កម្ពុជា

លោក កឹម សុខា​៖​ ឆ្នាំ​​ថ្មី​ ​សង្គ្រោះ​​ជាតិ​​មាន​​យុទ្ធសាស្ត្រ​​ថ្មី​​តែ​​គោលដៅ​​ចាស់​​

លោក​កឹម សុខា អនុប្រធានគណបក្ស​សង្គ្រោះជាតិ ក្នុងវេទិកានៅខេត្ត​ព្រៃវែង។
លោក​កឹម សុខា អនុប្រធានគណបក្ស​សង្គ្រោះជាតិ ក្នុងវេទិកានៅខេត្ត​ព្រៃវែង។ @Facebook Kem Sokha

ក្រោយ​ពី​បាន​ផ្អាក​សកម្មភាព​ជួប​សំណេះ​សំណាល​ជាមួយ​សកម្មជន​មួយ​រយៈ ​បន្ទាប់​ពី​មាន​រឿង​រ៉ាវ​មិន​សមប្រកប ​កើត​ឡើង​ចំពោះ​បក្ស​ប្រឆាំង​ជា​បន្ត​បន្ទាប់​ លោកកឹម សុខា ​ប្រធាន​ស្តីទី​គណបក្ស​សង្គ្រោះជា​តិ ​បាន​ត្រលប់​មក​ចូលរួម​ក្នុង​វេទិកា​សកម្មជន​មូលដ្ឋាន​ ជា​លើក​ដំបូង​ក្នុង​ឆ្នាំ​ថ្មី​ ២០១៦​នេះ ​កាល​ពី​ថ្ងៃ​អាទិត្យ​ម្សិលមិញ ​នៅ​ខេត្ត​ព្រៃវែង។ ក្នុង​សកម្មភាព​ពង្រឹង​បក្សតាម​មូលដ្ឋាន​នោះ ​លោកកឹម សុខា បាន​ប្រា​ប់អ្នក​គាំទ្រ​ខ្លួនថា​ ឆ្នាំថ្មី ​គណបក្ស​សង្គ្រោះ​ជាតិ ​បាន​ត្រៀម​យុទ្ធសាស្ត្រ​ថ្មី​ចំនួន​​៧ចំ​នុច​ តែ​រក្សា​គោលដៅ​ចាស់​ នៅ​ដដែល។

ផ្សាយពាណិជ្ជកម្ម

​​ថ្លែង​ក្នុង​វេទិកា​សកម្មជន​មូលដ្ឋាន​ ដើម្បី​ជួប​ថ្នាក់​ដឹកនាំ​មូលដ្ឋាន​ សកម្មជន​ និង​ចលនា​យុវជន​គណបក្ស​សង្គ្រោះជាតិ​ខេ​ត្ត​ព្រៃវែង​ ប្រមាណ​៥ពាន់នាក់ នៅ​ថ្ងៃ​ទី ​១០​មករា ​លោក​កឹម សុខា ​ប្រធាន​ស្តីទី​គណបក្ស​សង្គ្រោះ​ជាតិ​ បាន​រៀបរាប់​ពី​យុទ្ធសាស្ត្រ​វិមជ្ឈការ​៧​ចំនុច ​សម្រាប់​ឆ្នាំ​ថ្មី ​ក៏​ដូចជា​សម្រាប់​ការ​បោះឆ្នោត​ក្រុម​ប្រឹក្សា​ ឃុំ សង្កាត់ ​ឆ្នាំ ​២០១៧ ​និង​ការ​បោះឆ្នោត​សភា ​នៅ​ឆ្នាំ​ ២០១៨។ ​៧​ចំនុច​នោះ ​រួមមាន ​ការ​រៀប​ចំ​គោល​នយោបាយ ​ពង្រឹង​រចនា​សម្ព័ន្ធ​តាំង​ពី​ថ្នា​ក់ក្រោម​ទៅ។ ពង្រឹង​ធនធាន​មនុស្ស​សម្រាប់​ការ​ឈរ​ឈ្មោះ ​និង​សង្កេត​ការណ៍។ ​ពង្រឹង​ទំនាក់​ទំនង​ជា​ប្រចាំ​ តាំង​ពី​ថ្នាក់​មូលដ្ឋាន​ឡើង​ទៅ។ ពង្រឹង​ការ​ផ្សព្វផ្សាយ​គ្រប់​បណ្តាញ​ឲ្យ​បាន​កាន់​តែ​ទូលំទូលាយ ​និង​ពង្រឹង​ការ​ប្រជុំ​វាយ​តម្លៃ​សកម្មភាព​ជា​ទៀង​ទាត់។

លោក​កឹម សុខា បាន​បន្ត​ថា ​ទោះបី​ជា​មាន​យុទ្ធសាស្ត្រ​ថ្មី​ ប៉ុន្តែ​គោល​ដៅ​ចាស់ ​គឺ​ការ​ផ្លាស់​ប្តូរ​រដ្ឋាភិបាល ​គឺ​នៅ​ដដែល។ លើស​ពី​នេះ ​លោកកឹម សុខា ក៏​បាន​បញ្ជាក់​ថា​ ឆ្នាំ​ថ្មី​នេះ ​លោក​ខ្លួន​ផ្ទាល់​ នឹង​មិន​ឈ្លោះ​ មិន​ឆ្លង​ឆ្លើយ ​ជាមួយ​នរណា​ម្នា​ក់នោះ​ទេ។ ហើយ​លោក​ ក៏​សំណូម​ពរ​​ឲ្យ​សកម្មជន​ថ្នាក់​ដឹកនាំ​មូលដ្ឋាន ​ផ្តោត​លើ​ផែនការ​សកម្មភាព​ និង​ត្រូវ​ចៀស​វាង​ការ​ឈ្លោះ​គ្នា​ ជាមួយ​បក្ស​ផ្សេង​ផង​ដែរ។

​គួរ​ជម្រាប​ជូន​ថា ​ការ​ចេញ​មុខ​ជួប​សំណេះ​សំណាល​ជាមួយ​សកម្មជន​របស់​ខ្លួន​នេះ ​អាច​ចាត់​ទុក​ថា​ ជា​សកម្មភាពលើក​ដំបូង​ក្នុង​ឆ្នាំ​ ២០១៦​នេះ ​បន្ទាប់​ពី​គណបក្ស​សង្គ្រោះ​ជាតិ​ បាន​ជួប​ភាព​ចម្រូង​ចម្រាស​មួយ​ចំនួន​ កាល​ពី​ឆ្នាំ ​២០១៥ ​រួម​មាន​ ការ​វាយ​ដំ​ បង្ក​របួស​ស្នាម​ លើ​អ្នក​តំណាង​រាស្ត្រ ​២​រូប​ របស់​បក្ស​ គឺ​លោក​ញ៉យ ចំរើន និង​លោក​គង់ សភា។ ការ​ដក​តំណែង​លោក​កឹ​ម សុខា ចេញ​ពី​អនុប្រធាន​ទី​១​ រដ្ឋសភា ​ហើយ​លោក សម រង្ស៊ី ប្រធាន​គណបក្ស ​ក៏​ត្រូវ​បាន​ដក​អភ័យ​ឯកសិទ្ធិ​ពីរ​ដ្ឋសភា ​និង​កំពុង​ប្រឈម​មុខ​ នឹង​ដីកា​តុលាការ​ ជុំវិញ​រឿង​បរិហា​កេរ្តិ៍ ​បទ​ចោទ​ឃុបឃិត​ក្លែង​ឯកសារ ​និង​រឿង​រ៉ាវ​ទាក់​ទង​នឹង​ព្រំដែន។

ការ​ចេញ​មុខ​របស់​លោក​កឹម សុខា ពេល​នេះ ​ក៏​ស្រប​ពេល​ដែល​គណបក្ស​ប្រជាជន​កម្ពុជា​  បាន​បើក​ធ្វើ​សន្និបាត​ពង្រឹង​បក្ស​រយៈ​ពេល​ ​២​ថ្ងៃ​ នៅ​ទីក្រុង​ភ្នំពេញ។ ​តាម​សេចក្តី​ប្រកាស​ព័ត៌មាន ​បន្ទាប់​ពី​វេទិកា ​នៅ​ក្រុង​ព្រៃវែង​ ខេត្ត​ព្រៃវែង​នេះ ​លោកកឹម សុខា ក៏​នឹង​បន្ត​ទៅ​ខេត្ត​កំពង់​ចាម​ នៅ​ថ្ងៃ​ទី​ ១៧​មករា ​រួច​ទៅ​ខេត្ត​ត្បូង​ឃ្មុំ ​នៅ​ថ្ងៃ​ទី​២៣​ មករា និង​នៅ​ខេត្ត​សៀមរាប ​នា​ថ្ងៃ​ទី​៣០ មករា៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI