កម្ពុជា

លោក​មឿង សុន​ស្វែងរក​ព្រះរាជ​អន្តរាគមន៍​លើកលែង​ទោស​ពី​ព្រះមហាក្សត្រ

លោក​មឿង សុន​រធាន អង្គការ​មូលនិធិ​ទ្រទ្រង់​​អរិយធម៌​ខ្មែរ
លោក​មឿង សុន​រធាន អង្គការ​មូលនិធិ​ទ្រទ្រង់​​អរិយធម៌​ខ្មែរ ©បណ្ណសារ
១៨ នាទី

បន្ទាប់​ពី​និរទេស​ខ្លួននៅ​ឯ​បរទេស​អស់​រយៈពេលជា​ច្រើន​ឆ្នាំ​ដោយ​គេច​ពី​ការជាប់​ពន្ធនាគារ​ចំនួន​ពីរ​ឆ្នាំពី​បទ​ចោទ​ញុះញង់​លោក ​មឿង សុន ប្រធាន ​​អង្គ​ការ​​មូល​និ​ធិ​ទ្រ​ទ្រង់​​អរិយធម៌​ខ្មែរបាន​ដាក់​លិខិត​ស្នើ​សុំ​ព្រះរាជ​អន្តរាគមន៍​ពី​ព្រះ​មហាក្សត្រ​ធ្វើការ​លើកលែង​ទោស​ដល់​រូប​លោក​ក៍​ដូចជា​ អ្នក​នយោបាយ​ សកម្ម​ជន​សិទ្ធិមនុស្ស សកម្មជន​ដី​ធ្លី​និង​ប្រ​ជា​ពលរដ្ឋ​មួយ​ចំនួន​ដើម្បី​បាន​ចូល​​រួម​​គោរព​ព្រះបរម​សព​សម្តេច​​ព្រះមហាវីរក្សត្រ។

ផ្សាយពាណិជ្ជកម្ម

ប្រធាន អង្គការ​មូលនិធិ​ទ្រទ្រង់​​អរិយធម៌​ខ្មែរ​លោក មឿង សុន​ដែល​កំពុង​រស់នៅ​និរទេស​នៅ​ឯ​ក្រៅ​ប្រទេសក្រោយ​ពី​​ជាប់​ចោទ​ពី​បទ​ញុះញង់ ​បាន​ដាក់​លិខិត​ស្នើ​សុំ​ព្រះ​រាជ​អន្តរាគមន៍​ទៅ​ព្រះមហាក្សត្រ​ ព្រះរាជ​​ទាន​លើកលែងទោស​ដល់​រូប​លោក​ ក៍​ដូចជា​អ្នកនយោបាយ​ សកម្មជន​សិទ្ធិមនុស្ស​មួយ​ចំនួននិង​សកម្មជន​ដីធ្លី​​ដើម្បី​បាន​ចូល​​រួម​​គោរព​​ព្រះបរមសព​សម្តេច​​ព្រះមហាវីរក្សត្រ។

នៅ​ក្នុង​លិខិត​ស្នើ​សុំ​របស់​លោក​មឿង ស៊ុន​ដែល​បាន​ដាក់​ថ្វាយជូន​ព្រះមហាក្សត្រ​សម្តេច​ព្រះបាទ​ព្រះបរមនាថ នរោត្តម​ សីហមុនី នៅ​ថ្ងៃ​ទី​៣០ ខែ​តុលា​ ស្នើរ​សុំ​ព្រះរាជទាន​អន្តរាគមន៍​ដល់​​ប្រមុខរដ្ឋាភិបាល​លើកលែង​ទោស​មាន​ដូចជា​រូបលោក​​ផ្ទាល់ ​លោក សម ​រង្ស៊ី ប្រធាន​គណបក្ស​​សង្គ្រោះជាតិ លោក​ម៉ម សូណង់​ដូ ប្រធាន​សមាគម​អ្នកប្រជាធិបតេយ្យ និង​នាយក​វិទ្យុ​សំបុក​​ឃ្មុំ​ ប្រជាសហគមន៍​បឹងកក់ បូរីកីឡា​ សមាជិក​សមាគម​អ្នកប្រជាធិបតេយ្យ និង​ប្រជាពលរដ្ឋ​មាន​ទោស​កំហុស​​បន្តិច​បន្តួច​ដែល​កំពុង​នៅ​ជាប់​ឃុំ​ក្នុង​ពន្ធនាគារ​ និង​អ្នក​ខ្លះ​ទៀត​រត់​គេច​ចេញ​ពី​ប្រទេស ឲ្យ​មាន​ឱកាស​បាន​ចូល​ទៅ​ថ្វាយ​បង្គំ​ព្រះបរម​សព និង​ឃើញ​ព្រះ​ភ័ក្រ្ត​សម្តេចឪ។

លោក​បាន​ទូល​ថ្វាយ​នៅ​ក្នុង​លិខិត​នោះ​ទៀត​ថា​ ៖យើង​ខ្ញុំ​ទាំង​អស់​គ្នា​ពុំ​មាន​ចេតនាប្រឆាំង​​ប្រយោជន៍​ជាតិ​ឡើយ ហើយ​ការស្នើ​សុំ​នេះគឺ​យោង​តាម​ព្រះរាជបណ្តាំ​ និង បំណង​របស់​សម្តេច​ឪ​លើ​ចំណុច​ បង្រួប​បង្រួម​ជាតិ​ យុត្តិធម៌​សង្គម និង​យុត្តិធម៌​សេដ្ឋកិច្ច។

លោក ​​មឿង សុន បាន​បញ្ជាក់​នៅ​ក្នុង​លិខិតនោះ​ទៀត​ថា​​ រហូតមក​ដល់​ពេល​​នេះ​ អង្គ​ការ​របស់​លោក​មិន​​ទាន់​បានចាប់​​ផ្តើម​កសាង​​មន្ទីរពេទ្យ​ព្រះនាម សម្តេចឪ ​ព្រះនរោត្តម ​សីហនុ​ នៅ​ក្បែ​រ​ប្រាសាទ​ព្រះវិហារ​តាម​ការអនុ​ញ្ញាត​របស់​អាជ្ញាធរ​ព្រះ​​វិហារ ​ដើម្បី​​ទុក​​ជា​​អនុស្សាវរីយ៍​​របស់​ព្រះបិតា​​បូរណភាព​ទឹកដី ​នៅ​ឡើយ​ទេ ​ដោយ​ហេតុ​តែ​​នៅ​ពេល​នេះ ​លោក​កំពុង​គេចចេញ​ពី​ប្រទេស​ ​ដើម្បី​ចៀសវាង​ការចាប់​​ខ្លួន​លោក​ដាក់​ពន្ធនាគារ​ដោយ ​តុលាការ។

កាល​ឆ្នាំ​២០០៩ លោក មឿង សុន ត្រូវបាន​តុលាការក្រុង​ភ្នំពេញ​កាត់​ទោស​កំបាំងមុខ ដាក់​ពន្ធនាគារ​រយៈពេល ២ ឆ្នាំ និង​ពិន័យ​ជា​ប្រាក់ ១៥ លាន​រៀល ពី​បទ​ផ្សាយ​ព័ត៌មាន​មិន​ពិត តាម​ពាក្យបណ្តឹង​របស់​រដ្ឋាភិបាល។ រដ្ឋាភិបាល​បាន​ប្តឹង​លោក បន្ទាប់ពី​បាន​ថ្លែង​តាម​កាសែត​ចំពោះ​ការដាក់​អំពូល​ភ្លើង លើ​ជញ្ជាំង​ប្រាសាទអង្គរវត្ត ដើម្បី​ទាក់ទាញ​ភ្ញៀវ​ទេសចរ​នៅ​ពេលយប់។ នៅ​ខែ​​ឧសភា​ ឆ្នាំ​២០១១​ ​សាលាឧទ្ធរណ៍ បាន​ប្រកាស​តម្កល់​សេចក្តីសម្រេច​ផ្តន្ទាទោស​កំបាំង​មុខ​ដោយ​រក្សា​ការផ្តន្ទា​ទោសឲ្យ​ជាប់​ពន្ធនាគារ ២ ឆ្នាំដដែល ក៏​ប៉ុន្តែ​បាន​សម្រេច​បន្ធូរបន្ថយ​លើ​ការពិន័យ​បង់​ប្រាក់​​ពី ១៥ លាន​រៀល មក​នៅត្រឹម ៤ លាន​រៀល និង​កែប្រែ​បទ​ចោទប្រកាន់ពី​បទ​ផ្សាយ​ព័ត៌មាន​មិន​ពិត មក​ជា​បទ​ញុះញង់ ស្របតាម​ច្បាប់​ក្រម​ព្រហ្មទណ្ឌ​ថ្មី៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI