ឧបទ្វីបកូរ៉េ

មន្ត្រី​រដ្ឋាភិបាល​កូរ៉េ​ទាំងពីរ​ជួបគ្នា​ដើម្បី​រៀបចំ​វេទិកា​ចរចា​សំរាប់​មេដឹកនាំ​របស់​ពួកគេ

គណប្រតិភូ​កូរ៉េ​ខាងត្បូង​ជួប​ជាមួយ​ភាគី​កូរ៉េខាងជើង នៅថ្ងៃ​អាទិត្យ​ទី ៩​មិថុនា ២០១៣
គណប្រតិភូ​កូរ៉េ​ខាងត្បូង​ជួប​ជាមួយ​ភាគី​កូរ៉េខាងជើង នៅថ្ងៃ​អាទិត្យ​ទី ៩​មិថុនា ២០១៣ ©Reuters

មន្ត្រី​រដ្ឋាភិបាល​នៃ​បងប្អូន​កូរ៉េ ទាំងពីរ​បាន​ជួបគ្នា​ហើយ នៅព្រឹក​ថ្ងៃអាទិត្យនេះ នៅ​ក្នុង​ភូមិ ប៉ានមុនជុំ​ ជាប់​ព្រំដែន​នៃ​ប្រទេស​ទាំងពីរ។ មន្ត្រី​ទាំងពីរ​ត្រូវជួបគ្នា ដើម្បី​ត្រៀម​រៀបចំ​កិច្ចប្រជុំ​សម្រាប់ការ​ចរចា​ថ្នាក់ខ្ពស់​នៃ​ប្រទេស​ទាំងពីរ​នៅពេល​ខាងមុខ។ គួរ​បញ្ជាក់ថា ការជួប​ចរចា​គ្នា​រវាង​បងប្អូន​សត្រូវ​ទាំងពីរ​បាន​កើត​មាន​ឡើង បន្ទាប់​ពី​មេដឹកនាំ​ប្រទេស​មហាអំណាច​អាមេរិក និង​ចិន​បាន​ព្រមព្រៀងគ្នា លើ​ការបញ្ចប់​កម្មវិធី​នុយក្លេអ៊ែរ​របស់​កូរ៉េខាងជើង។

ផ្សាយពាណិជ្ជកម្ម

មាន​មន្ត្រី​រដ្ឋាភិបាល​៣​រូប​របស់​កូរ៉េខាងជើង និង​៣​រូប​ទៀត​របស់កូរ៉េត្បូង។ ពួកគេ​បានជួបគ្នា​នៅ​ម៉ោង ១០ព្រឹកថ្ងៃ​អាទិត្យ​ទី ៩ មិថុនា នៅ​ក្នុង​ភូមិ ប៉ានមុនជុំ ជាភូមិជាប់ព្រំដែន​នៃប្រទេស​សត្រូវ​បងប្អូន​ទាំងពីរ។ ភូមិ​នេះ​ក៏​ធ្លាប់ជា​កន្លែង​ដែល​មេដឹកនាំ​កូរ៉េទាំងពីរ​បាន​ចុះហត្ថលេខា​បញ្ចប់សង្គ្រាម​រវាង​ប្រទេស​ទាំងពីរ​ផងដែរ ក្នុង​ទសវត្សរ៍​ឆ្នាំ៥០។

មន្ត្រី​រដ្ឋាភិបាល​កូរ៉េទាំងពីរ​បាន​ជួបពិភាក្សា​អំពី​ការត្រៀម​រៀបចំ​ជំនួប​ជាន់ខ្ពស់​រវាង​មេដឹកនាំ​នៃ​ប្រទេស​បងប្អូន​ទាំងពីរ។ មេដឹកនាំ​កូរ៉េ​ទាំងពី​នឹង​ជជែក​ផ្តោត ជាសំខាន់ទៅ​លើ​ការបង្កើត​ឡើងវិញ​នូវ​ទំនាក់ទំនង​ពាណិជ្ជកម្ម​ទ្វេភាគី រួម​ទាំង​​ការបើកឡើង​វិញ​តំបន់​ឧស្សាហកម្ម​កៃស៊ុង​ផងដែរ។ តំបន់​ឧស្សាហកម្មនេះ​ដែល​ស្ថិតនៅ​លើ​ទឹកដី​កូរ៉េខាងជើង​ត្រូវបាន​ទីក្រុង​ព្យុងយ៉ាង​សម្រេច​បិទ​ទ្វារ កាលពី​ខែ​មេសា​កន្លងទៅ។

ស្ថានភាព​ធូស្រាល​រវាង​បងប្អូន​កូរ៉េ​ទាំងពីរ​នៅពេលនេះ កើតឡើង​ទន្ទឹម​គ្នា​នឹង​ជំនួប​កំពូល​រវាង​ប្រធានាធិបតី​ចិន ស៊ី ជីនពីង និង​ប្រធានាធិបតី​អាមេរិក​ បារ៉ាក់ អូបាម៉ា។ ប្រធានាធិបតី​នៃ​ប្រទេស​មហាអំណាច​ទាំងពីរ​ដែល លើកនេះ​បាន​ជួបគ្នា​ក្នុង​លក្ខណៈ​សាមញ្ញ​បំផុត​នោះ បាន​ព្រមព្រៀងគ្នា​លើ​ការបញ្ចប់​កម្មវិធី​នុយក្លេអ៊ែរ​របស់​កូរ៉េខាងជើង។ ចិន​ដែល​ជា​សម្ព័ន្ធមិត្ត​ដ៏មាន​ទំងន់​លើរបប​ព្យុងយ៉ាងនោះ ចុងក្រោយ​នេះបានបង្ហាញ​ជំហរ​មិន​គាំទ្រ​កម្មវិធី​នុយក្លេអ៊ែរ​របស់​កូរ៉េខាងជើង ដែល​កំពុង​ដឹកនាំ​ដោយ​មេដឹកនាំ​វ័យក្មេង គឹម ជុងអ៊ុន​ឡើយ។

ការ​បន្ទន់​ឥរិយាបទ​របស់កូរ៉េខាងជើង​ដែល​បាន​ព្រមព្រៀង​ជួបគ្នា​ជាមួយ​កូរ៉េខាងត្បូង​នៅពេលនេះ​ ត្រូវបាន​ស្វាគមន៍​ដោយ​កូរ៉េខាងត្បូង។ ប៉ុន្តែ​ក្រុម​អ្នកវិភាគ​មួយ​ចំនួន​នៅ​តែ​មិនទាន់​ទុកចិត្ត​ទាំងស្រុងទៅលើ​កូរ៉េខាង​ជើង​នៅឡើយ។

ក្រុមអ្នកវិភាគ​និយាយថា ការ​បន្ទន់ឥរិយាបទ​របស់​កូរ៉េខាងជើង​នេះ គឺ​ជា​អត្តចរិត​ការទូត​របស់​របបព្យុងយ៉ាង​ដែល​ចង់អោយកូរ៉េ​ខាង​ត្បូង​ដោះស្រាយបញ្ហា​នានាដែល​ខ្លួន​ឯង គឺ​កូរ៉េខាងជើង​ជាអ្នកបង្កើត​ឡើង៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI