អានតួអត្ថបទ
ជប៉ុន-អាមេរិក

លោក អូបាម៉ា ៖ ប្រជុំ​កោះ​សេនកាគូ ការពារ​ដោយ​សន្ធិសញ្ញា​សន្តិសុខ​អាមេរិក​-ជប៉ុន

យន្តហោះ​ការពារជាតិ​ជប៉ុន PC3 ទៅ​ល្បាត​នៅ​ប្រជុំ​កោះ​សេនកាគូ
យន្តហោះ​ការពារជាតិ​ជប៉ុន PC3 ទៅ​ល្បាត​នៅ​ប្រជុំ​កោះ​សេនកាគូ Reuters/路透社
ដោយ៖ អៀង សុខម៉ិញ
3 នាទី

លោកប្រធានាធិបតី​អាមេរិក បារ៉ាក់ អូបាម៉ា ដែល​នឹង​ត្រូវ​អញ្ជើញ​ទៅ​ដល់​ប្រទេស​ជប៉ុន​នៅល្ងាច​ថ្ងៃ​ពុធ​ទី ២៣​មេសា នេះ បាន​អះអាង នៅ​ក្នុង​បទ​សម្ភាសន៍​ជាមួយ​សារព័ត៌មាន​ដ៏​ល្បីល្បាញ​របស់​ជប៉ុន ឈ្មោះ Yomiuri Shimbunថា ប្រជុំ​កោះ​សេនកាគូ ប្រភព​ជម្លោះ​ដ៏​រ៉ាំរ៉ៃ​រវាង​ចិន​និង​ជប៉ុន ត្រូវ​បាន​ការពារ​ដោយ​សន្តិសញ្ញា​សន្តិសុខ​អាមេរិក-​ជប៉ុន។

ផ្សាយពាណិជ្ជកម្ម

 

“អាមេរិក​មាន​នយោបាយ​ច្បាស់​លាស់ ! ប្រជុំ​កោះ​សេនកាគូ ​ដែល​គ្រប់គ្រង​​​ដោយ​រដ្ឋបាល​ជប៉ុន​ ត្រូវ​តែបានស្ថិត​ក្នុង​ក្របខ័ណ្ឌ​នៃ​​សន្ធិសញ្ញា​សន្តិសុខ​អាមេរិក​ជប៉ុន ត្រង់​មាត្រ៥” ! សន្ធិសញ្ញា​ដែល​ អាមេរិក​និង​ជប៉ុនព្រមព្រៀង​ ​​ចុះ​ហត្ថលេខា​រួម​គ្នា​ កាលពី​ឆ្នាំ​១៩៦០ ដើម្បី​ធានា​ពង្រឹង​កិច្ច​សហប្រតិបត្តិការ និង​រក្សា​សន្តិសុខ​​ ឱ្យ​គ្នា​ទៅ​វិញ​ទៅ​មក។​

ការ​​ការពារ​បូរណភាព​ដែន​ប្រជុំកោះ​សេនកាគូ​នេះ ត្រូវ​បាន​ឥស្សរជន​ជាន់​ខ្ពស់​អាមេរិក មានជា​អាទិ៍​រដ្ឋមន្ត្រី​ក្រសួង​ការពារ​ជាតិ អនុប្រធានាធិបតី​ ធ្លាប់​លើក​ឡើង​ជា​បន្ត​បន្ទាប់​ហើយ ប៉ុន្តែ​នេះ​ជា​លើក​ទី​មួយ ដែល​លោក អូបាម៉ា បាន​បញ្ជាក់​ជំហរ​ច្បាស់ ចេញ​​បបូរមាត់​ប្រធានាធិបតី​ដោយ​ផ្ទាល់។

ប្រជុំ​កោះ​សេនកាគូ ស្ថិត​ក្នុង​សមុទ្ទ​ចិន​ខាង​កើត ចម្ងាយ​ប្រមាណ​២០០​គីឡូម៉ែត្រ​ពី​តៃវ៉ាន់ និង​៤០០​គ.ម. ពី​កោះ​អូគីណាវ៉ា​របស់​ជប៉ុន គ្រប់គ្រង​ដោយ​ជប៉ុន ប៉ុន្តែ​ចិន​​តែង​ទាមទារ​​​ជា​របស់​ខ្លួន ក្រោម​ឈ្មោះ​ថា ទាវយូ និង​បាន​បញ្ជូន​នាវា​ទៅ​ក្រវិល​ កោះ​នោះ ដែល​ធ្វើ​ឱ្យ​ហានិភ័យ​នៃ​ការ​បះទង្គិច​យោធា​ឡើង​ខ្ពស់។ កាលពី​ខែ​វិច្ឆិកា​កន្លង​ទៅ​ប៉េកាំង​បាន​ថែម​ទាំង​ប្រកាស​ជា​ឯកតោភាគី​​ តំបន់​ការពារ​ដែន​អាកាស​ វាស​គ្រប​ដល់​ប្រជុំ​កោះ​ជាប់​ជម្លោះ​តែម្តង។

ក្រៅ​ពី​មាន​ទីតាំង​ជា​យុទ្ធសាស្ត្រ ​ម្តុំ​ប្រជុំ​កោះ​នេះ​ទំនង​មាន​ផ្ទុក​ឧស្ម័ន​ក្រោម​ដី​ដ៏​ក្រាស់ក្រែល​ និង​ជាទី​ទាក់ទាញ​សម្រាប់​គ្រប់ភាគី។ ​លោក​អូបាម៉ា​ ធ្លាប់​ជួប​​ប្រធានាធិបតី​ចិន លោក ស៊ីជិនពីង ជជែក​គ្នា​​ ជម្លោះ​ដែន​សមុទ្ទ​នេះ និង​ស្នើ​សុំឱ្យ​មាន​ការ​ដោះស្រាយ​វិបត្តិ តាម​តែ​ផ្លូវ​ចរចា និង​ការទូត មិន​មែន​តាម​វិធី​សម្ញែង​កម្លាំង​ដាក់​គ្នា​ឡើយ។ ប៉ុន្តែ​នេះ​ជា​ដំណើរ​ទស្សនកិច្ច​ក្នុង​តំបន់​លើក​ទីមួយ គិត​តាំង​ពី​ជម្លោះដណ្តើម​​ប្រជុំ​កោះ​ ចិន​ជប៉ុនឡើង​តានតឹង​ខ្លាំង។ លោក​អូបាម៉ា បាន​ទៅ​ដល់​ក្រុង​តូក្យូ​នៅល្ងាច​ថ្ងៃពុធ​នេះ។ ​ជំនួប​កំពូល​អាមេរិក​ជប៉ុន គ្រោង​នឹង​ប្រព្រឹត្ត​ទៅ​នៅ​ថ្ងៃព្រហស្បតិ៍​ស្អែក បន្ទាប់​មក​លោក​អូបាម៉ា​នឹង​បន្ត​ដំណើរទៅ​ប្រទេសកូរ៉េខាង​ត្បូង ហ្វីលីពីន និង​ម៉ាឡេស៊ី៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ