ស.រ.អា.-កូរ៉េខាងជើង

កូរ៉េខាងជើង​ទន្ទេញ​មេរៀន​ព្រមាន​ធ្វើ​សង្គ្រាម ដដែលៗ ប្រឆាំង​អាមេរិក

លោក Kim Jong-un នៅ​មុខ​រូប​ថត​ជីតា Kim Il-sung បិតា​​បង្កើត​របបកុម្មុយនិស្ត​កូរ៉េខាង​ជើង
លោក Kim Jong-un នៅ​មុខ​រូប​ថត​ជីតា Kim Il-sung បិតា​​បង្កើត​របបកុម្មុយនិស្ត​កូរ៉េខាង​ជើង REUTERS/KCNA

នៅ​ថ្ងៃ​សៅរ៍​ទី​១២​តុលានេះ របប​កុម្មុយនិស្ត​កូរ៉េខាង​ជើង បាន​​អំពាវនាវ​ជា​ថ្មី​ម្តង​ទៀត ឱ្យ​សហរដ្ឋ​អាមេរិក​បញ្ឈប់​ជា​បន្ទាន់​​ ការ​ធ្វើ​សមយុទ្ទ​ និង​ការ​បង្ខំ​ឱ្យ​ព្យុងយ៉ាង​បោះបង់​កម្មវិធី​នុយក្លេអ៊ែរ​ជា​ថ្នូរ​នឹង​ការ​ចរចា​ទ្វេភាគី​។ ជា​សេចក្តី​ថ្លែងការណ៍​ព័ត៌មាន​ដែល​​អម​ ដោយ​ពាក្យ​​ព្រមាន​ ដូច​ទម្លាប់ ថា​នឹង​អាច​មាន​គ្រោះ​ផ្ទុះ​សង្គ្រាមទូទៅ​​ នៅ​ឧបទ្វីប​កូរ៉េផង។

ផ្សាយពាណិជ្ជកម្ម

ក្នុង​អត្ថន័យ​ព្រមាន​ ចង់​វាយ​ប្រហារ​សហរដ្ឋ​អាមេរិក សេចក្តី​ប្រកាស​ព័ត៌មាន​ របស់​គណៈកម្មការការពារ​ជាតិ​ដែល​ជា​ស្ថាប័ន​កំពូល​ដឹក​នាំ​ដោយ​លោក គីម ជុងអ៊ុន បាន​ទាមទារ​​​ឱ្យ​វ៉ាស៊ីនតោន​បញ្ឈប់​រាល់​សកម្មភាព​​ស្អប់ខ្ពើម​កូរ៉េខាង​ជើង ប្រសិន​បើ​ចង់​ឃើញ​សន្តិភាព​មាន​ជា​និរន្ត​ក្នុង​​ឧបទ្វីប​កូរ៉េ និង​លើ​ទឹក​ដី​អាមេរិក។ ​ “អាមេរិក​ត្រូវ​​ដឹង​ថា​កូរ៉េខាង​ជើង​តែង​សងសឹក​ដោយ​ការវាយប្រហារ​តប​នឹង​សកម្មភាព​ផ្គើន​បង្ក​ហេតុ​ ដែល​នៅ​ទី​បំផុត​នឹង​រាលដាល​ជាសង្គ្រាម​ទូទៅជាមួយ​អាមេរិក" ! នេះ​ជា​សម្តី​របស់​​ អ្នកនាំ​ពាក្យ​​គណៈកម្មាការ​យោធា​ជាតិ​ ចុះ​ផ្សាយ​​ក្នុង​សារព័ត៌មាន​ផ្លូវការ កូរ៉េខាង​ជើង។

ម្យ៉ាង​វិញ​ទៀត ព្យុងយ៉ាង​ក៏​ឆ្លៀ​ត​រិះគន់ លក្ខខណ្ឌ​របស់​អាមេរិក​ ដាក់​បង្ខំ​ឱ្យ​កូរ៉េខាង​ជើង​ឱ្យ​បង្ហាញ​ចេតនា​ពិត​បោះ​បង់​កម្មវិធី​នុយក្លេអ៊ែរ​ ជា​ថ្នូ​រ​នឹង​ការ​បើក​កិច្ច​ចរចា​ទ្វេភាគី​ថា ជា​ការ​ម៉ាក់ងាយ​ដែល​មិន​អាច​អនុគ្រោះ​បានទេ។

​​ប្រតិកម្ម​របស់​ព្យុងយ៉ាងម្សិលមិញ​នេះ ធ្វើ​ឡើង​បន្ទាប់​ពី​សហរដ្ឋ​អាមេរិក កូរ៉េខាង​ត្បូង​ និង​ជប៉ុន​បាន​ធ្វើ​សមយុទ្ធ​រួម​គ្នា​ពីរ​ថ្ងៃ​​ (ព្រហស្បតិ៍​និង​សុក្រ) នៅ​តាម​បណ្តោយ​ឆ្នេរ​សមុទ្ទ​ខាង​ត្បូង​ឧបទ្វីប​កូរ៉េ ដោយ​មានទាំង​នាវា​ចម្បាំង​នុយក្លេអ៊ែរ​អាមេរិក​ចូល​រួម​ផង និង​បន្ទាប់​ពី​ លោកស្រី​ប្រធានាធិបតី​កូរ៉េខាង​ត្បូង បាក់ គុនហឺ បាន​ចាត់​ទុក​អ្នកជិត​ខាង​កូរ៉េខាង​ជើង​ថា​ជា​អ្នក​គំរាម​កំហែង​ស្ថិរភាព​និង​សន្តិភាព​ប្រចាំ​តំបន់ និង​មិន​ត្រូវការ​ឃើញ​​ប្រទេស​មួយ​នេះ​មាន​អាវុធ​នុយក្លេអ៊ែរ​ឡើយ។

តាមការពិត ព្យុងយ៉ាង​ធ្លាប់​បាន​និយាយ​ដដែលៗ រាប់​សិប​ឆ្នាំ​មក​ហើយ ចង់​រំសាយ​​​​​អាវុធ​នុយក្លេអ៊ែរ ប៉ុន្តែ​ការ​អភិវឌ្ឍន៍​កម្មវិធី​​នេះ​ ក៏​ព្រោះ​តែ​ចង់​ទប់​ទល់​នឹង​អាមេរិក​ព្រោះ​តែង​បាន​បញ្ជូន​នាវានុយក្លេអ៊ែរ​ជាញឹកញយ​មក​ឧបទ្វីប​កូរ៉េ​តែ​ប៉ុណ្ណោះ។ កាលពី​ខែ​កុម្ភៈ​កន្លង​ទៅ​ ព្យុង​យ៉ាង​បាន​សាក​ល្បង​នុយក្លេអ៊ែរ​ក្រោម​ដី​ដោយ​ជោគជ័យ​ ល្មើស​នឹង​សេចក្តី​សម្រេចចិត្ត​​របស់ក្រុម​ប្រឹក្សាសន្តិសុខ និង​បាន​ធ្វើ​ឱ្យ​ឧបទ្វីប​កូរ៉េ​ជួប​ភាព​តាន​តឹង​ ស្ទើរ​ធ្លាក់​​ក្នុង​ជ្រោះ​វិបត្តិ​យោធាផង៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI