ស៊ីរី-រុស្ស៊ី

ម៉ូស្គូ​ចង់រៀបចំ​ឲ្យមាន​សន្និសីទ​អន្តរជាតិ​ស្តីពី​ស៊ីរី​ដោយមាន​ការចូល​រួម​ពី​អ៊ីរ៉ង់​

ប្រមុខ​ការទូត​រុស្ស៊ី​ លោក​ស៊ែរហ្គេយ​​ ​ឡាវរ៉ូវ​ នា​សន្និសីទ​​កាសែត​​មួយ​​នៅ​ទីក្រុង​​ម៉ូស្គូ​​នៅ​ថ្ងៃសៅរ៍​​ទី៩​​មិថុនា​​ឆ្នាំ២០១២​
ប្រមុខ​ការទូត​រុស្ស៊ី​ លោក​ស៊ែរហ្គេយ​​ ​ឡាវរ៉ូវ​ នា​សន្និសីទ​​កាសែត​​មួយ​​នៅ​ទីក្រុង​​ម៉ូស្គូ​​នៅ​ថ្ងៃសៅរ៍​​ទី៩​​មិថុនា​​ឆ្នាំ២០១២​ REUTERS/Sergei Karpukhin

ប្រទេស​រុស្ស៊ី​ចង់​រៀបចំ​ឲ្យមាន​សន្និសីទ​អន្តរជាតិ​មួយ​ស្តីពី​ប្រទេស​ស៊ីរី​ឲ្យបាន​ឆាប់​រហ័ស​ដើម្បី​អនុវត្ត​ផែនការ​របស់​បេសកជន​ពិសេស​នៃ​អ.ស.ប.​ លោក​កូហ្វី​អាណាន។​ នេះ​ជាការ​ប្រកាស​ឲ្យដឹង​ដោយ​នាប្រមុខ​ការទូត​រុស្ស៊ី​ លោក​ស៊ែរហ្គេយ​​ ឡាវរ៉ូវ​ ឱកាស​សន្និសីទ​កាសែត​មួយ​នៅ​ទីក្រុង​ម៉ូស្គូ​នៅ​ថ្ងៃសៅរ៍​ទី៩​មិថុនា​ឆ្នាំ២០១២។

ផ្សាយពាណិជ្ជកម្ម

 

នាឱកាស​សន្និសីទ​កាសែត​មួយ​នៅ​ទីក្រុង​ម៉ូស្គូ​ ប្រមុខ​ការទូត​រុស្ស៊ី​ លោក​ ស៊ែរហ្គេយ​ ឡាវរ៉ូវ ​បាន​ប្រកាស​រំលឹកថា​ ​ ប្រទេស​រុស្ស៊ី​ពុំ​យល់ព្រម​ទទួល​យកឡើយ​នូវ​ “សេចក្តី​សម្រេចចិត្ត​របស់​ក្រុមប្រឹក្សា​សន្តិសុខ”​ ស្តីពី​អន្តរាគមន៍​យោធា​បរទេស​នៅ​ប្រទេស​ស៊ីរី។​ ហើយ​ម្យ៉ាងទៀត​ លោក​រដ្ឋមន្ត្រី​ក្រសួង​ការបរទេស​រុស្ស៊ី​បាន​សង្កត់​បញ្ជាក់​ឲ្យដឹងថា​ ​ ទីក្រុង​ម៉ូស្គូ​ចង់ឲ្យ​ប្រទេស​អ៊ីរ៉ង់​ចូលរួម​ក្នុង​សន្និសីទ​អន្តរជាតិ​នេះ។​ ក៏​ប៉ុន្តែ​ ទាំងនេះ​បាន​ត្រូវ​ទទួល​ការ​ប្រឆាំង​យ៉ាង​ដាច់ខាត​ពី​សំណាក់​ប្រទេស​លោក​ខាងលិច​មួយ​ចំនួន។

ដូច្នេះ​ វាពិតជា​ការមួយ​ដ៏​លំបាក​សម្រាប់​អ្នកការទូត​រុស្ស៊ី​រៀបចំ​ឲ្យ​មាន​សន្និសីទ​អន្តរជាតិ​ដែល​មាន​ការ​ចួលរួម​ពី​សំណាក់​ប្រទេស​អ៊ីរ៉ង់​ផង​ ​ ពី​សំណាក់​សហរដ្ឋ​អាមេរិក​ផង​ ​ ពីសំណាក់​ប្រទេស​អង់គ្លេស​និង​ប្រទេស​បារាំង​ផង។​ សូមបញ្ជាក់ថា​ ​ កាលពី​ប៉ុន្មានថ្ងៃ​មុន​ នៅទីក្រុង​អ៊ីស្តង់ប៊ូល​ ​ ទីក្រុង​វ៉ាស៊ីនតោន​ ​ ប៉ារីស​ ​ និង​ទីក្រុង​ឡុងដ្រឹ៍​ធ្លាប់បាន​បដិសេធ​ម្តង​រួច​ទៅហើយ​ ​ ពុំយល់ព្រម​ឲ្យ​ទីក្រុង​តេហេរ៉ង់​ចូលរួម​ក្នុង​សន្និសីទ​អន្តរជាតិ​ស្តីពី​ប្រទេស​ស៊ីរី។​ ដោយ​សហរដ្ឋ​អាមេរិក​និង​ក្រុមប្រឹក្សា​ជាតិ​ស៊ីរី​ CNS ​ដែលជា​បក្ស​សម្ព័ន្ធ​ប្រឆាំង​ស៊ីរី​ដ៏​សំខាន់​ បាន​ចោទ​ប្រទេស​អ៊ីរ៉ង់ថា​ ជាអ្នក​បាន​ផ្តល់​ជំនួយ​យោធា​ឲ្យ​របប​គ្រប់គ្រង​ស៊ីរី​ផ្តាច់ការ​បាស្ហារ​អាល-អាស្សាដ។

ប្រមុខ​ការទូត​រុស្ស៊ី​ លោក​ ស៊ែរហ្គេយ​ ឡាវរ៉ូវ បាន​ថ្លែង​បញ្ជាក់​ទៀតថា​ ​ អន្តរាគមន៍​យោធា​ជាយថាហេតុ​នៅ​ប្រទេស​ស៊ីរី​ អាចបង្ក​ឲ្យ​មាន​ “តំបន់អស្ថិរភាព”​ នៅ​ឈូងសមុទ្រ​ពែរស៍​និង​នៅ​តំបន់​សមុទ្រ​មេឌី​ទែរ៉ាណេ​ ​ ដែលទាំងនេះ​នឹង​អាច​ជួយ​បញ្ឆេះ​ឲ្យ​មាន​ការ​ប្រយុទ្ធ​គ្នា​រវាង​អ្នកកាន់​សាសនា​អ៊ីស្លាម​និន្នាការ​និកាយ​ស៊ុន្នីត​ហើយនិង​អ្នកកាន់​សាសនា​អ៊ីស្លាម​និន្នាការ​និកាយ​ស្ហ៊ីអ៊ីត​នៅក្នុង​តំបន់។

រដ្ឋមន្ត្រី​ក្រសួង​ការបរទេស​រុស្ស៊ី​បាន​ថ្លែង​ឲ្យដឹង​ទៀតថា​ ​ ទីក្រុង​ម៉ូស្គូ​គាំទ្រ​ដោយ​ “រីករាយ”​ នូវ​ការ​ចាកចេញ​ពី​រដ្ឋអំណាច​ដោយ​បាស្ហារ​អាល-អាស្សាដ​ “បើ​ប្រសិន​ជា​មាន​ឆន្ទៈ​របស់​ប្រជាជន​ស៊ីរី”។​ ទស្សនវិស័យ​នេះ​ជាការ​ទាមទារ​ចង់បាន​ជាយូរយារ​​ណាស់​មកហើយ​ ដោយ​ប្រទេស​លោក​ខាងលិច។​ លោក​ ស៊ែរហ្គេយ​ ឡាវរ៉ូវ បានទាំង​បង្ហាញ​ឲ្យ​ឃើញ​នូវ​ការ​សាងផ្ទេរ​អំណាច​រវាង​អ្នកក្នុង​ប្រទេស​នៅ​យេម៉ែន​ប្រកប​ដោយ​ជោគជ័យ​ដោយ​គ្មាន​អន្តរាគមន៍​បរទេស​ផងទៀត៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI