កូរ៉េ​ខាង​ជើង

កូរ៉េ​ខាង​ជើង​ប្រកាស​ថា​នឹង​មិន​ផ្លាស់ប្តូរ​នយោបាយ​និង​​គំរាម​កូរ៉េ​ខាង​ត្បូង

លោក​គីម ជុងអ៊ុន ប្រមុខដឹកនាំ​ថ្មី​របស់​កូរ៉េ​ខាងជើង
លោក​គីម ជុងអ៊ុន ប្រមុខដឹកនាំ​ថ្មី​របស់​កូរ៉េ​ខាងជើង REUTERS/KRT

មួយថ្ងៃ​ក្រោយ​ពី​លោក​គីម ជុងអ៊ុន ត្រូវ​បាន​ប្រកាស​តែងតាំង​ជា​អគ្គមគ្គទេសក៍​ថ្មី​ជំនួស​លោក​គីម ជុងអ៊ីល នៅថ្ងៃសុក្រ​នេះ កូរ៉េ​ខាង​ជើង​​បាន​ប្រកាស​ប្រាប់​សហគមន៍​អន្តរជាតិ​ថា កូរ៉េ​ខាង​ជើង​នឹង​មិន​ធ្វើ​ការ​ផ្លាស់ប្តូរ​នយោបាយ​របស់​ខ្លួន​នោះទេ។ ក្នុងពេល​ជាមួយ​គ្នា​នេះ របបដឹកនាំ​ក្រុង​ព្យុងយ៉ាង​ក៏​បាន​ឆ្លៀត​ធ្វើការ​គំរាម​រដ្ឋាភិបាល​​កូរ៉េ​ខាង​ត្បូង​ផងដែរ។

ផ្សាយពាណិជ្ជកម្ម

អស់រយៈពេល​ជាង​១០ថ្ងៃ​មក​ហើយ ដែល​គេ​ទន្ទឹង​រង់ចាំមើល​ថា តើ​នៅក្រោយ​ការ​ស្លាប់​របស់​លោក​គីម ជុងអ៊ីល កូរ៉េ​ខាង​ជើង​នឹង​មាន​ការ​ផ្លាស់ប្តូរ​អ្វី​ដែរ​ឬទេ? តើ​ការ​ស្នងតំណែង​នឹង​ប្រព្រឹត្ត​ទៅ​ដោយ​រលូន​ដែរ​ឬ​ក៏យ៉ាងណា? តើ​លោក​គីម ជុងអ៊ុន ដែល​ជា​អ្នក​ត្រូវ​ឡើង​មក​ស្នងតំណែង ហើយ​ដែល​ធ្លាប់​រស់នៅ និង​សិក្សា​នៅ​ប្រទេស​លោកខាងលិច (ស្វ៊ីស) អាច​នឹងកែប្រែ​របៀប​ដឹកនាំ​ខុសពី​ឳពុក​របស់​គាត់​ដែរ​ឬទេ?

នៅថ្ងៃ​សុក្រ​នេះ គណៈកម្មការ​ការពារជាតិ ដែល​ជា​ស្ថាប័ន​មាន​អំណាច​កំពូល​របស់​កូរ៉េ​ខាង​ជើង​បាន​ចេញ​សេចក្តី​ថ្លែងការណ៍​​មួយ​បញ្ជាក់ថា គេ​មិនត្រូវ​រំពឹង​ថា​នឹង​មាន​ការ​ផ្លាស់ប្តូរ​ណាមួយ​នៅកូរ៉េ​ខាងជើង​នោះទេ។ នៅ​ក្នុង​សេចក្តីថ្លែងការណ៍​នេះ កូរ៉េ​ខាងជើង​បាន​ហៅ​រដ្ឋាភិបាល​កូរ៉េ​ខាង​ត្បូង​ជា​ក្រុម​អាយ៉ង​ ហើយ​ថា កូរ៉េ​ខាង​ជើង​នឹង​មិន​ធ្វើ​ការ​ចរចា​ណាមួយ​​ជាមួយ​រដ្ឋាភិបាល​របស់​លោក​លី ម្យ៉ុងបាក់​​នោះទេ។

លើសពីនេះ​ទៅទៀត​ របបដឹកនាំក្រុង​ព្យុងយ៉ាង​បាន​​រិះគន់​សេចក្តីសម្រេច​របស់​កូរ៉េ​ខាង​ត្បូង ដែល​បាន​អនុញ្ញាត​ឲ្យ​មាន​គណៈប្រតិភូ​ក្រៅផ្លូវការ​តែ​ពីរក្រុម ​ឆ្លងដែន​ទៅ​គោរព​វិញ្ញាណក្ខន្ធ​លោក​គីម ជុងអ៊ីល ដោយចាត់ទុក​ថា​ជា​រឿង​ដែល​ “មិន​អាច​អត់ឱន​ឲ្យ​បាន”។

ការផ្លាស់ប្តូរ​មេដឹកនាំ​កូរ៉េ​ខាងជើង នៅតែ​ជា​សំណុំរឿង​ដ៏​គួរ​ឲ្យ​ព្រួយបារម្ភ​របស់​កូរ៉េ​ខាង​ត្បូង សហរដ្ឋ​អាមេរិក និង​ជប៉ុន ដែល​ជា​គូភាគី​ក្នុង​កិច្ចចរចា ៦ភាគី ស្តីពី​សំណុំរឿង​នុយក្លេអ៊ែរ​កូរ៉េ​ខាងជើង។ ក្រសួង​ការបរទេស​អាមេរិក​បាន​ប្រកាស​ឲ្យដឹង​ថា អាមេរិក​នឹង​បញ្ជូន​មន្រ្តី​ការទូត​ជាន់ខ្ពស់​របស់​ខ្លួន​មួយរូប​ឲ្យ​ទៅ​​ជួប​ជជែក​ពិភាក្សា​ជាមួយ​មន្រ្តីរដ្ឋាភិបាល​ជាដៃគូ​ក្នុង​តំបន់ ​អំពី​ស្ថានភាព​នៅ​កូរ៉េ​ខាង​ជើង។ លោក Kurt Campbell អនុរដ្ឋមន្រ្តី​ការបរទេស​អាមេរិក ទទួលបន្ទុក​កិច្ចការ​អាស៊ី-ប៉ាស៊ីហ្វ៊ិក នឹង​ទៅ​បំពេញ​ទស្សនកិច្ច នៅ​​ចិន កូរ៉េ​ខាង​ត្បូង និង​ជប៉ុន ពីថ្ងៃ​ទី៣ ដល់​ថ្ងៃ​ទី៧ ខែមករា សប្តាហ៍ក្រោយ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI