អានតួអត្ថបទ
ម៉ាដាហ្កាស្កា

បោះឆ្នោត​ម៉ាដាហ្កាស្កា​ជុំទី២៖​បេក្ខជន​ប្រជែងគ្នា​ទាំងពីររូប​ ចោទគ្នា​ទៅវិញទៅមក​ ថា​លួចបន្លំ​សន្លឹកឆ្នោត​

បេក្ខជន​ប្រធានធិបតីសំរាប់​ការបោះឆ្នោត​​​ជុំទី២ នៅ​ម៉ាដាហ្កាស្កា លោក Robinson Jean Louis (ឆ្វេង) និង​លោក Hery Rajaonarimampianina
បេក្ខជន​ប្រធានធិបតីសំរាប់​ការបោះឆ្នោត​​​ជុំទី២ នៅ​ម៉ាដាហ្កាស្កា លោក Robinson Jean Louis (ឆ្វេង) និង​លោក Hery Rajaonarimampianina RFI/Marie Audran
ដោយ៖ ព្រំ សឿន សូលីណា
១៦ នាទី

នៅ​ម៉ាដាហ្កាស្កា បន្ទាប់​ពី​ការបោះឆ្នោត​ជ្រើសរើស​ប្រធានាធិបតី​ជុំទី២ បាន​បញ្ចប់​ទៅ​កាលពីថ្ងៃសុក្រកន្លងទៅ​ នៅថ្ងៃ​សៅរ៍នេះ បេក្ខជន​ឈរឈ្មោះ​ជាប្រធានាធិបតី​​​​ទាំងពីររូប បាន​អះអាង​រៀងៗខ្លួនថា ខ្លួន​ជា​អ្នក​ឈ្នះឆ្នោត ត្រូវ​ធ្វើជាប្រធានាធិបតី។ ​បេក្ខជន​ទាំងពីររូប​នោះ គឺ​លោក ហ្សង់ល្វី​ រ៉ូប៊ីនសុន មកពី​គណបក្ស​​​អាវ៉ាណា AVANA ដែល​ជា​គណបក្ស​របស់​អតីត​ប្រធានាធិបតី​ម៉ាក រ៉ាវ៉ាឡូម៉ាណាណា ហើយ​មួយរូប​ទៀត​ គឺ​លោក​ហេរី​រ៉ាចាវ​ណារីម៉ាំពីយ៉ានីណា​​ មកពី​សមាគម​ឈ្មោះ​កម្លាំងថ្មីសម្រាប់​ម៉ាដាហ្កាស្កា។ ពួកគេ​ទាំងពីរ​បាន​ចោទគ្នា​ទៅវិញ​ទៅមក​ថា បាន​លួច​បន្លំសន្លឹកឆ្នោត។

ផ្សាយពាណិជ្ជកម្ម

នៅប្រទេស​ម៉ាដាហ្កាស្កា ថ្ងៃ​សៅរ៍​​​នេះ ​ទាំង​លោក ហ្សង់ល្វី​ រ៉ូប៊ីនសុន បេក្ខជន​ឈរឈ្មោះ​ជាប្រធានាធិតី មកពី​គណបក្ស​​​​អាវ៉ាណា AVANA ​​របស់​អតីត​ប្រធានាធិបតី​ម៉ាក រ៉ាវ៉ាឡូម៉ាណាណា ទាំង​លោក​ហេរី រ៉ាចាវណារីម៉ាំពីយ៉ានីណា បេក្ខជន​ប្រធានាធិបតី​ មកពី​សមាគម​ឈ្មោះ​ថា កម្លាំងថ្មីសម្រាប់​ម៉ាដាហ្កាស្កា ដែល​កាន់អំណាច​​ក្នុងប្រទេស សុទ្ធ​តែ​បាន​ចោទគ្នា​ទៅវិញ​ទៅមក​ថា បាន​លួច​បន្លំសន្លឹកឆ្នោត ក្នុង​ការ​បោះឆ្នោត​ប្រធានាធិបតី​ជុំទី២​ កាលពី​ថ្ងៃ​សុក្រ​កន្លងទៅ។​ ការរាប់សន្លឹកឆ្នោត​មិនទាន់​បាន​ចាប់​ផ្តើម​ទៅ​បាន​ស្រួល​ផង បេក្ខជន​​ទាំងពីរ​រូប​សុទ្ធ​តែ​ប្រកាស​ដណ្តើមជ័យជំនះ​​ និង​​ចោទប្រកាន់​គ្នា​ទៅវិញ​ទៅមក​រៀងខ្លួន។

នៅម៉ោង​ប្រមាណ​មួយរសៀល ថ្ងៃសៅរ៍​ គណៈកម្មការ​បោះឆ្នោត​ឯករាជ្យ​ហៅកាត់ថា សេនីត Cenit បានចុះផ្សាយ​លទ្ធផល​នៃការបោះឆ្នោត​ជុំទី២ សំរាប់​ការិយាល័យ​ចំនួន​២០៤ ក្នុង​ចំណោម​ការិយាល័យ​សរុប​ ពីរម៉ឺន​មួយ ២000១ ​ការិយាល័យ។ យោងតាម​លទ្ធផល​សំរាប់​ការិយាល័យ​ចំនួន​២០៤ បេក្ខជន​រ៉ូប៊ីនសុន បានទទួល​សម្លេងឆ្នោត​៥០,២១ភាគរយ នាំមុខ​បេក្ខជន​​ រ៉ាចាវណារីម៉ាំពីយ៉ានីណា។

លោក​ហ្សង់ល្វី រ៉ូប៊ីនសុន រំពឹងថា ខ្លួន​ទទួលបាន​សម្លេង​ឆ្នោត​៥៦ភាគរយ ប៉ុន្តែ​ខាង​លោក​រ៉ាចាវណារីម៉ាំពីយ៉ានីណា ផ្នែក​អំណាច​ម៉ាដាហ្កាស្កា​ឯណោះវិញ បាន​ប្រកាស​​ថា បេក្ខភាព​ខ្លួន​បានទទួលសម្លេងឆ្នោត​ពី​៦០ទៅ៦៥ភាគរយ។ លោករ៉ូប៊ីនសុន​ប្រាប់​ថា ​បាន​​រកឃើញ​​សន្លឹកឆ្នោត​សន្ធឹកសន្ធាប់​ ​ជា​សន្លឹកឆ្នោត​គាំទ្រ​​ដៃគូ​ប្រជែង​របស់​លោក។ លោក​រ៉ាចាវណារី​ម៉ាំពីយ៉ានីណា​ បានចោទ​ទៅវិញ ថា​មាន​ភស្តុតាង​​គ្រប់គ្រាន់​ថា ខាង​លោក​រ៉ូប៊ីនសុន​​​​​​​ត្រួតត្រា និង​កេងបន្លំ​​ក្នុង​ពេល​បោះឆ្នោត។ ​

កាលពីថ្ងៃសុក្រ ប្រជាជន​ម៉ាដាហ្កាស្កា​បាន​នាំគ្នា​ទៅបោះឆ្នោត​ជុំទី២ ជ្រើសរើស​ប្រធានាធិបតី និង​​តំណាងរាស្ត្រ​១៥១រូប។ ការបោះឆ្នោតនេះ​មានលក្ខណៈ​​ចាំបាច់​បំផុត​ដើម្បី​​​ដោះស្រាយ​វិបត្តិ​នយោបាយ​ និង​សេដ្ឋកិច្ច​ បន្ទាប់​ពី​ម៉ាដាហ្កាស្កា​​ធ្លាក់​ក្នុង​វិបត្តិនយោបាយ​នៅ​​ឆ្នាំ២០០៩មក ពោលគឺ​បន្ទាប់ពី​​អតីត​ប្រធានាធិបតី ម៉ាក រ៉ាវាឡូម៉ាណាណា ត្រូវ​គេ​ទំលាក់ពីតំណែង​មក។

លោក​​រ៉ាវ៉ាឡូម៉ាណាណា កំពុង​ភៀសខ្លួន​​នៅ​អាហ្វ្រិក​ខាងត្បូង។ លោក​គ្មាន​សិទ្ធិ​ឈរឈ្មោះ​ជាប្រធានាធិបតី​ពេលកន្លងទៅ​នេះ​​ទេ។ ហើយ​លោក​ អាន់ឌ្រី រ៉ាចូលីណា ដែល​បាន​ទំលាក់​អតីតប្រធានាធិបតី​រូបនេះ​ពី​តំណែង​​នោះ ក៏​គ្មានសិទ្ធិ​ឈរឈ្មោះ​ក្នុង​ការបោះឆ្នោត​ប្រធានាធិបតី​​​នេះដែរ ព្រោះ​សហគមន៍​អន្តរជាតិ​ខ្លាច​មាន​ចលាចល​ក្នុង​ស្រុក៕ 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ