អានតួអត្ថបទ
ព្រឹត្តិការណ៍អន្តរជាតិប្រចាំថ្ងៃ

អន្តរជាតិ​បន្ត​បែកបាក់​គ្នា ក្នុង​ពេល​ដែល​ការសម្លាប់​បង្ហូរឈាម​នៅតែ​បន្ត​នៅ​ស៊ីរី

សំឡេង ០៧:០៥
រថក្រោះ​រដ្ឋាភិបាល​រក​ឃើញ​នៅក្នុង​ទីក្រុង​Homs ដែល​ជា​សំបុក​របស់​ក្រុមប្រឆាំងស៊ីរី រូបនេះ​ថត​បាន​ដោយ​ប្រជាជន​ស៊ីរី
រថក្រោះ​រដ្ឋាភិបាល​រក​ឃើញ​នៅក្នុង​ទីក្រុង​Homs ដែល​ជា​សំបុក​របស់​ក្រុមប្រឆាំងស៊ីរី រូបនេះ​ថត​បាន​ដោយ​ប្រជាជន​ស៊ីរី ©Reuters
ដោយ៖ ឈាង បុប្ផា
៣០ នាទី

បេសកកម្ម​របស់​អ្នកសង្កេតការ​ណ៍អារ៉ាប់​ត្រូវ​បញ្ចប់ នៅថ្ងៃ​ព្រហស្បតិ៍ ម្សិលមិញ និង​ត្រូវ​ដាក់របាយការណ៍​ជូនសម្ព័ន្ធអារ៉ាប់ នៅចុងសប្តាហ៍នេះ។ កាលពី​ថ្ងៃ​អង្គារទី ១៧ មករា ២០១២ ប្រទេស​កាតារ ដែល​ដឹកនាំ​គណៈកម្មាធិការ​អារ៉ាប់​សម្រាប់ដោះស្រាយ​វិបត្តិស៊ីរី​បាន​ទាមទារ ​ឲ្យ​មាន​អន្តរាគមន៍​ទ័ព​អារ៉ាប់ ក្នុង​ប្រទេស​ស៊ីរី​ដើម្បី​បញ្ចប់​អំពើហិង្សា ក្នុង​ប្រទេស​នេះ។ ប៉ុន្តែ កាលពីថ្ងៃ​ព្រហស្បតិ៍​ទី ១៩ មករា រដ្ឋមន្រ្តី​ការបរទេស​បារាំង​បាន​បដិសេធ មិនយល់ស្រប​តាម​គំនិត​ស្នើ​ឡើង​ដោយ​​ប្រទេស​កាតារ។

ផ្សាយពាណិជ្ជកម្ម

លោក​រដ្ឋមន្រ្តី​ការបរទេស លោក​Alain Juppé មិន​បាន​បញ្ជាក់​ពី​មូលហេតុ​ដែល​ធ្វើ​ឲ្យ​បារាំង​ប្រឆាំង​មិន​ឲ្យ​មាន​ អន្តរាគមន៍​បរទេស​នៅស៊ីរី​ទេ ប៉ុន្តែ រដ្ឋមន្រ្តី​ការបរទេស​បារាំង​គ្រាន់តែ​លើកឡើង​ថា នៅក្នុង​កាលៈទេសៈ​បច្ចុប្បន្ន​នេះ គេ​មិន​អាច​និយាយ​ពី​លទ្ធភាព​ប្រើ​កម្លាំងទ័ព​បរទេស ដើម្បី​អន្តរាគម​ទៅក្នុង​ប្រទេស​ស៊ីរី ដូចដែល​គេ​បាន​ធ្វើ​កន្លងមក ក្នុង​ប្រទេស​លីប៊ីទេ។ អន្តរាគមន៍​ទ័ព​បរទេស​ទៅក្នុង​ប្រទេស​ស៊ីរី គឺ​ជារឿង​ស្មុគស្មាញ​មួយ ព្រោះ​សមាជិក​ក្រុមប្រឹក្សា​សន្តិសុខ​នៅតែ​មិន​ទាន់​ឯកភាពគ្នា ហើយ​រុស្ស៊ី​បាន​ការពារ​រដ្ឋាភិបាលរបស់​លោក​Bachar Al Assad មិន​ឲ្យ​មាន​អន្តរាគមន៍ទ័ព​ក្នុង​ប្រទេស​ស៊ីរី។

ប៉ុន្តែ សម្រាប់​លោក​Alain Juppé បើទោះ​គេ​មិន​អាច​ប្រើកម្លាំងទ័ព បារាំង និង​ប្រទេស​អន្តរជាតិ​ដទៃ​ក៏នឹង​បង្កើន​ពិភាក្សា ធ្វើការ​ជាមួយ​ក្រុមប្រឆាំង​ស៊ីរី ដើម្បី ជួយ​ជំរុញ​ឲ្យ​ក្រុមនេះ​បង្កើត​ចេញ​ជា​រចនា​សម្ព័ន្ធ​ច្បាស់លាស់ ធ្វើការតវ៉ា​ប្រឆាំង​រដ្ឋាភិបាល​ស៊ីរី។

រហូតមកដល់ពេលនេះ វិបត្តិ​នយោបាយ និង​អំពើ​ហិង្សា នៅស៊ីរី កើតមានរយៈពេល ១០ខែ។ គឺ​ជាវិបត្តិ​ដ៏​យូរអង្វែង ដែល​ធ្វើ​ឲ្យមនុស្ស​រងគ្រោះ​ស្លាប់ ជាង ៥ពាន់នាក់ នេះ​បើតាម​តួលេខ​របស់​អង្គការ​សហប្រជាជាតិ។

ប្រធានាធិបតី​Bachar Al Assad ​នៅ​តែ​ក្រាញ ស្រឡាញ់​អំណាច មិន​ទទួលដឹង​ឮ​​ពី​ជីវិតមនុស្ស​ដែល​ស្លាប់នៅក្នុង​ការបាញ់បង្រ្កាប​របស់​ ទាហាន​រដ្ឋាភិបាល។ ប្រទេស​ដែល​ជាសមាជិក​របស់​ក្រុមប្រឹក្សា​សន្តិសុខ បែកបាក់​គ្នា នៅពេល​រុស្ស៊ី គាំទ្រ​ដោយ​ចិន ឥណ្ឌា និង​ប្រេស៊ីល ប្រឆាំង​មិន​ឲ្យ​មាន​សេចក្តីសម្រេចចិត្ត​ដាក់ទណ្ឌកម្ម​លើ​ស៊ីរី និង​អន្តរាគមន៍​ទ័ព​ទៅលើ​ស៊ីរី។

ចំណែក​សម្ព័ន្ធអារ៉ាប់ ដែល​ដើរតួនាទី​សំខាន់​ក្នុង​ការរកដំណោះស្រាយ​នៅស៊ីរី ក៏​មាន​ការបែកបាក់​ផ្ទៃក្នុង​ដែរ។ ប្រទេស​ដែល​សម្បូរ​ដោយ​ពួកSunnite ចង់​ឲ្យ​មាន​ការដាក់​ទណ្ឌកម្ម​លើ​ស៊ីរី ដោយសារ​តែ​របប​ស៊ីរី​គាំទ្រ​ដោយ​ពួកChiite ដែល​ជា​និកាយ គូប្រឆាំង​របស់​ពួកSunnite។ ឧទាហរណ៍​ជាក់ស្តែង ប្រទេស​កាតា​របស់​ពួក​ Sunnite បាន​ទាមទារ​ឲ្យ​គេ​បញ្ជូនទ័ព​អារ៉ាប់ ទៅ​បញ្ចប់​បញ្ហា​នៅស៊ីរី ប៉ុន្តែ ការស្នើនេះ​ក៏​ត្រូវ​បាន​អ៊ីរ៉ាក់ និង​អេហ្ស៊ីប​ជំទាស់។ អ៊ីរ៉ាក់​ប្រឆាំង ព្រោះ​ក្រោយ​ការដួលរលំ​របស់​លោក​សាដាម ហ៊ូសេន អ៊ីរ៉ាក់ ត្រូវ​ពួក Chiite​ចូលកាន់​អំណាច​គ្រប់គ្រង​ប្រទេស ហើយ​ពួកនេះ គឺ​ជាអ្នកគាំទ្រ​របប​ដឹកនាំ​របស់​ប្រធានាធិបតី​ស៊ីរី​បច្ចុប្បន្ន។

បើសិន​ជា​សហគមន៍​អន្តរជាតិ​នៅតែ​ខ្វែងគំនិត​គ្នា តទៅទៀត មិន​រកឃើញ​ដំណោះស្រាយ​រួមមួយនោះ នោះ ​វិបត្តិ​នៅស៊ីរី​នឹងនៅមាន​រយៈពេល​វែង​តទៅទៀត។ ជាក់ស្តែង រដ្ឋាភិបាល​របស់​លោក​Bachar Al Assad យល់ព្រម​ឲ្យ​អ្នកសង្កេតការណ៍​របស់​សម្ព័ន្ធ​អារ៉ាប់ បន្ត​ធ្វើការ​ក្នុង​ប្រទេស​ខ្លួន គឺ​ដើម្បី​បង្ហាញ​ថា ស៊ីរី​សហការ​ជាមួយ​អន្តរជាតិ គឺ​ធ្វើ​យ៉ាងម៉េច​ពន្យារពេល ទប់កុំ​ឲ្យ​មាន​អន្តរាគមន៍​ទ័ព ឬ​ទណ្ឌកម្ម​អន្តរជាតិ។

ប្រធានាធិបតី​ស៊ីរី ឆ្លាត ចេះ​ឆ្លៀត យក​ព្រឹត្តិការណ៍​នៅក្នុង​ពិភពលោក​មកធ្វើ​ជា​ប្រយោជន៍​ខ្លួន។ ឧទាហរណ៍ បញ្ហា​សេដ្ឋកិច្ច​សកលធ្វើ​ឲ្យ​ប្រទេស​លោកខាងលិច​មិនអាច​​ចំណាយ​លុយខ្ជះខ្ជាយ ​លើ​កម្លាំងទ័ព នៅស៊ីរី។ ម្យ៉ាងទៀត ​នៅពេល​នេះ គេ​មិនសង្ឃឹម​នឹង​មាន​អន្តរាគមន៍ទ័ព​ពី​​ប្រទេស​មហាអំណាច​យោធា​ដូចជា​បារាំង អាមេរិក ព្រោះប្រទេស​ទាំងពីរនេះ កំពុង​ជាប់រវល់​ត្រៀម​រៀបចំ​ការបោះឆ្នោត។ ឆ្លៀតក្នុង​ពេល​ប្រទេស​លោកខាងលិច​ជាប់រវល់​បញ្ហា​ក្នុង​ប្រទេស​រៀងៗខ្លួន ស៊ីរី​ឆ្លៀត​វាយបង្រ្កាប កាន់តែខ្លាំង ដើម្បី​បិទបញ្ចប់​ចលនា​ប្រឆាំង​នៅស៊ីរី។

ការវាយបង្រ្កាប​បំបិទ​ចោល​ក្រុមប្រឆាំង​ស៊ីរី​មិន​អាច​នឹង​ធ្វើ​បាន​ទៅ ​ដោយងាយស្រួល។ ចលនា​ទាហាន​ស៊ីរី សេរី ធ្លាប់បាន​ប្រកាស​ហើយ​ថា គេ​នឹង​តស៊ូ​ផ្នែកអាវុធ ប្រសិន​បើ​សម្ព័ន្ធ​អារ៉ាប់ និង​ប្រទេស​លោកខាងលិច បរាជ័យ មិន​អាច​អន្តរាគម​ជួយ​បញ្ឈប់​អំពើហិង្សា​នៅក្នុង​ស៊ីរី។ ក្រុមប្រឹក្សា​ស៊ីរី ដែល​ដឹកនាំ​ចលនា​ប្រឆាំង​សន្តិភាពវិញ ក៏​បាន​ព្រមាន​ដែរ ថា បើមាន​ការបង្រ្កាបខ្លាំង និង​គ្មាន​ជម្រើស ប្រជាជន​ស៊ីរី​សាមញ្ញ​នឹង​ចូលជាមួយ​​កងទ័ព​ស៊ីរី​សេរី ដែល​បាន​ផ្តាច់ខ្លួនពី​កងទ័ព​រដ្ឋាភិបាល។

បច្ចុប្បន្ននេះ ទាហាន​ស៊ីរី​សេរី​មាន​ចំនួន​ប្រមាណ តែ ១ម៉ឺន ៥ពាន់នាក់ ដើម្បី​ប្រយុទ្ធតទល់​នឹង​ទាហាន​រដ្ឋាភិបាល​ដែល​មាន​ចំនួន​ដល់​ទៅ ២សែននាក់។ អ៊ីចឹង​ឃើញថា ខុសពី​ពេលមុនៗ រដ្ឋាភិបាល​ស៊ីរី​ត្រូវ​ប្រឈម​នឹង​ការតស៊ូ របស់​ក្រុមប្រឆាំង ដែល​ទំនង​នឹង​អាច​គាំទ្រ​ដោយ​ចលនា​អ៊ីស្លាម​និយម​Sunniteដែល​កំពុង​មាន​ សកម្មភាព​ខ្លាំង នៅតំបន់​អារ៉ាប់។ ការតស៊ូ​ផ្នែកអាវុធ​ក្នុង​ប្រទេស​នឹង​ធ្វើ​ឲ្យ​ស៊ីរី (ជៀសមិនផុត) ធ្លាក់​ទៅក្នុង​សង្រ្គាម​ស៊ីវិល បង្ហូរឈាម៕
 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ