អានតួអត្ថបទ
កម្ពុជា

រដ្ឋាភិបាល​កម្ពុជា​នឹង​រៀប​ចំ​ព្រះរាជ​ពិធី​បុណ្យ​ឡើង​គ្រង​រាជ​សម្បត្តិ​ព្រះ​មហាក្សត្រ​ដ៍​ធំ​ ក្នុង​រយៈពេល១០​ឆ្នាំ

ព្រះមហាក្សត្រ ព្រះបាទសម្តេចព្រះ បរមនាថ នរោត្តម សីហមុនី។
ព្រះមហាក្សត្រ ព្រះបាទសម្តេចព្រះ បរមនាថ នរោត្តម សីហមុនី។ RFI/ Siv Channa
ដោយ៖ វ៉ា សំណព្វ
១៥ នាទី

រាជ​រដ្ឋាភិបាល​កម្ពុជា​នឹង​រៀប​ចំ​ព្រះរាជ​ពិធី​បុណ្យ​ដ៍​គគ្រឹក​កគ្រែង​មួយ​ នៅ​ថ្ងៃ​ទី​២៩​ខែ​តុលា​ខាង​មុខ​នេះ ​ដើម្បី​អបអរ​សាទរ​ខួប​១០​ឆ្នាំ​ នៃ​ការ​ឡើង​គ្រង​រាជ​សម្បត្តិ​របស់​ព្រះ​មហាក្សត្រ ​ព្រះ​បាទ​សម្តេច​ព្រះ ​បរមនាថ ​នរោត្តម​ សីហមុនី។​ នេះ​គឺ​ជា​ពិធី​បុណ្យ​ដ៍​ធំ​មួយ ​ក្នុង​រយៈ​ពេល​១០​ឆ្នាំ​មក​នេះ​។

ផ្សាយពាណិជ្ជកម្ម

បើតាម​គម្រោង នៅ​ថ្ងៃទី២៨ តុលា ដែលជា​ថ្ងៃទី១នៃ​ព្រះរាជ​ពិធីបុណ្យ ពេលព្រឹក ព្រះរាជ​ពិធីបុណ្យ​នឹងធ្វើ​ឡើង​នៅក្នុង​ព្រះបរមរាជវាំង ដោយមាន​កិច្ច​ពិធី​តាម​គន្លង​ព្រះពុទ្ធសាសនា ដោយមាន​ឥស្សរជន​ជាន់ខ្ពស់​ចូលរួម​ផងដែរ។ ហើយ​នៅពេល​រសៀល មន្ត្រី​អង្គទូត​នានា​ប្រមាណ​ជា ៤០ និង​ចូល​ថ្វាយព្រះពរ​ជ័យ​បវរ​ថ្វាយ​ព្រះមហា​ក​ក្សត្រ។ បន្ទាប់មក គឺ​ឥស្សរជន​ថ្នាក់ដឹកនាំ​តាម​ស្ថាប​ន័​រដ្ឋ ក្រសួង​មន្ទីរ ដែល​ដឹកនាំ​ដោយ​ក្រសួង និង​ប្រធាន​ស្ថាប័ននីមួយៗ ក្នុង​ឯកសណ្ឋាន​ជា​ផ្លូវរដ្ឋ សញ្ញា​សក្តិ និង​មាន​ពាក់​រឿង​ឥស្ស​សិរិ​យ​យស​ចូល​ក្រាបបង្គំ​គាល់។ បន្ទាប់មក​គឺ​ថ្នាក់ដឹកនាំ រាជធានី ខេត្ត​ទាំង ២៥ ដែលមាន​គណៈ​អភិបាល និង ប្រធាន​ក្រុមប្រឹក្សា រាជធានី​ខេត្ត​ផងដែរ។

ចំណែក​នៅ​ព្រឹក​ថ្ងៃទី២៩តុលា ដែលជា​ថ្ងៃទី​ពីរ​នៃ​ព្រះរាជ​ពិធីបុណ្យ ត្រូវ​នឹង​ថ្ងៃ​ពុធ ៧កើត ខែកត្តិក នឹងមាន​រៀបចំ​មិ​ទ្ទិញ​មហាជន​ដ៍​ធំ​មួយ នៅខាងមុខ​ព្រះបរមរាជវាំង។ មិ​ទ្ទិញ​មហាជន​នេះ នឹងមាន​អ្នកចូលរួម​ប្រមាណ​ជាង២ម៉ឺន​នាក់ ជារួម មាន​មហាជន​ពី​គ្រប់​ខណ្ឌ, កងកម្លាំងប្រដាប់អាវុធ​ទាំង៣, កង​នគរបាល, កងរាជអាវុធហត្ថ, យុវជន​កាកបាទក្រហម, កាយ​រិ​ទ្ធ និង ឥស្សរជន​ថ្នាក់ដឹកនាំ​រដ្ឋ ក្រសួង ស្ថាប័ន មន្ទីរ អង្គភាព និង​តំណាង​រាជធានី ខេត្ត​ទាំង ២៥ចូលរួម។

ក្នុង​រយៈពេល​ពីរ​ថ្ងៃ​នៃ​ព្រះ​រាជពិធី​បុណ្យខួប​គម្រប់១០ឆ្នាំ នៃ​ការឡើង​គ្រង​រាជសម្បត្តិ របស់​ព្រះករុណា ព្រះបាទ សម្តេចព្រះ​បរមនាថ នរោត្តម សីហមុនី ព្រះមហាក្សត្រ​នៃ​ព្រះរាជាណាចក្រ​កម្ពុជា ( ២៩តុលា២០០៤-២៩តុលា២០១៤)នេះ រាជរដ្ឋាភិបាល​កម្ពុជា​ហាក់​បាន​ត្រៀម​រៀបចំ​អធិក អធម ជាង​បណ្តាឆ្នាំមុនៗ ពិសេស​ក្នុង​រយៈពេល៣ឆ្នាំ​ចុង​ក្រោយនេះ ដែល​ប្រទេស​កម្ពុជា​បាន​ជួប​រឿង​ដ៍​សោកសៅផ្ទួនៗគ្នា នោះ​គឺ​ការយាង​សោយ​ទីវ​ង្គ​ត់របស់​សម្តេច​ឳ​នរោត្តម សីហនុ និង​គ្រោះទឹកជំនន់ ដែល​សូម្បីតែ​ព្រះរាជ​ពិធីបុណ្យ​អុំទូក​ក៍​ត្រូវបាន​លុបចោល​ផងដែរ។ 

លោក កឹម គុណ​វ​ឌ្ឍ អគ្គនាយក​ទូរទស្សន៍​ជាតិ​កម្ពុជា បាន​សរសេរ​នៅលើ​ទំព័រ Facebookរបស់លោក​នៅ​ថ្ងៃទី១៩តុលា​នេះ​ថា ទូរទស្សន៍​ជាតិ​កម្ពុ​ជាក៍​នឹងធ្វើ​ការផ្សាយ​ផ្ទាល់​នូវ​អង្គ​មិ​ទ្ទិញ​មហាជន ដែល​ប្រារព្ធ​ធ្វើឡើង​នៅខាងមុខ​ព្រះបរមរាជវាំង​នា​ថ្ងៃទី២៩តុលា​នោះ។
សូមបញ្ជាក់ថា ការ​ប្រារព្ធ​ព្រះ​រាជពិធី​បុណ្យខួប១០ឆ្នាំ នៃ​ការឡើង​គ្រង​រាជសម្បត្តិ​របស់​ព្រះករុណា ព្រះបាទ​សម្តេចព្រះ បរមនាថ នរោត្តម សីហមុនី ក៍​នឹង​រៀបចំ​ធ្វើឡើង នៅតាម​ខេត្ត​ក្រុង​នានា​នៅ​ទូទាំងប្រទេស​ផងដែរ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ