កម្ពុជា-អ.ស.ប.

យូណេស្កូ​​និង​​កម្ពុជា​​បន្ត​​ជួសជុល​​អង្គវត្ត​​ក្នុង​​ជំហាន​​ទី២​​

យូណេស្កូ​​និង​​កម្ពុជា​​បន្ត​​ជួសជុល​​អង្គវត្ត​​ក្នុង​​ជំហាន​​ទី២​​
យូណេស្កូ​​និង​​កម្ពុជា​​បន្ត​​ជួសជុល​​អង្គវត្ត​​ក្នុង​​ជំហាន​​ទី២​​ Duc Tam/RFI

រដ្ឋាភិបាល​កម្ពុជា និង​អង្គការ​យូណេស្កូ​បាន​ចុះ​ហត្ថលេខា​លើ​កិច្ច​ព្រមព្រៀង​ស្តី​ពី​ការ ជួសជុល និង​អភិរក្ស​ប្រាសាទអង្គរ​វត្ត​ជំហាន​ទី២​នៅ​ព្រឹក​ថ្ងៃព្រហស្បតិ៍​នេះ។ គម្រោង​ជួសជុល​និង​អភិរក្ស​​នេះ​ត្រូវ​បាន​ឧបត្ថម្ភ​រួមគ្នាដោយ​រដ្ឋាភិបាល​អ៊ីតាលី និង​រដ្ឋាភិបាល​កម្ពុជា​ ក្នុង​ទំហំ​ទឹកប្រាក់​សរុប​២សែន​៥ម៉ឺន​ដុល្លារ។

ផ្សាយពាណិជ្ជកម្ម

រដ្ឋាភិបាល​កម្ពុជា​ និង​អង្គការ​យូណេស្កូ​បាន​ព្រមព្រៀង​បន្ត​ការដ្ឋាន​ជួសជុល និង​អភិរក្ស​ប្រាសាទ​អង្គរ​វត្ត​ទៀត​ក្នុង​ជំហាន​ទី​២។ កិច្ច​ព្រមព្រៀង​នេះ​ត្រូវ​បាន​ចុះ​ហត្ថលេខា​ដោយ​លោក​ឧបនាយករដ្ឋមន្ត្រី​សុខ អាន និង​លោកស្រី Anne Lemaistre តំណាង​អង្គការ​យូណេស្កូ​ប្រចាំ​កម្ពុជានៅ​ព្រឹក​​ថ្ងៃ​ទី​៦​កញ្ញា​នេះ។

 
គម្រោង​ជួសជុល និង​អភិរក្ស​ប្រាសាទ​អង្គរវត្ត​ជំហាន​ទី​២​ដែល​មាន​រយៈ​ពេល​២​ឆ្នាំ​នេះ នឹង​តំណើរ​ការ​ដោយ​​ការ​គាំ​ទ្រ​ផ្នែក​ហិរញ្ញ​វត្ថុ​ពី​រដ្ឋាភិបាល​ប្រទេស​អ៊ីតាលី ចំនួន​២​សែន​ដុល្លារ និង​ការ​ឧបត្ថម្ភ​ពី​រដ្ឋាភិបាល​កម្ពុជា​ចំនួន​៥​ម៉ឺន​ដុល្លារ​ថែម​ទៀត។ គួរ​បញ្ជាក់​ថា គម្រោង​ជួសជុល​ជំហ៊ាន​ទី២​នេះ គឺ​ជា​ការ​ងារ​បន្ត​ពី​គម្រោង​ទី​មួយ​ដែលមានរយៈពេល​៧ឆ្នាំ ពោល​គឺ​ពី​ឆ្នាំ​២០០៥​ដល់ឆ្នាំ​២០១១ ដែល​ជំហ៊ាន​ទី​មួយ​នោះ រដ្ឋាភិបាល​កម្ពុជា​បាន​ឧបត្ថម្ភ​ថវិកា​ចំនួន ៥៦០០០​ដុល្លារ រីឯ​រដ្ឋាភិបាល​អ៊ីតាលី​បានផ្តល់​ថវិកា​ចំនួន​៥៦៥០០០ដុល្លារ។

លោកឧបនាយករដ្ឋមន្ត្រី សុខ អាន​​បាន​ថ្លែង​នៅ​ក្នុង​ពិធី​ចុះ​ហត្ថលេខាព្រឹក​មិញ​នេះ​ថា ការ​ចុះ​ហត្ថលេខា​នេះ​មាន​អត្ថន័យ​យ៉ាង​ខ្លាំង ដោយសារ​វា​បាន​ប្រព្រឹត្តិ​ទៅ​នៅ​ក្នុង​ឆ្នាំ​ដែល​កម្ពុជា និង​អង្គការ​យូណេស្កូ​នឹង​រៀបចំ​ខួប​ឆ្នាំ​ទី​២០​នៃ​ការ​ចុះឈ្មោះ​ប្រាសាទ​អង្គរវត្ត​ចូល​ក្នុង​បញ្ជី​បេតិកភណ្ឌ​ពិភពលោក​នៅ​ក្នុង​ខែ​ធ្នូ​ខាង​មុខ​នេះ។

ប្រាសាទ​អង្គរ​វត្ត​ត្រូវ​បាន​ចុះ​ឈ្មោះ​ក្នុង​បញ្ជី​បេតិកភណ្ឌ​ពិភពលោក​តាំង​ពី​ឆ្នាំ​១៩៩២ ហើយ​បន្ទាប់មក​គណៈ​កម្មាធិការ​​សម្រប​សម្រួល​អន្តរជាតិ​ដើម្បី​ការ​អភិរក្ស និងការ​​អភិវឌ្ឍ​ឧទ្យាន​អង្គរ​​​ក៏​ត្រូវ​បាន​បង្កើត​ឡើង​ដែរ។ ចាប់​តាំង​ពី​ពេល​នោះ​មក ការ​ដ្ឋាន​ជួសជុល​ប្រាសាទ​បុរាណ​ខ្មែរ​នានា​ក៏​បាន​ចាប់​ផ្តើម​ជា​បន្ត​បន្ទាប់​ដោយ​ដឹកនាំ​ដោយ​​អ្នក​ជំនាញ​បរទេស។ រហូតដល់​ឆ្នាំ​​២០១២​នេះ​ ការ​ជួសជុល​ប្រាសាទ​ក្នុង​ឧទ្យាន​អង្គរ​មាន​រយៈ​២០​ឆ្នាំ​ហើយ។

លោក​លីម ប៊ុនហុក មន្ត្រី​ការិយាល័យ​វប្បធម៌​នៃ​អង្គការ​យូណេស្កូ បាន​ប្រាប់​អោយ​ដឹង​ថា ព្រឹត្តិការណ៍ជា​ច្រើន​ រួម​មាន​ការ​តាំងពិព័រណ៌ ការ​សំដែង​សិល្បៈ​នានា​ផង ស្តី​ពី​ការ​អភិរក្ស និង​អភិវឌ្ឍន៍​ឧទ្យាន​អង្គរនឹង​ត្រូវ​រៀបចំ​នៅ​ក្នុងខេត្ត​សៀមរាប​ផង និង​នៅ​ភ្នំពេញផង​ ដើម្បី​រំលឹក​ខួប​២០​ឆ្នាំ​នៃ​ការ​ចុះ​ឈ្មោះ​ប្រាសាទ​អង្គរវត្ត​ក្នុង​បញ្ជី​បេតិកភណ្ឌ​របស់​មនុស្សជាតិ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI