តូក្យូត្រៀមប្រឈមនឹងព្យុះកំណាចប្រចាំទសវត្សរ៍
ចុះផ្សាយនៅថ្ងៃ៖
វីផា ព្យុះដ៏កំណាចបំផុត មានរាល់មួយទសវត្សរ៍កំពុងបក់សំដៅក្រុងតូក្យូ និងភាគខាងជើងប្រទេសជប៉ុន នៅព្រឹកថ្ងៃពុធនេះ។ ប្រឈមមុខនឹងកម្លាំងខ្យល់ព្យុះកំណាចពិសេសបែបនេះ ជើងហោះហើរជាច្រើនត្រូវលុបចោល តាំងពីថ្ងៃអង្គារមក។ ចរាចរណ៍ផ្លូវដែក និងផ្លូវទឹក ជួបការរអាក់រអួលយ៉ាងខ្លាំង។
ព្យុះវីផា នឹងមកដល់ក្រុងតូក្យូ នៅព្រឹកថ្ងៃពុធ ទន្ទឹមគ្នានឹងពេលដែលបណ្តាជនក្រុងតូក្យូប្រមាណ៣០លានចេញទៅធ្វើការ។ នៅវេលាម៉ោង៨ ម៉ោងសកល ថ្ងៃអង្គារម្សិលមិញ អ្នកឯកទេសបានឃើញវីផាកំពុងស្ថិតនៅចម្ងាយ៨៦០គ.ម. ពីទីក្រុងតូក្យូ និងកំពុងរំកិលក្នុងល្បឿន៣៥គ.ម.ក្នុងម៉ោង ប៉ុន្តែកម្លាំងខ្យល់បោកបក់វិលកួចមានល្បឿនជាង១៩៤គ.ម.ក្នុងមួយម៉ោង។
សម្រាប់អ្នកឧតុនិយម វីផា ជាព្យុះដ៏កំណាចបំផុត មួយទសវត្សរ៍ទើបជួបម្តង ! ព្យុះកំណាចដូចវីផា ដែលជប៉ុនជួបជាចុងក្រោយគេ គឺនៅឆ្នាំ២០០៤ ដែលកាលណោះជប៉ុនបានខាតបង់ប្រាក់ជាច្រើនពាន់លាន ប្រជាជនរាប់សិបពាន់នាក់ត្រូវជម្លៀស និងមានស្លាប់ជាងមួយរយនាក់ ព្រោះទឹកជំនន់និងការហូរបាក់ដី។
នៅលើកនេះក៏ទំនងជាមិនខុសពីព្យុះឆ្នាំ២០០៤ដែរ ព្រោះថាគ្រាន់តែចំហាយព្យុះសោះ ការហោះហើរក្នុងស្រុកជិតបួនរយជើង និងជើងហោះហើរអន្តជាតិជាច្រើន ចេញអាកាសយានដ្ឋានក្រុងតូក្យូ ត្រូវលុបចោល នៅថ្ងៃអង្គារនិងថ្ងៃពុធនេះ ជាហេតុធ្វើឱ្យអ្នកដំណើរជាង៦សែននាក់ជាប់កុន។ ខ្សែរថភ្លើងល្បឿនលឿន ពីតូក្យូទៅខេត្តក្រុងភាគខាងជើង ចំនួន៣១ខ្សែ ត្រូវលុបចោលដែរ។ ចំណែកមជ្ឈមណ្ឌលហ្វូគូស្ហ៊ីម៉ា ដែលមួយភាគធំត្រូវបំផ្លាញដោយគ្រោះរញ្ជួយដីនិងរលកស៊ូណាមី កាលពីឆ្នាំ២០១១ ត្រូវហិនហោចមួយជាន់ទៀតដោយវីផា។ ម្ខាស់ក្រុមហ៊ុនតិបកូបានប្រកាសផ្អាករាល់សកម្មភាពក្នុងសមុទ្ទ និងសម្រុកប៊ូបទឹកភ្លៀងដើម្បីកុំឱ្យហៀធ្លាក់ចូលក្នុងអាងស្តុកទឹកមានសារធាតុវិទ្យុសកម្មបាន។ ក្រុមហ៊ុនផលិតរថយន្តនីសាន់ បានគ្រោងផ្អាកសកម្មភាពការងារ ដល់រាល់បុគ្គលិកវេនព្រឹកថ្ងៃពុធ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ