កម្ពុជា

រដ្ឋមន្ត្រី​ព័ត៌មាន​ស្នើ​ប៉ូលីស​មិន​អោយ​ផ្តល់​រូបភាព​គ្រោះថ្នាក់​រន្ធត់​ដល់​សារព័ត៌មាន​

លោក ខៀវ កាញារីទ្ធ​រដ្ឋមន្ត្រី​ព័ត៌មាន​ស្នើប៉ូលីស​មិន​ឲ្យ​ផ្តល់​រូបភាព​គ្រោះថ្នាក់​រន្ធត់​ដល់​សារព័ត៌មាន
លោក ខៀវ កាញារីទ្ធ​រដ្ឋមន្ត្រី​ព័ត៌មាន​ស្នើប៉ូលីស​មិន​ឲ្យ​ផ្តល់​រូបភាព​គ្រោះថ្នាក់​រន្ធត់​ដល់​សារព័ត៌មាន RFI/Leang Delux

លោក​​​ខៀវ កាញារីទ្ធ​​​រដ្ឋមន្ត្រី​​​ក្រសួង​​ព័ត៌មាន​ ​​បាន​​​ផ្ញើ​​លិខិត​​​​​មួយ​​​​ច្បាប់​​​ទៅ​​​នាយ​​ឧត្តម​​​សេនីយ​​​អគ្គ​​ស្នងការ​​​នគរបាល​​​​​ជាតិ​​នៅ​​ព្រឹក​​​​ថ្ងៃ​​​ព្រហស្បតិ៍​​ទី​​​៧​​មិ​ថុនា​​​នេះ​​ដើម្បី​​ស្នើ​​អោយ​​នគរបាល​​ប៉ុស្តិ៍​​តាម​​មូលដ្ឋាន​បញ្ឈប់​​ការ​​ផ្តល់​រូបថត​​ស្តីពី​​ឃាតកម្ម​និង​​គ្រោះថ្នាក់​​ចរាចរណ៍​ដែល​​មាន​​លក្ខណៈ​​​កាច​​សាហាវ​និង​​រន្ធត់​​ដល់​​អ្នកសារព័ត៌​មាន​​ដើម្បី​​ចុះផ្សាយ។​ សម្រាប់​លោក​រដ្ឋមន្ត្រី​ការ​​ផ្សព្វផ្សាយ​​រូបភាព​​ទាំង​នេះ​​ដែល​​ពេល​​ខ្លះ​​មិន​​ត្រូវ​​បាន​​លាក់​​​អត្តសញ្ញាណ​​ផង​​នោះ ​បាន​​ធ្វើ​​អោយ​​​ប៉ះពាល់​​ដល់​​សេចក្តី​​ថ្លៃថ្នូរ​​របស់​​ជន​​រងគ្រោះ​និង​​គ្រួសារ​​​របស់​​ពួក​​គេ។​

ផ្សាយពាណិជ្ជកម្ម

នេះ​ គឺ​ជា​វិធានការ​ថ្មី​មួយ​បន្ថែម​ទៀត​របស់​ក្រសួង​ព័ត៌មាន​ក្នុង​ការ​កាត់​បន្ថយ​ការ​ផ្សព្វផ្សាយ​រូបថត​​គ្រោះថ្នាក់​រន្ធត់អសីលធម៌ បន្ទាប់​ពី​ក្រសួង​បាន​ណែនាំ​ម្តង​ហើយ​ដល់​អង្គការ​សារព័ត៌មាន​​​កាល​ពី​ខែ​កុម្ភៈ​កន្លង​ទៅ​មិន​អោយ​ពួកគេ​ផ្សព្វផ្សាយ​រូបភាព​អាក្រក់​ទាំងនេះ។

នៅ​ក្នុង​លិខិត​ផ្ញើ​ទៅ​នាយ​ឧត្តមសេនីយ​អគ្គស្នងការ​នគរបាល​ជាតិ ​នេត សារឿន​នៅ​ថ្ងៃ​ព្រហស្បតិ៍​​នេះ លោក​ខៀវ កាញារីទ្ធ​បាន​សរសេរ​ថា កម្លាំង​​នគរបាល​ជំនាញនិង​នគរបាល​មូលដ្ឋាន​​បាន​​ផ្តល់​​រូបថត​ឃាតកម្ម គ្រោះថ្នាក់ចរាចរណ៍​ដែល​មាន​លក្ខណៈ​កាច​សាហាវ ឃោរឃៅ​​ទៅដល់​អ្នក​កាសែត។

ហើយ​ពេល​ខ្លះ ការ​ផ្តល់​រូបថត​ទាំង​នោះ​មិន​មាន​លាក់​អត្តសញ្ញាណ​​របស់​ជនរងគ្រោះ ដែល​វា​ធ្វើ​អោយ​ប៉ះពាល់​ដល់​សេចក្តីថ្លែថ្នូរ​របស់​ជនរងគ្រោះនិង​ក្រុម​គ្រួសារ​របស់​ពួកគេ។ដើម្បី​ទប់​ស្កាត់​​​បញ្ហា​នេះ លោក​រដ្ឋមន្ត្រី​ក្រសួង​ព័ត៌មាន​បាន​ស្នើ​អោយ​លោក​អគ្គ​ស្នងការ​នគរបាល​ជាតិ​ចាត់វិធានការ​អោយ​នគរបាល​ជំនាញ និង​នគរបាល​មូលដ្ឋាន​បញ្ឈប់​ការ​ផ្តល់​រូបថត​ទាំងនោះ​ទៅ​សារព័ត៌មាន និង​សូម​ផ្តល់​រូបភាព​ដែល​មាន​លាក់​អត្តសញ្ញាណ​ជា​ការ​ផ្សព្វផ្សាយ​ជំនួស​វិញ។

កាលពីខែកុម្ភៈកន្លងទៅ រដ្ឋមន្ត្រី​ក្រសួង​ព័ត៌មាន​លោក​ខៀវ កាញារីទ្ធ​បាន​ផ្សាយ​សេចក្តី​ណែនាំ​ជា​សាធារណៈ​មួយ​ដល់​ម្ចាស់​និង​អ្នក​គ្រប់គ្រង​ការ​បោះពុម្ព​ផ្សាយ​សារព័ត៌មាន ​ទស្សនាវដ្តីនិង​​​ព្រឹត្តិបត្រ​​ទាំងអស់​នៅ​កម្ពុជា អោយ​ពួកគេ​បញ្ឈប់​ទាំងស្រុង​នូវ​ការ​ផ្សព្វផ្សាយ​រូបភាព​ដែល​អសីលធម៌ ខុសឆ្គង​ពី​ក្រមសីលធម៌​វិជ្ជាជីវៈ​សារព័ត៌មាន។ រដ្ឋមន្ត្រី​ក្រសួង​ព័ត៌មាន​បាន និយាយ​​ផ្តោត​ទៅ​លើ​ការ​ផ្សព្វផ្សាយ​រូបភាព​ហឹង្សា​លើ​ស្ត្រី​និង​កុមារ រូបភាព​គ្រោះថ្នាក់​ចរាចរណ៍​​គួរ​​អោយ​​ខ្លាច​និង​​រូបភាព​​ឧក្រិដ្ឋកម្ម​ជាដើម៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI