អានតួអត្ថបទ
ព្រឹត្តិការណ៍អន្តរជាតិប្រចាំថ្ងៃ

អាមេរិក និង​កូរ៉េ​ខាង​ជើង​ដំឡើង​សំឡេង​ដាក់គ្នា​ក្នុង​វេទិកា​អាស៊ាន

សំឡេង ០៥:១៧
លោកស្រី​គ្លីនតុន ក្នុង​វេទិកា​អាស៊ាន​ស្តីពី​បញ្ហា​សន្តិសុខ
លោកស្រី​គ្លីនតុន ក្នុង​វេទិកា​អាស៊ាន​ស្តីពី​បញ្ហា​សន្តិសុខ ©Reuters
ដោយ៖ សេង ឌីណា

វេទិកា​​អាស៊ាន ស្តីពី​សន្តិសុខ​ បាន​ក្លាយ​ទៅជា​សមរភូមិ​ការទូត ជុំវិញ​បញ្ហា​លិច​នាវា​ចម្បាំង​កូរ៉េ​ខាង​ត្បូង។ លោកស្រី​គ្លីនតុន​ រដ្ឋមន្រ្តី​ការបរទេស​អាមេរិក​បាន​ទាមទារ​ឲ្យ​បណ្តា​ប្រទេស​នៅ​អាស៊ី​ចូលរួម ​បង្កើន​សម្ពាធ​លើ​កូរ៉េ​ខាងជើង។ ចំណែក​​កូរ៉េ​ខាង​ជើង​វិញ បាន​ព្រមាន​ថា នឹង​ធ្វើ​ការ​តបត​ចំពោះ​អាមេរិក​វិញ ដោយ​កម្លាំង​យោធា។ ការដំឡើង​សំឡេង​ដាក់​គ្នា​នេះ កើត​មាន​ឡើង តែប៉ុន្មាន​ថ្ងៃ​ប៉ុណ្ណោះ មុន​ការ​បើក​ធ្វើ​សមយុទ្ធ​​ដ៏ធំ​មួយ​​រវាង​អាមេរិក និង​កូរ៉េ​ខាង​ត្បូង ដែល​គ្រោង​ធ្វើ​នៅថ្ងៃ​អាទិត្យ​នេះ។

ផ្សាយពាណិជ្ជកម្ម

 

ការព្រមាន​របស់​កូរ៉េ​ខាង​ជើង បាន​ធ្វើ​ឡើង នៅ​ក្នុង​អំឡុង​វេទិកា​អាស៊ាន ស្តីពី​សន្តិសុខ ដែល​​ប្រព្រឹត្ត​ទៅ នៅ​ក្នុង​ទីក្រុង​ហាណូយ ប្រទេស​វៀតណាម។

នៅ​ក្នុង​សប្តាហ៍នេះ អាមេរិក​ទើប​តែ​បាន​ប្រកាស​ដាក់​ទណ្ឌកម្ម​ថ្មីៗ​បន្ថែម​ទៀត លើ​កូរ៉េ​ខាង​ជើង ដែល​គេ​ចោទ​ថា ជា​អ្នក​បាញ់​ពន្លិច​នាវាចម្បាំង​កូរ៉េ​ខាង​ត្បូង។ អាមេរិក និង​កូរ៉េ​ខាង​ត្បូង គ្រោង​នឹង​បើក​ធ្វើ​សមយុទ្ធ​រួម​គ្នា​ដ៏ធំមួយ នៅ​ថ្ងៃ​អាទិត្យ​ ទី២៥ កក្កដា ២០១០​នេះ ដោយ​មាន​​នាវា​ផ្ទុក​យន្តហោះ​ដ៏ទំនើប​១គ្រឿង នាវាមុជទឹក និង​នាវា​ចម្បាំង ប្រមាណ​ជា ២០​គ្រឿង និង​យន្តហោះ​ប្រមាណ ១០០​គ្រឿង ចូល​រួម។

អ្នកនាំពាក្យ​គណៈប្រតិភូ​កូរ៉េ​ខាង​ជើង ដែល​ទៅ​ចូលរួម​ក្នុង​វេទិកា​អាស៊ាន​ បាន​ថ្លែង​ថា ការធ្វើ​សមយុទ្ធ​អាមេរិក-កូរ៉េ​ខាង​ត្បូង​នេះ គឺ​ជា​ការ​រំលោភ​លើ​អធិបតេយ្យ​របស់​កូរ៉េ​ខាង​ជើង។ វា​គឺ​ជា​ការ​គំរាម​កំហែង​ដល់​សន្តិសុខ​របស់​កូរ៉េ​ខាង​ជើង និង​ដល់​សន្តិសុខ​ក្នុង​តំបន់​អាស៊ី​ទាំងមូល។ កូរ៉េ​ខាង​ជើង​ប្រាកដ​ជា​នឹង​ធ្វើ​ការ​តបត​វិញ ចំពោះ​ទង្វើ​របស់​អាមេរិកនេះ។ ការ​តបត​នេះ នឹង​មិនមែន​ធ្វើ​ត្រឹម​តែ​ពាក្យ​សម្តី​ប៉ុណ្ណោះទេ ប៉ុន្តែ នឹង​តបត​តាម​ផ្លូវ​យោធា។

គួរ​បញ្ជាក់ថា នៅពេលនេះ រដ្ឋាភិបាល​កូរ៉េ​ខាង​​ត្បូង​កំពុង​តែ​ព្យាយាម​ស្វះស្វែង​រក​ការ​គាំទ្រ​ពី​សំណាក់​សហគមន៍​អន្តរជាតិ ក្នុង​នោះ​ក៏មាន​ប្រទេស​នៅ​អាស៊ាន​ផង​ដែរ ឲ្យ​ធ្វើ​ការ​ថ្កោលទោស​កូរ៉េ​ខាង​ជើង។ អាមេរិក​ ក៏​បាន​ព្យាយាម​បញ្ចុះ​បញ្ចូល​​វេទិកា​អាស៊ាន ស្តីពី​សន្តិសុខ​ឲ្យ​ចេញ​សេចក្តី​ថ្លែងការណ៍​​ថ្កោលទោស​កូរ៉េ​ខាង​ជើង​ដែរ នៅថ្ងៃ​សុក្រ​នេះ។ ក៏ប៉ុន្តែ ចិន និង​កូរ៉េ​ខាង​ជើង ជំទាស់​ដាច់ខាត​ចំពោះ​ការ​ថ្កោលទោសនេះ។

នៅ​ក្នុង​សេចក្តីព្រាង​សេចក្តី​ថ្លែងការណ៍​ គេ​ឃើញ​ថា វេទិកា​អាស៊ាន គ្រោង​នឹង​ធ្វើ​ការ​ថ្កោលទោស​ចំពោះ​ការ​វាយប្រហារ​លើ​នាវា​ចម្បាំង​កូរ៉េ​ខាង​ត្បូង ក៏ប៉ុន្តែ មិន​បាន​និយាយ​ចំឈ្មោះ​កូរ៉េ​ខាង​ជើង​ថា​ជា​អ្នក​ប្រព្រឹត្ត​នោះទេ។ និយាយ​ជា​រួម គឺ​ជា​សេចក្តី​ថ្លែងការណ៍ ដែល​យក​លំនាំ​តាម​សេចក្តី​ថ្លែងការណ៍​របស់​ក្រុមប្រឹក្សា​សន្តិសុខ​អ.ស.ប.។

នៅ​ល្ងាច​ថ្ងៃ​សុក្រនេះ លោកស្រី​គ្លីនតុន ក៏​បាន​​ជួប​ជាមួយ​រដ្ឋមន្រ្តី​ការបរទេស​ចិន រុស្ស៊ី និង​ជប៉ុន​ផងដែរ​ ដើម្បី​​ជជែក​ពី​បញ្ហា​កូរ៉េ​ខាង​ជើង។ គួរ​បញ្ជាក់ថា អាមេរិក ចិន ជប៉ុន រុស្ស៊ី កូរ៉េ​ខាង​ត្បូង និង​កូរ៉េ​ខាង​ជើង គឺ​ជា​គូភាគី ក្នុង​កិច្ចចរចា ៦ភាគី ស្តីពី​សំណុំរឿង​នុយក្លេអ៊ែរ​កូរ៉េ​ខាង​ជើង។ ការចរចានេះ ត្រូវ​បាន​ជាប់គាំង តាំង​ពី​ខែ​មេសា ឆ្នាំ​២០០៩មក​ម៉្លេះ ក្រោយ​ពី​​កូរ៉េ​ខាង​ជើង​បាន​ធ្វើ​ការ​សាកល្បង​អាវុធ​នុយក្លេអ៊ែរ ធ្វើ​ឲ្យ​មាន​ការ​ថ្កោលទោស​ពី​សំណាក់​ក្រុមប្រឹក្សា​សន្តិសុខ​អ.ស.ប.។ ហេតុការណ៍​លិចនាវា​ចម្បាំង​កូរ៉េ​ខាង​ត្បូង គឺ​ជា​បញ្ហា​មួយ​ថ្មីទៀត ដែល​រឹត​តែ​ធ្វើ​ឲ្យ​ការចរចា ៦ភាគី កាន់តែ​ជាប់គាំង​ថែមទៀត៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ