អាមេរិក-អឺរ៉ុប

បដិវត្តន៍​អារ៉ាប់​ជា​សំណុំរឿង​ចម្បង​ក្នុង​ដំណើរ​ទស្សនកិច្ច​របស់​លោក​អូបាម៉ា​នៅ​អឺរ៉ុប

លោក​អូបាម៉ា និង​ភរិយា ពេល​មកដល់​អៀរឡង់ នៅថ្ងៃ​ចន្ទ ២៣ ឧសភា ២០១១
លោក​អូបាម៉ា និង​ភរិយា ពេល​មកដល់​អៀរឡង់ នៅថ្ងៃ​ចន្ទ ២៣ ឧសភា ២០១១ ©Reuters

លោក​អូបាម៉ា​បាន​ធ្វើ​ដំណើរ​ទៅដល់​ប្រទេស​អៀរឡង់ នៅ​ថ្ងៃ​ចន្ទ ២៣ ឧសភា ២០១១​នេះ ក្នុង​ដំណើរ​ទស្សនកិច្ច​រយៈពេល​មួយសប្តាហ៍​ទៅ​កាន់​អឺរ៉ុប។ នៅ​ក្នុង​ដំណើរ​ទស្សនកិច្ច​នេះ លោក​អូបាម៉ា​នឹង​នាំ​យក​សំណុំរឿង​ដើមបូព៌ា និង​បដិវត្តន៍​អារ៉ាប់ ទៅ​ជជែក​ជាមួយ​ប្រទេស​សម្ព័ន្ធមិត្ត។ ដំណើរទស្សនកិច្ច​នេះ ក៏​នឹង​ជា​ឱកាស​មួយ​ដែរ ឲ្យ​លោក​អូបាម៉ា​ពង្រឹង​ទំនាក់ទំនង​ជាមួយ​អឺរ៉ុប។

ផ្សាយពាណិជ្ជកម្ម

នៅ​អៀរឡង់ លោក​អូបាម៉ា​នឹង​ធ្វើ​ដំណើរ​ទៅកាន់​ភូមិកំណើត​​នៃ​សាច់ញាតិ​ខាង​ម្តាយ​របស់​ លោក ដែល​ជា​ជនជាតិ​អាមេរិក មាន​ដើមកំណើត​អៀរឡង់។ នៅ​ថ្ងៃ​អង្គារ​ស្អែក លោក​អូបាម៉ា​ត្រូវ​បន្ត​ដំណើរ​ទៅកាន់​ប្រទេស​អង់គ្លេស។ ម្ចាស់​ក្សត្រិយានីអង់គ្លេស​នឹង​ទទួល​លោក​អូបាម៉ា​ឲ្យ​ស្នាក់​នៅ​ក្នុង​វាំង ​ចំនួន​ពីរ​យប់ មុននឹង​បន្ត​ដំណើរ​ទៅកាន់​ប្រទេស​បារាំង ដើម្បី​ចូលរួម​ជំនួបកំពូល G8 នៅថ្ងៃ​ទី២៦ ដល់​ថ្ងៃទី២៧ ឧសភា។

នៅ​ក្នុង​អំឡុង​ជំនួបកំពូល G8 នៅ​បារាំង លោក​អូបាម៉ា​គ្រោង​ជួប​ទ្វេភាគី​ជាមួយ​​លោក​សាកូហ្ស៊ី ប្រធានាធិបតី​បារាំង, លោក​មេដេវេដេវ ប្រធានាធិបតី​រុស្ស៊ី និង​លោក​ណាអូតូ កាន់ នាយករដ្ឋមន្រ្តី​ជប៉ុន។

ក្នុង​ជំនួប​ទាំងនេះ លោក​អូបាម៉ា​គ្រោង​នឹង​ជជែក​អំពី​ការ​ជួយ​លើក​កម្ពស់​លទ្ធិប្រជាធិបតេយ្យ នៅ​តំបន់​ដើមបូព៌ា និង​អាហ្វ្រិក​ខាង​ជើង ដែល​កំពុង​តែ​កើត​មាន​ចលនា​បះបោរ​ទាមទារ​លទ្ធិប្រជាធិបតេយ្យ។ ក្នុង​ពេល​ជាមួយ​គ្នា​នេះ ប្រមុខដឹកនាំ​អឺរ៉ុប​ ទំនង​ជា​នឹង​​ទាមទារ​ឲ្យ​អាមេរិក​ចូលរួម​កាន់តែ​សកម្ម​ថែមទៀត ក្នុង​ប្រតិបត្តិការ​យោធា​នៅ​លីប៊ី ដើម្បី​ដាក់សម្ពាធ​ឲ្យ​លោក​កាដាហ្វ៊ី​ចុះចេញ​ពី​តំណែង​កាន់តែ​ឆាប់។

គួរ​បញ្ជាក់ថា នៅ​ពេល​ចាប់ផ្តើម​ប្រតិបត្តិការ​យោធា​នៅ​លីប៊ី កងទ័ព​អាមេរិក​បាន​ដើរតួនាទី​សកម្មជាងគេ​បំផុត។ ក៏ប៉ុន្តែ ក្រោយ​មក​ អាមេរិក​ក៏​បាន​​ដកឃ្លាថយ ដោយ​ទុក​ឲ្យ​សម្ព័ន្ធមិត្ត​នៅ​អឺរ៉ុប​ជា​អ្នក​​ចាត់ចែង។ ប្រតិបត្តិការ​យោធា​នៅ​លីប៊ី​បាន​ចូលរួម​ចំណែក​ធំបំផុត ក្នុង​ការ​​រារាំង​កងទ័ព​របស់​លោក​កាដាហ្វ៊ី​មិន​ឲ្យ​កាប់​សម្លាប់​​ ប្រជាជនស៊ីវិល។ ក៏ប៉ុន្តែ រហូត​មកទល់​ពេលនេះ គេ​នៅតែ​មិន​អាច​ទម្លាក់​លោក​កាដាហ្វ៊ី​ចេញ​ពី​អំណាច​បាន។

នៅ​ក្នុង​ជំនួបកំពូល G8 លោក​អូបាម៉ា​នឹង​ជជែក​ជាមួយ​ប្រទេស​ជាដៃគូ ដើម្បី​ធ្វើយ៉ាងណា​រក​អគ្គនាយក​មូលនិធិរូបិយវត្ថុ​អន្តរជាតិ មក​ជំនួស​លោក​ដូមីនិក ស្រ្តូសកាន់ ឲ្យ​បាន​ឆាប់។

នៅថ្ងៃ​សុក្រ ក្រោយ​ពី​បិទបញ្ចប់​ជំនួបកំពូល​ G8 លោក​អូបាម៉ា​នឹង​ធ្វើ​ដំណើរ​ទៅកាន់​ប្រទេស​ប៉ូឡូញ ដែលជា​ដំណាក់កាល​ចុងក្រោយ​ នៃ​ដំណើរ​ទស្សនកិច្ច​របស់​លោក​។ នៅទីនោះ លោក​នឹង​ជួប​ជាមួយ​ប្រមុខដឹកនាំ​ប៉ូឡូញ ព្រមទាំង​ប្រមុខដឹកនាំ​មួយចំនួន​ទៀត មក​ពី​អឺរ៉ុប​ខាង​កើត។ សំណុំរឿង​សំខាន់​បំផុត​ក្នុង​ជំនួប​នេះ គឺ​គម្រោង​សាងសង់​ខែលការពារមីស៊ីល។

ចាប់តាំង​ពី​លោក​អូបាម៉ា​ឡើង​កាន់តំណែង​ជា​ប្រធានាធិបតី​មក លោក​បានផ្តោត​អាទិភាព​នៃ​នយោបាយ​ការបរទេស​​ នៅ​ក្នុង​តំបន់​អាស៊ី ព្រោះ​លោក​យល់​ថា អាស៊ី​គឺ​ជា​តំបន់​ប្រកប​ទៅ​ដោយ​សក្តានុពល។ ក៏ប៉ុន្តែ រដ្ឋាភិបាល​អាមេរិក​មុនៗ​បែរ​ជា​មិនរវីរវល់ ទុក​បណ្តោយ​ឲ្យ​ចិន​ពង្រីក​ឥទ្ធិពល​​បាន​តាមចិត្ត នៅ​អាស៊ី។

ការ​ដែល​លោក​អូបាម៉ា​បង្វែរ​អាទិភាព​ទៅកាន់​តំបន់​អាស៊ី បាន​ធ្វើ​ឲ្យ​ប្រទេស​ខ្លះ ​យល់​ថា លោក​អូបាម៉ា​​ហាក់ដូច​ជា​លែង​សូវ​រវីរវល់​នឹង​​​សម្ព័ន្ធមិត្ត​ចាស់ នៅ​អឺរ៉ុប។ ដំណើរ​ទស្សនកិច្ច​រយៈពេល​មួយសប្តាហ៍​នេះ គឺ​ជា​ឱកាស​មួយ សម្រាប់​ឲ្យ​លោក​អូបាម៉ា​ពង្រឹង​ទំនាក់ទំនង​ជា​មួយ​សម្ព័ន្ធមិត្ត​អឺរ៉ុប​ ឡើងវិញ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI