អានតួអត្ថបទ
កូរ៉េខាងជើង

កូរ៉េខាងជើង​លើក​ថ្ងៃ​បាញ់​បង្ហោះ​មីស៊ីល

ទាហាន​កូរ៉េខាងជើង​យាម​មីស៊ីល​ដែល​ក្រោយមក គេ​បាន​បាញ់បរាជ័យ កាលពីខែ​មេសា​ឆ្នាំ ២០១២
ទាហាន​កូរ៉េខាងជើង​យាម​មីស៊ីល​ដែល​ក្រោយមក គេ​បាន​បាញ់បរាជ័យ កាលពីខែ​មេសា​ឆ្នាំ ២០១២ ©REUTERS/Bobby Yip
ដោយ៖ ឈាង បុប្ផា
១៧ នាទី

នៅព្រឹកថ្ងៃ​អាទិត្យ​ទី ៩​ធ្នូ ទីក្រុង​ព្យុងយ៉ាង​បាន​ប្រកាស​លើកថ្ងៃ​បាញ់​បង្ហោះ​រ៉ុកកែត​ផ្ទុក​​ផ្កាយរណប​របស់ខ្លួន ដែល​ត្រូវ​គ្រោង​ធ្វើ​នៅចន្លោះ ថ្ងៃ​ទី ១២ និង​ថ្ងៃ​ទី ២០​ធ្នូ​ខាងមុខ។ តាមអ្នកវិទ្យាសាស្រ្ត​កូរ៉េខាងជើង បញ្ហា​បច្ចេកទេស ជាមូលហេតុ​ដែល​ធ្វើ​ឲ្យ​គេ​លើកថ្ងៃ​បាញ់​បង្ហោះ​មីស៊ីល។

ផ្សាយពាណិជ្ជកម្ម

 

អ្នកជំនាញ​បរទេស​ដែល​តាមដាន​ជាប់ស្អិត​កម្មវិធី​នុយក្លេអ៊ែរ​របស់​កូរ៉េខាងជើង​ជឿថា ការលើក​ថ្ងៃ​បាញ់បង្ហោះ​មីស៊ីល​ពិត​ជា​អាច​មក​ពី​បញ្ហា​បច្ចេកទេស ប៉ុន្តែ មិនមែន​បណ្តាល​មក​ពី​គំនាប​របស់​សហគមន៍​អន្តរជាតិ​ទេ។ បើតាម​អ្នកវិភាគ​របស់​វិទ្យាស្ថាន​ដើម្បី​សន្តិភាព នៃ​សកលវិទ្យាល័យ​កូរ៉េខាងត្បូង បើសិន​ជា​កូរ៉េខាងជើង​ចង់​បន្ទន់​ជំហរ​របស់ខ្លួន នៅចំពោះមុខ​សហគមន៍​អន្តរជាតិ នោះ គឺ​រដ្ឋអំណាច​កូរ៉េខាងជើង តាមរយៈ​គណបក្ស ឬ​កងទ័ព​ដែល​ជា​អ្នកប្រកាស​ដំណឹង​លើកថ្ងៃ។ ប៉ុន្តែ ការពិត​ជាក់ស្តែង អ្នក​ដែល​ប្រកាស​ដំណឹង នៅថ្ងៃ​អាទិត្យ​នេះ គឺក្រុម​អ្នកវិទ្យាសាស្រ្ត មកពី​គណៈកម្មាការ​ដើម្បី​វិទ្យាសាស្រ្ត​អវកាស​កូរ៉េខាងជើង។ ចំណុចនេះ​ធ្វើ​ឲ្យ​គេ​ជឿថា ការយឺតយ៉ាវ​ពិត​ជាមាន​មែន ហើយ​វា​ពិត​ជា​បណ្តាល​មក​ពី​បញ្ហា​បច្ចេកទេស ឬ​ក៏​អាកាសធាតុ។

អ្នកវិទ្យាសាស្រ្ត​កូរ៉េខាងជើង​បាន​ត្រឹម​និយាយ​ពី​បញ្ហា​បច្ចេកទេស​ដែល​ជាមូលហេតុ​ធ្វើ​ឲ្យ​គេ​លើកថ្ងៃ​បាញ់បង្ហោះ ប៉ុន្តែ មិន​បាន​លម្អិត​ព័ត៌មាន​ច្រើន​ទេ។ កាលពីថ្ងៃ​សុក្រ ម្សិលម្ង៉ៃ អាមេរិក និង​កូរ៉េខាងត្បូង​បាន​កត់សំគាល់​ឃើញ​មាន​ការយឺតយ៉ាវ​ក្នុង​គម្រោង​បាញ់បង្ហោះ​មីស៊ីល​របស់​កូរ៉េខាងជើង ដែល​អាច​បណ្តាល​មកពី​ការធា្លក់​ទឹកកក​ខ្លាំងពេក នៅកន្លែង​ដំឡើង​មីស៊ីល។

សម្រាប់​សាស្ត្រាចារ្យ​Yang Moo Jinn​មកពី​សកលវិទ្យាល័យ​ដើម្បី​​សិក្សាពីកូរ៉េខាងជើង ទីក្រុង​ព្យុងយ៉ាង​ប្រញាប់​រួសរាន់​ចង់​បាញ់​មីស៊ីល​លឿនពេក ក្នុង​ខណៈពេល​ដែល​អ្នកវិទ្យាសាស្រ្ត​នៅមិន​ទាន់​ត្រៀម​ខ្លួន។ កូរ៉េខាងជើង​គ្រោង​នឹង​បាញ់​បង្ហោះ​រ៉ុកកែត នៅ​ពាក់​កណ្តាល​ខែ​ធ្នូនេះ គឺ​ឲ្យ​ចំ​ថ្ងៃ​ទី ១៧​ធ្នូ ថ្ងៃ បុណ្យ​ខួប​មួយឆ្នាំ​នៃ​មរណភាព​របស់​លោក​គីម ជុងអ៊ីល ដែលជា​ឪពុក​របស់​លោក​គីម ជុងអ៊ុន មេដឹកនាំ​កូរ៉េខាងជើង​បច្ចុប្បន្ន។

នៅថ្ងៃ​បុណ្យ​ពិសេស ថ្នាក់ដឹកនាំ​កូរ៉េខាងជើង​ចង់​បង្ហាញ​ដល់​ប្រជាជន​របស់ខ្លួន និង​ពិភពលោក​ទាំងមូល ពី​សមត្ថភាព​ជឿនលឿន​របស់​កូរ៉េខាងជើង នៅក្នុង​វិស័យ​បច្ចេកវិទ្យា។ ម្យ៉ាងទៀត របប​កុម្មុយនិស្ត​ជឿថា ការបាញ់​សាកល្បង​មីស៊ីល​បាន​សម្រេចជោគជ័យ នឹង​ធ្វើ​ឲ្យ​ប្រជាជន​កូរ៉េខាងជើង រួមគ្នា​មក​គាំទ្រ​មេដឹកនាំ​វ័យក្មេង។

សូម​រំលឹកថា កាលពី​ខែ​មេសា​កន្លងទៅ កូរ៉េខាងជើង បាន​បាញ់​សាកល្បង​មីស៊ីល​ចម្ងាយ​ឆ្ងាយ ដោយ​ផ្គើននឹង​សេចក្តីសម្រេច​របស់​ក្រុមប្រឹក្សា​សន្តិសុខ​អង្គការ​សហប្រជាជាតិ។ ប៉ុន្តែ ការបាញ់សាកល្បង​បាន​ទទួល​បរាជ័យ ដោយ​មីស៊ីល​បាន​ឆេះ​ធ្លាក់​ទៅក្នុង​ទឹកសមុទ្រ បន្ទាប់ពី​ហោះ​បាន​៥​នាទី។ នៅចុង​សប្តាហ៍នេះ វិញ អាមេរិក និង​ជប៉ុន​បាន​ប្រកាស​ហើយ​ថា ពួកគេ​នឹង​ត្រៀម​ទាមទារ​ឲ្យ​ក្រុមប្រឹក្សា​សន្តិសុខ​ដាក់​ចេញ​ទណ្ឌកម្ម​ថ្មីៗ​បន្ថែមទៀត លើ​កូរ៉េខាងជើង ក្នុង​ករណី​ទីក្រុង​ព្យុងយ៉ាង​នៅតែ​រឹងរូស ចង់​បាញ់មីស៊ីល​របស់ខ្លួន៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ