ប៉ាឡេស្ទីន-អ៊ីស្រាអែល

ស្ថានភាព​ពុះកញ្រ្ជោល​នៅ​តំបន់​ស៊ីហ្សកដានី ក្រោយ​ការ​ស្លាប់​ទារក​ប៉ាឡេស្ទីន​ម្នាក់

ប្រជាជន​ប៉ាឡេស្ទីន​កំពុង​ដង្ហែរ​សព​ទារក​ដែល​ពួក​ជ្វីហ្វ​ជ្រុល​និយម​ដុត​សម្លាប់​ទំាង​រស់
ប្រជាជន​ប៉ាឡេស្ទីន​កំពុង​ដង្ហែរ​សព​ទារក​ដែល​ពួក​ជ្វីហ្វ​ជ្រុល​និយម​ដុត​សម្លាប់​ទំាង​រស់ REUTERS/Abed Omar Qusini

ស្ថានភាព​កំពុង​បន្ត​ពុះកញ្ជ្រោល និង​តានតឹង​កាន់​តែងខ្លំាង​រវាង​ភាគី​អ៊ីស្រាអែល និង​ប៉ាឡេស្ទីន។ ពេញ​មួយ​យប់​ថ្ងៃ​សុក្រ​ឆ្លង​ចូល​ថ្ងៃ​សៅរ៍ ទី១ សីហា​នេះ ប្រជាជន​ប៉ាឡេស្ទីន​ជា​ច្រើន​រយ​នាក់​បាន​បន្ត​ធ្វើ​បាតុកម្ម​ប្រឆំាង​នឹង​ការ​ដុត​ទារកប៉ាឡេស្ទីន​អាយុ ១៨ខែ​​ទំាង​រស់​ពី​សំណាក់​ពួក​ជ្វីហ្វ​និយមជ្រុល។ ការ​ប៉ះទង្គិច​គ្នា​រវាង​បាតុករ​ប៉ាឡេស្ទីន និង​ទាហាន​អ៊ីស្រាអែល​បាន​បណ្តាល​ឲ្យ​ស្លាប់​ជនជាតិ​ប៉ាឡេស្ទីន​ចំនួន ២នាក់ និង​រងរបួស​ជា​ច្រើន​នាក់។

ផ្សាយពាណិជ្ជកម្ម

អាលី នេះ​ជា​ឈ្មោះ​ទារក​ប៉ាឡេស្ទីន​អាយុ ១៨ខែ​ដែល​ត្រូវ​បាន​ពួក​ជ្វីហ្វនិយមជ្រុល​ដុត​សម្លាប់​ទំាង​រស់​នៅ​ក្នុង​ផ្ទះ។ ចំណែក​ឱពុក ម្តាយ និង​បងប្រុស​ម្នាក់​របស់​អាលី​អាយុ ៤ឆ្នំា​ក៏​កំពុង​ស្ថិត​ក្នុង​ស្ថានភាព​ស្លាប់ រស់​ដែរ។ នេះ​ហើយ​ជា​ចំណុច​ចាប់​ផ្តើម​នៃ​ការ​ផ្ទុះ​កំហឹង​របស់​ប្រជាជន​ប៉ាឡេស្ទីន​នៅ​ក្នុង​ទីក្រុង​ហ្សេរុយសាឡឹម​ខាងកើត និង​នៅ​ក្នុង​តំបន់​ស៊ីហ្សកដានី។ ពេញ​មួយ​យប់​ថ្ងៃ​សុក្រ​ឆ្លង​ចូល​ថ្ងៃ​សៅរ៍ ទី១ សីហា​នេះ ភាព​ប្រទូស្រ្តាយ​យ៉ាង​ហិង្សា​កំពុង​បន្ត​កើត​មាន​យ៉ាង​ខ្លំាង​រវាង​បាតុករ​ប៉ាឡេស្ទីន និង​កម្លំាង​ប៉ូលិស​អ៊ីសា្រអែល។ អំពើ​ហិង្សា​ដែល​មក​ទល់​ពេល​នេះ​បាន​បណ្តាល​ឲ្យ​ស្លាប់​ជនជាតិ​ប៉ាឡេស្ទីន​ពីរ​នាក់ និង​រងរបួស​ជា​ច្រើន​នាក់។

ប្រតិកម្ម​ថ្កោលទោស​លើ​ទង្វើ​ដុត​សម្លាប់​ទារក​ប៉ាឡេស្ទីន​ទំាង​រស់​ពី​សំណាក់​ជនជាតិ​អ៊ីស្រាអែល​ជ្រុលនិយម​មាន​ច្រើន រាប់​ទំាង​ថ្នាក់ដឹកនំា​អ៊ីស្រាអែល​ផង។ លោក​នាយករដ្ឋមន្រ្តី​អ៊ីសា្រអែល​នេតាន់យ៉ាហ៊ូ​បាន​ចាត់​ទុក​ការ​ដុត​សម្លាប់​ទារក​ប៉ាឡេស្ទីន​ទំាង​រស់​ថា ជា​ទង្វើ​ភេរវនិយម ព្រម​ទំាង​សន្យា​តាម​ចាប់​ជនដៃ​ដល់​ទៅ​កាត់ទោស​តាម​ច្បាប់។ ទន្ទឹម​គ្នា​នេះ លោក​នេតាន់យ៉ាហ៊ូ រួម​ទំាង​លោក​ប្រធានាធិបតី​អ៊ីស្រាអែល​ក៏​បាន​ចុះ​ទៅ​មន្ទីរពេទ្យ​ដើម្បី​ពិនិត្យ​ស្ថានភាព​សុខភាព​ឱពុក ម្តាយ រួម​ទំាង​បងប្រុស​របស់​សព​អាលី​ដែល​ត្រូវ​ភ្លើង​ឆេះ​រលាក​ពេញ​ខ្លួន។

បន្ទាប់​មក លោក​នេតាន់យ៉ាហ៊ូ​ក៏​បាន​ទូរស័ព្ទ​ទៅ​កាន់​លោក​ប្រធាន​រដ្ឋអំណាច​ប៉ាឡេស្ទីន​អាបាស់​ដើម្បី​ចូលរួម​កាន់​ទុក្ខ ព្រម​ទំាង​ប្តេជ្ញា​ចិត្ត​ក្នុង​ការ​ប្រយុទ្ធប្រឆំាង​នឹង​ភេរវនិយម​គ្រប់រូប​ភាព ទោះ​បី​ជា​វា​មាន​ប្រភព​ចេញ​ពី​ណា​ក៏​ដោយ។ សម្រាប់​លោក​អាបាស​គឺ​ច្បាស់​ណាស់ ទង្វើ​នេះ ជា​ឧក្រិដ្ឋកម្ម​សង្រ្គាម និង​ឧក្រិដ្ឋកម្ម​ប្រឆំាង​មនុស្សជាតិ​ដែល​ប្រជាជន​ប៉ាឡេស្ទីន​មិន​អាច​បន្ត​ទុកបណ្តោយ​ដោយ​ឈរ​ឱបដៃ​មើល​បាន​ឡើយ។ លោក​អាបាស់​បាន​បញ្ជាក់​ថា លោក​នឹង​យក​រឿង​ថ្មី​នេះ រួម​ទំាង​រឿង​រ៉ាវ​កន្លង​មក​ទៅ​ប្តឹង​តុលាការ​ព្រហ្មទ័ណ្ឌ​អន្តរជាតិ​ក្រុង​ឡាអេ និង​ថា គ្មាន​អ្វី​ដែល​អាច​ចូល​មក​រារំាង​ចំណាត់ការ​របស់​ប៉ាឡេស្ទីន​បាន​ឡើយ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI