កូរ៉េខាងជើង

លោកគីម ជុងអ៊ុន​បាន​រៀបចំ​ពិធី​ជប់លៀង​ឲ្យ​ក្រុម​កីឡាករ កីឡាការនី​ដែល​ទទួល​បាន​មេដាយមាស

លោកគីម ជុងអ៊ុន​បាន​រៀបចំ​ពិធី​ជប់លៀង​ឲ្យ​ក្រុម​កីឡាករ កីឡាការនី​ដែល​ទទួល​បាន​មេដាយមាស
លោកគីម ជុងអ៊ុន​បាន​រៀបចំ​ពិធី​ជប់លៀង​ឲ្យ​ក្រុម​កីឡាករ កីឡាការនី​ដែល​ទទួល​បាន​មេដាយមាស REUTERS/KCNA

គឺ​ជា​ទម្លាប់​មួយ​ដែល​គេ​កម្រ​ឃើញ​មាន​នៅ​កូរ៉េខាងជើង។ លោក​ប្រមុខដឹកនំា​គីម ជុនអ៊ុន និង​ភរិយា​បាន​រៀបចំ​ពិធី​ជប់លៀង​យ៉ាង​អធិកអធម​មួយ​ជូន​ក្រុមកីឡាករ កីឡាការនី​ដែល​ទទួល​បាន​មេដាយមាស​នា​ឱកាស​ការ​ប្រកួតកីឡាអាស៊ី​ថ្មីៗ​នេះ​នៅ​ក្នុង​ទីក្រុង​អ៊ីនឈុន ប្រទេស​កូរ៉េខាងត្បូង។ វត្តមាន​លោក​គីម ជុនអ៊ុន​នៅ​ក្នុង​ពិធី​ជប់លៀង​នៅ​ថ្ងៃ​សៅរ៍ ទី១៨ តុលា​ម្សិលមិញ គឺ​ជា​ការ​បង្ហាញ​ខ្លួន​លើក​ទី៣ ក្នុង​រយៈពេល ១សប្តាហ៍ បន្ទាប់​ពី​លោក​បាន​បាត់​មុខ​ជា​សាធារណៈ​អស់​រយៈពេល​ជាង ៤០ថ្ងៃ។

ផ្សាយពាណិជ្ជកម្ម

សម្រាប់​លោក​គីម ជុនអ៊ុន​ដែល​គេ​ស្គាល់​ថា ជា​អ្នក​ស្នេហា និង​ចូលចិត្ត​កីឡា ការ​ចូលរួម​លើកទឹកចិត្ត​ក្រុមកីឡាករ កីឡាការនី​ដែល​ទទួល​បាន​មេដាយមាស គឺ​ជា​រឿង​មិន​អាច​ខ្វះ​បាន​ទេ ព្រោះ​គឺ​ពួក​នេះ​ហើយ​ដែល​បាន​ធ្វើ​ឲ្យ​ល្បីល្បាញ​កាន់​តែ​ខ្លំាង​នូវ​សុពលភាព និង​កម្លំាងក្លៀវក្លា​ដល់​គម្រោង​របស់​គណបក្ស​កុម្មុយនិស្ត​ក្នុង​ការ​ស្ថាបនា​ម៉ាស៊ីនកីឡា​មួយ​នៅ​កូរ៉េខាងជើង។ គួរ​ជម្រាប​ជូន​ថា ថ្វី​ដ្បិត​តែ​ជា​ប្រទេស​ឯកោ​នៅ​លើ​លោក​មែន តែ​កូរ៉េខាងជើង​ទទួល​បាន​មេដាយ​គួរ​ឲ្យ​កត់សម្គាល់​នៅ​ក្នុង​ការ​ប្រកួតកីឡាអាស៊ី​រៀបចំ​នៅ​ក្នុង​ទីក្រុង​អ៊ីនឈុន កូរ៉េខាងត្បូង​ពី​ថ្ងៃទី១៩ កញ្ញា​ដល់​ថ្ងៃទី៤ តុលា​កន្លង​ទៅ​ថ្មីៗ​នេះ ដោយ​ទទួល​បាន​មេដាយ​សរុប​ចំនួន ៣៦ ក្នុង​នោះ មាន​មាស​ចំនួន ១១ ប្រាក់​ចំនួន ១១ និង​មេដាយសំរិទ្ធិ​ចំនួន ១៤។ គឺ​ជា​លទ្ធផល​ដ៏​ប្រសើរ​មួយ​ដែល​កូរ៉េខាងជើង​មិន​ធ្លាប់​ទទួល​បាន​ទេ​គិត​តំាង​ពី​ឆ្នំា ១៩៩០ មក។

អ៊ីចឹង​ហើយ​បាន​ជា​នៅ​ក្នុង​ពិធី​ជប់លៀង​ដែល​ចូលរួម​ដោយ​ភរិយា​របស់​លោក​គីម ជុនអ៊ុន សមាជិក​រដ្ឋាភិបាល ថ្នាក់ដឹកនំាជើងចាស់​របស់​គណបក្ស​កុម្មុយនិស្ត និង​មន្រ្តីជាន់ខ្ពស់​កងទ័ព លោក​គីម ជុនអ៊ុន​មិន​ញញើត​នឹង​ផ្តល់​រង្វាន់​ជា​ឡាន​ទំនើបៗ ឬ​មួយ​ក៏​ផ្ទះសម្បែង​ឲ្យ​កីឡាករ កីឡាការនី​ជើងឯក​របស់​ខ្លួន​ទេ។ ដោយឡែក កូរ៉េខាងត្បូង​បាន​ប្រាប់​ឲ្យ​ដឹង​ថា ក្នុង​ទឹកប្រាក់​ចំណាយ​សរុប​ជាង ៥០ម៉ឺនអឺរ៉ូ​សម្រាប់​ការ​ចូលរួម​របស់​ក្រុមកីឡាករ កីឡាការនី​កូរ៉េខាងជើង​នោះ រដ្ឋាភិបាល​ទីក្រុង​សេអ៊ូល​បាន​ជួយ​ចេញ​ជាង ៧០%។ គួរ​បញ្ជាក់​ថា​តាម​ទម្លាប់​មក​ដល់​ពេល​នេះ កូរ៉េខាង​ត្បូង​បាន​ធានា​ចេញ ១០០% ចំពោះ​ការ​ស្នាក់នៅ ហូបចុក​របស់​ក្រុម​កីឡាករ កីឡាការនី​កូរ៉េខាងជើង​ក្នុង​ទឹកដី​របស់​ខ្លួន។

មិន​ខុស​ពី​ការ​បង្ហាញ​មុខ​ជា​ថ្មី​ចំនួន ២ដង​បន្តបន្ទាប់​គ្នា​កន្លង​មក​ទេ វត្តមាន​លោក​គីម ជុនអ៊ុន​នៅ​លើកទី៣ នេះ​ក៏​មាន​នំា​មក​ជាមួយ​នូវ​ឈើច្រត់​ដែរ។ តែ​អ្វី​ដែល​សំខាន់ និង​ដែល​របប​ក្រុង​ព្យុងយ៉ាង​ចង់​បង្ហាញ​ប្រាប់​មជ្ឈដ្ឋានជាតិ និង​អន្តរជាតិ​នោះ​គឺ​ថា មនុស្សខ្លំាង​កូរ៉េខាងជើង​រូប​នេះ​កំពុង​ស្ថិត​ក្នុង​ប្រទេស និង​ក៏​កំពុង​ដឹក​នំា​ប្រទេស​ដែរ ពោល​គឺ​មិន​ដូច​ពាក្យ​ចចាមអារ៉ាម​កន្លង​មក​ដែល​ថា ប្រហែល​ជា​លោក​ត្រូវ​បាន​គេ​ធ្វើ​រដ្ឋប្រហារ​ទម្លាក់​បាត់​ទៅ​ហើយ ឬ​មួយ​ក៏​កំពុង​ឈឺ​ធ្ងន់​ងើប​ពី​គ្រែ​មិនរួច​នោះ​ទេ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI