ប្រទេសចិន​​នឹង​ពន្លឿន​​កំណែ​​ទម្រង់​​សេដ្ឋកិច្ច​​

“​សេចក្តី​សម្រេចចិត្ត​ធ្វើឲ្យ​អត្រា​នៃ​កំណើន​សេដ្ឋកិច្ច​ចិន​ធ្លាក់មកនៅ​៧,៥%​នៅឆ្នាំ២០១២​ជាជាង៨%​គឺ​ពិតជា​ការចាំបាច់​ក្នុងការ​ធ្វើកំណែ​ទម្រង់​សេដ្ឋកិច្ច​ ​ ធ្វើការ​ចែកចាយ​សម្បត្តិទ្រព្យ​ប្រទេសជាតិ​ជូន​ប្រជាជន​ចិន​ឲ្យបាន​ត្រឹមត្រូវ​ ​ ហើយនិង​ធ្វើការ​ក្តោបក្តាប់​ទៅលើ​បញ្ហា​ទំនិញ​ឡើងថ្លៃ”​ ​ នេះ​ជា​ការ​ថ្លែង​បញ្ជាក់​បន្ថែម​របស់​លោក​នាយករដ្ឋមន្ត្រី​ចិន​ វិន​ជាប៉ាវ​ ​ នាឱកាស​សន្និសីទ​កាសែត។

 
ដោយ​មូលហេតុ​វិបត្តិ​ប្រាក់បំណុល​អឺរ៉ុប​ ​ ហើយនិង​ទីផ្សារ​ក្រៅប្រទេស​ចេះតែ​ខើច​រួមតូច​ ​ សម្ពាធ​មកពី​ក្រៅ​ប្រទេស​ក៏​ចេះតែ​មក​ធ្វើការ​គាប​សង្កត់​ឲ្យ​សេដ្ឋកិច្ច​ចិន​ធ្លាក់ចុះ។​ នៅក្នុង​ស្ថានភាព​បែបនេះ​ហើយ​ដែល​ទីក្រុង​ប៉េកាំង​ត្រូវតែ​បន្ថយ​មហិច្ឆតា​របស់ខ្លួន​ពាក់ព័ន្ធ​នឹង​អត្រា​កំណើន​សេដ្ឋកិច្ច​ ​ ហើយនិង​ធ្វើ​កំណែ​ទម្រង់​ទៅលើ​រចនា​សម្ព័ន្ធ​របស់ខ្លួន។

លោក​នាយករដ្ឋមន្ត្រី​ចិន​ក៏​បាន​ថ្លែង​ឲ្យដឹង​ទៀតថា​ ​ តម្លៃ​អចលនទ្រព្យ​នៅក្នុង​ប្រទេសចិន​មាន​តម្លៃ​ខ្ពស់​ហួសហេតុ​ពេក​ ​ ដូច្នេះ​គេត្រូវតែ​ធ្វើការ​ប្រយុទ្ធ​ប្រឆាំង​ទល់នឹង​ការទិញលក់​កេង​យក​ចំណេញ​ក្នុង​វិស័យ​អចលនទ្រព្យ។​ ការទិញលក់​កេង​យក​ចំណេញ​ក្នុង​វិស័យ​អចលនទ្រព្យ​ដែលអាច​បណ្តាល​ឲ្យកើតមាន​វិបត្តិ​ធ្ងន់ធ្ងរ​ដល់​សេដ្ឋកិច្ច​នៃ​ប្រទេសចិន។

គួរកត់​សម្គាល់ថា​ ​ លោក​នាយករដ្ឋមន្ត្រី​ចិន​ វិន​ជាប៉ាវ​ នឹងត្រូវ​ចាកចេញ​ពី​មុខ​តំណែង​នៅឆ្នាំក្រោយ​ ​ ទន្ទឹមគ្នា​នឹង​លោក​ប្រធានាធិបតី​ចិន​ ហ៊ូ​ជិនតាវ។​ បើយោងតាម​តួលេខ​ស្ថិតិ​ចុងក្រោយ​ ​ ឧបសគ្គ​ដែល​កើតមាន​នៅក្នុង​វិស័យ​សេដ្ឋកិច្ច​ក្នុង​ប្រទេស​និង​ក្រៅ​ប្រទេស​នារយៈពេល​ប៉ុន្មានឆ្នាំ​ចុងក្រោយនេះ​ ​ អាចនឹង​ធ្វើឲ្យ​មាន​ការ​លំបាក​ដល់​គណបក្ស​កុម្មុយនិស្តចិន​ដែល​ឲ្យ​អាទិភាព​ទៅលើ​បញ្ហា​ស្ថិរភាព។

គួរបញ្ជាក់ថា​ ​ វិបត្តិ​ប្រាក់​បំណុល​និង​ការទិញដូរ​ហូបចុក​ធ្លាក់ចុះ​ពិតជា​ធ្វើឲ្យ​ប៉ះពាល់​ដល់​ការបញ្ជា​ទិញ​ទំនិញចិន​ពី​សំណាក់​ទីផ្សារ​ធំៗ​ពីរ​ក្នុងលោក​គឺ​សហរដ្ឋ​អាមេរិក​និង​អឺរ៉ុប។​ ស្ថិតិ​ពាណិជ្ជកម្ម​ដែល​បាន​ផ្សាយ​ឲ្យដឹង​កាលពី​​ថ្ងៃសុក្រ​កន្លងទៅ​បាន​ឲ្យ​ដឹងថា​ ​ ជញ្ជីង​ពាណិជ្ជកម្ម​ចិន​បាន​ស្គាល់​ឧនភាព​៣១,៥​ពាន់លាន​ដុល្លារ​នៅ​ខែកុម្ភៈ​កន្លងទៅ​ ​ ដែលជា​ឧនភាព​មួយ​ដ៏​សែន​ធ្ងន់ធ្ងរ​ពុំដែល​កើតមាន​នារយៈ​ពេល​មួយ​ទសវត្សរ៍​ចុងក្រោយនេះ​សម្រាប់​ប្រទេស​ចិន៕