កម្ពុជា

អនុព័ន្ធ​យោធា​បរទេស​ជំរុញ​អោយ​អ្នក​សង្កេតការណ៍​ឥណ្ឌូនេស៊ី​មក​ព្រំដែន​អោយ​បាន​ឆាប់

អនុព័ន្ធយោធា​បរទេស​​នៅ​ប្រាសាទ​ព្រះវិហារ ថ្ងៃ​ព្រហស្បតិ៍ ៣ មីនា ២០១១
អនុព័ន្ធយោធា​បរទេស​​នៅ​ប្រាសាទ​ព្រះវិហារ ថ្ងៃ​ព្រហស្បតិ៍ ៣ មីនា ២០១១ ©ដឺលុច/RFI

ក្រុម​មន្ត្រី​អនុព័ន្ធ​យោធា​បរទេស​បាន​បញ្ចប់​ទស្សនកិច្ច​នៅព្រំដែន​ កម្ពុជា-ថៃ​ហើយ កាលពីព្រឹកថ្ងៃព្រហស្បតិ៍​នេះ។ ​មន្ត្រី​យោធា​កម្ពុជា​បាន​ចាត់ទុក​ថា ទស្សនកិច្ច​នេះ​ប្រព្រឹត្ត​ទៅ​ដោយ​ជោគជ័យ បើទោះជា​មាន​ការ​អត្ថាធិប្បាយ​គំរាមកំហែង​ពី​ភាគី​ថៃ​ក៏​ដោយ។ តំណាង​ប្រតិភូ​អនុព័ន្ធ​យោធា​បរទេស​បាន​ថ្លែង​ថា ពួកគេ​នឹង​ជួយ​ជំរុញ​អោយ​អ្នក​សង្កេតការណ៍​​ឥណ្ឌូនេស៊ី​មក​ដល់​តំបន់​ ព្រំដែនអោយ​បាន​ឆាប់។ ក្នុងចំណោម​សមាជិក​ប្រតិភូ​អនុព័ន្ធ​យោធា​ដែល​ទៅ​​ព្រះវិហារ​នោះ មិនមាន​​អនុព័ន្ធ​យោធា​ថៃ​ឡើយ។

ផ្សាយពាណិជ្ជកម្ម

សេចក្តីរាយការណ៍​របស់​លាង ដឺលុច ពី​ភ្នំពេញ

អ្នក​នាំពាក្យ​ក្រសួង​ការពារ​ជាតិ​កម្ពុជាបាន​ប្រាប់​អោយ​ដឹង ​កាល​ពី​រសៀល​ថ្ងៃ​ព្រហស្បតិ៍​នេះ​ថា មន្ត្រី​អនុព័ន្ធ​យោធា​បរទេស​ចំនួន​១៧​នាក់ មក​ពី​ស្ថានទូត​ចំនួន​១៣​ ប្រចាំ​នៅ​កម្ពុជា​ បាន​បញ្ចប់​ទស្សនកិច្ច​នៅលើ​ប្រាសាទ​ព្រះវិហារ​ហើយ កាល​ពី​ព្រឹកថ្ងៃ​ព្រហស្បតិ៍​នេះ។ ទស្សនកិច្ច​នេះ​ដឹកនាំ​ដោយ​នាយឧត្តមសេនីយ៍ ​នាង ផាត រដ្ឋលេខាធិការ​ក្រសួង​ការពារជាតិ ធ្វើឡើង​នៅលើ​ប្រាសាទ​ព្រះវិហារ និង​វត្ត​កែវសិក្ខាគិរីស្វារៈហើយ​មាន​រយៈពេល​២ម៉ោង។

ឧត្តមសេនីយ៍ឯក​ឈុំ សុជាតិ អ្នកនាំពាក្យ​ក្រសួង​ការពារ​ជាតិបាន​អត្ថាធិប្បាយ​ថា ដំណើរ​ទស្សនកិច្ច​នេះ​បាន​បញ្ចប់​ដោយ​ជោគជ័យ ក្នុង​បរិយាកាស​ស្ងប់ស្ងាត់​ល្អ បើទោះជា​មាន​ការ​អត្ថាធិប្បាយ​ពី​ភាគី​ថៃ​ថា ទស្សនកិច្ច​យោធា​បរទេស​នៅលើ​ក្នុង​តំបន់​សមរភូមិ​ជួរមុខ​ដែល​រៀបចំ​ដោយ​កម្ពុជា អាច​បង្កភាព​តានតឹង​នៅ​ព្រំដែន​ក៏​ដោយ។ លោក​ឧត្តមសេនីយ៍​ឈុំ សុជាតិ​ថ្លែងថា កម្ពុជា​មិនខ្វល់​ពី​ការ​អត្ថាធិប្បាយ​របស់​ថៃ​ឡើយ ពីព្រោះ​កម្ពុជា​ធ្វើ​សកម្មភាព​តែ​លើ​បូរណភាព​ដែនដី​របស់​ខ្លួន​តែ​ប៉ុណ្ណោះ។

បើតាម​ការ​អះអាង​របស់​អ្នកនាំពាក្យ​ក្រសួង​ការពារ​ជាតិ​កម្ពុជា ក្រោយ​ពី​បាន​បញ្ចប់​ទស្សនកិច្ច​នៅលើ​ប្រាសាទ​ព្រះវិហារ តំណាង​ប្រតិភូ​អនុព័ន្ធ​យោធា​បរទេស​បាន​អរគុណ​ដល់​ក្រសួង​ការពារជាតិ​ ចំពោះ​ការរៀបចំ​ទស្សនកិច្ច​នេះ​សម្រាប់​ពួកគេ ហើយថា ​ពួកគេ​នឹង​ជួយ​ជំរុញ​អោយ​អ្នក​សង្កេតការណ៍​ឥណ្ឌូនេស៊ី​អាច​មក​ដល់​តំបន់​ព្រំដែន​នេះ​អោយ​បាន​ឆាប់។ បើតាម​អ្នក​នាំពាក្យ​យោធា​ដដែល តំណាង​ប្រតិភូ​អនុព័ន្ធយោធា​បរទេស​បន្តថា ពួកគេ​ក៏​នឹង​ខិតខំ​ជួយ​ស្វែងរក​ជំនួយ ​ដើម្បី​ការ​ជួសជុល​ប្រាសាទ​ព្រះវិហារ​ផងដែរ។

គួរបញ្ជាក់​ថា ការ​រៀបចំដំណើរ​ទស្សនកិច្ច​សម្រាប់​អនុព័ន្ធ​យោធា​បរទេសនៅ​តំបន់​សមរភូមិ​ជួរមុខ ក៏ដូចជា​ការ​ត្រួតពិនិត្យ​មើល​ការខូចខាត​នៃ​ប្រាសាទ​ព្រះវិហារ​ខ្មែរ ​នៅពេលនេះ ធ្វើ​ឡើង​តាម​ការ​ស្នើសុំពី​ការិយាល័យ​អនុព័ន្ធ​យោធា​ទាំងនោះ ដែល​ទាំងអស់​មាន​១៣​ប្រទេស ប៉ុន្តែ ក្នុង​ចំណោម​នោះ មិនមាន​អនុព័ន្ធ​យោធា​ថៃ​នោះឡើយ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI