អ៊ីស្រាអែល

បោះឆ្នោតសភា​អ៊ីស្រាអែល៖ជ័យជម្នះ​គួរ​ឲ្យ​ភ្ញាក់ផ្អើល​របស់​លោក​នាយករដ្ឋមន្រ្តី​ផុត​អាណត្តិនេតាន់យ៉ាហ៊ូ​

បោះឆ្នោតសភា​អ៊ីស្រាអែល៖លោកនេតាន់យ៉ាហ៊ូ​បន្ត​កាន់​តំណែង​នាយករដ្ឋមន្រ្តី​អាណត្តិ​ថ្មី
បោះឆ្នោតសភា​អ៊ីស្រាអែល៖លោកនេតាន់យ៉ាហ៊ូ​បន្ត​កាន់​តំណែង​នាយករដ្ឋមន្រ្តី​អាណត្តិ​ថ្មី REUTERS/Amir Cohen

នៅ​ប្រទេស​អ៊ីស្រាអែល លទ្ធផល​នៃ​ការ​បោះឆ្នោត​សភា​នា​ថ្ងៃ​អង្គារ ទី១៧ មីនា​បាន​ផ្តល់​ជោគជ័យ​ធំធេង​ដល់​លោក​នាយករដ្ឋមន្រ្តី​ផុត​អាណត្តិ​បិនយ៉ាមីន នេតាន់យ៉ាហ៊ូ។ លទ្ធផល​ប្រកាស​ដោយ​គណៈកម្មការជាតិ​​រៀបចំ​បោះឆ្នោត​នៅ​ថ្ងៃ​នេះ​ឲ្យ​ដឹង​ថា គណបក្សស្តំានិយម Likoud របស់​លោក​នេតាន់យ៉ាហ៊ូ​ទទួល​បាន​អសនៈ​ចំនួន ២៩កៅអី​នៅ​ក្នុង​ចំណោម ១២០អសនៈ​ដែល​មាន​នៅ​ក្នុង​រដ្ឋសភា។ ចំណែក​គណបក្ស​ស្ថិត​លំដាប់​ទី២ គឺ​គណបក្ស​ពលករ Union sioniste របស់​លោក អ៊ីហ្ស៉ាក់ អ៊ែរហ្សូ​ទទួល​បាន ២៤អសនៈ។ អ្វី​ជា​ការ​កត់សម្គាល់ គឺ​ការ​ស្ទុះ​ឡើង​របស់​គណបក្ស​អារ៉ាប់ Liste commune ដោយ​ទទួល​បាន​ដល់​ទៅ ១៤អសនៈ។

ផ្សាយពាណិជ្ជកម្ម

ជ័យជម្នះ​របស់​លោក​នេតាន់យ៉ាហ៊ូ​នៅ​ក្នុង​ការ​បោះឆ្នោត​ពេល​នេះ​បាន​ធ្វើ​ឲ្យ​គ្រប់​គ្នា​ភ្ញាក់ផ្អើល​យ៉ាង​ខ្លំាង នេះ​ក៏​ដោយសារ​ថា នៅ​មុន​ការ​បោះឆ្នោត លទ្ធផល​នៃ​ការ​ស្ទង់មតិ​ធ្វើ​ឡើង​ដោយ​វិទ្យាស្ថាន​ស្ទង់មតិ​នានា​បាន​ផ្តល់​ជោគជ័យ​យ៉ាង​ធំធេង​ដល់​គណបក្ស​កណ្តាលឆ្វេងនិយម Union sioniste របស់​លោក អ៊ីហ្ស៉ាក់ អ៊ែរហ្សូ​ដែល​ជា​បក្សប្រឆំាង។ ចំណែក​គណបក្ស​ស្តំានិយម Likoud របស់​លោក​នាយករដ្ឋមន្រ្តី​ផុតអាណត្តិ​បិនយ៉ាមីន នេតាន់យ៉ាហ៊ូ​ស្ថិត​នៅ​លំដាប់​ទី២។ តែ​ទីបំផុត លទ្ធផល​ផ្លូវការ​បាន​ផ្តល់​ជោគជ័យ​ឲ្យ​លោក​នេតាន់យ៉ាហ៊ូ​ដោយ​ទទួល​បាន ២៩អសនៈ​ទល់​នឹង ២៤អសនៈ​សម្រាប់​លោក​អ៊ែរហ្សូ។ លោក​អ៊ែរហ្សូ​បាន​ទទួល​ស្គាល់​បរាជ័យ​របស់​ខ្លួន និង​ថ្លែង​សាទរ​ចំពោះ​លោក​នេតាន់យ៉ាហ៊ូ។

ប្រជាពលរដ្ឋ​អ៊ីស្រាអែល​ទូទៅ​ក៏​មាន​ការ​ភ្ញាក់ផ្អើល​ចំពោះ​លទ្ធផល​នេះ​ដែរ ព្រោះ​រហូត​ដល់​នាទី​ចុង​ក្រោយ​នៃ​ការ​បិទ​ទ្វារ​មណ្ឌល​បោះឆ្នោត​នៅ​យប់​មិញ ពួក​គេ​នៅ​តែ​មាន​ជំនឿ​លើ​ជោគជ័យ​របស់​គណបក្ស​កណ្តាលឆ្វេងនិយម Union sioniste របស់​លោក អ៊ីហ្ស៉ាក់ អ៊ែរហ្សូ។ ការ​ភ្ញាក់ផ្អើល​មួយ​ទៀត គឺ​ការ​ស្ទុះ​ឡើង​របស់​គណបក្ស​អារ៉ាប់ Liste commune ដែល​ទទួល​បាន​ដល់​ទៅ ១៤អសនៈ។ តែ​កិច្ចការ​ដំបូង​ដែល​លោក​ត្រូវ​ធ្វើ​ពេល​នេះ គឺ​ទៅ​ចរចា​ជាមួយ​គណបក្ស​តូចតាច​ដើម្បី​អាច​បង្កើត​រដ្ឋាភិបាល​ចម្រុះ​ថ្មី​បាន។

លោក​នេតាន់យ៉ាហ៊ូ​អាច​ធ្វើ​សម្បទាន​ខ្លះ​ដើម្បី​យក​សម្លេង​ពី​គណបក្ស​ផ្សេង

តាម​លទ្ធផល​បោះឆ្នោត​ឲ្យ​ដឹង​ថា មាន​គណបក្សនយោបាយ​ចំនួន ១០ ដែល​ទទួល​បាន​អសនៈ​តិច ឬ​ច្រើន ពោល​តំាង​គណបក្ស​ទទួល​បាន ២៩អសនៈ​ដល់​គណបក្ស​ទទួល​បាន ៤អសនៈ។ តែ​ដើម្បី​អាច​ឲ្យ​លោក​នេតាន់យ៉ាហ៊ូ​បង្កើត​រដ្ឋាភិបាលចម្រុះ​បាន លោក​ត្រូវ​ការ​សម្លេង​គំាទ្រ​យ៉ាង​៦១សម្លេង​នៅ​ក្នុង​រដ្ឋសភា​ដែល​មាន ១២០អសនៈ។ ឥឡូវ​នេះ គណបក្ស Likoud របស់​លោក​របស់​លោក​នេតាន់យ៉ាហ៊ូ​ដែល​មាន​សម្លេង​ក្នុង​ដៃ​ចំនួន ២៩សម្លេង​រួច​ហើយ​នោះ លោក​ត្រូវ​ទៅ​ចែចូវ​ជាមួយ​គណបក្ស​ដែគូ​ផ្សេង​ដើម្បី​ស្វែង​រក​សម្លេង​គំាទ្រ​បន្ថែម​យ៉ាង​តិច ៣២សម្លេង។ បើ​ផ្អែក​តាម​លទ្ធផល​ដែល​គណបក្ស​នីមួយៗ​ទទួល​បាន លោក​នេតាន់យ៉ាហ៊ូ​ប្រហែល​ជា​មិន​ជួប​ការ​លំបាក​ក្នុង​ការ​រក​គណបក្ស​ដៃគូ​ទេ តែ​លោក​ត្រូវ​តែ​ហ៊ាន​ធ្វើ​សម្បទាន​ខ្លះ ពោល​ត្រូវ​ប្រគល់​តំណែង​ក្រសួង​មួយ​ចំនួន​ឲ្យ​គណបក្សដៃគូ ពិសេស​ក្រសួង​ហិរញ្ញវត្ថុ។

មាន​គណបក្ស​ចំនួន ៥ ដែល​អាច​ចូលរួម​នៅ​ក្នុង​រដ្ឋាភិបាលចម្រុះ​ថ្មី​របស់​លោក​នេតាន់យ៉ាហ៊ូ គឺ​គណបក្សកណ្តាល​និយម​មួយ​ដែល​មាន ១០អសនៈ គណបក្សជាតិនិយម និង​ជាតិនិយមជ្រុល​ដែល​សរុប​មាន ១៤អសនៈ ព្រម​ទំាង​គណបក្ស​សាសនា orthodoxe ចំនួន​ពីរ​ដែល​មាន​អសនៈ​សរុប ១៣អសនៈ។ បើ​បូក​សរុប​ទៅ​ឃើញ​ថា លោក​នេតាន់យ៉ាហ៊ូ​អាច​ទទួល​បាន​សម្លេង​គំាទ្រ​ដល់​ទៅ ៦៥សម្លេង។ នៅ​ក្នុង​ករណី​ណា​ដែល​លោក​នេតាន់យ៉ាហ៊ូ​មិន​អាច​រក​គណបក្ស​ដៃគូ​ដើម្បី​អាច​បង្កើត​រដ្ឋាភិបាលចម្រុះ​ថ្មី​បាន លោក​ប្រធានាធិបតី​អាច​ស្នើ​ឲ្យ​ប្រធាន​គណបក្ស​ជាប់​ឆ្នោត​លំដាប់​ទី១ និង​ទី២ រួម​គ្នា​បង្កើត​រដ្ឋាភិបាល​បង្រួបបង្រួមជាតិ​មួយ​ដោយ​ប្តូរ​វេនគ្នា​ធ្វើ​នាយករដ្ឋមន្រ្តី​ម្តង​ម្នាក់។

សេដ្ឋកិច្ច និង​សង្គម ជា​សំណុំរឿង​អាទិភាព​ថ្មី​របស់​លោក​នេតាន់យ៉ាហ៊ូ

បើ​ប្រជាជន​អ៊ីស្រាអែល​បាន​បោះឆ្នោត​ឲ្យ​គណបក្ស Likoud របស់​លោក​នេតាន់យ៉ាហ៊ូ​ជា​ថ្មី​ពេល​នេះ​មាន​ន័យ​ថា ប្រជាជន​អ៊ីស្រាអែល​ពេញ​ចិត្ត​នឹង​នយោបាយ​ដឹកនំា​ដោយ​លោក​នេតាន់យ៉ាហ៊ូ​ក្នុង​រយៈពេល ២អាណត្តិ​កន្លង​មក។ ចូរ​កុំ​ភ្លេច​ថា បើ​លោក​នេតាន់យ៉ាហ៊ូ​បន្ត​កាន់​តំណែង​នាយករដ្ឋមន្រ្តី​ជា​ថ្មី​ពេល​នេះ គឺ​ជា​អាណត្តិ​ទី៣​របស់​លោក បើ​គិត​តំាង​ពី​ឆ្នំា ២០០៩ និង​ជា​អាណត្តិទី៤ បើ​គិត​តំាង​ពី​ឆ្នំា ១៩៨៧។

សម្រាប់​អាណត្តិ​ថ្មី​ពេល​នេះ លោក​នេតាន់យ៉ាហ៊ូ​ប្រាកដ​ជា​បន្ត​អនុវត្តន៍​នយោបាយ​ដែល​លោក​បាន​ធ្វើ​កន្លង​មក និង​ដែល​លោក​ត្រូវ​បន្ត​បញ្ចប់​កំណែទម្រង់​ខ្លះ​ដែល​បាន​ចាប់​ផ្តើម​ក្នុង​អាណត្តិ​កន្លង​មក។ តែ​អ្វី​ដែល​ថ្មី និង​ដែល​លោក​នេតាន់យ៉ាហ៊ូ​ត្រូវ​គិត​គូរ​បន្ថែម​នោះ គឺ​បញ្ហា​សេដ្ឋកិច្ច និង​សង្គម​ដែល​ជា​ការ​ទាមទារ​របស់​ប្រជាជន និង​ដែល​ជា​ប្រធានបទ​ចម្បង​នៃ​យុទ្ធនាការ​ឃោសនា​បោះឆ្នោត។ សូម​ជម្រាប​ជូន​ថា នៅ​ក្នុង​យុទ្ធនាការ​ឃោសនា​បោះឆ្នោត លោក​នេតាន់យ៉ាហ៊ូ​បាន​ផ្តល់​អាទិភាព​លើ​បញ្ហា​សន្តិសុខ​របស់​ប្រជាជន ពោល​ខុស​ពី​បេក្ខជន​របស់​បក្សប្រឆំាង​ដែល​ផ្តោត​សំខាន់​លើ​បញ្ហា​សេដ្ឋកិច្ច និង​សង្គម ពិសេស​ពី​បញ្ហា​ជីវភាព​រស់នៅ​ប្រចំាថ្ងៃ​របស់​ប្រជាជន។

ទាក់ទង​នឹង​សំណុំរឿង​អន្តរជាតិ​វិញ លោក​នេតាន់យ៉ាហ៊ូ​នឹង​បន្ត​ចេញ​មុខ​ប្រឆំាង​នឹង​កិច្ចព្រមព្រៀង​ស្តីពី​នុយក្លេអ៊ែរ​អ៊ីរ៉ង់​ដែល​សហគមន៍អន្តរជាតិ​កំពុង​បន្ត​ពិភាក្សា​ជាមួយ​អ៊ីរ៉ង់ និង​ដែល​លោក​នេតាន់យ៉ាហ៊ូ​បាន​ចាត់​ទុក​ជា​កិច្ចព្រមព្រៀង​ដ៏​អាក្រក់​រួច​ជា​ស្រេច។ និយាយ​ពី​​ជម្លោះ​ជាមួយ​ប៉ាឡេស្ទីន លោក​នេតាន់យាហ៊ូ​ត្រូវ​តែ​គោរព​ពាក្យ​សន្យា​នៅ​ថ្ងៃ​ឃោសនា​ចុង​ក្រោយ​ដែល​ថា លោក​នឹង​បន្ត​ប្រឆំាង​មិន​ឲ្យ​មាន​ការ​បង្កើត​រដ្ឋប៉ាឡេស្ទីន​ជា​ដាច់​ខាត៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI