អានតួអត្ថបទ
កម្ពុជា

មេធាវី​ការពារ​ ខៀវ សំផន វាយ​ប្រហារ​ខ្លាំងៗ​ទៅ​លើ​សហ​ព្រះរាជ​អាជ្ញា

លោក ខៀវ សំផន
លោក ខៀវ សំផន @ECCC
ដោយ៖ ប៉ែន បូណា
១៧ នាទី

នៅ​ក្នុង​សវនាការ​បិទ​បញ្ចប់​ការ​ដេញដោល​សំណុំរឿង ០០២​វគ្គ​ទី​១ នា​ថ្ងៃ​សុក្រ​នេះ ក្រុម​មេធាវី​ការពារ​ឲ្យ​ជន​ជាប់​ចោទ ខៀវ សំផន បាន​បើក​ការ​វាយ​ប្រហារ​ដោយ​ពាក្យ​សម្តី​ធ្ងន់ៗ​ទៅ​លើ​សហ​ព្រះរាជអាជ្ញា ដែល​បាន​សុំ​ឲ្យ​តុលាការ​កាត់​ទោស​កូន​ក្តី​របស់​ខ្លួន ដាក់ពន្ធនាគារ​មួយ​ជីវិត។ ពួកគេ​បាន​ចោទ​សហ​ព្រះរាជអាជ្ញា​ថា បាន​ប្រថុយ​ប្រថាន​ធ្វើ​យ៉ាងណា​ឲ្យ​តែ​ជន​ជាប់ចោទ​ជាប់​ពន្ធនាគារ​ដោយ​មិន​គោរព​វិធាន​ជា​មូលដ្ឋាន​នៃ​យុត្តិធម៌។

ផ្សាយពាណិជ្ជកម្ម

សវនាការ​សាលាក្តី​ខ្មែរក្រហម​ថ្ងៃនេះ​បានក្លាយ​ជាទី​លាន​នៃ​សង្គ្រាមពាក្យសម្តី​ដ៏​ក្តៅគគុក​មួយ​នៅពេលដែល​មេធាវី​ការពារ​ក្តី​ឲ្យ​លោក​ខៀវ សំផន បើក​ការវាយប្រហារ​យ៉ាងធ្ងន់ធ្ង​រ​ទៅលើ​សហ​ព្រះរាជអាជ្ញា។

 

សហ​មេធាវី​អន្តរជាតិ​ជនជាតិ​បារាំង លោក អា​ថឺ វែរ​កិន ( Athur Vecken) បាន​ចំណាយពេល​យ៉ាងច្រើន​ដើម្បី​វាយប្រហារធ្ងន់ៗទៅលើ​សហ​ព្រះរាជអាជ្ញា​ដែល​បាន​សុំ​ឲ្យ​តុលាការ​ដាក់ទោស​កូនក្តី​របស់ខ្លួន​អស់​មួយជីវិត។ មេធាវី​បរទេស​រូបនេះ​ចំអក​ឲ្យ​សហ​ព្រះរាជអាជ្ញា​ថា មិនមែនជា​អ្នក​អាជីព តែ​ជា​អ្នកទេសចរ​ច្រើនជាង។

បើតាម​មេធាវី​ជនជាតិ​បារាំង​រូបនេះ សហ​ព្រះរាជអាជ្ញា​កំពុង​ប្រថុយប្រថាន​និង​ប្រើ​យុទ្ធសាស្ត្រ កូម៉ង់ដូ ធ្វើយ៉ាងណា​ឲ្យ​តែ​បាន​ដាក់ទោស​ទៅលើ​លោក ខៀវ សំផន ដោយ​ពួកគេ​ចាត់ទុកថា ជនជាប់ចោទ​មានទោស​រួចទៅហើយ។ ផ្ទុយទៅវិញ លោក​បាន​រិះគន់​សហ​ព្រះរាជអាជ្ញា​ថា មិនបាន​ផ្អែកលើ​វិជ្ជាជីវៈ អង្គហេតុ និង​អង្គច្បាប់​ត្រឹមត្រូវ​ទេ។

មេធាវី​រូបនេះ​បាន​ចោទ​សហ​ព្រះរាជអាជ្ញា​ថា​បាន​ព្យាយាម​សុំ​ឲ្យ​ចៅក្រម​ធ្វើ​រដ្ឋប្រហារ​វិធាន​យុត្តិធម៌​របស់​តុលាការ។ ការវាយប្រហារ​ដោយ​ពាក្យសម្តីធ្ងន់ៗរបស់​សហ​មេធាវី​អន្តរជាតិ​ការពារ​ក្តី​ឲ្យ​លោក ខៀវ សំផន បាន​បង្ខំ​ឲ្យ​លោក​ចៅក្រម និល ណុន ប្រធាន​អង្គជំនុំជម្រះ​សាលាដំបូង​នៃ​សាលាក្តី​ខ្មែរក្រហម​អន្តរាគមន៍​ជាច្រើនលើក​ដោយ​ព្រមាន​មេធាវី​រូបនេះ​ឲ្យ​គោរព​ក្រមសីលធម៌ និង​ចៀសវាង​ការវាយប្រហារ​ទៅលើ​អ្នកដទៃ។

យ៉ាងណាក៏ដោយ លោក​មេធាវី អា​ថឺ វែ​រ​កិន នៅតែ​បន្ត​ការវាយប្រហារ​និង​រិះគន់​ចៅក្រម​តុលាការ​វិញ​ថា បាន​បិទ​សិទ្ធិ​អ្នកការពារ​ក្តី​ឲ្យ​ជនជាប់ចោទ។ លោក​បានបញ្ជាក់​ជា​ចុងក្រោយ​ថា តុលាការ​មិនមែន​ដើម្បី​ផ្សះផ្សារ​ជាតិ​ទេ តែ​ដើម្បី​ផ្តល់​យុត្តិធម៌​ប្រកបដោយ​ភស្តុតាង​រឹងមាំ។ មេធាវី​ការពារ​ក្តី​ឲ្យ​ខៀវ សំផន មួយរូប​ទៀត​គឺ​លោកស្រី អង់​តា ហ្គី​ស្សេ ( Anta Guissé) ក៏បាន​ស្នើសុំ​ឲ្យ​តុលាការ​បំបាត់ចោល​គំនិត​បូ​រេ​វិនិច្ឆ័យ​ដើម្បី​ស្វែងរក​យុត្តិធម៌​ពិតប្រាកដ។

មេធាវី​ជនជាតិខ្មែរ លោក គង់ សំអុន ក៏​មិន​នៅ​ស្ងៀម​ដែរ។ លោក​បាន​ងើបឡើង​ហើយ​អះអាងថា វត្តមាន​របស់លោក​ក្នុង​អង្គ​សវនាការ​ពេលនេះ​គឺ​ដើម្បី​ការពារ​សុភាពបុរស​ម្នាក់​ដែល​ត្រូវគេ​លាប​ពណ៌​ជា​បិសាច។ លោក គង់ សំអុន បាន​ពិពណ៌នា​លោក ខៀវ សំផន ប្រមុខរដ្ឋ​នៃ​របប​ខ្មែរក្រហម​ថា​ជា​មនុស្ស​សុភាពរាបសារ ស្អាតស្អំ និង​មាន​ទឹកចិត្ត​មនុស្សធម៌​ថែមទៀត។
 

សូមបញ្ជាក់ថា ក្រុម​មេធាវី​ការពារ​ក្តី​ឲ្យ​លោក ខៀវ សំផន មាន​រយៈពេល​ពីរ​ថ្ងៃ​ដើម្បី​ធ្វើ​សេចក្តីសន្និដ្ឋាន​បិទ​បញ្ចប់​សំណុំរឿង ០០២ វគ្គ​ទី១ នេះ​ដោយ​លើក​ភស្តុតាង​នានា​មក​បញ្ជាក់​ដើម្បី​ធ្វើយ៉ាងណា​ឲ្យ​កូនក្តី​របស់ខ្លួន​រួចផុត​ពី​ការចោទប្រកាន់៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ