រុស្ស៊ី-អ៊ីរ៉ង់

នៅម៉ូស្គូ អន្តរជាតិ​អារ​កាត់​វាសនា កម្មវិធី​នុយក្លេអ៊ែរ​អ៊ីរ៉ង់

កិច្ច​ចរចា​ឆ្ពោះ​ទៅរក​ច្រកចេញ​អោយ កម្មវិធី​នុយក្លេអ៊ែរ​អ៊ីរ៉ង់
កិច្ច​ចរចា​ឆ្ពោះ​ទៅរក​ច្រកចេញ​អោយ កម្មវិធី​នុយក្លេអ៊ែរ​អ៊ីរ៉ង់

អារ​កាត់នេះ គឺ​ក្នុង​កិច្ចចរចា ដែល​ចាប់ផ្តើម​ថ្ងៃនេះ ហើយ​ពន្យារ​ទៅ​ដល់​ស្អែក ដោយមាន​ការចូលរួម​នៃ ៦​អន្តរការី​អន្តរជាតិ និង​ភាគី​អ៊ីរ៉ង់​ផ្ទាល់។ នៅលើ​តុ​ចរចា មាន​សំណើ​២ឆ្ពោះ​ទៅរក​ច្រកចេញ ឲ្យ​ដំណោះស្រាយ កម្មវិធី​នុយក្លេអ៊ែរ​អ៊ីរ៉ង់ ដើម្បី​បញ្ចៀស កម្មវិធី​នេះ ឲ្យ ផុត​ពី​ការបម្រើ ដល់​គោលដៅ​យោធា។

ផ្សាយពាណិជ្ជកម្ម

 

ជា​បឋម ក្នុង​៦​អន្តរការី​អន្តរជាតិ​នោះ គឺ គ្រប់​តែ​៥​ប្រទេស សមាជិក​អចិន្ត្រៃយ៍ នៃ ក្រុមប្រឹក្សា​សន្តិសុខ​អ.ស.ប. មាន ស.រ.អា. រុស្ស៊ី ចិន បារាំង អង់គ្លេស និង​ដោយ​ឡែក អាល្លឺម៉ង់ ដែល​តំណាង​ឲ្យ សហភាព​អឺរ៉ុប ព្រមទាំង​សាមី​ភាគី​អ៊ីរ៉ង់​ផ្ទាល់។

ជំនួប​ចាប់ផ្តើម​ឡើង​ពី​សម័យ​ប្រជុំ​ពេញអង្គ ដែល​ឡើងថ្លែង គឺ​លោកស្រី Catherine Ashton ជា​ប្រមុខ​ការទូត​របស់​សហភាព​អឺរ៉ុប គឺ នាយក​ផ្នែក​នយោបាយ​របស់ ៦អន្តរការី​អន្តរជាតិ   
ព្រមទាំង លេខា​នៃ​ឧត្តម​ក្រុមប្រឹក្សា​សន្តិសុខ​ជាតិ​អ៊ីរ៉ង់ លោក Said Jalili។

សំណើ​នៅលើ​តុចរចា មាន​ពីរ៖ មួយ​ពី​ខាង ៦​អន្តរការី​អន្តរជាតិ, មួយទៀត​ពី​ខាងអ៊ីរ៉ង់។
ភារកិច្ច​ដែល​ចោទ គឺ​ត្រូវ​ស្វែងរក​រូបមន្ត ដែល​ម្ខាងៗ​អាច​ទទួល​យកបាន​ដូចគ្នា។ ក្នុង​រូបមន្ត​នេះ មាន​ចំណុច​២​ជា​គន្លឹះ ៖ ទី១- អ៊ីរ៉ង់​ត្រូវ​កម្រិត ការ​ចម្រើន​ធាតុ​អ៊ុយរ៉ានីយ៉ូម ឲ្យ​ចុះ​ពី​២០% មក នៅ​ត្រឹម​៣,៥% ឫ ៥%។ ទី២- អ៊ីរ៉ង់​ត្រូវ​បញ្ឈប់​ទាំងស្រុង ការងារ​ខាង​ចម្រើន​ធាតុអ៊ុយរ៉ានីយ៉ូម នៅ​រោងចក្រ​ក្រោមដី “ Fordo “ ឫ ថែម​ទាំង​បិទ​រោងចក្រ​នេះ ឲ្យ​ឈប់​ដំណើរការ​តែម្តង។

ជា​ថ្នូរ អ៊ីរ៉ង់ នឹង​ត្រូវ​អនុញ្ញាត ឲ្យ​ផលិត​ពី អ៊ុយរ៉ានីយ៉ូម​ចម្រើន​ធាតុ​បាន​ដល់​កម្រិត​ខ្ពស់​ទៅហើយ ក្នុង​បរិមាណ ១៤៥ គីឡូក្រាម​ដែល​អ៊ីរ៉ង់​មាន​ស្រាប់ ទៅ​ជា ”បំពង់​ឥន្ធនៈ” សម្រាប់​ប្រតិករ ស្រាវជ្រាវ​វេជ្ជសាស្ត្រ នៅ​ឯ​ជាយ​ក្រុងTeheran ដោយ​ស្ថិតនៅ​ក្រោម​ការ​ត្រួតពិនិត្យ របស់ “ទីភ្នាក់ងារ​អន្តរជាតិ​ខាង​ថាមពល​បរមាណូ” AIEA។ គ្រាន់តែ អ៊ីរ៉ង់​បំពេញ​តាម​ចំណុច​ខាងលើ ដូច​ចិត្ត​មែន នោះ ទណ្ឌកម្ម​ទល់នឹង​ប្រទេសនេះ នឹង​ត្រូវ​លុប​ទៅវិញ​ភ្លាម។

ដូច​គេ​ដឹង​ស្រាប់ លោក​ខាងលិច​តែង​សង្ស័យថា កម្មវិធី​នុយក្លេអ៊ែរ​អ៊ីរ៉ង់ បង្កប់​ទៅដោយ គោលដៅ​យោធា។ ពេល​ថ្មី​ៗ ពួកមន្ត្រី​អធិការ របស់ AIEA បាន​រកឃើញ ក្នុង​រោងចក្រ “ Fordo “ គឺ​ស្នាម​នៃ​ធាតុអ៊ុយរ៉ានីយ៉ូម​មាន​កម្រិត​ដល់ ២៧% ឯណោះ។ ប៉ុន្តែ អាជ្ញាធរអ៊ីរ៉ង់ បាន​ដោះសា ថា ការ​កើនឡើង​លើសពី​កម្រិត​២០%នោះ គឺ​បណ្តាល​មកពី មូលហេតុ​បច្ចេកទេស​ទេតើ ហើយ នៅតែ​អះអាង​ថា កម្មវិធី​នុយក្លេអ៊ែរ​អ៊ីរ៉ង់ ដក់​ជាប់​ទៅដោយ​គោលដៅ​ស៊ីវិល​សុទ្ធសាធ។

តាម​កាសែត​រុស្ស៊ី​ឈ្មោះ Kommersant លេខ​ថ្ងៃនេះ ជំនួប​ក្រុង​ម៉ូស្គូ នៃ ៦​អន្តរការី​អន្តរជាតិ និង ភាគី​អ៊ីរ៉ង់​ផ្ទាល់ អាច​នាំមក​ជា​លទ្ធផល​ជាក់លាក់ ប៉ុន្តែ​បស្ចិមលោក នឹង​ខំ​ខ្នះខ្នែង ឲ្យ​ជំនួប​នេះ ធ្លាក់​ក្នុង​បរាជ័យ​ទេ​តើ ដ្បិត ជោគជ័យ​នៃ​កិច្ចចរចា​នេះ នឹង​មាន​ន័យ​ជា អត្ថប្រយោជន៍​នយោបាយ សម្រាប់​លោកពូទីន ដែល​ក្រោយ​ពី​ត្រឡប់​ទៅវិមាន​ក្រេមឡាំងវិញ បង្ហាញ​កាន់​តែ​សកម្មឡើងៗ នូវ​គោលជំហរ​រុស្ស៊ី នៅលើ​ឆាក​នយោបាយ​ពិភពលោក៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI