កម្ពុជា

តំណាង​ដើម​បណ្តឹង​រដ្ឋប្បវេណី​ដាក់​សំណើ​បន្ទាន់​សុំ​សិទ្ធិ​ថ្លែង​បើក​សវនាការ

ទិដ្ឋភាពសវនាការ​សំណុំរឿង​០០២ ​កាល​ពី​ពេល​កន្ល​ងមក​។
ទិដ្ឋភាពសវនាការ​សំណុំរឿង​០០២ ​កាល​ពី​ពេល​កន្ល​ងមក​។ REUTERS/Nhet Sokheng

សហ​មេធាវី​នាំ​មុខ​ដែល​ជា​តំណាង​ដើម​បណ្តឹង​រដ្ឋប្បវេណី​នៅ​សាលាក្តី​ខ្មែរក្រហម​បាន​ដាក់​សំណើ​បន្ទាន់​មួយ​កាល​ពី​ល្ងាច​ថ្ងៃ​ពុធ​ទី​០៨​តុលា​ទៅ​កាន់​អង្គ​ជំនុំ​ជម្រះ​សាលា​ដំបូង​ដើម្បី​ទាមទារ​សិទ្ធិ​ថ្លែង​ដោយ​សង្ខេប​នៅ​ពេល​បើក​សវនាការ។ ​សំណើ​នេះ​បាន​ធ្វើ​ឡើង​ខណៈ​ដែល​សាលាក្តី​គ្រោង​បើក​សវនាការ​លើ​អង្គ​សេចក្តី​សំណុំ​រឿង​ ០០២ ​ វគ្គ​ទី​២​ ដែល​គ្រោង​បើក​ធ្វើ​នៅ​ថ្ងៃ​ទី​ ១៧​ តុលា​នេះ។

ផ្សាយពាណិជ្ជកម្ម

សហ​មេធាវី​នាំមុខ​ដែល​តំណាង​ដោយ​លោក​មេធាវី ពេជ្រ អង្គ និង​លោកស្រី  Marie GUIRAUD បានដាក់​សំណើ​បន្ទាន់​នេះ​ទៅកាន់​អង្គ​ជំ​នុះ​ជម្រះ​សាលាដំបូង​ដោយ​ពួកគេ​យល់​ថា តំណាង​ដើម​បណ្តឹងរដ្ឋប្បវេណី​គួរតែមាន​សិទ្ធិ​ថ្លែង​ក្នុងពេល​បើកសវនាការ​ដូច​សហ​ព្រះរាជអាជ្ញា​ដែរ។

លោក​មេធាវី ពេជ្រ អង្គ បាន​ប្រាប់​វិទ្យុ​បារាំង​អន្តរជាតិ​ថា ការបិទ​សិទ្ធិ​ដើមបណ្តឹង​រដ្ឋប្បវេណី​មិន​ឲ្យ​ថ្លែងការណ៍​នៅពេល​បើកសវនាការ​មានន័យថា​ដើមបណ្តឹង​រដ្ឋប្បវេណី​គ្មាន​សិទ្ធិ​ពេញ​លេញ​ក្នុង​សវនាការ​នេះ​ទេ។ នេះ​មិនមែនជា​លើកដំបូង​ទេ​ដែល​តំណាង​ដើម​បណ្តឹង​រដ្ឋ​ប្ប​វេណី​ទាមទារ​សិទ្ធិ​ថ្លែង​ដោយ​សង្ខេប​ក្នុងពេល​បើកសវនាការ ប៉ុន្តែ រាល់​លើក សំណើ​របស់​ពួកគេ​ត្រូវបាន​បដិសេធ។

លោក នេត្រ ភក្ត្រា អ្នកនាំពាក្យ​សាលាក្តី​ខ្មែរក្រហម​បាន​ពន្យល់ថា វិធាន​ផ្ទៃក្នុង​របស់​សាលា​ក្តី​នេះ​បាន​តម្រូវ​ឲ្យ​ភាគី​សហ​ព្រះរាជអាជ្ញា​ជា​អ្នកធ្វើ​សេចក្តីសន្និដ្ឋាន​ពីបទ​ចោទប្រកាន់​នៅ​ពេល​​បើកសវនាការ។ យ៉ាងណាក៏ដោយ លោក​អះអាងថា ភាគីនីមួយៗមាន​ពេលវេលា​ស្មើ​គ្នា​ក្នុងការ​ជជែក​ដេញដោល​ក្នុងអំឡុងពេល​នៃ​សវនាការ។

នៅ​មិនទាន់មាន​សេចក្តីសម្រេច​យ៉ាងណា​អំពី​សំណើ​របស់​ក្រុម​តំណាង​ដើ​ម្ប​បណ្តឹង​រដ្ឋប្ប​វេណី​នេះ​នៅឡើយ​ទេ។ លោក ពេជ្រ អង្គ អះអាងថា លោក​មិនសូវមាន​សុ​ទិ​ដ្ឋ​និយម​ទេ​ថា​នឹងមាន​ចម្លើយ​ជា​វិជ្ជមាន​ចំពោះ​សំណើ​នេះ។ យ៉ាងណាក៏ដោយ លោក​បញ្ជាក់ថា ភាគី​ដើម​បណ្តឹងរដ្ឋប្បវេណី​នឹង​នៅតែ​ចូលរួម​ក្នុង​ដំណើរការ​សវនាការ​នេះ។

សវនាការ​សំណុំរឿង ០០២ វគ្គ​ទី២ គ្រោង​បើក​ធ្វើ​នៅ​ថ្ងៃទី១៧តុលា​នេះ​ដោយមាន​ជនជាប់​ចោទ​ពីររូប​គឺ​អតីត​បងធំ​ទី២ នួន ជា និង អតីត​ប្រមុខរដ្ឋ ខៀវ សំផន។ ជនជាប់ចោទ​ទាំងពីរ​ត្រូវបាន​សាលាក្តី​ផ្តន្ទាទោស​ឲ្យ​ជាប់ពន្ធនាគារ​អស់​មួយជីវិត​ម្តង​ហើយ​ក្នុង​សំណុំរឿង ០០២ វគ្គ​ទី១ ពាក់ព័ន្ធ​នឹង​បទឧក្រិដ្ឋ​កម្ម​ប្រឆាំង​មនុស្សជាតិ​ក្នុងការ​ជម្លៀស​ប្រជាជន​ដោយ​បង្ខំ​ចេញ​ពី​ភ្នំពេញ​និង​ទីប្រជុំជន និង​ការសម្លាប់​អតីត​ទា​ហាម លន់ នល់ នៅ​ទួល​ពោធិ៍​ជ្រៃ ខេត្ត​ពោធិ៍​សាត់។

សវនាការ​សំណុំរឿង ០០២ វគ្គ​ទី២ នឹង​ផ្តោតលើ​បទឧក្រិដ្ឋ​កម្ម​ប្រល័យ​ពី​ជ​សាសន៍​ទៅលើ​ជនជាតិ​ចាម និង​ជនជាតិ​វៀតណាម ព្រមទាំង​ការងារ​ដោយ​បង្ខំ​ក្នុង​សហករណ៍​នៃ​របប​ខ្មែរ​ក្រហម៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI