អានតួអត្ថបទ
អ៊ីរ៉ង់

ទោះជា​មាន​​ទណ្ឌកម្ម​​អន្តរជាតិ​​ក៏ដោយ ​​ក៏អ៊ីរ៉ង់​នៅតែ​​ពង្រឹង​​សកម្មភាព​​នុយក្លេអ៊ែរ​​​

លោក​ Yukiya Amano ​អគ្គ​នាយក​​នៃ​ទីភ្នាក់ងារ​​អន្តរជាតិ​​ខាង​ថាមពល​​នុយក្លេអ៊ែរ​​ AIEA​
លោក​ Yukiya Amano ​អគ្គ​នាយក​​នៃ​ទីភ្នាក់ងារ​​អន្តរជាតិ​​ខាង​ថាមពល​​នុយក្លេអ៊ែរ​​ AIEA​ DIETER NAGL / AFP
ដោយ៖ សៀក សារិន
1 នាទី

ទោះបីជា​សហគមន៍​អន្តរជាតិ​បាន​ដាក់​ទណ្ឌកម្ម​យ៉ាងណា​ក៏​ដោយ​ ​ ក៏​ប្រទេស​អ៊ីរ៉ង់​នៅតែ​បន្ត​ពង្រឹង​ពង្រីក​ទ្វេ​សកម្មភាព​ចម្រើន​ធាតុ​ uranium ​នៅ​មជ្ឈមណ្ឌល​ ហ្វ័រដូ។​ ហើយបើ​យោងតាម​របាយការណ៍​នៅ​ថ្ងៃ​ព្រហស្បតិ៍​ម្សិលមិញ​របស់​ទីភ្នាក់ងារ​អន្តរជាតិ​ខាង​ថាមពល​នុយក្លេអ៊ែរ​ AIEA ​ដែលបាន​ចោទ​យ៉ាងធ្ងន់ៗ​ទៅលើ​ទីក្រុង​តេហេរ៉ង់​ថា​ បាន​បង្ក​ឧបសគ្គ​ខាឃាំង​ដល់​ការ​ត្រួត​ពិនិត្យ​មើល​របស់​ AIEA ​ នៅ​មជ្ឈមណ្ឌល​ Parchin ​។

ផ្សាយពាណិជ្ជកម្ម

សាធារណរដ្ឋ​អ៊ីស្លាម​អ៊ីរ៉ង់​ធ្លាប់បាន​រៀបចំ​ឲ្យមាន​ឧបករណ៍​ centrifugeuses ប្រមាណ​២ ០០០​នៅ​មជ្ឈមណ្ឌល​នុយក្លេអ៊ែរ​ ហ្វ័រដូ​នៅ​ថ្ងៃទី​១៨សីហា​កន្លងទៅ​ ​ ទល់នឹង​ប្រមាណ​ជា​១ ០០០​នៅខែ​ឧសភា​ ​ នេះ​បើយោងតាម​ឯកសារ​របស់​ ទីភ្នាក់ងារ​អន្តរជាតិ​ខាង​ថាមពល​នុយក្លេអ៊ែរ​ AIEA ។​ ក្នុង​ចំណោមនេះ​ មាន​ប្រមាណជា​៧០០​កំពុង​មាន​សកម្មភាព​ ​ នេះ​ជាការ​គូស​បញ្ជាក់​បន្ថែម​របស់​ AIEA។

 
សហរដ្ឋ​អាមេរិក​ឯណោះ​បាន​ព្រមាន​ប្រទេស​អ៊ីរ៉ង់ថា​ ​“ពេលវេលា​សម្រាប់​ការរិះរក​ដំណោះស្រាយ​តាម​ផ្លូវទូត​ មាន​កម្រិត”​ ​ នេះជា​សេចក្តី​ប្រកាស​របស់​លោក​ Jay Carney ​អ្នកនាំពាក្យ​របស់​លោក​ប្រធានាធិបតី​បារ៉ាក់​អូបាម៉ា។

គួរ​កត់​សម្គាល់​ថា​ ​ uranium ​ចម្រើនធាតុ​អាច​ត្រូវ​គេ​យកមក​ប្រើ​សម្រាប់​ផលិត​អគ្គិសនី​ឬ​យកមក​ប្រើ​ក្នុង​វិស័យ​វេជ្ជសាស្ត្រ​សម្រាប់​ព្យាបាល​ជម្ងឺ​មហារីក។​ ក៏​ប៉ុន្តែ​បើគេ​ចម្រើន​ធាតុ​រហូត​ដល់ទៅ​៩០%​ ​ នោះ​គេ​អាច​យកមក​ប្រើ​សម្រាប់​ផលិត​អាវុធ​នុយក្លេអ៊ែរ។

រីឯ​ប្រទេស​លោកខាងលិច​និង​ប្រទេស​អ៊ីស្រាអែល​សង្ស័យ​ទីក្រុង​តេហេរ៉ង់​ថា​ ​កំពុង​បន្ត​សកម្មភាព​ផលិត​អាវុធ​នុយក្លេអ៊ែរ​ ​ ដោយយក​កម្មវិធី​នុយក្លេអ៊ែរ​ស៊ីវិល​មក​ធ្វើ​ជា​រនាំង​សម្រាប់​បិទបាំង។

ទីក្រុង​តេហេរ៉ង់​បាន​ឆ្លើយ​បដិសេធ​ការចោទ​ប្រកាន់​ខាងលើនេះ​ជា​ផ្លូវការ។​ សូមបញ្ជាក់ថា​ ​ ក្រុមប្រឹក្សា​សន្តិសុខ​អ.ស.ប.​បាន​ចេញ​សេចក្តី​សម្រេចចិត្ត​៦លើក​រួចហើយ​ប្រឆាំង​នឹង​សកម្មភាព​​នុយក្លេអ៊ែរ​របស់​អ៊ីរ៉ង់​ ​ ដែលក្នុង​នោះ​មាន​សេចក្តី​សម្រេចចិត្ត​៤​ដែលមាន​ភ្ជាប់​មក​ជាមួយ​នូវ​ទណ្ឌកម្ម​ ​ ដោយហេតុ​តែ​សកម្មភាព​ចម្រើន​ធាតុ​ uranium ​របស់​ប្រទេសអ៊ីរ៉ង់៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ