ម៉ាឡេស៊ី

យន្តហោះ​ម៉ាឡេស៊ី​បាត់ ការ​អង្កេត​​ផ្តុំ​​លើ​​អ្នក​​បើក​បរ​​និង​​អ្នក​ដំណើរ

នាយករ​ដ្ឋមន្ត្រី​ម៉ាឡេស៊ី​លោក Najib Razakធ្វើ​សន្និសីទ​កាសែត​ផ្តល់​ព័ត៌មាន​អំពី​ដំណើរការ​ស៊ើប​រក​យន្តហោះ
នាយករ​ដ្ឋមន្ត្រី​ម៉ាឡេស៊ី​លោក Najib Razakធ្វើ​សន្និសីទ​កាសែត​ផ្តល់​ព័ត៌មាន​អំពី​ដំណើរការ​ស៊ើប​រក​យន្តហោះ REUTERS/Damir Sagolj

៧​ថ្ងៃ​ក្រោយ​ការ​បាត់​យន្តហោះ​ប៊ូអ៊ីន​នៃ​ក្រុមហ៊ុន​ម៉ាឡេស៊ីអ៊ែរឡាញ បាន​ងាក​ផ្តោត​លើ​ការ​បង្វែរ​ដាន។ នាយក​រដ្ឋមន្ត្រី​ម៉ាឡេស៊ី​បាន​ប្រកាស​ថា ទិសដៅ​ហោះហើរ ទំ​នង​ជា​ត្រូវ​បាន​ប្តូរ​ផ្លាស់​ដោយ​ស្នាដៃ​មនុស្ស។ មនុស្ស​ដែល​មាន​បទ​ពិសោធន៍​ ក្នុង​ការ​បើក​បរ​ ហើយ​យន្តហោះ​បន្ត​ហោះហើរ​ រយៈ​ពេល​ជិត​៧​ម៉ោង ទម្រាំ​បាត់​ខ្លួន​ឈឹង​រហូត​មក​ទល់​ពេល​នេះ​ម៉ោង​នេះ។ តើ​យន្តហោះ​នោះ​ទៅណា ? ចុះ​ចត​នៅកន្លែងណា​មួយ ? ឬ​ក៏​ធ្លាក់​បាត់​ក្នុង​សមុទ្ទ​ ? សំណួរ​​មាន​ច្រើន​ តែ​គ្មាន​ចម្លើយ​ដដែល។ ការស្វែង​រក​ពេលនេះ បន្ត​ធ្វើ​នៅ​ក្នុង​មហា​សមុទ្ទ​ឥណ្ឌា​ម្តង។

ផ្សាយពាណិជ្ជកម្ម

លោក​នាយក​រដ្ឋមន្ត្រី​ម៉ាឡេស៊ី មិន​បាន​ប្រើពាក្យ​ច្បាស់ៗ ថា​ជាការ​បង្វែរ​ដាន​​ទេ ប៉ុន្តែ​លោក​បានបញ្ជាក់​ថា ការ​​យន្តហោះ​បាន​បើក​ខុស​ទិស​ដែល​គ្រោង​ទុក។ ​នេះ​ជា​លើក​ទី​មួយ​ហើយ ដែល​អាជ្ញាធរ​ម៉ាឡេស៊ី បាន​បញ្ជាក់​ជា​ផ្លូវការ​ថា យន្តហោះ​​បាន​បក​ក្រោយ​ មុន​នឹង​បាត់​ខ្លួន​​​ទៅ​យ៉ាង​ចម្លែក​កាលពី​សប្តាហ៍មុន។

 
យន្តហោះ​ទំនង​ជា​ប្តូរ​ទិស​ ហោះ​រំលង​ប្រទេស​ម៉ាឡេស៊ីវិញ ដោយ​មាន​មនុស្ស​ប្រកប​ដោយ​បទ​ពិសោធន៍​ទៅ​ចុច កាច់​បិទ​ប្រព័ន្ធ​ទូរគមនាគមន៍និង​ប្រព័ន្ធ​ដៅ មិន​ឱ្យ​រ៉ាដា​ត្រួតពិនិត្យ​ការ​ហោះហើរ​ចាប់​បាន។ ប្រព័ន្ធ​ផ្កាយ​រណប​យោធា​បាន​ទទួល​ សញ្ញា​ចុង​ក្រោយបំផុត ​ គឺ​នៅ ៦​ម៉ោង​កន្លះ ​ ក្រោយ​យន្តហោះ​បាត់​ខ្លួន​ពី​ប្រព័ន្ធ​រ៉ាដា ព្រោះ​សូម​បញ្ជាក់​ថា​យន្តហោះ​ប៊ូអ៊ីន៧៧៧​នេះ​​ប្រេង​បំរុង​អាច​​ហោះហើរ​បាន​៧​ម៉ោង។​

►សូម​អាន ៖ សន្និសីទ​កាសែត​របស់​នាយក​រដ្ឋមន្ត្រី​ម៉ាឡេស៊ី​​ជា​ភាសា​អង់គ្លេស​

បើ​តាម​កាសែត​ The New York Time ដែល​បាន​សូត្រ​ប្រភព​ព័ត៌មាន​ស្និទ្ធ​នឹង​អ្នក​អង្កេត​អាមេរិក យន្តហោះ​ MH370 មិន​ត្រឹម​តែ​ហោះ​ខុស​ទិសម្តង​ជា​ពីរ​ដង​​ទេ តែ​ថែម​ទាំង​ហោះ​ក្នុង​រយៈ​កម្ពស់​ ខ្ពស់​ជាង​និង​ទាប​ជាង​ការ​អនុញ្ញាត ជា​ច្រើន​លើក​ច្រើនសា។

ពេល​នេះ​អ្នក​អង្កេត​បាន​ ប្រមូល​ផ្តុំ​ការ​ស្រាវជ្រាវ​មក​លើ​ អ្នកបើកបរ​និង​អ្នក​បំរើ​តាម​យន្តហោះ ព្រម​ទាំង​​អ្នក​ដំណើរ។ ឯ​ការ​ស្វែង​រក​បំណែ​ក​យន្តហោះ​ជា​យថាហេតុ ដែល​មាន​ប្រទេស​ចំនួន​១៤​ យន្តហោះ​៥៨​គ្រឿង និង​នាវា​៤៣ ចូល​រួម​ ត្រូវ​ងាក​មក​រកខាង​មហា​សមុទ្ទ​ឥណ្ឌា​វិញ។ ប្រតិបត្តិការ​នៅ​ សមុទ្ទ​ចិន​ខាង​ត្បូងត្រូវ​ លុប​ចោល។ ​​ក្រុម​អ្នក​អង្កេត​បានផ្តោត​​អាទិភាព​លើ​ទិសដៅ​សំខាន់ៗ​ពីរ ៖ យន្តហោះ​អាច​ហោះ​ទៅ​ប៉ែក​ខាង​ជើងពី​ប្រទេស​ថៃទៅ​ប្រទេស​កាហ្សាក់ស្ថានឬ​ទៅ​ខាង​ត្បូងពី​ឥណ្ឌូណេស៊ី​ទៅ​មហា​សមុទ្ទ​ឥណ្ឌា។

សន្និសីទ​កាសែត​របស់​នាយក​រដ្ឋមន្ត្រី​ម៉ាឡេស៊ី​​ កាលពី​ព្រឹក​ថ្ងៃ​សៅរ៍ បាន​ធ្វើ​សេណារីយោ ភេរវកម្ម​រស់​រវើក​ឡើង​វិញ។ ភេរវជន​ដែល​អាចប​ង្ខំ​អ្នក​បើក​បរ​ឱ្យ​ប្តូរ​ទិស​ដៅ​ហោះហើរ និង​កាត់​ផ្តាច់​ប្រព័​ន្ធ​​ផ្តល់​​ព័ត៌មាន​រ៉ាដា ឬ​ពុំ​នោះ​ទេ​ជា​ចេតនា​របស់​អ្នក​បើក​ ម្នាក់​ក្នុង​ចំណោម​ ឬ​អ្នក​បើក​ទាំង​ពីរ៕
 

 

 

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI