អានតួអត្ថបទ
ម៉ាដាហ្កាស្កា

បេក្ខជន​បក្សកាន់អំណាច​ទទួល​ជោគជ័យ​ក្នុង​ការបោះឆ្នោត​ប្រធានាធិបតី​ម៉ាដាហ្កាស្កា​ ជុំទី២​

លោក Hery Rajaonarimampianina ក្នុង​ថ្ងៃ​បោះឆ្នោត​ប្រធានាធិបតី​ ជុំទី២ ថ្ងៃ​២០ធ្នូ ឆ្នាំ២០១៣។
លោក Hery Rajaonarimampianina ក្នុង​ថ្ងៃ​បោះឆ្នោត​ប្រធានាធិបតី​ ជុំទី២ ថ្ងៃ​២០ធ្នូ ឆ្នាំ២០១៣។ REUTERS/Thomas Mukoya
ដោយ៖ ព្រំ សឿន សូលីណា
១៧ នាទី

នៅ​ម៉ាដាហ្កាស្កា​ ថ្ងៃ​សុក្រនេះ លទ្ធផល​នៃ​ការ​រាប់សន្លឹក​ឆ្នោត​​​​​ចេញពី​ការ​បោះឆ្នោត​ប្រធានាធិបតីជុំទី២​ កាលពី​ថ្ងៃ​២០ធ្នូ ឆ្នាំ២០១៣កន្លងទៅ ត្រូវ​បាន​ចុះផ្សាយ​ជាផ្លូវការហើយ។ យោងតាម​លទ្ធផល​នោះ បេក្ខជន​ ហេរី រ៉ាចាវណារី ម៉ាមពីយ៉ានីណា មក​ពី​​បក្ស​កាន់អំណាច​ បាន​ទទួល​ជោគជ័យ ជាមួយ​សម្លេងឆ្នោត​៥៣,៥០ភាគរយ ឈ្នះ​​លោក​ហ្សង់ល្វី រ៉ូប៊ីនសុន ជា​គូប្រជែង​របស់​លោក។ ទោះយ៉ាងនេះ​ក្តី ម៉ាដាហ្កាស្កា​ត្រូវ​ចាំ​១៥ថ្ងៃ​ទៀត ព្រោះ​​​​​តុលា​ការ​ត្រូវ​ពិនិត្យ​​ពាក្យបណ្តឹង​ មុន​សម្រេច​ជាផ្លូវការ​ថា លោក​ហង់រី ​ជា​ប្រធានាធិបតី​ម៉ាដាហ្កាស្កា។ ​

ផ្សាយពាណិជ្ជកម្ម

នៅ​ម៉ាដាហ្កាស្កា ថ្ងៃ​សុក្រ​នេះ យោងតាម​លទ្ធផល​​នៃការរាប់សន្លឹកឆ្នោត លោក​ ហេរី រ៉ាចាវណារី ម៉ាមពីយ៉ានីណា មកពី​ខាង​បក្ស​កាន់អំណាច​ គឺ​ជា​អ្នក​ឈ្នះ​ ក្នុង​ការ​បោះឆ្នោត​ប្រធានាធិបតី ម៉ាដាហ្កាស្កា ថ្ងៃ២០ធ្នូ ឆ្នាំ២០១៣កន្លងទៅ។ គណៈកម្មការ​បោះឆ្នោត ប្រកាស​ថា លោក ហេរី ទទួលបាន​សន្លឹកឆ្នោត ៥៣,៥០ភាគរយ នាំ​មុខ​​គូប្រជែង​របស់​លោក គឺ​ហ្សង់ល្វី រ៉ូប៊ីនសុន ដែលទទួល​បាន​សម្លេង​៤៦,៥០ភាគរយ។

គួររំលឹកថា លោក ហេរី អាយុ​៥៥ឆ្នាំ ជា​អតីត​រដ្ឋមន្ត្រី​ហិរញ្ញវត្ថុ និង​ជា​​បេក្ខជន​មកពី​​សមាគម​ឈ្មោះ​ថា កម្លាំងថ្មីសម្រាប់​ម៉ាដាហ្កាស្កា ដែល​​គាំទ្រ​​ដោយ​រដ្ឋាភិបាល​កាន់អំណាច​​។ ​គូប្រជែង​លោក គឺ​លោក​រ៉ូប៊ីនសុន ​មកពី​គណបក្ស​​​​អាវ៉ាណា AVANA ​​របស់​អតីត​ប្រធានាធិបតីធ្លាក់ពី​អំណាច ​ម៉ាក រ៉ាវ៉ាឡូម៉ាណាណា។

បន្ទាប់ពី​មានការ​ចុះផ្សាយ​លទ្ធផល​ជាផ្លូវការ​ លោក​រ៉ូប៊ីនសុន ដែល​ចាញ់ឆ្នោត​នោះ មិនមាន​ប្រតិកម្ម​អ្វី​តបត​ភ្លាមៗ​នោះទេ។ ក្នុង​ការ​បោះឆ្នោត​ប្រធានាធិបតី​ថ្ងៃ​២០ធ្នូ គូប្រជែង​ទាំង២រូប​បាន​ចោទគ្នាទៅវិញ​ទៅមក​ ថាបាន​ក្លែងបន្លំ​សន្លឹកឆ្នោត បង្កភាព​មិនប្រក្រតី។ ប៉ុន្តែ អ្នកសង្កេតការ​បោះឆ្នោត​បរទេស​ជាច្រើនរូប​​ ក្នុង​នោះ មាន​អ្នកសង្កេតការណ៍​មកពី​សហភាព​អឺរ៉ុប​ដែរនោះ មិន​បាន​​សង្កេតឃើញ​ពី​ការបន្លំ​សន្លឹកឆ្នោត​អ្វី​​នោះឡើយ។

ទោះយ៉ាងនេះ​ក្តី ប្រជាជន​ម៉ាដាហ្កាស្កា​ត្រូវ​រង់ចាំ​ពេល​១៥ថ្ងៃ​ទៀត ដើម្បី​ដឹង​ថា តើ​លោក ហេរី រ៉ាចាវណារី ម៉ាមពីយ៉ានីណា ពិត​ជា​ក្លាយ​ជា​ប្រធានាធិបតី​​ថ្មី​ រឺ​ក៏​យ៉ាងណា។ ក្នុង​រយៈពេល​១៥ថ្ងៃ​នេះ តុលាការ​ទទួលបន្ទុក​ត្រួតពិនិត្យ​ពាក្យបណ្តឹង​​ប្រឆាំង​ការបោះឆ្នោត នឹង​​ពិចារណា ស៊ើបអង្កេត​មើលថា តើ​ខ្លួន​អាច​សំរេច​អោយ​លោក​ហេរី​ ធ្វើ​ជា​ប្រធានាធិបតី ស្របតាម​លទ្ធផល​បោះឆ្នោត​នោះ​ដែរ​រឺទេ។ បេក្ខជន​រ៉ូប៊ីនសុន​ដែល​ចាញ់ឆ្នោត​នោះ បាន​ដាក់ ពាក្យបណ្តឹង​​ទៅ​តុលាការ បរិហារ​ពី​ការ​ក្លែងបន្លំ​សន្លឹកឆ្នោត​លើសលុប និង​សុំអោយ​តុលាការ​សំរេច​ថា ការ​បោះឆ្នោត​កន្លងមក មិនមាន​សុពលភាព​​នោះទេ។

ម៉ាដាហ្កាស្កា​​បាន​ធ្លាក់​ក្នុង​វិបត្តិនយោបាយ​​ ក្នុង​​​ឆ្នាំ២០០៩​ ​បន្ទាប់ពី​​​លោក​ម៉ាក រ៉ាវ៉ាឡូ​ ម៉ាណាណា ត្រូវ​គេ​ទំលាក់ពីតំណែងប្រធានាធិបតី។ លោក​​រ៉ាវ៉ាឡូម៉ាណាណា កំពុង​ភៀសខ្លួន​​នៅ​​អាហ្វ្រិក​ខាងត្បូង។ លោក​គ្មាន​សិទ្ធិ​ឈរឈ្មោះ​ជាប្រធានាធិបតី​ក្នុង​ពេលកន្លងទៅ​នេះ​​ទេ។ ហើយ​លោក​ អាន់ឌ្រី រ៉ាចូលីណា ដែល​បាន​ទំលាក់​អតីតប្រធានាធិបតី​រូបនេះ​ពី​តំណែង​​​ ក៏​គ្មានសិទ្ធិ​ឈរឈ្មោះ​ក្នុង​ការបោះឆ្នោត​ប្រធានាធិបតី​​​កន្លងទៅ​នេះ​ដែរ ព្រោះ​សហគមន៍​អន្តរជាតិ​ខ្លាច​មាន​ចលាចល​ក្នុង​ស្រុក៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ