អាមេរិក

ក្រុមអ្នកប្រជាធិបតេយ្យ​មិន​សូវ​ភ្ញាក់ផ្អើល​នឹង​សុន្ទរកថា​របស់​លោក Mitt Romney

បេក្ខជន​គណបក្ស​សាធារណរដ្ឋ លោក Romney (រូបស្តំា)
បេក្ខជន​គណបក្ស​សាធារណរដ្ឋ លោក Romney (រូបស្តំា) REUTERS/Adrees Latif

នៅ​សហរដ្ឋអាមេរិក លោក Mitt Romney បាន​ក្លាយ​ជា​បេក្ខជន​ផ្លូវការ​នៃ​គណបក្ស​សាធារណរដ្ឋ​សម្រាប់​ចូល​រួម​ការ​បោះឆ្នោត​ជ្រើសរើស​ប្រធានាធិបតី​ថ្មី​នៅ​ខែ​វិច្ឆិកា​ខាង​មុខ។ នៅ​ក្នុង​សុន្ទរកថា​ចុង​ក្រោយ​របស់​លោក​នៅ​ក្នុង​រដ្ឋ Floride កាល​ពី​ថ្ងៃទី៣១ សីហា លោក Romney បាន​ផ្តោត​សំខាន់​លើ​វិស័យ​សេដ្ឋកិច្ច។ ប៉ុន្តែ​ក្រុមអ្នក​ប្រជាធិបតេយ្យ​ហាក់​ដូច​ជា​មិន​បាន​ភ្ញាក់ផ្អើល​នឹង​សុន្ទរកថា​របស់​លោក Romney ទេ ព្រម​ទំាង​បាន​ទិតៀន​លោក Romney ថា មិន​បាន​លើក​យក​ប្រធានបទ​សំខាន់​មក​និយាយ​ទេ គិត​តែ​និយាយ​ពី​ជីវិត​ផ្ទាល់ខ្លួន។

ផ្សាយពាណិជ្ជកម្ម

ប្រតិកម្ម​របស់​ក្រុម​អ្នកប្រជាធិបតេយ្យ​មិន​មាន​អ្វី​គួរ​ឲ្យ​ឆ្ងល់​ទេ សម្រាប់​អ្នក​ខ្លះ​យល់​ថា សុន្ទរកថា​របស់​លោក Mitt Romney មិន​សូវ​ធ្វើ​ឲ្យ​មាន​ការ​ភ្ញាក់ផ្អើល​អ្វី​ទេ និង​សម្រាប់​អ្នក​ខ្លះ​ទៀត លោក Romney នៅ​តែ​ជា​មហាសេដ្ឋី​ម្នាក់​ដែល​មិន​យល់​ពី​ទុក្ខលំបាក​របស់​ប្រជាពលរដ្ឋ​អាមេរិកំាង។ អ្វី​ដែល​ក្រុមសកម្មជន​គំាទ្រ​លោក Obama បាន​ស្តីបន្ទោស​លោក Romney គឺ​សុន្ទរកថា​របស់​លោក Romney ប្រកប​ដោយ​ការ​រិះគន់ ទិតៀន​ប្រឆំាង​លោក​ប្រធានាធិបតី នោះ​បើ​ទោះបី​ជា​ពាក្យ​រិះគន់​នោះ​មិន​សូវ​ជា​ខ្លំាងក្លា​ដូច​នៅ​ក្នុង​Spot ពាណិជ្ជកម្ម​តាម​ទូរទស្សន៍​ក៏​ដោយ។

ជា​ទូទៅ ក្រុម​អ្នកប្រជាធិបតេយ្យ​បាន​កត់សម្គាល់​ឃើញ​ថា សុន្ទរកថា​រយៈពេល​ប្រមាណ ៣៧នាទី​របស់​លោក Mitt Romney បាន​ផ្តោតសំខាន់​តែ​លើ​ជីវិត​ផ្ទាល់​ខ្លួន ការ​បរិហារ​លើ​នយោបាយ​របស់​គូប្រជែង និង​មិន​បាន​និយាយ​អ្វី​ច្រើន​ពាក់ព័ន្ធ​នឹង​កម្មវិធី​នយោបាយ​របស់​លោក​ទេ។

ក្រុមអ្នកគំាទ្រ​លោក Obama នឹង​ធ្វើ​ការ​វាយបក​វិញ នៅ​ពេល​ដែល​គណបក្ស​ប្រជាធិបតេយ្យ​នឹង​បើក​ធ្វើ​មិន្ទិញ​របស់​ខ្លួន​នៅ Charlotte ក្នុង​រដ្ឋ Caroline ខាងជើង។ ប៉ុន្តែ​អ្នកធ្វើអត្ថាធិប្បាយ​ឲ្យ​កាសែត​ឈ្មោះ Huffington Post បាន​ចំអក​ឡកឡាយ​ឲ្យ​ថា គេ​ត្រូវ​រង់ចំា​មើល ថា​តើ​សុន្ទរកថា​របស់​គណបក្សប្រជាធិបតេយ្យ​នឹង​មាន​អ្វី​ខុស​គ្នា​នឹង​សុន្ទរកថា​របស់​គណបក្សសាធារណរដ្ឋ​ទៅ ?

អ្នកកាសែត​រូបនេះ​ដែល​បាន​ចូលរួម​នៅ​ក្នុង​សមាជ​គណបក្សប្រជាធិបតេយ្យ​នា​សប្តាហ៍​នេះ​បាន​កត់សម្គាល់​ឃើញ​ថា ដើម្បី​ទាក់ទាញ​ពលរដ្ឋ​អាមេរិកំាង​ដែល​នៅ​បន្ត​អល់អែក​ក្នុង​ការ​សម្រេចចិត្ត គណបក្ស​ប្រជាធិបតេយ្យ​បាន​ព្យាយាម​មិន​និយាយ​លើ​ប្រធានបទ​ណា​ដែល​ជា​ការ​ទន្ទឹង​រង់ចំា​របស់​ពលរដ្ឋ​អាមេរិកំាង​ទេ ក្នុង​នោះ​មាន ការ​រលូតកូន អន្តោប្រវេសន៍ កំណែទម្រង់​លើ​ច្បាប់​ចូលនិវត្ត ឬ​មួយ​ក៏​សន្តិសុខសង្គម​ជា​ដើម។ ជា​រួម គឺ​សុទ្ធសឹង​ជា​ប្រធានបទ​អាទិភាព​របស់​លោក Obama។ ទាក់ទង​នឹង​ការ​បង្កើត​ការងារ​វិញ អ្នកកាសែត​បាន​សរសេរ​ថា លោក Mitt Romney បាន​បង្កើត​ការងារ​ជា​ច្រើន​នៅ​ក្នុង​ប្រទេស​ចិន នៅ​ឥណ្ឌា នៅ​ម៉ាឡេស៊ី និង​នៅ​ក្នុង​ប្រទេស​សិង្ហបុរី៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI