អានតួអត្ថបទ
កម្ពុជា

លោក​គង់ គាំ ត្រូវបាន​អង្គសមាជ​ជ្រើសតាំង​ជា​ប្រធាន​គណបក្ស​សមរង្ស៊ី

លោក​គង់ គាំ (កណ្តាល) នៅ​ក្នុង​អង្គសមាជវិសាមញ្ញ​គណបក្ស​សមរង្ស៊ី ថ្ងៃទី២ វិច្ឆិកា ២០១២
លោក​គង់ គាំ (កណ្តាល) នៅ​ក្នុង​អង្គសមាជវិសាមញ្ញ​គណបក្ស​សមរង្ស៊ី ថ្ងៃទី២ វិច្ឆិកា ២០១២ RFI/Channa Siv
១៧ នាទី

នៅ​ថ្ងៃ​នេះ​ គណបក្ស​​សមរង្ស៊ី ដែល​ជា​បក្ស​ប្រ​ឆាំង​ដំបូង​គេ​នៅ​ក្នុង​ប្រទេស​កម្ពុជា បង្កើតឡើង​​អស់​រយៈ​ពេល​១៧ឆ្នាំ មកហើយ​នោះ​​ បាន​ធ្វើ​សមាជ​វិសាមញ្ញ​របស់​ខ្លួន​ ដើម្បី​ជ្រើសរើស​ប្រធាន និង​អនុ​ប្រធាន​គណបក្ស​ថ្មី បន្ទាប់​ពី​លោក សម រង្ស៊ី បាន​លាលែង​ពី​តំណែង​​ ទៅ​ធ្វើ​​ជា​ប្រ​ធាន​​គណបក្ស​សង្គ្រោះ​ជាតិ ដែល​ជា​គណបក្ស​បង្រួបបង្រួម​គ្នា ​រវាង​គណបក្ស សម រង្ស៊ី និង​គណបក្ស​សិទ្ធិ​មនុស្ស​។ នៅ​ក្នុងសាមាជ​នោះ​ លោក គង់ គាំ ត្រូវបាន​អង្គសមាជ​ជ្រើស​តាំង​ជា​ប្រធានគណបក្ស​ជំនួស​លោក សម រង្ស៊ី​។

ផ្សាយពាណិជ្ជកម្ម

សមាជ​វិសាមញ្ញ​របស់​គណបក្សសម រង្ស៊ី នៅ​ព្រឹក​ថ្ងៃទី​២ ខែវិច្ឆិកា ឆ្នាំ​២០១២ នៅ​អតីត​ទីស្នាក់ការ​កណ្តាល ​បាន​អនុម័ត​​ជ្រើសតាំងលោក គង់ គាំ ​ជា​ប្រធានគណបក្ស​ជំនួស​លោក សម រង្ស៊ី​ តែ​មិន​អនុញ្ញាត​​ឲ្យ​មាន​ការប្តូ​រ​ឈ្មោះ និង​​ស្លាក​សញ្ញាភ្លើងទៀន របស់​គណបក្សឡើយ។

នៅ​ក្នុងអង្គ​​សមាជវិសាមញ្ញ​​នេះ​ ​មាន​អ្នក​​​ចូល​រួម ​ប្រ​មាណ​ជា​២០០០នាក់ ​ក្នុង​នោះ​ ក៏​មាន​តំណាង​អង្គ​ទូត​​​ប្រ​ទេស​មហា​អំណាច អង្គការ​ក្រៅ​រដ្ឋា​ភិបាល ថ្នាក់​ដឹកនាំ​គណបក្ស​សិទ្ធិមនុស្ស ដែល​ជា​សម្ព័ន្ធភាព​របស់​គណបក្ស សម រង្ស៊ី​​​ផងដែរ។​ ចំណែក​លោកសម រង្ស៊ី បាន​ចូលរួម​ ​​តាម​វីដេអូ ខន​ហ្វឺ​រេ​ន​។

លោក​យឹម​ សុវណ្ណ​ អ្នកនាំ​ពាក្យ​គណបក្ស​សម រង្ស៊ី​បាន​ថ្លែង​ឲ្យ​ដឹង​ថា ក្រៅពី​ការ​ជ្រើសរើស​លោក​គង់ គាំ ​ជា​ប្រធាន អង្គសមាជ​បាន​ជ្រើសតាំង​លោក​ស្រី ជូ​ឡុង ស៊ូ​មូរ៉ា ភរិយា​របស់​លោក សម រង្ស៊ី ឲ្យ​ធ្វើ​​ជា​អនុប្រធាន​គណបក្សសម រង្ស៊ី ជំនួស​លោក គង់ គាំ។ រីឯលោក សម រង្ស៊ី ត្រូវបាន​គេ​ជ្រើសតាំង​ជា​ទី​ប្រឹក្សា​​ជាន់ខ្ពស់​របស់​គណបក្ស សម រង្ស៊ី​។ លោក​ថា ​អង្គសមាជ​​បាន​បើកផ្លូវ​ឲ្យ​លោក សម រង្ស៊ី អាច​វិល​ត្រឡប់មក​ដឹកនាំ​គណបក្សប្រឆាំងសម រង្ស៊ី នៅពេល​ណា​ក៏​បាន។ អង្គសមាជ​ក៏​បាន​កំណត់​ផងដែរ នូវ​​ផែនការនិង​យុទ្ធសាស្ត្រ​នយោ​បាយ​​ថ្មី សម្រាប់​ចូល​រួម​ជា​មួយ​គណ​បក្ស​សង្គ្រោះ​ជាតិ​ក្នុង​កា​រ​បោះ​ឆ្នោត​ឆ្នាំ​២០១៣​ខាង​មុខ​​។​

គណបក្សសមរង្ស៊ី​នៅ​មិន​ទាន់​ប្រាកដ​ទេ​ថា​នឹង​ចុះ​ឈ្មោះ​បោះ​ឆ្នោត ​ប្រកួត​ប្រជែង​នៅ​អាណត្តិ​បោះ​ឆ្នោត​​ឆ្នាំ​ ២០១៣ខាងនោះ​ ​ដោយសារ​នៅ​​រង​ចាំ​មើល​ការ​រៀប​ចំរបស់​គណៈកម្មាធិការ​ជាតិ​រៀបចំការ​បោះ​ឆ្នោត ​និង​ការ​វិល​ត្រឡប់​មកប្រ​ទេស​​វិញ​របស់​លោក​សម​ រង្ស៊ី​។ ការផ្លាស់ប្តូរ​ប្រធាន​គណបក្សប្រឆាំង សម រង្ស៊ីនេះ ដោយសារ​នៅ​ក្នុង​ខែ​កញ្ញា ឆ្នាំ​២០១២ លោក​សម រង្ស៊ី​បាន​លាលែងតំណែង​ប្រ​ធាន​បក្ស​ប្រ​ឆាំង​មួយ​នេះ ​ទៅ​កាន់​តំណែង​ជា​ប្រធាន​ជា​គណបក្ស​សង្គ្រោះ​ជាតិ ដែល​ជា​ការរួបរួមរ​វាង​គណបក្ស សម រង្ស៊ី និង​គណ​បក្ស​​សិទ្ធិមនុស្ស​។

​គណបក្សសម រង្ស៊ី គឺ​ជា​គណបក្ស​ប្រឆាំង​ដំបូង​គេបង្អស់​​ដែល​បាន​បង្កើត​នៅ​ក្នុងឆ្នាំ​១៩៩៥​ ដោយ​មាន​​ឈ្មោះ​ថា គណបក្សជាតិខ្មែរ ក្រោយ​ពី​លោកសម រង្ស៊ី ត្រូវ​បាន​ទម្លាក់​ពី​តំណែង​ជា​រដ្ឋមន្ត្រី​ក្រសួង​សេដ្ឋកិច្ចនិង​ ហិរញ្ញវត្ថុ ក្នុងជួ​រគណបក្ស​ហ្វ៊ុនស៊ិនប៉ិច។

លោក​សម រង្ស៊ី​ ដែល​បច្ចុប្បន្ន​ កំពុង​រស់នៅ​និរទេស​ឯក្រៅ​ប្រ​ទេសគេច​ពី​ការ​ជាប់​ពន្ធនាគារ ត្រូវ​បាន​តុលាការ​កាត់​ទោស​កំបាំង​មុខ​ឲ្យ​ជាប់​ពន្ធនាគារ​ចំនួន ១២ឆ្នាំ ពី​បទ​បំផ្លាញ​តម្រុយ​បង្គោល​​ព្រំដែន​កម្ពុជា-វៀតណាម និង​បទ​ក្លែង​បន្លំ​ឯកសារ​ពាក់ព័ន្ធ​នឹង​ផែនទី​ព្រំដែន​កម្ពុជា-វៀត​ណាម​។ លោកក៏​ត្រូវ​បាន​​រដ្ឋសភា លុប​ឈ្មោះចេញ​ពី​បញ្ជី​សមាជិកសភា​មណ្ឌល​កំពង់ចាម នីតិកាល​ទី​៤ ផងដែរ​៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ