អានតួអត្ថបទ
ទស្សនៈព្រឹត្តិការណ៍ខ្មែរ

សុវត្ថិភាព​អ្នក​កាសែត​គួរ​ត្រូវ​បាន​ធានា!

សំឡេង ០៤:៥៦
អាជ្ញាធរ​បិទ​ផ្លូវ​ស្ពាន​នាគ​ដោយ​ដេញ​វាយ​អ្នក​កាសែត​ និង​ប្រជាពលរដ្ឋ​មិន​ឲ្យ​មាន​ការ​ជួប​ជុំ​គ្នា​​នា​ពេល​កន្លង​មក​។
អាជ្ញាធរ​បិទ​ផ្លូវ​ស្ពាន​នាគ​ដោយ​ដេញ​វាយ​អ្នក​កាសែត​ និង​ប្រជាពលរដ្ឋ​មិន​ឲ្យ​មាន​ការ​ជួប​ជុំ​គ្នា​​នា​ពេល​កន្លង​មក​។ RFI/ Siv Channa
ដោយ៖ ប៉ែន បូណា
២៧ នាទី

ថ្ងៃ​អាទិត្យ​ទី​២​វិច្ឆិកា​ចុង​សប្តាហ៍​នេះ​គឺ​ជា​ទិវា​អន្តរជាតិ​ប្រឆាំង​និទណ្ឌ​ភាព​ចំពោះ​បទល្មើស​ទៅ​លើ​អ្នក​កាសែត។​ ទិវា​នេះ​ក៏​ជា​ពេល​វេលា​ដែល​ត្រូវ​ពិនិត្យ​មើល​ឡើង​វិញ​អំពី​សេរីភាព​សារព័ត៌មាន​និង​លក្ខខណ្ឌ​ការងារ​របស់​អ្នក​កាសែត​នៅ​ក្នុង​ពិភព​លោក​ក៏​ដូច​ជា​នៅ​កម្ពុជា​ដែរ។​ ស្ថានភាព​នយោបាយ​តាន​តឹង​រយៈ​ពេល​កន្លង​ទៅ​នេះ​ក៏​ជា​ពេល​វេលា​ដ៏​លំបាក​សម្រាប់​អ្នក​កាសែត។​ ក្រៅ​ពី​នោះ ​អ្នក​កាសែត​ខ្មែរ​ក៏​បាន​រង​គ្រោះ​ជា​បន្ត​បន្ទាប់​ដោយ​សារ​«ជន​សង្គមង​ងឹត»​មួយ​ចំនួន​ក្នុង​បរិបទ​ដែល​វប្បធម៌​និទណ្ឌ​ភាព​នៅ​មាន​អត្ថិភាព​នៅ​ឡើយ។

ផ្សាយពាណិជ្ជកម្ម

អ្នក​កាសែត​ត្រូវ​បាន​គេ​បាញ់សម្លាប់​ក្នុងពេល​បំពេញ​ការងារ ​អ្នក​កាសែត​ទទួល​រង​ពាក្យ​បណ្តឹង​ អ្នក​កាសែត​រង​ការ​វាយ​ដំ ​ឬ​រង​ការ​ចាប់ខ្លួន... នៅតែ​ជា​បច្ចុប្បន្នភាព​ក្តៅ​គគុក​នៅ​ឡើយ​ទាំង​ក្នុង​បរិបទ​ពិភពលោក​ក៏ដូចជា​នៅ​កម្ពុជា​ដែរ។ ចុងក្រោយ​នេះ មាន​និន្នាការ​ថ្មី​ពីរ​ទៀត​បាន​លេច​ឡើង​គួរ​ឲ្យ​កត់​សម្គាល់៖​ ទី​១​ គឺ​អ្នក​កាសែត​រង​ការវាយដំ​មិន​រើសមុខ​ពី​សំណាក់​កង​សន្តិសុខ​បង្ក្រាប​បាតុកម្ម។ និង​ទី២ គឺ​ការរើសអើង​ទៅលើ​អ្នកកាសែត​ពី​ដោយ​សារ​តែ​និន្នាការ​នយោបាយ។ ​កាល​ពី​មុន​នេះ​ធ្លាប់​តែ​ អ្នក​កាសែត​ដែល​គាំទ្រ​បក្សប្រឆាំង​ទទួល​​ការរើសអើង​ពី​សំណាក់​អាជ្ញា​ធរមាន​សមត្ថកិច្ច​ឬ​ពី​សំណាក់​អ្នកមាន​សមានចិត្ត​ទៅលើ​គណបក្សកាន់អំណាច។ ប៉ុន្តែ ឥឡូវនេះ ក៏​លេចចេញ​និន្នាការ​ថ្មី​មួយទៀត​គឺ​អ្នកកាសែត​ដែល​មាន​និន្នាការ​លម្អៀង​ទៅ​រដ្ឋាភិបាល​ក៏​ទទួលរង​ការរើសអើង​ពី​សំណាក់​អ្នកគាំទ្រ​គណបក្សប្រឆាំង​ដែរ។

ជាការ​ពិតណាស់ នៅ​កម្ពុជា វិស័យ​សារព័ត៌មាន​កំពុង​រីក​ដុះដាល​យ៉ាងខ្លាំង​រយៈពេល​ចុង​ក្រោយ​នេះ​ទាំង​បរិមាណ​និង​គុណភាព​បើទោះបីជា​បញ្ហា​ឯករាជ្យភាព និង​វិជ្ជាជីវៈ​នៅតែ​ជា​ចំណោទ​ដ៏​ធំ​មួយ​ក៏ដោយ។ ក្រៅពី​សារព័ត៌មាន​ប្រពៃណី​ដូចជា​កាសែត វិទ្យុ និង​ទូរទស្សន៍​នោះ សារព័ត៌មាន​បែប​ថ្មី ( គេហទំព័រ និង​បណ្តាញ​សង្គម​នានា)ក៏​កំពុង​រីកដុះដាល​ណាស់​ដែរ។ នេះ​ជា​ផ្លែផ្កា​នៃ​លទ្ធិប្រជាធិបតេយ្យ​រយៈពេល​ជាង​ពីរ​ទសវត្សរ៍​កន្លងទៅ​នេះ។

នៅក្នុង​សង្គម​ប្រជាធិបតេយ្យ សារព័ត៌មាន​ត្រូវបាន​គេ​ចាត់ទុកថា​ជា​មូលដ្ឋានគ្រឹះ​មិនអាច​ខ្វះ​បាន​ក្នុង​ការជំរុញ​យន្តការ​ប្រជាធិបតេយ្យ​ឲ្យ​ដើរទៅ​មុខ។ ប៉ុន្តែ ដើម្បី​ឲ្យ​សារព័ត៌មាន​អាច​បំពេញ​តួនាទី​ដ៏​សំខាន់​នេះ​បាន​ទាល់តែ​អ្នកកាសែត​អាចបំពេញ​មុខនាទី​រប​ស់​ខ្លួន​ដោយ​ពេញ​លេញ​និង​ចៀស​ផុតពី​ការ​ព្យាបាទ​គ្រប់​រូបភាព។
 
មាន​មូលហេតុ​សំខាន់​មួយចំនួន​ដែល​ធ្វើ​ឲ្យ​អ្នកកាសែត​ទទួលរង​គ្រោះ​ក្នុង​អាជីព​របស់ខ្លួន៖

មូលហេតុ​ទី១ គឺ​ដោយសារតែ​ស្ថានការណ៍​នយោបាយ​ប្រែប្រួល។ ជាទូទៅ នៅពេល​ដែល​មាន​វិបត្តិ​នយោបាយ​តានតឹង ស្ថានការណ៍​ប្រទេសជាតិ​តែងតែ​ចុះ​ដុនដាប​ទាំង​សេដ្ឋកិច្ច ទាំង​​ការគោរព​សិទ្ធិមនុស្ស និង​សេរីភាព​សារព័ត៌មាន។ ស្ថានភាព​នេះហើយ​ដែល​ធ្វើ​ឲ្យ​ការងារ​អ្នកកាសែត​ជួប​ឧបសគ្គ។
 
មូលហេតុ​ទី២ គឺ​ដោយសារតែ​ទម្លាប់​ចាត់ទុក​អ្នកកាសែត​ថា​ជា​បន្លាក្នុងកែវភ្នែក​ដែល​ត្រូវតែ​កម្ចាត់​ទោះជា​ដោយ​រូបភាព​ណាក៏ដោយ។ អ្នក​ដែល​មិន​ចូលចិត្ត​អ្នកកាសែត​មានដូចជា​ជន​ពុករលួយ ឈ្មួញ​រកស៊ី​ខុសច្បាប់​ឬ​អ្នកប្រព្រឹត្ត​មិនល្អផ្សេងៗទៀត។ និយាយ​ជារួម​គឺ​ជន​សង្គម​ងងឹត​ដែល​ស្អប់​ទី​ភ្លឺ។

មូលហេតុ​ទី៣ ទម្លាប់​របស់​អ្នកនយោបាយ​ដែល​តែង​យក​សារព័ត៌មាន​ធ្វើជា​ឧបករណ៍​បម្រើ​នយោបាយ​របស់ខ្លួន​ក៏​ជា​បញ្ហា​មួយ​ដែរ។ បញ្ហា​នៅត្រង់ថា នៅពេលដែល​ឆាកនយោបាយ​ពោរពេញ​ដោយ​គំនុំសងសឹក​យ៉ាងខ្លាំង​នៅឡើយ​នោះ អ្នកកាសែត​ដែល​ធ្វើការ​ឲ្យ​ស្ថាប័ន​ដែលមាន​និន្នាការ​នយោបាយ ក៏​អាច​ទទួលរង​គ្រោះ​ជំនួស​អ្នកនយោបាយ​ដែរ។

មូលហេតុ​ទី៤ បញ្ហា​វិជ្ជាជីវៈ​ក៏​មិនអាច​មើលរំលង​បានដែរ។ មាន​អ្នកខ្លះ​ពាក់​ស្លាក​អ្នកកាសែត​តែ​បែរជា​ប្រព្រឹត្ត​ខុសពី​ក្រមសីលធម៌​វិជ្ជាជីវៈ​ដោយ​យក​អាជីព​របស់ខ្លួន​ទៅ​ស្វែងរក​ប្រយោជន៍​​ផ្ទាល់ខ្លួន​ទៅវិញ។ បញ្ហា​នេះ​ក៏មាន​ចំណែក​ជះឥទ្ធិពល​មិនល្អ​ដល់​ការងារ​របស់​អ្នកកាសែត​ដែរ។

ដូច្នេះ ដើម្បី​ឲ្យ​អ្នកកាសែត​អាចបំពេញ​ការងារ​រប​ស់​ខ្លួន​បាន​ពេញលេញ ទាល់តែ​មូលហេតុ​ទាំងនេះ​ត្រូវបាន​ដោះស្រាយ។ ជាបឋម អាជ្ញាធរ​រដ្ឋាភិបាល​ត្រូវតែ​ធានា​សុវត្ថិភាព​របស់​អ្នក​កាសែត​ឲ្យ​បាន។ ការធានា​អាចធ្វើ​ឡើង​តាមរយៈ​ការចេញ​បទបញ្ជា​តឹងរ៉ឹង​ដល់​សមត្ថកិច្ច​គ្រប់​ប្រភេទ​កុំ​ឲ្យ​ប៉ះពាល់​ដល់​អ្នកកាសែត។ បើ​មានការ​បំពាន​កើតឡើង ការស៊ើបអង្កេត​និង​ឈានទៅ​ផ្តន្ទាទោស​ត្រូវតែមាន​ជាដាច់ខាត​ដើម្បី​កុំ​ឲ្យ​មាន​វប្បធម៌​និ​ទណ្ឌ​ភាព។ ចំណែក​អ្នក​ប្រកប​អាជីព​សារព័ត៌មាន​ក៏ត្រូវ​ពង្រឹង​ក្រមសីលធម៌​វិជ្ជាជីវៈ​របស់ខ្លួន​ផងដែរ។ សារព័ត៌មាន​ដែល​គេ​ចាត់ទុកជា«អំណាច​ទី៤»គួរ​ត្រូវបាន​ប្រើប្រាស់​ដើម្បី​ប្រយោជន៍​សង្គម​ឲ្យ​សម​នឹង​កេរ្តិ៍ឈ្មោះ​របស់​វា។

ក្នុងសង្គម​ប្រជាធិបតេយ្យ មនុស្ស​មិនអាច​រស់នៅ​ដោយ​ខ្វះ​ព័ត៌មាន​បានទេ។ ដូច្នេះ មានតែ​អ្នកកាសែត​នេះហើយ​ដែល​ដើរតួ​សំខាន់​ក្នុងការ​ចែកចាយ​ព័ត៌មាន​ដល់​សាធារណជន។ ប៉ុន្តែ ដើម្បី​ឲ្យ​អ្នកកាសែត​អាចបំពេញ​តួនាទី​របស់ខ្លួន​បាន​ពេញលេញ​ទាល់តែ​ពួកគេ​ចៀស​ផុតពី​ការ​ធ្វើទុក្ខបុកម្នេញ​គ្រប់​រូបភាព និង​ទាល់តែ​វប្បធម៌​និ​ទណ្ឌ​ភាព​ត្រូវ​បានគាស់​រំលើង៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ