កម្ពុជា

អង្គការ​សមាគម​ខ្មែរ​កម្ពុជា​ក្រោម​ ជួប​ជុំ​រម្លឹក​ទិវា​តស៊ូ​ទាមទារ​សិទ្ធិ​សេរីភាព​​ពី​វៀតណាម

ចំណែក​ពណ៌​បៃតង គឺ​ជា​ដី​កម្ពុជាក្រោម​ដែល​បារាំង​កាត់​ទៅ​ឲ្យ​វៀតណាម
ចំណែក​ពណ៌​បៃតង គឺ​ជា​ដី​កម្ពុជាក្រោម​ដែល​បារាំង​កាត់​ទៅ​ឲ្យ​វៀតណាម
ដោយ៖ លី ម៉េងហួរ
១៤ នាទី

ក្រុម​អង្គការ​សមាគម​ខ្មែរ​កម្ពុជា​ក្រោម នឹង​ជួប​ជុំ​រម្លឹក​ខួប​ទី ៣៧​ឆ្នាំ ថ្ងៃ​១៦​វិច្ឆិកា ឆ្នាំ​១៩៧៦ ដែល​ជា​ថ្ងៃ​តស៊ូ​​ទាមទារ​សិទ្ធិ​សេរីភាព​ពី​វៀតណាម ដើម្បី​សម្រេច​វាសនា​ខ្លួន​ឯង លើ​ទឹកដី​កម្ពុជា​ក្រោម។ ពិធី​ជួប​ជុំ​នោះ នឹង​ធ្វើ​ឡើង​នៅ​ថ្ងៃ​សៅរ៍ ទី​១៦​វិច្ឆិកា នៅ​វត្ត​សាមគ្គី​រង្សី ក្នុង​សង្កាត់​ស្ទឹងមានជ័យ រាជធានី​ភ្នំពេញ។

ផ្សាយពាណិជ្ជកម្ម

ព្រះ​សង្ឃ​និង​ពលរដ្ឋ​ខ្មែរ​កម្ពុជា ក្នុង​នាម​ជា​អង្គការ​សមាគម​ចំនួន ១២ នឹង​ជួប​ជុំ​ប្រារព្ធ​ពិធី​រំឭក​ខួប​ទី​៣៧​ឆ្នាំ ទិវា​តស៊ូ​របស់​ខ្មែរ​កម្ពុជា​ក្រោម ក្នុង​ការ​ទាម​ទារ​សិទ្ធិ​សេរីភាព​ពី​រដ្ឋ​អំណាច​វៀតណាម ដើម្បី​សម្រេច​វាសនា​ខ្លួន​ដោយ​ខ្លួន​ឯង នៅ​លើ​ទឹក​ដី​កម្ពុជា​ក្រោម ថ្ងៃ​ទី​១៦​វិច្ឆិកា ឆ្នាំ១៩៧៦​-​ថ្ងៃ​ទី​១៦​វិច្ឆិកា ឆ្នាំ​២០១៣។ 

ពិធី​ជួប​ជុំ​នេះ​នឹង​ធ្វើ​ឡើង នៅ​ព្រឹក​ថ្ងៃ​សៅរ៍ ទី​១៦​វិច្ឆិកា នៅ​វត្ត​សាមគ្គី​រង្សី ក្នុង​សង្កាត់​ស្ទឹងមានជ័យ​ ខណ្ឌមានជ័យ រាជធានី​ភ្នំពេញ។

តាម​សេចក្តី​ប្រកាស ក្នុង​ពិធី​ជួប​ជុំ​នោះ ជន​រង​គ្រោះ​នឹង​រៀប​រាប់​រម្លឹក​ពី​ព្រឹត្តិការណ៍​ប៉ះ​ទង្គិច រវាង​ក្រុម​អ្នក​តស៊ូ​ខ្មែរ​ក្រោម និង​កង​កម្លាំង​នៃ​រដ្ឋ​អំណាច​វៀតណាម នៅ​ឆ្នាំ​១៩៧៦ ដែល​នាំ​ឲ្យ​មាន​ការ​ចាប់​ខ្លួន និង​សម្លាប់​ពលរដ្ឋ​ខ្មែរក្រោម​ជា​ច្រើន រួម​ទាំង​អាចារ្យ ហែម ជៀវ ជា​ដើម។
ព្រះតេជគុណ សៀង សុវណ្ណារ៉ា ព្រះ​ចៅ​អធិការ​វត្ត​សាមគ្គី​រង្សី និង​ជា​ប្រធាន​ស្តីទី​សមាគម​ព្រះសង្ឃ​ខ្មែរ​កម្ពុជា​ក្រោម បាន​ឲ្យ​ដឹង​ថា ពិធី​រម្លឹក​ដល់​ថ្ងៃ​តស៊ូ​របស់​ខ្មែរ​កម្ពុជា​ក្រោម ក្នុង​ការ​ទាម​ទារ​សិទ្ធិ​សេរីភាព​ពី​រដ្ឋអំណាច​វៀតណាម នៅ​ថ្ងៃ​១៦​វិច្ឆិកា នៅ​ឆ្នាំ​នេះ ប្រារព្ធ​ឡើង​ធំ​ជាង​ឆ្នាំ​មុន។ គោល​បំណង ដើម្បី​រម្លឹក​ពី​គុណូបក្ការៈ​របស់​បុព្វបុរស​ខ្មែរ ដែល​បាន​ពលី​ជីវិត ក្នុង​បុព្វហេតុ​ជាតិ សាសនា និង​មាតុភូមិ​កម្ពុជា​ក្រោម។

រហូត​ដល់​សព្វថ្ងៃ​នេះ ព្រះតេជគុណ សៀង សុវណ្ណារ៉ា បាន​លើក​ឡើង​ថា ស្ថានភាព​ពលរដ្ឋ​ខ្មែរ រស់​លើ​ទឹកដី​កម្ពុជា​ក្រោម មិន​មាន​សិទ្ធិ​ពេញ​លេញ​ទេ ដូច​ជា ការ​សិក្សា​អក្សរសាស្ត្រ​ខ្មែរ ត្រូវ​បាន​លុប​បំបាត់ ការ​​គោរព​ជំនឿ​សាសនា វប្បធម៌ ប្រពៃណី ក៏​ត្រូវ​រឹត​ត្បិត។ ថ្មីៗនេះ ព្រះសង្ឃ និង​ពលរដ្ឋ​ខ្មែរក្រោម​មួយ​ចំនួន ក៏​ត្រូវ​បាន​អាជ្ញាធរ​វៀតណាម​ចាប់​ផ្សឹក និង​កាត់ទោស​ដាក់​ពន្ធនាគារ​ថែម​ទៀត។

ទឹក​ដី​កម្ពុជា​ក្រោម ត្រូវ​បាន​អាណានិគម​បារាំង កាត់​ឲ្យ​វៀតណាម នៅ​ថ្ងៃ​ទី​៤​មិថុនា ឆ្នាំ១៩៤៩ ដែល​ឥឡូវ​នេះ ជា​ទឹក​ដី​ភាគ​ខាង​ត្បូង​របស់​ប្រទេស​វៀតណាម។ វៀតណាម បាន​ចាត់​ទុក​ពលរដ្ឋ​ខ្មែរ​កម្ពុជា​ក្រោម ជា​ជនជាតិ​ភាគតិច ដែល​រស់​នៅ​លើ​ទឹកដី​វៀតណាម៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI