អ៊ុយក្រែន

មាន​ការវាយប្រហារ​គ្នា​ជាថ្មី​នៅ​ម្តុំ​អាកាសយានដ្ឋាន​ទីក្រុង​ដូណេត​ក្នុង​ប្រទេស​អ៊ុយក្រែន

មាន​ការវាយប្រហារ​គ្នា​ជាថ្មី​នៅ​ម្តុំ​អាកាសយានដ្ឋាន​ទីក្រុង​ដូណេត​ក្នុង​ប្រទេស​អ៊ុយក្រែន
មាន​ការវាយប្រហារ​គ្នា​ជាថ្មី​នៅ​ម្តុំ​អាកាសយានដ្ឋាន​ទីក្រុង​ដូណេត​ក្នុង​ប្រទេស​អ៊ុយក្រែន REUTERS/Shamil Zhumatov

នៅ​ក្នុង​ប្រទេស​អ៊ុយក្រែន កិច្ចព្រមព្រៀង​ឈប់​បាញ់​ដែល​បាន​ចុះ​ហត្ថលេខា​ដោយ​កងទ័ព​អ៊ុយក្រែន និង​ក្រុមឧទ្ទាម​គំាទ្រ​រុស្ស៊ី​មិន​ត្រូវ​បាន​គោរព​ត្រឹមត្រូវ​ទេ។ ជាក់ស្តែង​នៅ​តំបន់​ប៉ែកខាងកើត​ដែល​ការ​ប៉ះទង្គិច​គ្នា​ផ្លូវអាវុធ​កំពុង​បន្ត​មាន​ជាប់​ជា​ប្រចំា។ បន្ទាប់​ពី​មាន​ស្លាប់​ជនស៊ីវិល ១០ កាល​ពី​ថ្ងៃ​ពុធ​កន្លង​មក ការ​បាញ់​ផ្លោង​ដាក់​គ្នា​បាន​ចាប់​ផ្តើម​នៅ​ថ្ងៃ​ព្រហស្បតិ៍ ទី២ តុលា​ម្សិលមិញ​នៅ​ជុំវិញ​អាកាសយានដ្ឋាន​ដូណេត។

ផ្សាយពាណិជ្ជកម្ម

 

នៅ​កន្លែង​ណា​មិន​ដឹង​ទេ តែ​អាកាសយានដ្ឋាន​ក្នុង​ទីក្រុង​ដូណេត គឺ​ជា​ទីតំាង​យុទ្ធសាស្រ្ត​ដ៏​សំខាន់​មួយ​ដែល​ពួកឧទ្ទាម​តែងតែ​បាន​ព្យាយាម​ដណ្តើម​កាន់កាប់។ បន្ទាប់​ពី​ត្រូវ​បាន​កម្លំាង​ទ័ពអ៊ុយក្រែន​វាយ​រុញច្រាន​នៅ​ថ្ងៃ​ពុធ ទី១ តុលា​មក ក្រុម​ឧទ្ទាម​អ្នកទាមទារ​ផ្តាច់ទឹកដីនិយម​គំាទ្រ​រុស្ស៊ី​បាន​បើក​ការ​វាយប្រហារ​ជា​ថ្មី​ទៀត​ទៅ​លើ​អាកាសយានដ្ឋាន​ដដែល​មួយ​នេះ។ មាន​ព័ត៌មាន​លេច​ឡើង​ថា កម្លំាង​ឧទ្ទាម​វាយ​យក​បាន​ព្រលាន​ចំនួន​ពីរ​នៅ​អាកាសយានដ្ឋាន​នោះ តែ​ព័ត៌មាន​នេះ​ត្រូវ​បាន​ច្រាន​ចោល​ដោយ​អ្នកនំាពាក្យ​ទាហាន​អ៊ុយក្រែន។ យោង​តាម​អ្នកនំាពាក្យ​ទាហាន​អ៊ុយក្រែន​រូប​នេះ​ដដែល កងទ័ព​រដ្ឋាភិបាល​អ៊ុយក្រែន​កំពុង​បន្ត​កាន់កាប់​អាកាសយានដ្ឋាន​ដូណេត​ដដែល និង​ក៏​កំពុង​បន្ត​ផ្គត់ផ្គង់​ជំនួយ​យោធា និង​ចំណីអាហារ​ឲ្យ​កម្លំាង​ទាហាន​អ៊ុយក្រែន​ដែល​កំពុង​ឈរជើង​នៅ​ទីនោះ។

បើ​យោង​តាម​កងទ័ព​អ៊ុយក្រែន ពួក​ឧទ្ទាម​បាន​បើក​ការ​វាយប្រហារ​នៅ​ប៉ែក​ខាង​ត្បូង ដោយ​បាន​ដាក់​តំាង​ជើង​បាញ់​គ្រាប់រ៉ូកែត​នៅ​តាម​អាគារ​ស្នាក់នៅ​របស់​ប្រជាជន​ក្នុង​ស្រុក​គៀវស្គី។ គឺ​នៅ​ទីនោះ​ហើយ​ដែល​ពួក​ឧទ្ទាម​បាន​រងការ​បាញ់​ផ្លោង​របស់​ទាហាន​អ៊ុយក្រែន ដោយ​បាន​បណ្តាល​ឲ្យ​មាន​ស្លាប់​ជនស៊ីវិល ១០នាក់​នៅ​ថ្ងៃពុធ ទី១ តុលា​ក្បែរ​កន្លែង​ចំណត​រថយន្តក្រុង និង​នៅ​ក្នុង​សាលារៀន​មួយ។ គឺ​អាកាសយានដ្ឋាន​ដូណេត​នោះ​ឯង​ដែល​ភាគី​នីមួយៗ​កំពុង​ដណ្តើម​គ្នា​កាន់កាប់ ព្រោះ​វា​ជា​ទីតំាង​យុទ្ធសាស្រ្ត​មួយ​យ៉ាង​សំខាន់។

លោក​អាឡិចសង់ ហ្សាកាឆេនកូ នាយករដ្ឋមន្រ្តី​តែងតំាង​ដោយ​ខ្លួន​ឯង​នៅ​ដូណេត​បាន​ទាយទុក​ជាមុន​ថា នៅ​ប៉ុន្មាន​ថ្ងៃ​ខាង​មុខ​នេះ អាកាសយានដ្ឋាន​ដូណេត​នឹង​ធ្លាក់​ក្នុង​កណ្តាប់ដៃ​របស់​ពួក​ឧទ្ទាម។ គឺ​ជា​ទស្សនវិស័យ​មួយ​ដែល​កំពុង​ធ្វើ​ឲ្យ​បស្ចិមលោក​ព្រួយបារម្ភ​ខ្លំាង។ លោកស្រី​នាយករដ្ឋមន្រ្តី​អាលឺម៉ង់​បាន​ទូរស័ព្ទ​និយាយ​ជាមួយ​លោក​ប្រធានាធិបតី​រុស្ស៊ី​ពូទីន​នៅ​យប់​ថ្ងៃ​ពុធ ដោយ​អំពាវនាវ​ឲ្យ​រុស្ស៊ី​ឈប់​គំាទ្រ​ពួក​ឧទ្ទាម និង​គោរព​តាម​កិច្ចព្រមព្រៀង​ឈប់​បាញ់​ដែល​ទើប​បាន​ចុះ​ហត្ថលេខា។ ប្រភព​ព័ត៌មាន​ស្និទ្ធិ​នឹង​រដ្ឋាភិបាល​អាល្លឺម៉ង់​បាន​ប្រាប់​ឲ្យ​ដឹង​ថា អឺរ៉ុប​គ្រោង​នឹង​ដាក់​ទ័ណ្ឌកម្ម​ថ្មី​ប្រឆំាង​រុស្ស៊ី ប្រសិន​បើ​អាកាសយានដ្ឋាន​ដូណេត​ធ្លាក់​ក្នុង​កណ្តាប់ដៃ​ពួក​បះបោរ​មែន​នោះ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI