អានតួអត្ថបទ
ចិន-កូរ៉េខាងជើង

Pyongyang រំងាប់​ចិត្ត Pékin ក្រោយពី​មាន​ឧប្បត្តិហេតុ​កើតឡើង​នៅ​ទល់ដែន

ទាហានការពារព្រំដែន​កូរ៉េ​ខាងជើង​បាញ់​សម្លាប់​ជនជាតិចិន​៣នាក់
ទាហានការពារព្រំដែន​កូរ៉េ​ខាងជើង​បាញ់​សម្លាប់​ជនជាតិចិន​៣នាក់ ©Reuters
ដោយ៖ តាន់ ហ្សង់-ហ្វ្រង់ស័រ
១៣ នាទី

មួយ​សប្តាហ៍​ក្រោយ​ពី​ជនជាតិ​ចិន​បី​នាក់​ត្រូវ​បាន ​ឆ្មាំ​យាម​ព្រំដែន​របស់​កូរ៉េខាងជើង​បាញ់​សម្លាប់​រួច​មក របប​ទីក្រុង​Pyongyang បាន​ប្រកាស​ចូលរួម​រំលែក​មរណទុក្ខ​ពី​ក្រុម​គ្រួសារ​អ្នក​រង​គ្រោះ។ ការ​ប្រកាស​បែប​នេះ ត្រូវ​បាន​ធ្វើ​ឡើង ក្រោយ​ពី​ក្រសួង​ការបរទេស​ចិន​បាន​ទាមទារ​ឲ្យ​កូរ៉េខាងជើង​បំភ្លឺ​ជុំវិញ​ ឧប្បត្តិហេតុ​នេះ។

ផ្សាយពាណិជ្ជកម្ម

សេចក្តី​រាយការណ៍​របស់​​តាន់ ហ្សង់​-ហ្វ្រង់ស្វ័រ

ទីក្រុង​Pyongyang បាន​ប្រកាស​ចូលរួម​រំលែក​មរណទុក្ខ​ពី​ក្រុម​គ្រួសារ​នៃ​ជនជាតិ​ចិន​ទាំង​បី​នាក់ កាល​ពី​ម្សិលមិញ។ នេះ​បើ​យោង​ទៅ​តាម​ទីភ្នាក់ងារ​ព័ត៌មាន​ផ្លូវការ​ចិនថ្មី របស់​ទីក្រុង​Pékin ដែល​បាន​អះអាង​ទៀត​ថា អាជ្ញាធរ​កូរ៉េខាងជើង​នឹង​ដាក់ទោស​យ៉ាង​ធ្ងន់ ទៅ​លើ​អ្នក​ទទួល​ខុស​ត្រូវ​ចំពោះ​មរណភាព​របស់​ប្រជាជន​ចិន​ទាំង​នេះ។

ជនជាតិ​ចិន​ទាំង​បី​នាក់​ត្រូវ​បាន​ឆ្មាំ​រក្សា​ព្រំដែន​របស់​កូរ៉េខាងជើង​បាញ់​ប្រហារ កាល​ពី​ថ្ងៃ​ទី​៤​មិថុនា​សប្តាហ៍​មុន ពីព្រោះ​ពួក​គេ​បាន​ឆ្លង​ចូល​មក​ក្នុង​ទឹកដី​កូរ៉េ​ខាងជើង ដើម្បី​រត់ពន្ធ។ កាល​ពី​ថ្ងៃ​អង្គារ​ទី​៨​មិថុនា ដើម​សប្តាហ៍​នេះ អាជ្ញាធរ​ចិន​បាន​បញ្ចេញ​ប្រតិកម្ម​ទាមទារ​ចង់​បាន​ការ​ពន្យល់​បំភ្លឺ​ជុំវិញ​រឿងរ៉ាវ​នេះ។

តាម​រយៈ​ការ​ប្រកាស​ចូលរួម​រំលែក​មរណទុក្ខ​នេះ របប​ទីក្រុង​Pyongyang ចង់​រំងាប់​ចិត្ត​ថ្នាក់​ដឹកនាំ​ចិន​ឲ្យ​បាន​លឿន​រហ័ស។ ម្យ៉ាង ពីព្រោះ​ចិន​ជា​សម្ព័ន្ធមិត្ត​នយោបាយ​និង​សេដ្ឋកិច្ច​សឹង​តែ​មួយ​គត់​របស់​កូរ៉េខាងជើង នៅ​លើ​ឆាក​អន្តរជាតិ។ ម្យ៉ាង​ទៀត ពីព្រោះ​ប៉ុន្មាន​សប្តាហ៍​ចុង​ក្រោយ​នេះ កូរ៉េ​ខាងជើង​ដែល​សហគមន៍​អន្តរជាតិ​ចោទ​ថា​បាន​បាញ់​ពន្លិច​នាវា​ចម្បាំង​មួយ​គ្រឿង​របស់​កូរ៉េខាងត្បូង​បាន​បង្ក​បញ្ហា​មិន​តិច​ទេ​ដល់​ប្រទេស​ចិន។ ជាក់ស្តែង​សហរដ្ឋអាមេរិក​បាន​ដាក់​សម្ពាធ​ទៅ​លើ​ទីក្រុង​Pékin ឲ្យ​ជួយ​ប្រដៅ​និង​ថ្កោល​ទោស​កូរ៉េ​ខាងជើង៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ