យេមែន

ទិវាបង្ហូរឈាម​ដាបនៅ​យេម៉ែន​ លោកប្រធានាធិបតីSaleh​ប្រកាសសភាព​អាសន្ន​

បាតុករ​ម្នាក់​ទទួល​រងរបួស​នៅ​ទីក្រុង​ Sanaa​ ​ថ្ងៃទី១៨មីនា​ឆ្នាំ២០១១.
បាតុករ​ម្នាក់​ទទួល​រងរបួស​នៅ​ទីក្រុង​ Sanaa​ ​ថ្ងៃទី១៨មីនា​ឆ្នាំ២០១១. Reuters/Khaled Abdullah

គឺជា​ទិវា​បង្ហូរ​ឈាម​ដាប​ច្រើន​បំផុត​ នៅ​យេម៉ែន​ចាប់​តាំង​ពី​មាន​ចលនា​តវ៉ា​ប្រឆាំង​នឹង​រដ្ឋអំណាច​ នៅ​ចុង​ខែ​មករា​២០១១​មក​។​ ​យ៉ាង​តិច​ មាន​ជន​៤១នាក់​បាន​ស្លាប់​និង​របួស​២០០នាក់​ នៅ​ថ្ងៃ​សុក្រ​១៨មីនា​ម្សិល​មិញ​ -​ស្រប​តាម​ប្រភព​មន្ទីរពេទ្យ​ នៅ​ឱកាស​បាតុកម្ម​ប្រឆាំង​នឹង​រដ្ឋ​អំណាច​ នៅ​ទីក្រុង​Sanaa​ ។​​ លោក​អគ្គលេខាធិការ​អ.ស.ប.​ បាន​ គីមូន​ បាន​”​ ថ្កោល​ទោស​យ៉ាង​ខ្លាំង​ “​ការប្រើ​គ្រាប់​កាំភ្លើង​មែន​ទែន​ ដោយ​បក្សព័ន្ធ​នៃ​របប​។​លោក​ប្រធានាធិបតី​Saleh​បាន​ចេញ​ក្រិត្យ​ប្រកាស​សភាព​អាសន្ន​សំរាប់​រយៈពេល​មិន​កំណត់។

ផ្សាយពាណិជ្ជកម្ម

សេចក្តីរាយការណ៍របស់ វីនស្តុន រតនា

ស្រប​តាម​សាក្សី​ដែល​បាន​ឃើញ​ផ្ទាល់​ភ្នែក​គឺ​ជា​ការសម្លាប់​រង្គាល​។​មនុស្ស​ស្លៀក​ពាក់​ជា​ស៊ីវិល​ចាំ​ឃ្លាំ​មើល​ពី​លើ​ដំបូល​ផ្ទះ​បាន​បាញ់​ទៅ​លើ​ពួក​បាតុករ​ដែល​ប្រមូល​ផ្តុំ​គ្នា​ នៅ​ជិត​សាកលវិទ្យាល័យ​Sanaa​។

 
ចុះ​តើ​នរណា​ទៅ​ជា​អ្នក​បាញ់​ទាំង​នេះ​?​ស្រប​តាម​ប្រភព​ជា​ច្រើន​គឺ​បក្សព័ន្ធ​របស់​លោក​ប្រធានាធិបតី​Saleh​។​ប៉ុន្តែ​ គេហទំព័រ​អាំងទែរណេត​របស់​បណ្តាញ​ទូរទស្សន៍​Al​ Jazira​ លើក​ឡើង​អំពី​អន្តរាគមន៍​របស់​កង​កម្លាំង​សន្តិសុខ​យេម៉ែន​ដែល​ប្រហែល​ជា​បាន​ប្រើ​អាវុធ​របស់​ខ្លួន​។​គោល​ដៅ​គឺ​ឃាត់​ឃាំង​កុំ​ឱ្យ​គណបក្ស​ប្រឆាំង​ដើរ​ធ្វើ​បាតុកម្ម​នៅ​ក្នុង​ទីក្រុង​។

ប៉ុន្តែ​ អាជ្ញាធរ​បដិសេធ​ថា​កង​កម្លាំង​សន្តិសុខ​ពុំ​ជាប់​ពាក់​ព័ន្ធ​ក្នុង​រឿង​នេះ​ទេ​។​លោក​ប្រធានា​ធិបតី​Saleh​អះអាង​នឹក​សោក​ស្តាយ​មរណភាព​របស់​ពួក​ជន​ដែល​គាត់​ហៅ​ថា​ជា​”​ ទុក្ករ​បុគ្គល​នៃ​របប​ប្រជាធិបតេយ្យ​”​ ។​គាត់​បញ្ជា​ឱ្យ​គណៈកម្មការ​មួយ​ធ្វើ​អង្កេត​ ដើម្បី​រក​ឱ្យ​ឃើញ​ពួក​ជាប់​ពិរុទ្ធ។

ប៉ុន្តែ​ការនេះ​ទំនង​ជា​ពុំ​គ្រប់គ្រាន់ទេ​ ដើម្បី​រំងាប់​កំហឹង​របស់​ពួក​អ្នក​តវ៉ា​ប្រឆាំង​ ដ្បិត​ពួកគេ​និយាយថា​ “ចាប់ពី​អំណើះ​តទៅ​ពុំអាច​មាន​ជំនួប​សន្ទនា​អ្វីមួយ​បាន​ឡើយ​ជាមួយ​រដ្ឋាភិបាល​”។​ ពួក​អ្នក​ប្រឆាំង​នឹង​ លោក​ប្រធានាធិបតី​Saleh​ធ្វើ​បាតុកម្ម​តាំងពី​មួយខែ​កន្លះ​មកហើយ​ជាប់រហូត​ឥតឈប់ឈរ​ដើម្បី​ទាមទារ​ឲ្យ​ចាកចេញទៅ​ជនដែល​បាន​កាន់​អំណាច​៣២ឆ្នាំ​មកហើយ​ និង​ដែល​ក្នុង​ខណៈ​នេះ​ពុំ​ព្រម​លាឈប់​ពី​មុខ​តំណែង​ទេ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI