អានតួអត្ថបទ
កម្ពជា

គណៈប្រតិភូ​ខ្មែរ​ត្រឡប់​មក​ពី​កិច្ចប្រជុំ​ស្តី​ពី​ការ​គ្រប់គ្រង​ប្រាសាទ​ព្រះវិហារ​នៅ​ក្នុង​ប្រទេស​ប្រេស៊ីល​វិញ​ហើយ

​ខ្មែរអបអរ​ថ្ងៃ​បុណ្យ​ខួប​ពីរ​ឆ្នាំ ប្រាសាទ​ព្រះ​វិហារ​ក្លាយ​ជា​បេតិកភណ្ឌពិភពលោក
​ខ្មែរអបអរ​ថ្ងៃ​បុណ្យ​ខួប​ពីរ​ឆ្នាំ ប្រាសាទ​ព្រះ​វិហារ​ក្លាយ​ជា​បេតិកភណ្ឌពិភពលោក © Reuters
ដោយ៖ គី សុខលីម
២១ នាទី

គណៈប្រតិភូ​ខ្មែរ​ត្រឡប់​មក​ពី​កិច្ច​ប្រជុំ​ស្ដីពី​ការ​គ្រប់គ្រង​ ប្រាសាទ​ព្រះវិហារ​នៅក្នុង​ប្រទេស​ប្រេស៊ីល​វិញ​ហើយ​នៅ​ថ្ងៃ​សៅរ៍​នេះ។ បន្ទាប់​ពី​មក​ដល់​ភ្លាម លោក សុខ អាន ប្រធាន​គណៈ​ប្រតិភូ​ខ្មែរ​និង​ជា​រដ្ឋមន្ត្រី​ទីស្ដីការ​គណៈ​រដ្ឋ​មន្ត្រី​ បាន​ប្រកាស​ថា ប្រទេស​កម្ពុជា​ទទួល​បាន​ជ័យជំនះ​នៅក្នុង​បេសកកម្ម​ផែនការ​គ្រប់គ្រង​ អភិវឌ្ឍ​និង​និង​អភិរក្ស​តំបន់​ប្រាសាទ​ព្រះវិហារ។

ផ្សាយពាណិជ្ជកម្ម

បទអន្តរាគមន៍​របស់ គី សុខលីម

គណៈប្រតិភូ​ខ្មែរ​ដែល​ទៅ​ចូលរួម​កិច្ចប្រជុំ​លើក​ទី​៣៤​នៃ​គណៈកម្មាធិការ​បេតិកភណ្ឌ​ពិភពលោក​ក្នុង​ប្រទេស​ប្រេស៊ីល​ស្ដីពី​ការ​គ្រប់គ្រង​ប្រាសាទ​ព្រះវិហារ បាន​ត្រលប់​មកដល់​ទីក្រុង​ភ្នំពេញ​វិញ​ហើយ​នៅ​ព្រឹក​ថ្ងៃ​សៅរ៍​នេះ។ លោក សុខ អាន ប្រធាន​គណៈ​ប្រតិភូ​ខ្មែរ​និង​ជា​រដ្ឋ​មន្ត្រី​ទីស្ដីការ​គណៈ​រដ្ឋ​មន្ត្រី​បាន​ថ្លែង​ទៅកាន់​ក្រុម​អ្នក​កាសែត​ថា ប្រទេស​កម្ពុជា​ទទួល​បាន​ជ័យជំនះ​នៅក្នុង​បេសកកម្ម​ផែនការ​គ្រប់គ្រង​អភិវឌ្ឍន៍​និង​អភិរក្ស​តំបន់​ប្រាសាទ​ព្រះវិហារ។

ពាក្យ​ជ័យជំនះ​ដែល​លោក សុខ អាន ប្រកាស​ជាថ្មី​ម្តង​ទៀត​នេះ​គឺ​ដោយសារ ផែនការ​គ្រប់គ្រង អភិវឌ្ឍន៍​និង​អភិរក្ស​តំបន់​ប្រាសាទ​ព្រះវិហារ​របស់​កម្ពុជា​ត្រូវ​បាន​ទទួល​យក​ដោយ​គណៈកម្មាធិការ​បេតិកភណ្ឌ​ពិភពលោក យូណេស្កូ ក្នុង​កិច្ចប្រជុំ​ក្នុង​ប្រទេស​ប្រេស៊ីល​កាល​ពី​ពេល​កន្លងមក​នេះ។ លោក សុខ អាន បាន​បន្ត​ទៀត​ថា អ្នក​ច្បាប់​ម្នាក់​បាន​ប្រាប់​រូប​លោក​ថា កម្ពុជា​មិនមែន​គ្រាន់តែ​ទទួល​ជោគជ័យ​ប៉ុណ្ណោះ​ទេ​ ប៉ុន្តែ​នេះ​វា​ជា​មហា​ជោគជ័យ។ លោក សុខ អាន បាន​និយាយ​ចំអក​ថា ភាគី​ថៃ​ទទួល​បរាជ័យ​ហើយ​ថៃ​កំពុង​តែ​កុហក​ខ្លួន​ឯង។

លោក សុខ អាន រដ្ឋមន្ត្រី​នៃ​ទីស្ដីការ​គណៈរដ្ឋមន្ត្រី​បាន​លម្អិត​បញ្ជាក់​ថា ផែនការ​សំខាន់ៗ​ក្នុង​ការ​គ្រប់គ្រង​ប្រាសាទ​ព្រះវិហារ​ជា​រួមមាន ៖​ទី១​ ការ​ការពារ​និង​វាយ​តម្លៃ​អំពី​ប្រាសាទ។ ទី២ ៖ ការ​ធ្វើអោយ​ប្រាសាទ​ចេញ​ពី​ភាព​ឯកោ​និង​ដាច់ស្រយាល​តាមរយៈ​ការ​រៀបចំ​តភ្ជាប់​បណ្ដាញ​ផ្លូវថ្នល់។ ទី៣ ៖ ការ​រៀបចំ​មណ្ឌល​បដិសណ្ឋារកិច្ច​ និង​ការ​កសាង​ជណ្ដើរ​អំពី​ឈើ​ដែល​ស្ថិត​នៅ​ទិស​ខាងកើត​ប្រាសាទ។ ទី៤ ​ការ​រក​ឃើញ​បារាយណ៍​ចំនួន​បី​ដែល​ជា​អាង​ស្តុក​ទឹក​ដ៏​ធំ​កសាង​ក្នុង​សម័យ​បុរាណ។ ទី៥៖ ការ​បង្កើត​លំនៅឋាន​ថ្មី​ដែល​មាន​ទស្សនទាន​បរិស្ថាន​និង​ឆ្លើយតប​ទៅ​នឹង​តម្រូវការ​សង្គម​​ដូចជា​ការ​បង្កើត​ភូមិ​ធម្មជាតិ​សម្ដេច​តេជោ ហ៊ុន សែន ស្ថិត​នៅ​ចំងាយ​ប្រមាណ​ជា​២០​គ.ម.​ភាគ​ខាង​ត្បូង​នៃ​ប្រាសាទ។ ទី៦ ៖ ការ​កសាង​សារមន្ទីរ​សំយោគ​ដែល​ស្ថិតនៅ​មិន​ឆ្ងាយ​ប៉ុន្មាន​ពី​ភូមិ​ធម្មជាតិ​នេះ។ សារមន្ទីរ​នេះ​មាន​ឈ្មោះ​ថា​សារ​មន្ទីរ​ធម្មជាតិ​សាកល។

ទាក់ទង​ទៅ​នឹង​ស្ថានភាព​នៅ​តាម​ព្រំដែន​នៅ​ថ្ងៃ​នេះ លោក ទិត្យ សុធា អ្នក​នាំពាក្យ​អង្គភាព​ប្រតិកម្ម​រហ័ស​របស់​ទីស្ដីការ​គណៈរដ្ឋមន្ត្រី​បាន​បញ្ជាក់​ប្រាប់​នៅ​រសៀល​ថ្ងៃ​នេះ​ថា ស្ថានភាព​នៅ​តាម​ព្រំដែន​គឺ​មាន​សភាព​ធម្មតា​មិន​មាន​អ្វី​កើតឡើង​ទេ។ ប៉ុន្តែ​កងទ័ព​របស់​កម្ពុជា​ស្ថិតនៅ​ក្នុង​ស្ថានភាព​ប្រុង​ជើង​ការ​ជា​រៀង​រហូត។

ចំពោះ​ក្រុម​អាវ​លឿង​ដែល​មាន​បំណង​ចង់​មក​តវ៉ា​ក្នុង​ខេត្ត​ស៊ីសាកេត​ក្បែរ​ប្រាសាទ​ព្រះវិហារ​នោះ លោក ទិត្យ សុធា បាន​បញ្ជាក់​ថា ពួក​នេះ​បាន​សម្រេច​ចិត្ត​ប្ដូរ​ទិសដៅ​ក្នុង​ការ​ដង្ហែ​ក្បួន​របស់​ពួកគេ​វិញ​ហើយ ​ពីព្រោះ​អាជ្ញាធរ​របស់​ថៃ​ខ្លួនឯង​បាន​ទប់ស្កាត់​សកម្មភាព​ក្រុម​ជ្រុល​និយម​មួយ​នេះ៕ 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ