អង្គការ​សហប្រជាជាតិ

ឆ្នាំថ្មី ​អ.ស.ប.​បង្កើន​ចំណាយ  បូកសកម្មភាព​​បន្ថែមក្នុង​សំណុំ​រឿង​ស៊ីរី និងសំណុំរឿង​រ៉ូហ៊ីងយ៉ានៅភូមា​

រូប​តំណាង​នៃកិច្ចប្រជុំ​របស់មហាសន្និបាតអង្គការ​សហប្រជាជាតិ
រូប​តំណាង​នៃកិច្ចប្រជុំ​របស់មហាសន្និបាតអង្គការ​សហប្រជាជាតិ UN Photo/Mark Garten

​ថ្ងៃសុក្រ ទី​២៧ធ្នូ​  មហាសន្និបាតអង្គការ​សហប្រជាជាតិ (​អ.ស.ប.) អនុម័ត​បង្កើន​ចំណាយបន្តិច​បន្ថែម​​ទៀតសម្រាប់គម្រោង​ដំណើការ​ទូទៅ​ នៅ​ក្នុង​​ឆ្នាំថ្មី ២០២០​​។ ក្នុង​នោះ មាន​បន្ថែម​ចំណាយ​សម្រាប់កិច្ចការ​ស៊ើប​អង្កេត​សំណុំ​រឿង​ស៊ីរី និង​ឧក្រិដ្ឋកម្ម​នៅភូមា ដែលកិច្ចការ​​ទាំងពីរនេះ  បាន​ធ្វើឱ្យ​​រុស្ស៊ី​និង​សម្ព័ន្ធ​មិត្ត មិន​សប្បាយ​ចិត្ត​ជាខ្លាំង​។

ផ្សាយពាណិជ្ជកម្ម

កញ្ចប់​ថវិការបស់​​អង្គការ​សហប្រជាជាតិ ​ក្នុងគម្រោង​ដំណើការងារ​​ទូទៅ​ នៅ​​ឆ្នាំថ្មី ២០២០​​ គឺ​មាន​ចំនួន ​៣,០៧ ពាន់​លាន​ដុល្លារ គឺ​កើន​ឡើងច្រើន​​ជាងបន្តិច បើ​ធៀប​​ឆ្នាំ​២០១៩ ដែល​មាន​ត្រឹមតែ ២,៩ ពាន់លាន​ដុល្លារ​តែ​ប៉ុណ្ណោះ។ ការ​កើន​ឡើង​លុយ​ថែម​បន្តិច​នេះ ក៏​ស្រប​នឹង​ការ​បង្កើន​សកម្មភាពការងារ​ ​សំខាន់​ពីរ​បន្ថែមទៀត​ដែរ។ នោះគឺការស៊ើបអង្គេតឧក្រិដ្ឋកម្ម​ដែល​កើត​មាន​នៅ​ប្រទេស​ស៊ីរី ចាប់​តាំង​ពីស៊ីរី​​ធ្លាក់​ចូល​ក្នុង​វិបត្តិធ្ងន់ធ្ងរ​​កាលពីឆ្នាំ​២០១១​រហូត​មក។​ ហើយ​កិច្ចការ​ដ៏​ចម្រូង​សម្រាស់ទី២ គឺ​ការ​ស៊ើប​អង្កេត​ សំណុំ​រឿង​បង្ក្រាបនិង​ការ​សម្លាប់​រង្គាល​ទៅ​លើ​ជនជាតិភាគតិច រ៉ូហ៊ីងយ៉ា កាន់​សាសនា​អ៊ីស្លាម នៅក្នុង​ប្រទេស​ភូមា។

កិច្ចការសកម្មភាព​ទាំងពីរនេះ  គឺ​បានធ្វើឱ្យរុស្ស៊ីនិងប្រទេស​សម្ព័ន្ធមិត្ត ខ្ញាល់​ជាខ្លាំង។ អ្នក​ការទូត​មួយ​ចំនួនបាន​​កត់​សម្គាល់​ និង​បានខ្សឹ​ប​​ប្រាប់ទីភ្នាក់​ព័ត៌មាន​បារាំង​AFP ថា​ នៅក្នុង​ដំណើរ​ការ​បោះឆ្នោត​សម្រេច​គម្រោង​កញ្ចប់​ថវិកានេះ ប្រទេស​រុស្ស៊ី, ស៊ីរី, ភូមា, គាំទ្រ​ដោយ កូរ៉េខាងជើង, អ៊ីរ៉ង់, នីហ្គារ៉ាហ្គ័រ, វ៉េណេស៊ុយអេឡា ជាដើម បា​នបោះឆ្នោត​ជំទាស់ ប៉ុន្តែ សំឡេងរបស់ពួក​ប្រទេស​ទាំងនេះ តិច​តួច​ មិន​អាច​ខ្ទាស​ដំណើរ​ការ​សម្រេច​អនុម័ត​កញ្ចប់​ថវិកា​នេះបាន​ទេ។ សេចក្តីសម្រេច​នេះ មានចែងពី​លក្ខខណ្ឌ​ចាប់​បង្ខំ​តម្រូវ​ឱ្យ​រដ្ឋ​សមាជិក​បង់​វិភាគទាន ជា​កាតព្វកិច្ច។ ភាគី​រុស្ស៊ីនិងស៊ីរី ​ចាត់ទុកថា​ជារឿង​មិន​សមហេតុផល​ ​ និង​ថា ខ្លួន​នឹង​ពិចារណា​មើល​សិនចំពោះ​រឿងបង់​លុយ​វិភាគ​ទាន​នេះ។

ក្រៅពីកិច្ចការ​ចម្រូង​ចម្រាស់​ខាងលើ​នេះ អង្គការសហប្រជាជាតិ នៅ​ឆ្នាំថ្មី ក៏សម្រេច​ថា​​នឹង​បង្កើត​សកម្មភាព​បេសកម្ម នៅ​ក្នុង​ដំណើរការ​សង្កេតតាមដានពី​ជម្លោះទាស់​ទែង​គ្នា​​នៅ​ប្រទេស​យ៉េមែន ហើយ​នង​​បន្ត​បេសកម្ម​ជួយ​រៀបចំ​នយោបាយ​រដ្ឋ នៅកោះ​​ហៃទី ជាដើម។​

គួរ​​ជ្រាប​ដែរថា​ ការ​អនុម័ត​គម្រោង​ថវិកា​របស់​អង្គការសហប្រជាជាតិ សម្រាប់​ដំណើរ​ការការងារទូទៅ​ គឺ​មិនពាក់​ព័ន្ធ​នឹង​បេសកម្ម​សម្រាប់​កិច្ចការ​រក្សា​សន្តិភាពនោះទេ។ បេសកម្មសម្រាប់រក្សាសន្តិភាព គឺ​មានទំហំ​ទឹកប្រាក់ ប្រមាណ​ជា​៦ពាន់​លាន​ដុល្លារ ដាច់​ដោយ​ឡែក​​ផ្សេងទៀត ដែល​ជាទូទៅ ត្រូវ​អនុម័ត​នៅ​ខែ​មិថុនា ជារៀង​រាល់​ឆ្នាំ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI