រុស្ស៊ី-អាមេរិក

អនុប្រធានាធិបតី​ស.រ.អា.ផ្តើម​ទស្សនកិច្ច​រយៈពេល​៣ថ្ងៃ​នៅ​រុស្ស៊ី

លោក Joseph Biden អនុប្រធានាធិបតី​សហរដ្ឋ​អាមេរិក
លោក Joseph Biden អនុប្រធានាធិបតី​សហរដ្ឋ​អាមេរិក ©Reuters

ក្នុងក្របខ័ណ្ឌ​ទស្សនកិច្ច​នេះ លោក Joseph Biden នឹង​ធ្វើ​កិច្ចចរចា ជាមួយ លោក​ប្រធានាធិបតី​រុស្ស៊ី Medvedev លោក​នាយករដ្ឋមន្ត្រី Poutine ព្រមទាំង​ជួប​ជាមួយ​មជ្ឈដ្ឋាន​អ្នក​ជំនួញ មជ្ឈដ្ឋាន​និស្សិត​រុស្ស៊ី ក៏ដូចជា​ជួប​ជាមួយ​ពួក​អ្នក​តំណាង​នៃ​បក្សប្រឆាំង​រុស្ស៊ី ​និង​សង្គមស៊ីវិល​ជាដើម។

ផ្សាយពាណិជ្ជកម្ម

សេចក្តីរាយការណ៍​របស់ កែវ ឆាយា ពីម៉ូស្គូ

គឺ​ក្នុង​បរិបទ​នៃ​ការ​ធ្វើដំណើរ​តាម​ទ្វីប​អឺរ៉ុប ដែល​ល្ងាច​ថ្ងៃនេះ លោក​អនុប្រធានាធិបតី​អាមេរិកាំង Joseph Biden អញ្ជើញ​មកដល់​រដ្ឋធានី​រុស្ស៊ី ក្រោយពី​បញ្ចប់​ទស្សនកិច្ច​នៅ​ប្រទេស​ហ្វាំងឡង់។ លុះ​ថ្ងៃពុធ​ស្អែក ពេល​ព្រឹក លោក​នឹង​អញ្ជើញ​ទៅដាក់​កម្រងផ្កា​លើ “ផ្នូរ​ទាហាន​មិន​ស្គាល់​ឈ្មោះ” នៅជាប់​នឹង​កំពែង​វិមាន​ក្រេមឡាំង។ បន្ទាប់មក លោក​នឹង​ជួប​ជាមួយ​មជ្ឈដ្ឋាន​អ្នក​ជំនួញ​រុស្ស៊ី ក៏ដូចជា ជាមួយ​ពួក​សហគ្រិន​អាមេរិកាំង ដែល​ប្រកប​មុខជំនួញ នៅ​រុស្ស៊ី ហើយ​នឹង​ចូលរួម​ក្នុង​ពិធី​ចុះ​ហត្ថលេខា​លើ​កិច្ចព្រមព្រៀង​រវាង​ក្រុមហ៊ុន​អាមេរិកាំង ខាង​ផលិត​យន្តហោះ​ធុន Boeing និង​ក្រុមហ៊ុន​អាកាសចរណ៍​រុស្ស៊ី Aeroflot។

នៅពេលរសៀល លោក Biden នឹង​ត្រូវ​ទទួល​ជួប​ដោយ​លោក​ប្រធានាធិបតី​រុស្ស៊ី Medvedev។ សាច់រឿង​នៃ​ជំនួប​នេះ តាម​សំដី​អ្នក​នាំពាក្យ​វិមាន​ក្រេមឡាំង គឺ​សង្កត់ធ្ងន់​លើ​បញ្ហា​ទាក់ទង​នឹង​ការ​ទទួល​រុស្ស៊ី​ ឲ្យ​បាន​ចូល​ជា​សមាជិក នៃ​អង្គការ​ពាណិជ្ជកម្ម​ពិភពលោក (OMC) ក៏ដូចជា​​ទៅលើ​ស្ថានការណ៍​នៅ​ប្រទេសលីប៊ី​ដែរ។ ការនេះ ក៏​បញ្ជាក់​ដោយ​អ្នកនាំពាក្យ​របស់​សេតវិមាន​ក្រុង​វ៉ាស៊ីនតោន ​​ដែល​បន្ថែម​ថា នា​កិច្ចចរចា​នោះ ក៏​នឹង​មាន​លើក​យក​ទៅ​ពិភាក្សា អំពី​បំណង​ភាគី​អាមេរិក ចង់ចុះ​ជាមួយ​រុស្ស៊ី​ឲ្យបាន​ក្នុង​ឆ្នាំ២០១១​នេះ នូវ​កិច្ចព្រមព្រៀង​ ស្តីអំពី​ការបង្កើតឡើង​រួមគ្នា ជា “ប្រព័ន្ធ​ខែល​មីស្ស៊ីល​ប្រឆាំង​មីស្ស៊ីល”។

នៅថ្ងៃព្រហស្សតិ៍​១០មីនា ពេលព្រឹក លោក​អនុប្រធានាធិបតី​អាមេរិកាំង Biden នឹង​ជួប​ប្រស្រ័យ​ជាមួយ​លោក​នាយករដ្ឋមន្ត្រី​រុស្ស៊ី Poutine។ តាម​សំដី​អ្នកនាំពាក្យ​របស់​លោក Poutine ភាគី​រុស្ស៊ី​នឹង​ទាក់ទាញ​ស្មារតី​ភាគី​អាមេរិក ថា​គប្បី​បំផុសបំផុល​ឲ្យបាន​សកម្ម​ឡើង សហប្រតិបត្តិការ​នឹងគ្នា លើ​វិស័យ​ពាណិជ្ជកម្ម-សេដ្ឋកិច្ច​ ដែល​នៅ​បង្កប់​ទៅដោយ​សក្តានុពល​ធំធេង​​ មិនទាន់​ប្រើបាន​ទាំងស្រុង​នៅឡើយ។

បន្ទាប់មក លោក Biden នឹង​អញ្ជើញ​ទៅ​ថ្លែង​សុន្ទរកថា​ដ៏​ធំ នៅ​ពីមុខ​និស្សិត​សាកលវិទ្យាល័យ​ក្រុងម៉ូស្គូ ស្តីអំពី​ទំនាក់ទំនង​រុស្ស៊ី-អាមេរិកាំង។ លុះពេល​ល្ងាច លោក Biden នឹង​ទទួល​ជួប​ នៅ​ឯ​និវេសនដ្ឋាន​​របស់​ឯកអគ្គរដ្ឋទូត​អាមេរិកាំង ជាមួយ​ពួក​អ្នក​តំណាង​នៃ​បក្សប្រឆាំង​នៅ​រុស្ស៊ី និង​ពួក​អ្នកដឹកនាំ​​សង្គមស៊ីវិល​រុស្ស៊ី។

តបនឹង​ការចុះផ្សាយ​​នៃ​កាសែត​រុស្ស៊ី​ខ្លះ ដែល​ថា ​លោក Biden អញ្ជើញ​មក​ម៉ូស្គូ​លើកនេះ គឺ​ដើម្បី​គាំទ្រលោក Medvedev ដែល​គ្រោង​ឈរឈ្មោះ​​ជា​បេក្ខជន​ប្រធានាធិបតី​រុស្ស៊ី​សម្រាប់​អាណត្តិ​ទី២ និង​ដើម្បី​ពិភាក្សា​អំពី​បញ្ហា​ស្វែងរក “កន្លែង​ធ្វើការ​ថ្មី” សម្រាប់​លោក Poutine បែបយ៉ាង​ក្នុង​មុខតំណែង​ជា​ប្រធាន​នៃ “គណៈកម្មាធិការ​អូឡាំពិក​អន្តរជាតិ” ជាដើម អ្នកនាំពាក្យ​របស់​សេតវិមាន​ក្រុង​វ៉ាស៊ីនតោន លោក Michael McFaul បាន​ថ្លែងថា ស.រ.អា គ្មាន​បំណង​លូកដៃ​ចូលក្នុង​យុទ្ធនាការ​បោះឆ្នោត​ប្រធានាធិបតី​នៅ​រុស្ស៊ី ក្នុង​ឆ្នាំ២០១២​ឡើយ ហើយ​ក៏​មិន​ចាត់ទុក​ទស្សនកិច្ច​លោក​អនុប្រធានាធិបតី​អាមេរិកាំង នៅ​ម៉ូស្គូ ថា​ជា​ការ​គាំទ្រ​បេក្ខជន​រូបណា​ឡើយ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI