ទស្សនៈព្រឹត្តិការណ៍ពិភពលោក

អ៊ីស្រាអែល៖រដ្ឋអំណាច​កំពុង​បើក​ប្រតិបត្តិការ​ប្រឆំាង​នឹង​ពួក​ជ្វីហ្វជ្រុលនិយម

សំឡេង ០៤:៥៧
Meir Ettinger ជាសកម្មជន​អ៊ីស្រាអែល​ស្តំានិយមជ្រុល
Meir Ettinger ជាសកម្មជន​អ៊ីស្រាអែល​ស្តំានិយមជ្រុល REUTERS/Ammar Awad

នៅ​ក្នុង​ប្រទេស​អ៊ីស្រាអែល ១០ថ្ងៃ ក្រោយ​ព្រឹត្តិការណ៍​ដុត​បំផ្លាញ​ផ្ទះ​របស់​ប្រជាជន​ប៉ាឡេស្ទីន​មួយ​ខ្នង​នៅ​ក្នុង​តំបន់​ស៊ីហ្សកដានី​ដែល​បាន​បណ្តាល​ឲ្យ​ស្លាប់​ទារក​អាយុ ១៨ខែ​ម្នាក់ បន្ទាប់​មក​ឱពុក​របស់​ទារក និង​របួស​សមាជិក​គ្រួសារ​ដទៃ​ទៀត​មក រដ្ឋអំណាច​អ៊ីស្រាអែល​បាន​បើក​យុទ្ធនាការ​តាម​ចាប់​ជនដៃដល់​ដែល​ជា​ពួកជ្វីហ្វ​ជ្រុលនិយម។ ប្រតិបត្តិការ​តាម​ចាប់​ពួក​ជ្វីហ្វ​ជ្រុលនិយម​បាន​ធ្វើ​ឡើង​នៅ​ក្នុង​តំបន់​អាណានិគមនិយម​ស្ថិត​ក្នុង​តំបន់​ស៊ីហ្សកដានី​ដែនដី​ប៉ាឡេស្ទីន។ គេ​មិន​ដឹង​ច្បាស់​ពី​ចំនួន​ជនដៃដល់​ដែល​បាន​ចាប់​ខ្លួន​ទេ តែ​ព័ត៌មាន​ក្នុង​ថ្ងៃ​ចន្ទ ទី១០ សីហា​ឲ្យ​ដឹង​ថា បន្ទាប់​ពី​បាន​សួរ​ចម្លើយ អ្នក​ចាប់ខ្លួន​ទំាង​អស់​ក៏​ត្រូវ​បាន​ដោះលែង​ឲ្យ​មាន​សេរីភាព​វិញ។ តើ​ពួក​ជ្វីហ្វ​ជ្រុលនិយម​មាន​ប្រភព​ពី​ណា និង​ថា តើ​អ្វី​ទៅ ជា​គោលបំណង​របស់​ពួក​គេ?

ផ្សាយពាណិជ្ជកម្ម

១០ថ្ងៃ ក្រោយ​ព្រឹត្តិការណ៍​វាយប្រហារ​នៅ​ក្នុង​ទីក្រុង​ហ្សេរុយសាឡឹម​នា​ក្បួន​ព្យុះហយាត្រា Gay Pride របស់​ពួក​អ្នកស្រឡាញ់​ភេទ​ដូច​គ្នា និង​ព្រឹត្តិការណ៍​ដុតសម្លាប់​ទារក​ជនជាតិ​ប៉ាឡេស្ទីន​អាយុ ១៨ខែ​ទំាង​រស់ ព្រម​ទំាង​បណ្តាល​ឲ្យ​ស្លាប់​ឱពុក​របស់​ទារក​នា​ប៉ុន្មាន​ថ្ងៃ​ក្រោយ​រងរបួស​មក កងឯកភាព​ពិសេស​អ៊ីស្រាអែល​ប្រយុទ្ធប្រឆំាង​នឹង​បទឧក្រិដ្ឋ​បាន​បើក​ប្រតិបត្តិការ​តាម​ចាប់​ជនដៃដល់​នៅ​ក្នុង​ដែនដី​អាណានិគម។ នៅ​ពេល​ដែល​គេ​និយាយ​ពី​ដែនដី​អាណានិគម គឺ​គេ​ចង់​និយាយ​សំដៅ​លើ​ដែនដី​ប៉ាឡេស្ទីន ពិសេស​ក្នុង​តំបន់​ស៊ីហ្សកដានី​ដែល​អ៊ីស្រាអែល​បាន​អនុញ្ញាត​ឲ្យ​ប្រជាជន​ខ្លួន​ចូល​ទៅ​ធ្វើ​ការ​សាងសង់​ផ្ទះសម្បែង។ តែ​ប្រតិបត្តិការ​របស់​កម្លំាង​អ៊ីស្រាអែល​ពេល​នេះ​បាន​ធ្វើ​ឡើង​នៅ​ក្នុង​ដែនដី​អាណានិគម​ដែល​ពួក​ជ្វីហ្វ​បាន​ចូល​ទៅ​សង់​ផ្ទះ​ដោយ​គ្មាន​ការ​អនុញ្ញាត​ពី​រដ្ឋាភិបាលស៊ីវិល និង​យោធា​អ៊ីស្រាអែល។

គឺ​នៅ​ទីនោះ​ហើយ​ដែល​អ៊ីស្រាអែល​បាន​យល់ឃើញ​ថា ជា​សំបុក​របស់​ពួក​ជ្វីហ្វជ្រុលនិយម​ដែល​បាន និង​កំពុង​ដើរ​ប្រព្រឹត្តិបទឧក្រិដ្ឋ​ផ្សេងៗ ទំាង​នៅ​ក្នុង​ទឹកដី​អ៊ីស្រាអែល និង​ប៉ាឡេស្ទីន។ ក្រោយ​ព្រឹត្តិការណ៍​ទំាង​ពីរ​នៅ​ក្នុង​ទីក្រុង​ហ្សេរុយសាឡឹម និង​ក្នុង​ដែនដី​ប៉ាឡេស្ទីន​តំបន់​ស៊ីហ្សកដានី​មក កងឯកភាព​ពិសេស​អ៊ីស្រាអែល​ប្រយុទ្ធប្រឆំាង​នឹង​បទឧក្រិដ្ឋ​បាន​ចាប់​ខ្លួន​ពួក​ជ្វីហ្វជ្រុលនិយម​ដែល​ជា​ជនសង្ស័យ​ចំនួន ៣នាក់។ អ្វី​ដែល​គួរ​ឲ្យ​កត់សម្គាល់ រដ្ឋាភិបាល​អ៊ីស្រាអែល​បាន​អនុវត្តន៍​នូវ​វិធានការ​ពិសេស​ដោយ​ធ្វើ​ការ​ឃុំ​ខ្លួន​ជនសង្ស័យ​ទំាង ៣ នាក់​រយៈពេល ៦ខែ ដោយ​គ្មាន​ការ​ចោទ​ប្រកាន់​អ្វី​ទំាង​អស់ និង​ដែល​អាច​បន្ត​ថែម​ទៀត​បាន​នៅ​ពេល​អស់​សុពលភាព។

នេះ​ជា​លើកទី១ ដែល​រដ្ឋាភិបាល​អ៊ីស្រាអែល​បាន​យក​វិធានការ​ពិសេស​នេះ​ទៅ​អនុវត្តន៍​លើ​ពលរដ្ឋ​ខ្លួន ព្រោះ​តាម​ពិត​ទៅ​នោះ វិធានការ​ពិសេស​ដែល​ឃុំ​ជនសង្ស័យ​ដោយ​គ្មាន​ការ​ចោទ​ប្រកាន់ គឺ​ទុក​សម្រាប់​អនុវត្តន៍​តែ​ទៅ​លើ​ប្រជាជន​ប៉ាឡេស្ទីន​ប៉ុណ្ណោះ។ ការ​សម្រេច​របស់​អ៊ីស្រាអែល​របៀប​នេះ​ជា​សក្ខីកម្ម​បញ្ជាក់​ឲ្យ​ឃើញ​ថា ពួក​ជ្វីហ្វជ្រុលនិយម​មិន​ត្រឹម​ជា​មនុស្ស​គ្រោះថ្នាក់​សម្រាប់​ប៉ាឡេស្ទីន​ម្នាក់​ប៉ុណ្ណោះ​ទេ តែ​វា​ក៏​ជា​មនុស្ស​គ្រោះថ្នាក់​ខ្លំាង​ចំពោះ​ពលរដ្ឋ​អ៊ីស្រាអែល​គ្នា​ឯង​ផងដែរ។ តាម​ពិត​ទៅ នេះ​មិនមែន​ជា​លើកទី១ ទេ​ដែល​រដ្ឋាភិបាល​អ៊ីស្រាអែល​បាន​ទទួល​ការ​គំរាមកំហែង និង​បាន​ប្រឈម​មុខ​នឹង​ដង្កូវ​ចេញ​ពី​សាច់​ឯង​របស់​ពួក​ជ្វីហ្វជ្រុលនិយម​នៅ​ក្នុង​ដែលដី​អាណានិគម។

ក្នុង​ឆ្នំា ១៩៩៤ មាន​ជ្វីហ្វជ្រុលនិយម​ម្នាក់​បាន​សម្លាប់​បាញ់​សម្លាប់​បរិស័ទអ៊ីស្លាម​ចំនួន ២៩នាក់​នា​ពេល​ដែល​ពួក​គេ​កំពុង​សូត្រធម៌​នៅ​ក្នុង​វិហារ​សាសនា​អ៊ីស្លាម​មួយ​ស្ថិត​ក្នុង​តំបន់​ប៉ាឡេស្ទីន​ស៊ីហ្សកដានី។ ក្នុង​ឆ្នំា ១៩៩៥ គឺ​ពួកជ្វីហ្វជ្រុលនិយម​នេះ​ហើយ​ដែល​បាន​ធ្វើ​ឃាតកម្ម​សម្លាប់​លោក​នាយករដ្ឋមន្រ្តី​អ៊ីស្រាអែល Yitzhak Rabin។ ក្នុង​ឆ្នំា ២០០៥ គឺ​ពួកជ្វីហ្វ​ជ្រុលនិយម​ដដែល​នេះ​ឯង​ដែល​បាន​បាញ់​រះ​ទៅ​លើ​រថយន្ត​ក្រុង​មួយ​នៅ​ប៉ែក​ខាង​ជើង​អ៊ីស្រាអែល ដោយ​បាន​ផ្តាច់​ជីវិត​ប្រជាជន​អ៊ីស្រាអែល​ចំនួន ៤នាក់។ ចុង​ក្រោយ​ថ្មី​នេះ គឺ​ថ្ងៃទី៣០ និង ៣១ កក្កដា​កន្លង​ទៅ ពួក​នេះ​បាន​វាយប្រហារ​លើ​ក្បួន​ព្យុះហយាត្រា Gay Pride របស់​ប្រជាជន​អ៊ីស្រាអែល​អ្នក​ស្រឡាញ់​ភេទ​ដូច​គ្នា និង​ការ​ដុត​ផ្ទះ​ប៉ាឡេស្ទីន​សម្លាប់​ទារក​អាយុ ១៨ខែ​ទំាង​រស់។

សំណួរ​ដែល​បាន និង​កំពុង​ចោទ​ពេល​នេះ​គឺ​ថា តើ​ពួក​ជ្វីហ្វជ្រុលនិយម​មាន​រចនាសម្ព័ន្ធ​យ៉ាង​ម៉េច និង​ថា​តើ​អ្វី​ទៅ ជា​បំណង​ប្រាថ្នា​របស់​ពួក​គេ?

ជា​រួម ពួក​ជ្វីហ្វជ្រុលនិយម គឺ​ជា​ក្រុម​យុវជន​ដែល​មាន​កំណើត​ចេញ​មក​ពី​ដែនដី​អាណានិគម​នៅ​ស៊ីហ្សកដានី។ ជា​ទូទៅ ក្រុមជ្វីហ្វ​ជ្រុលនិយម​នេះ​មាន​គ្នា​ប្រមាណ​ជា ១០០នាក់ និង​ដែល​គ្មាន​រចនាសម្ព័ន្ធ​ដឹកនំា​អ្វី​ច្បាស់លាស់​ទេ។ តែ​ជា​ក្រុមមនុស្ស​ដែល​គេ​អាច​ហៅ​ថា ជា​ពួក​ឆ្វេង​ដែល​មិន​ចង់​ស្ថិត​ក្រោម​អំណាច ឬ​មួយ​ក៏​ស្តាប់​តាម​បង្គាប់​នរណា​ម្នាក់​ដែរ។ អ្វី​ដែល​គ្រប់​គ្នា​កំពុង​ចោទ​សួរ​នៅ​ពេល​នេះ​គឺ​ថា តើ​ពួកជ្វីហ្វ​ប្រភេទ​នេះ ជា​ពួក​ជ្រុលនិយម ឬ​មួយ​ក៏​ជា​ពួក​អ្នកជាតិនិយម។ បើ​គេ​ពិនិត្យ​ឲ្យ​បាន​ស៊ីជម្រៅ​បន្តិច​ទៅ​ឃើញ​ថា ទង្វើ​របស់​ពួកជ្វីហ្វ ជ្រុលនិយម​នេះ​មាន​គោលដៅ​សាសនា​ផង និង​នយោបាយ​ផង។ នយោបាយ ព្រោះ​សុបិន្ត​របស់​ពួកនេះ គឺ​ចង់​បាន​មហា​ប្រទេស​អ៊ីស្រាអែល​មួយ​ដោយ​ក្តោប​យក​ដែនដី​ប៉ាឡេស្ទីន​ទំាង​អស់។ នយោបាយ ព្រោះ​ពួក​នេះ​បាន​ចេញ​មុខ​ការពារ​គោលនយោបាយ​ពង្រីក​អាណានិគម​របស់​រដ្ឋាភិបាល​អ៊ីស្រាអែល​សព្វថ្ងៃ។

គឺ​នៅ​ក្នុង​ន័យ​នេះ​ហើយ​បាន​ពួកជ្វីហ្វជ្រុលនិយម​បាន និង​កំពុង​លេច​វត្តមាន​កាន់​តែ​ខ្លំាង ហើយ​រដ្ឋាភិបាល​អ៊ីស្រាអែល​របស់​លោក​នាយករដ្ឋមន្រ្តី​នេតាន់យ៉ាហ៊ូ​ដែល​ជា​អ្នក ជាតិនិយមជ្រុល​ក៏​បាន​ជាប់ចោទ​ពី​បទ​ស៊ុមគ្រលំ​ចិញ្ចឹម​វត្តមាន​របស់​ពួក​នេះ​ដែរ។ ជា​ការ​ពិត លោក​នេតាន់យ៉ាហ៊ូ​បាន​ចាត់​ទុក​ទង្វើ​ចុងក្រោយ​របស់​ពួក​នេះ​ថា ជា​ទង្វើ​ភេរវនិយម។ សម្រាប់​អ៊ីស្រាអែល​គឺ​ច្បាស់​ណាស់ ជនមួយ​ក្តាប់​តូច​នេះ​មិនមែន​ជា​មនុស្ស​គ្រោះថ្នាក់​សម្រាប់​អ៊ីស្រាអែល​ទេ។ តែ​អ្វី​ដែល​អ៊ីស្រាអែល​ភ្លេច​និយាយ​នោះ​គឺ​ថា ទង្វើ​របស់​ដង្កូវ​ចេញ​ពី​សាច់​ឯង​មួយ​នេះ គឺ​ជា​ឆ្អឹង​ទទឹង ក នៅ​ក្នុង​ដំណើរ​ស្វែង​រក​សន្តិភាព​ជាមួយ​ប៉ាឡេស្ទីន និង​ក៏​រឹត​តែ​ធ្វើ​ឲ្យ​អាប់ឱន​កេរ្តិ៍​ឈ្មោះ​អ៊ីស្រាអែល​នៅ​លើ​ឆាកអន្តរជាតិ​ដែរ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI