ទិវាជាតិប្រឆាំងការជួញដូរមនុស្សថ្ងៃ១២ធ្នូប្រារព្ធឡើងដោយការជួបជុំថ្លែងការណ៍
ចុះផ្សាយនៅថ្ងៃ៖ កែប្រែថ្ងៃទី៖
រដ្ឋាភិបាលតាមរយៈក្រសួងកិច្ចការនារី និងអង្គការក្រៅរដ្ឋាភិបាល បានជួបជុំប្រារព្ធទិវាជាតិប្រឆាំងការជួញដូរមនុស្សថ្ងៃ១២ធ្នូនៅឆ្នាំនេះក្រោមប្រធានបទ “រួមគ្នា ប្រឆាំងការជួញដូរមនុស្សគ្រប់រូបភាពនិងជួយជនរងគ្រោះ"។ ពិធីជួបជុំនៅសួនច្បារមុខវត្តបទុមក្នុងទីក្រុងភ្នំពេញនាព្រឹកថ្ងៃចន្ទ១២ធ្នូនេះ តំណាងរដ្ឋាភិបាល បានប្រកាសពីការប្តេជ្ញាដើម្បីប្រឆាំងនឹងការជួញដូរមនុស្ស។ ការជួញដូរមនុស្សនៅកម្ពុជានៅឆ្នាំ២០១១នេះ ត្រូវបានអាមេរិកកំណត់ ចំណាត់ថ្នាក់នៅត្រឹមប្រភេទទី២។ មានន័យថា កម្ពុជានៅតែកើតមានអំពើជួញដូរមនុស្សនៅឡើយ។
រដ្ឋាភិបាលកម្ពុជាបានសម្រេចយកថ្ងៃ១២ធ្នូ ជារៀងរាល់ឆ្នាំជាទិវាជាតិប្រឆាំងការជួញដូរមនុស្ស។ ពិធីជួបជុំនោះដើម្បីទប់ស្កាត់ការជួញដូរមនុស្សនិងលុបបំបាត់រាល់ទម្រង់នៃអំពើហិង្សាលើស្ត្រី យុវវ័យ និងកុមារ ដែលជាអំពើរំលោភយ៉ាងធ្ងន់ធ្ងរបំផុត លើសិទ្ធិជាមូលដ្ឋានរបស់មនុស្ស។
ដើម្បីទប់ស្កាត់ការជួញដូរមនុស្ស និងការធ្វើអាជីវកម្មផ្លូវភេទ រដ្ឋាភិបាលកម្ពុជាបានអនុម័ត និងដាក់ចេញជាបន្តបន្ទាប់នូវច្បាប់ និងវិធានការនានា ព្រមទាំងផ្តល់សច្ចាប័នចូលជាសមាជិករដ្ឋភាគី នៃអនុសញ្ញារបស់អង្គការសហប្រជាជាតិជាដើម។
ក្នុងពិធីជួបជុំនៅព្រឹកមិញ លោកស្រី អ៊ឹង កន្ថាផាវី រដ្ឋមន្ត្រីក្រសួងកិច្ចការនារី បានលើកឡើងថា អំពើជួញដូរមនុស្ស ទាំងនៅក្នុងប្រទេសនិងទាំងឆ្លងដែន គឺជាអំពើឧក្រិដ្ឋកម្ម ដែលរំលោភលើសិទ្ធិមនុស្សយ៉ាងធ្ងន់ធ្ងរបំផុត។ អំពើនេះ មានទំនាក់ទំនងប្រទាក់ក្រឡាទៅនឹងបញ្ហាជាច្រើន ជាពិសេសជាមួយចរន្តសេដ្ឋកិច្ចទីផ្សារនិងការអភិវឌ្ឍន៍ ដែលជនប្រព្រឹត្តបទល្មើស ត្រូវតែទទួលការផ្តន្ទាទោសតាមច្បាប់ និងជនរងគ្រោះត្រូវតែទទួលបាននូវកិច្ចការពារប្រកបដោយយុត្តិធម៌។
តាមមន្ត្រីរដ្ឋាភិបាល កត្តាមួយចំនួនដែលនាំឲ្យមានការជួញដូរមនុស្សបណ្តាលមកពីភាពមិនស្មើគ្នារវាងបុរសនិងស្ត្រី ភាពក្រីក្រ ជាពិសេសកង្វះការងារនៅមូលដ្ឋានជាដើម។ ម្យ៉ាងទៀតការចាកចេញពីស្រុកកំណើត ដើម្បីទៅរកការងារធ្វើក៏នាំឲ្យមានការជួញដូរមនុស្សផងដែរ។
យ៉ាងណាក៏ដោយ មន្ត្រីរដ្ឋាភិបាល ក្នុងពិធីជួបជុំនៅព្រឹកមិញ បានប្រកាសប្តេជ្ញារួមជាមួយអង្គការក្រៅរដ្ឋាភិបាល ដើម្បីប្រឆាំងនឹងអំពើជួញដូរមនុស្ស និងអំពើអាជីវកម្មផ្លូវភេទ តាមរយៈការផ្សព្វផ្សាយនៅថ្នាក់ជាតិ និងថ្នាក់តំបន់ ព្រមទាំងការបង្ក្រាបរាល់ទម្រង់នៃការជួញដូរមនុស្ស។ អំពើជួញដូរមនុស្ស ត្រូវបានក្រសួងការបរទេសអាមេរិកវាយតម្លៃ នៅឆ្នាំ២០១០ ដោយដាក់ប្រទេសកម្ពុជា ស្ថិតក្នុងប្រទេសប្រភេទទី២ ដោយមានការឃ្លាំមើល។ ប៉ុន្តែនៅឆ្នាំ២០១១នេះ អាមេរិកបានតម្លើងឋានៈកម្ពុជាមកត្រឹមប្រភេទទី២ ដែលមានន័យថា កម្ពុជា អនុវត្តបានល្អប្រសើរក្នុងការប្រឆាំងអំពើជួញដូរមនុស្ស។
របាយការណ៍បង្ហាញថា នៅឆ្នាំ២០១១ មានជនល្មើសជាង ២០០ នាក់ ត្រូវបានបញ្ជូនទៅកាត់ទោសនៅតុលាការ ពីបទជួញដូរមនុស្សនៅកម្ពុជា។ រីឯស្ត្រី និងកុមារី ដែលប្រកបមុខរបររក ស៊ីផ្លូវភេទចំនួន ៤០៧.៦៥៦ នាក់ ត្រូវបានសង្គ្រោះ និងអប់រំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ