អានតួអត្ថបទ
កម្ពុជា

បណ្តាញ​ព្រះសង្ឃ ​ប្រកាស​ធ្វើ​ធម្ម​យាត្រា ​ដាក់​ញត្តិ​ថ្វាយ​ព្រះមហាក្សត្រ ​និង​រដ្ឋសភា​ ដើម្បី​រក្សា​ដី​ពុទ្ធសាសន​បណ្ឌិត្យ

វិទ្យាស្ថានពុទ្ធសាសនបណ្ឌិត្យនៅចន្លោះណាហ្គាវើល និងណាហ្គា២។
វិទ្យាស្ថានពុទ្ធសាសនបណ្ឌិត្យនៅចន្លោះណាហ្គាវើល និងណាហ្គា២។ ©Naga Corp
ដោយ៖ លី ម៉េងហួរ
២២ នាទី

បណ្តាញ​ព្រះសង្ឃ ​និង​ពុទ្ធបរិស័ទ​ គ្រោង​នឹង​ជួបជុំ ​ធ្វើ​ធម្ម​យាត្រា ​នៅ​រាជធានី​ភ្នំពេញ ​នា​ដើមខែ​តុលា ​ដើម្បី​ដាក់​ញត្តិ​ថ្វាយ​ព្រះ​មហាក្សត្រ ​និង​រដ្ឋសភា ​ក្នុង​បំណង ​ទាមទារ​ឲ្យ​បញ្ឈប់​ការដ្ឋាន​របស់​ក្រុមហ៊ុន​សណ្ឋាគារ ​និង​កាស៊ីណូ ​ណាហ្គា វើល​ លើ​ទីតាំង​វិទ្យាស្ថាន​ពុទ្ធសាសន​បណ្ឌិត្យ ​ជាប់​នឹង​វិមាន​រដ្ឋសភា។ ​ព្រះ​តេជគុណ ​ប៊ុត ​ប៊ុនតិញ ​ស្ថាបនិក​បណ្តាញ​ព្រះសង្ឃ​ឯករាជ្យ ដើម្បី​យុត្តិធម៌​សង្គម ​ក៏​បាន​ស្នើ​ដល់​គណៈ​កម្មការ​ជំនាញ​រដ្ឋសភា ​កោះ​អញ្ជើញ​រដ្ឋ​មន្ត្រី​ក្រសួង​ធម្មការ ​និង​សាសនា ​រួម​ទាំង​មន្ត្រី​សង្ឃ ​ចូល​ឆ្លើយ​បំភ្លឺ​ ជុំវិញ​ការ​ដ្ឋាន​របស់ ​ណាហ្គា វើល ​លើ​ទីតាំង​វិទ្យាស្ថាន​ពុទ្ធ​សាសន​បណ្ឌិត្យ ​ផង​ដែរ។

ផ្សាយពាណិជ្ជកម្ម

ជា​ការ​ផ្តួច​ផ្តើម​ថ្មី​មួយ​ទៀត​ ក្នុង​បំណង​រក្សា​ឲ្យ​ខាន​តែ​បាន​នូវ​ទីតាំង​វិទ្យាស្ថាន​ពុទ្ធ​សាសន​បណ្ឌិត្យ ​នៅ​ជាប់​របង​ខាង​ជើង​រដ្ឋសភា ​ក្នុង​រាជធានី​ភ្នំពេញ។ ​នោះ​គឺ​ព្រះ​តេជគុណ ​ប៊ុត ប៊ុនតិញ ​ស្ថាបនិក​បណ្តាញ​ព្រះសង្ឃ​ឯករាជ្យ ​ដើម្បី​យុត្តិធម៌​សង្គម ​តាមរយៈ​វីដេអូ ​ខ្លីប​ បាន​អំពាវនាវ​ដល់​ព្រះសង្ឃ ​និង​ពុទ្ធ​បរិស័ទ​ ជួប​ជុំ​ ធ្វើ​ធម្ម​យាត្រា ​នៅ​ភ្នំពេញ ​នា​ថ្ងៃ​ទី​២​ ឬ​ថ្ងៃ​ទី​៣​តុលា។ ជា​ធម្ម​យាត្រា ​ដាក់​ញត្តិ​ទូល​ថ្វាយ​ព្រះ​មហាក្សត្រ ​និង​ដាក់​ញត្តិ​នៅ​រដ្ឋសភា។

ព្រះ​តេជ​គុណ ​ប៊ុត​ ប៊ុនតិញ ​បាន​មាន​សង្ឃ​ដីកា​ថា ​ក្នុង​ញត្តិ​ដាក់​ទៅ​កាន់​រដ្ឋ​សភា ​បណ្តាញ​ព្រះសង្ឃ​ឯករាជ្យ ​នឹង​ស្នើ​ដល់​គណៈ​កម្មការ​អប់​រំ​ យុវជន​ កីឡា ​ធម្មការ​ កិច្ចការ​សាសនា​ វប្បធម៌​ និង​ទេសចរណ៍ ​កោះ​ហៅ​រដ្ឋ​មន្ត្រី​ក្រសួង​ធម្មការ​ និង​សាសនា ​លោក ​មិន​ ឃិន​ ព្រម​ទាំង​មន្ត្រី​សង្ឃ ​ចូលរួម​ ជជែក​គ្នា ​ក្នុង​មហា​គ្រួសារ​ខ្មែរ​ លើ​ករណី​ក្រុមហ៊ុន​កាស៊ីណូ ​ណាហ្គា ​វើល ​បើក​ការ​ដ្ឋាន​លើ​ដី​របស់​វិទ្យាស្ថាន​ពុទ្ធ​សាសន​បណ្ឌិត្យ។

ជា​មួយ​គ្នា​នោះ​ បណ្តាញ​ព្រះ​សង្ឃ​ ក៏​ទូល​ស្នើ​សុំ​ព្រះ​រាជ​អន្តរាគមន៍​ពី​ព្រះ​មហាក្សត្រ ​ដែល​ជា​ម្ចាស់​ទ្រព្យ​របស់​ពុទ្ធ​សាសន​បណ្ឌិត្យ ​ដើម្បី​ឲ្យ​ព្រះអង្គ ​ចេញ​ព្រះរាជ​សារ​ ទៅ​រដ្ឋាភិបាល ​និង​រដ្ឋសភា​ ឲ្យ​ពិនិត្យ​លើ​ការដ្ឋាន​របស់​ណាហ្គា​វើល។

ការ​ផ្តួច​ផ្តើម​យុទ្ធនា​ការ​ជា​ថ្មី​ ដើម្បី​រក្សា​ទីតាំង​វិទ្យាស្ថាន​ពុទ្ធសាសន​បណ្ឌិត្យ ​ខាង​លើ​នេះ​ ត្រូវបាន​ធ្វើ​ឡើង​ បន្ទាប់​ពី​កាសែត​ បាន​ផ្សាយ​កាល​ពី​ថ្ងៃ​ទី​១៧​កញ្ញា ​ដោយ​ស្រង់​សម្តី​ប្រធាន​ផ្នែក​ហិរញ្ញ​វត្ថុ​របស់​ក្រុមហ៊ុន ​ណាហ្គា ​ខប​ មក​ចុះ​ផ្សាយ​ថា ​ក្រុមហ៊ុន ​ណាហ្គា ​កំពុង​តែ​ពិភាក្សា​ជាមួយ​អាជ្ញាធរ​ ដើម្បី​យក​ដី​ពុទ្ធ​សាសន​បណ្ឌិត ​សាងសង់​ ណាហ្គា ​៣​ ធ្វើ​ជា​សណ្ឋាគារ។

ប៉ុន្តែ​ភ្លាម​ៗ​នោះ ​ក្រសួង​ធម្មការ​ និង​សាសនា ​បាន​ចេញ​សេចក្តី​ថ្លែង​ការណ៍​ប្រតិកម្ម​ភ្លាម​ៗ​ដែរ ដោយ​បដិសេធ​យ៉ាង​ដាច់​ខាត​ថា ​ក្រសួង​ពុំ​ដែល​មាន​គោល​ការណ៍​គិត​គូរ​ ដល់​ការ​វិនិយោគ ​ឬ​លក់​វិទ្យាស្ថាន​ពុទ្ធ​សាន​បណ្ឌិត​ ឲ្យ​ក្រុមហ៊ុន​ឯកជន​ណា​ឡើយ ​រាប់​ទាំង​ក្រុមហ៊ុន​ណាហ្គា​វ៉ើល​។ ក្រសួង​ធម្មការ​ បាន​បញ្ជាក់​ថា ​ការ​ចុះ​ផ្សាយ​របស់​កាសែត​នោះ​ គឺ​ផ្ទុយ​នឹង​ការ​ពិត ដោយ​សារ​បច្ចុប្បន្ន​វិទ្យាស្ថាន​ពុទ្ធ​សាន​បណ្ឌិត​ កំពុង​តែ​ដំណើរ​ការងារ​របស់​ខ្លួន​ជា​ប្រក្រតី ​រួម​ទាំង​បាន​លើក​គម្រោង​ថវិការ​ជាតិ​ ដើម្បី​ជួសជុល​ កែ​លម្អ ​និង​សាងសង់​អាគារ​ថ្មី​បួន ឬ​ប្រាំ​ជាន់​ទៀត ​ក្នុង​ទីតាំង​វិទ្យាស្ថាន​នោះ។

ប៉ុន្តែ​យ៉ាង​ណា​ក៏​ដោយ​ កាល​ពី​ពាក់​កណ្តាល​ឆ្នាំ​នេះ​ ណាហ្គា ​វើល ​បាន​ព័ទ្ធ​របង ​និង​បើក​ការដ្ឋាន ​លើ​ដី​មួយ​ផ្នែក​របស់​វិទ្យាស្ថាន​ពុទ្ធ​សាសន​បណ្ឌិត​ ទំហំ ​៣០​ ម៉ែត្រ ​គុណ​នឹង​ ១០០ ម៉ែត្រ ​ក្រោម​កិច្ច​សន្យា​ជួល។ ​របង​ និង​ក្លោង​ទ្វារ​ ផ្នែក​ខាង​ជើង​របស់​វិទ្យាស្ថាន​ពុទ្ធ​សាសន​បណ្ឌិត​ ក៏​ត្រូវ​ក្រុម​ហ៊ុន​ ណាហ្គា​ វើល ​វាយ​ចោល ​ដើម្បី​សាង​សង់​ផ្លូវ​ និង​ផ្សារ​ក្រោម​ដី។

យ៉ាង​ណា​ក៏​ដោយ ​ព្រះ​តេជគុណ ​ប៊ុត​ ប៊ុនតិញ​ បាន​បញ្ជាក់​ថា ​បើ​សិន​ជា​ព្រះ​មហាក្សត្រ​ និង​រដ្ឋសភា​ មិន​អាច​ដោះស្រាយ​ការ​រំលោភ​បំពាន​លើ​ទីតាំង​វិទ្យាស្ថាន​ពុទ្ធ​សាសន​បណ្ឌិត្យ​បាន​នោះ​ទេ គឺ​ជម្រើស​ចុង​ក្រោយ ព្រះ​តេជគុណ​នឹង​សុំ​ជួប​លោក​នាយក​រដ្ឋ​មន្ត្រី ​ហ៊ុន ​សែន ​ដែលជា​អតីត​កូន​សិស្ស​លោក​ ដើម្បី​សុំ​បិណ្ឌបាត​ រក្សា​ទីតាំង​វិទ្យាស្ថាន​ពុទ្ធ​សាសន​បណ្ឌិត្យ​ ដែលជា​គ្រឹះ​នៃ​ព្រះ​ពុទ្ធ​សាសនា៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ