អានតួអត្ថបទ
សហរដ្ឋអាមេរិក-អារ៉ាប៊ី សាអូឌីត

Human Rights Watch អំពាវនាវ​សុំ​ឲ្យ​អាមេរិក​ឈប់​លក់​គ្រាប់បែក​ឆ្លាត​ទៅ ឲ្យ​អារ៉ាប៊ី សាអូឌីត

បាតុកម្ម​ប្រឆាំង​ការទម្លាក់​គ្រាប់បែក​របស់​អារ៉ាប៊ី សាអូឌីត នៅ​ក្នុង​ប្រទេស​យេម៉ែន
បាតុកម្ម​ប្រឆាំង​ការទម្លាក់​គ្រាប់បែក​របស់​អារ៉ាប៊ី សាអូឌីត នៅ​ក្នុង​ប្រទេស​យេម៉ែន ©REUTERS/Mohamed al-Sayaghi
ដោយ៖ ឈាង បុប្ផា
1 នាទី

អង្គការ​ការពារ​សិទ្ធិមនុស្ស​Human Rights Watch បាន​ទទូចសុំ​ឲ្យ​សភា​អាមេរិកាំង​អន្តរាគម បោះឆ្នោត ប្រឆាំង​គម្រោងការ​របស់​រដ្ឋាភិបាល​អាមេរិក ដែល​ចង់​លក់​គ្រាប់បែក ទៅ​ឲ្យ​ប្រទេស​អារ៉ាប៊ី សាអូឌីត។ ក្រសួងការបរទេស​អាមេរិក កាលពី​ថ្ងៃ​ចន្ទ ទើប​បាន​ប្រកាស​លក់​គ្រាប់បែក និង​មីស៊ីល​តម្លៃ ១ ៣០០​លាន​ដុល្លារ ទៅ​ឲ្យ​អារ៉ាប៊ី សាអូឌីត។ សម្រាប់​អង្គការ​ការពារ​សិទ្ធិមនុស្ស អារ៉ាប៊ី សាអូឌីត​ដែល​ដឹកនាំ​សម្ព័ន្ធអន្តរជាតិ វាយប្រហារ​ទ័ព​អាកាស​ក្នុង​ទឹកដី​យេម៉ែន បាន​ទម្លាក់​គ្រាប់បែក សម្លាប់​ភាគច្រើន​ប្រជាជន​ស៊ីវិល។ 

ផ្សាយពាណិជ្ជកម្ម

អង្គការ​ការពារ​សិទ្ធិ​មនុស្ស​អន្តរជាតិ Human Rights Watch បាន​អំពាវនាវ​សុំ​ឲ្យ​រដ្ឋាភិបាល​អាមេរិក​ប្តូរចិត្ត លែង​លក់​គ្រាប់បែក គ្រាប់មីស៊ីល ទៅ​ឲ្យ​អារ៉ាប៊ី សាអូឌីត។ តាម​អង្គការ​ Human Rights Watch អារ៉ាប៊ី សាអូឌីត​ដែល​កំពុង​ដឹកនាំ​ការវាយប្រហារ​ផ្លូវ​អាកាស​ក្នុង​ប្រទេស​យេម៉ែន បាន​ទម្លាក់​គ្រាប់បែក សម្លាប់​មនុស្ស​មិន​រើសមុខ។ តាម​ការស៊ើបអង្កេត​របស់​អង្គការ​ការពារ​សិទ្ធិមនុស្ស ពាក់កណ្តាល​នៃ​ជនរងគ្រោះ​ដោយ​ការទម្លាក់​គ្រាប់បែក​របស់​យន្តហោះចម្បាំង​អារ៉ាប៊ី សាអូឌីត គឺ​ជា​ប្រជាជន​ស៊ីវិល​យេម៉ែន។

 
នៅ​ថ្ងៃ​ចន្ទ ក្រសួង​ការបរទេស អាមេរិក​ប្រកាស​ឲ្យ​ដឹងថា ទៅតាម​ការបញ្ជារទិញ របស់​អារ៉ាប៊ី សាអូឌីត អាមេរិក​នឹង​លក់​គ្រាប់បែក​ឆ្លាត គ្រាប់មីស៊ីល ដែល​អាច​ទម្លុះ​រូងក្រោមដី រាប់ពាន់​គ្រាប់ ទៅ​ឲ្យ​ទីក្រុង​រីយ៉ាត។ តាម​លោកចូ ស្តុក អនុប្រធាន​កម្មវិធី​ដើមបូព៌ា និង​អាហ្វ្រិក​របស់​ Human Rights Watch រដ្ឋាភិបាល​អាមេរិក​បាន​ដឹង​ច្បាស់​ណាស់​ថា សម្ព័ន្ធ​អន្តរជាតិ​ដឹកនាំ​ដោយ​អារ៉ាប៊ី សាអូឌីត​បាន​ទម្លាក់​គ្រាប់បែក ដោយ​គ្មាន​ការរើសអើង គ្មាន​បែងចែក​ថា គោលដៅ​ជា​ពួកឧទ្ទាម ហ៊ូទីស្ហ ឬ​ជនស៊ីវិល។ “ការផ្តល់ លក់​គ្រាប់បែក​ដ៏ទំនើបៗ ទៅ​ឲ្យ​អារ៉ាប៊ី សាអូឌីត​សម្រាប់​ទៅ​សម្លាប់​ប្រជាជន​ស៊ីវិល​យេម៉ែន នឹង​ធ្វើ​ឲ្យ​អាមេរិក​ចូលរួម​ទទួល​ខុសត្រូវ​មួយចំណែក​ដែរ” នេះជា​ប្រសាសន៍​របស់​លោក​ចូ ស្តុក។

អង្គការ​ការពារ​សិទ្ធិមនុស្ស​ដែល​មាន​ទីតាំង​នៅ​ទីក្រុង​ញូវយ៉ក បាន​និយាយ​កាលពី​ខែ​តុលា​មុន​ថា ខ្លួន​បាន​ប្រមូល​បាន​ឯកសារ​មួយចំនួន ដែល​បង្ហាញ​ថា សម្ព័ន្ធ​អន្តរជាតិ​ដឹកនាំ​ដោយ​អារ៉ាប៊ី សាអូឌីត បាន​រំលោភ​ច្បាប់​សង្រ្គាម។ តាម​មន្រ្តី អង្គការ​ Human Rights Watch សភា​អាមេរិក​មានសិទ្ធ​តួនាទី​ទប់ស្កាត់​កុំ​ឲ្យរដ្ឋាភិបាល​អាមេរិក​លក់​អាវុធ ដែល​គេ​នឹង​អាច​យក​ទៅ ប្រើ ដើម្បី​ប្រព្រឹត្ត​ឧក្រិដ្ឋកម្ម​សង្រ្គាម។

ការអំពាវនាវ​របស់​ Human Rights Watch​អាច​ជា​ការឥតប្រយោជន៍ ព្រោះ​បើតាម​ការចុះផ្សាយ​របស់​កាសែត​ក្នុង​ស្រុក​អាមេរិក សភានឹង​បើកភ្លើង​ខៀវ​ឲ្យ​រដ្ឋាភិបាល​អាមេរិក​លក់​អាវុធ​ទៅ​អារ៉ាប៊ី សាអូឌីត ដែល​ជា​សម្ព័ន្ធមិត្ត រួម​ដៃ ជាមួយ​អាមេរិក ប្រយុទ្ធប្រឆាំង នឹង​ក្រុមជីហាត​នៃអង្គការ​រដ្ឋអ៊ីស្លាម។ សូមបញ្ជាក់ថា តាំង​ពី​ខែ​មីនា មក អារ៉ាប៊ី សាអូឌីត ដែល​គាំទ្រ​ប្រធានាធិបតី​យេម៉ែន (បណ្តេញចេញ​ពី​អំណាច)​បាន​បញ្ជូន​យន្តហោះ ទៅ​ទម្លាក់​គ្រាប់បែក​លើ​ក្រុមឧទ្ទាម ហ៊ូទីស្ហ ដែល​គាំទ្រ ដោយ​អ៊ីរ៉ង់ សត្រូវ​របស់​អារ៉ាប៊ី សាអូឌីត។ តាម​អង្គការ​សហប្រជាជាតិ ចាប់តាំង​ពី​មាន​ការវាយប្រហារ​តាម​ផ្លូវអាកាស​របស់​អារ៉ាប៊ី សាអូឌីត នៅក្នុង​ប្រទេស​យេម៉ែន មនុស្ស​ប្រមាណ ៥៧០០​នាក់​បាន​ស្លាប់ ដែល​ពាក់កណ្តាល​ជា​ជនស៊ីវិល៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ