មាន​​​ស្លាប់​រាប់​រយ​នាក់​ដោយរត់​ជាន់​គ្នា ក្នុង​ថ្ងៃ​បុណ្យ​សាសនា នៅ​អារ៉ាប៊ីសាអ៊ូឌីត

ក្រុមសង្គ្រោះ​អារ៉ាប៊ីសាអ៊ូឌីត កំពុង​ជួយ​អ្នក​រង​របួស​ពីការ​ជាន់​គ្នា នៅ​​La Mecque
ក្រុមសង្គ្រោះ​អារ៉ាប៊ីសាអ៊ូឌីត កំពុង​ជួយ​អ្នក​រង​របួស​ពីការ​ជាន់​គ្នា នៅ​​La Mecque REUTERS/Directorate of the Saudi Civil Defense/Handout
ដោយ៖ អៀង សុខម៉ិញ
១៥ នាទី

ចំនួន​មនុស្ស​ស្លាប់​បាន​កើន​ឡើង​ឥត​ឈប់ ! គិត​ត្រឹម​រសៀល​ថ្ងៃ​ព្រហស្បតិ៍​នេះ មាន​មនុស្ស​​ស្លាប់​យ៉ាង​ហោច​ណាស់ ៧១៧​នាក់ និង​របួស​៨០៥​នាក់ ក្នុង​ហេតុការណ៍​រត់​ជាន់​គ្នា​ នៅ​ក្បែរ​ក្រុង​ La Mecque ប្រទេស​អារ៉ាប៊ីសាអ៊ូឌីត។ គឺ​ជា​សោកនាដកម្ម​ដ៏​ធ្ងន់ធ្ងរ​បំផុត​មួយ​ ដែល​បាន​កើត​ឡើង​ក្នុង​អំឡុង​ពេល​បុណ្យគប់​ដុំ​ថ្ម​​ប្រចាំ​ឆ្នាំ​ លើ​ទឹក​ដី​ដ៏​សក្តិសិទ្ធ របស់​អ្នក​កាន់​សាសនា​អ៊ីស្លាម។

ផ្សាយពាណិជ្ជកម្ម

រូបភាព​វីដេអូ​​បង្ហាញ​អំពី​សាកសព​មនុស្ស​ ដេក​ស្លាប់​លើ​ដី ខ្លះ​មាន​រុំ​ក្រណាត់​ស ខ្លះ​អត់ ស្បែក​ជើង ឆ័ត្រ របស់របរ​រាយ​ប៉ាយ​ពេញ​ផ្លូវ​ ! ភ្នាក់ងារ​សង្គ្រោះ និង​សន្តិសុខ​ កំពុង​ឆ្វាត់​ឆ្វែង​ជម្លៀស​សាកសព​ចេញ​ ក្រោម​ក្រសែ​ភ្នែក​អសមត្ថភាព​របស់​អ្នក​បាន​រួច​ពី​ស្លាប់។

 

នេះ​ជា​សោកនាដកម្ម​លើក​ទីពីរ សម្រាប់​អ្នក​កាន់​សាសនា​អ៊ីស្លាម ក្នុង​តែ​មួយ​ឆ្នាំ និង​ខែ​នេះ។ កាលពី​ថ្ងៃ​ទី ១១ កញ្ញា មាន​អ្នក​ស្វែង​ធម៌​១០៩​នាក់​បាន​ស្លាប់​ក្នុងហេតុការណ៍​បាក់​រលំ​ឡាន​សន្ទូច​ដែល​កំពុង​សាងសង់​ពង្រីង​វិហារ​នៅ​ក្រុង​ឡាម៉ិច។

​ហេតុការណ៍រត់​ជាន់​គ្នា​ដល់​ស្លាប់លើក​នេះ​កើត​ឡើង​ ក្នុង​ពិធី​បុណ្យ​គប់​ដុំ​ថ្ម​ ​ ដែល​បើ​តាម​ក្រសួង​សុខាភិបាល​អារ៉ាប៊ីសាអ៊ូឌីត មក​ពី​សាសនិកជនគ្មាន​វិន័យ មិន​ស្តាប់​សេចក្តី​ណែនាំរបស់​អ្នក​រៀបចំ​កម្មវិធី ដោយ​ងើប​ដើរ​ដោយ​មិន​គោរព​ម៉ោង និង​ទិស​នៃ​ការ​ដើរ ទើប​ត្រូវ​បុក​ទង្គិច​ជា​មួយ​ហ្វូង​មនុស្ស​មក​ពីទិសបញ្ច្រាស​ទៀត។

គិត​ចាប់​ពី​ឆ្នាំ​១៩៩០​មក គ្រោះថ្នាក់​ដល់​ស្លាប់​ពេល​ស្វែង​ធម៌​របស់អ្នក​​អ៊ីស្លាម​បាន​កើត​ឡើង​ចំនួន​៧ដង ក្នុង​នោះ​៦​ដង​ជា​ការ​រត់​ជាន់​គ្នា​នៅ​ Mina ក្រុង​ឡាម៉ិច​ La Mecque ក្រុង​សក្តិសិទ្ធិ​របស់​អ៊ីស្លាម​នេះ​ឯង។ ការ​ជាន់​គ្នា​ស្លាប់​លើក​ចុងក្រោយ​គឺ​នៅ​ឆ្នាំ​២០០៦ ស្លាប់​អស់​មនុស្ស​៣៦៤​នាក់។ ​​ការ​ជួសជុល​ កែលម្អ​ប្រព័ន្ធ​ហេដ្ឋារចនា​សម្ព័ន្ធ  ផ្លូវ​ចូល​ក្រោម​ដី ឬ​ផ្លូវ​លើ​អាកាស​ នា​រយៈ​ពេល​ប៉ុន្មាន​ឆ្នាំ​ចុងក្រោយ​នេះ នៅ​តែ​មិន​អាច​បញ្ចៀស​គ្រោះ​ថ្នាក់​បាន​ទៀត។

គេ​នៅ​មាន​ទាន់​ដឹង​ថា​មាន​ជន​បរទេសប៉ុន្មាន​នាក់ ប៉ុន្មាន​សាសន៍​​​​បាត់​បង់​ជីវិត​ក្នុង​ហេតុការណ៍​ដើរ​ជាន់​គ្នា​នេះ​ទេ។ តែ​អ៊ីរ៉ង់​ដែល​មាន​ពលរដ្ឋ​បាត់​បង់​ជីវិត​អស់​យ៉ាង​ហោច​ណាស់​៩០​នាក់​ (តួលេខ​បណ្តោះអាសន្ន) ​បាន​ចោទ​ប្រកាន់​អារ៉ាប៊ីសាអ៊ូឌីត ថា​មាន​ភាព​ទន់​ខ្សោយ​ផ្នែក​សន្តិសុខ។

ជា​រៀង​រាល់​ឆ្នាំ​ មាន​បណ្តាជន​អ៊ីស្លាម​ជាង​ពីរ​លាន​នាក់ ក្នុង​ជិត​មួយ​លាន​នាក់​កន្លះ​មក​ពី​បរទេស និង​ប្រមាណ​៦០​ម៉ឺន​នាក់​ជា​ពលរដ្ឋ​ក្នុង​ស្រុក បាន​ចូល​រួម​ប្រារព្ធ​ពិធី​បុណ្យ​គប់​ដុំ​ថ្ម​ ដែល​ប្រព្រឹត្ត​ទៅ​រយៈ​ពេល​ពីរ​ទៅ​បី​ថ្ងៃ។ បើ​តាម​អាជ្ញាធរ​ អារ៉ាប៊ីសាអ៊ូឌីត បាន​ប្រមូល​កម្លាំង​ប៉ូលិស ជាង​១០​ម៉ឺន​នាក់​ ទាហាន​ ក្រុមគ្រូពេទ្យ ដើម្បី​រក្សា​សុវត្ថិភាព​​សណ្តាប់​ធ្នាប់​ផង និង​ទប់​ស្កាត់​គ្រោះ​រាតត្បាត​នៃ​ជំងឺ​ Mers ដែល​អារ៉ាប៊ីសាអ៊ូឌីត​រង​គ្រោះ​ខ្លាំង​ជាង​បំផុត​ផង៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI