កម្ពុជា

គណបក្ស​សង្គ្រោះជាតិ​ប្រកាស​បញ្ឈប់​ការចរចា​ ហើយ​នឹង​​ធ្វើ​បាតុកម្ម​ជា​ថ្មី​

លោក សម​ រង្ស៊ី​​ប្រធាន និង​លោក ​កឹម​ សុខា​ អនុ​ប្រធាន​​​គណ​​​​បក្ស​​​​សង្គ្រោះ​​​​ជាតិ​​​​
លោក សម​ រង្ស៊ី​​ប្រធាន និង​លោក ​កឹម​ សុខា​ អនុ​ប្រធាន​​​គណ​​​​បក្ស​​​​សង្គ្រោះ​​​​ជាតិ​​​​

ក្រោយ​ការចរចា​កាលពី​ថ្ងៃទី១០មីនា ដើម​សប្តាហ៍​ដោយ​មិនបាន​សម្រេច​លទ្ធផល​អ្វី​នោះ មេដឹកនាំ​គណបក្ស​សង្គ្រោះ​ជាតិ​ នៅ​ថ្ងៃទី១២ មីនា​នេះ បានប្រកាស​បញ្ឈប់​ការចរចា​ជាមួយ​គណបក្ស​ប្រជាជន​កម្ពុជា ហើយ​ថា បាតុកម្ម​ទ្រង់ទ្រាយ​ធំ​នឹង​ផ្ទុះ​ឡើងវិញ។ លោក សម រង្ស៊ី​អះអាងថា គណបក្ស​សង្គ្រោះ​ជាតិ​នឹង​វិល​ចូល​តុ​ចរចា​ឡើងវិញ​ប្រសិនបើ​ស្ថាប័ន​គណៈកម្មាធិការ​ជាតិ​រៀបចំ​ការបោះឆ្នោត​ត្រូវបាន​កែទម្រង់​តាម​ការទាមទារ​ប​ស់ប​ក្ស​ខ្លួន។ ដោយឡែក​គណបក្សកាន់អំណាច​សម្តែង​ការសោកស្តាយ​ចំពោះ​ការសម្រេចចិត្ត​របស់​មេ​បក្សប្រឆាំង​ដែល​ទាត់ចោល​តុ​ចរចា និង​ជ្រើស​រើសយក​បាតុកម្ម​នោះ។

ផ្សាយពាណិជ្ជកម្ម

ស្ថានការណ៍​នយោបាយ​នៅ​កម្ពុជា​បាន​ស្គាល់​ភាព​តានតឹង​សាជាថ្មី​វិញទៀត​ហើយ​នៅ​ថ្ងៃទី១២ មីនា​នេះ។ ជាការ​តានតឹង​នៅពេលដែល​ប្រធាន​គណបក្ស​សង្គ្រោះ​ជាតិ លោក​សម រង្ស៊ី​បានប្រកាស​បញ្ឈប់​ការចរចា​ជាមួយ​បក្ស​កាន់អំណាច ហើយ​ប្រកាស​ឱ្យមាន​បាតុកម្ម​ទ្រង់ទ្រាយ​ធំ​សាជាថ្មី​ម្តងទៀត។ ការ​ប្រកាស​បែបនេះ​ត្រូវ​បាន​ធ្វើឡើង នៅ​ក្នុង​វេទិការ​សាធារណៈ​នៅ​ស្រុក​អូ​រាំង​ឪ ខេត្តកំពង់ចាម។

ការប្រកាស​ទាត់ចោល​តុ​ចរចា​ជាមួយ​បក្ស​កាន់អំណាច​របស់លោក​នាយ​ក​រដ្ឋមន្ត្រី​ហ៊ុន សែន បែបនេះ គឺធ្វើឡើងភ្លាមៗពីរ​ថ្ងៃក្រោយ​ការចរចា​គ្មាន​លទ្ធផល​ផ្លែផ្កា​រវាង​ក្រុម​គណៈកម្មការ​ចម្រុះ​នៃ​គណបក្ស​ប្រជាជន​កម្ពុជា និង​គណបក្ស​សង្គ្រោះ​ជាតិ​កាលពី​ថ្ងៃទី១០ មីនា​កន្លងទៅ។

ថ្លែង​ដោយមាន​សំឡេង​ទះដៃ​គាំទ្រ​តាម​ពីក្រោយ​ផង​នោះ លោក សម រង្ស៊ី បាន​ចោទ​គណបក្ស​ប្រជាជន​កម្ពុជា​ថា គ្មាន​ឆន្ទៈ​ស្មោះត្រង់​ណាមួយ​ដែល​ចង់ឱ្យមាន​កំណែទម្រង់​ស្ថាប័ន​ការបោះឆ្នោត​នោះទេ ហើយ​ថា​ ជម្រើស​របស់​គណបក្ស​សង្គ្រោះ​ជាតិ គឺ​គ្មានអ្វី​ក្រៅពី​បាតុកម្ម​នោះឡើយ។

ប៉ុន្តែ​លោក ម៉ៅ មុន្នី​វណ្ណ សមាជិក​គណកម្មការ​ចម្រុះ​របស់​គណបក្ស​សង្គ្រោះ​ជាតិ បាន​អះអាងថា នៅ​ថ្ងៃ​ព្រហស្បតិ៍​ស្អែក​នេះ គណបក្ស​សង្គ្រោះ​ជាតិ នឹង​សរសេរ​លិខិត​ជា​ផ្លូវ​ការ​ជូន​គណបក្ស​ប្រជាជន​ដើម្បី​ឱ្យដឹង​ច្បាស់​ថា​តើ​គណបក្ស​ប្រជាជន​នឹង​លើកយក​បញ្ហា​គណៈកម្មាធិការ​រៀបចំ​កា​របោះ​ឆ្នោត ជា​របៀបវារៈ​នៃ​ការចរចា​ថ្ងៃទី១៧ មីនា​ឬ​យ៉ាងណា។ លោក ម៉ៅ មុនី​វណ្ណ សង្កត់ធ្ងន់ថា បើ​មិនមាន​ការឆ្លើយតប​ជា​វិជ្ជមាន​ណាមួយ​ពី​គណបក្សកាន់អំណាច​នោះទេ គណបក្ស​សង្គ្រោះ​ជាតិ​និង​ផ្តាច់​ផ្លូវ​ចរចា ហើយ​ធ្វើបាតុកម្ម។

គណបក្ស​ប្រជាជន​កម្ពុជា​វិញ​ដែលជា​ដៃគូ​ចារ​ចា​ជាមួយ​គណបក្ស​សង្គ្រោះ​ជាតិ បាន​អះអាងថា ខ្លួន​មានការ​សោកស្តាយ​ដែល​ប្រធាន​គណបក្ស​សង្គ្រោះ​ជាតិ​ទាត់ចោល​តុ​ចរចា និង​ជ្រើសរើស​បាតុកម្ម​ដើរ​តាម​ដងផ្លូវ​ជំនួស​វិញ។ តាមរយៈ​លោក ជាម យៀប មន្ត្រីជាន់ខ្ពស់​នៃ​ការ​រិ​យា​ល័យ​នយោបាយ​គណបក្ស​ប្រជាជន បាន​ស្នើឱ្យ​គណបក្ស​សង្គ្រោះ​ជាតិ​វិល​ចូល​សភា ហើយ​តស៊ូ​មតិ​ក្នុង​សភា​ជាការ​ប្រសើរ​ជាង។

អ្នកវិភាគ​ស្ថានការណ៍​នយោបាយ លោក បណ្ឌិត​សុខ ទូច បាន​ស្តីបន្ទោស​គណបក្ស​ទាំងពីរ​ថា រាល់​ការចរចា​ជាមួយគ្នា​តែងតែ​ប្រើ​ស្នៀត​ដាក់គ្នា​ដូច​ជាការ​លើកយក​លេស​បញ្ហា​សញ្ជាតិ​តែមួយ​ជាដើម ​ដែល​ធ្វើឱ្យ​ដៃគូរ​នយោបាយ​ដើរចេញ​ពី​តុ​ចរចា។ ​ការទាត់ចោល​តុ​ចរចា​ស្តីពី​កំណែទម្រង់​ការបោះឆ្នោត ដែលជា​ចំណុច​គន្លឹះ​នៃ​វិ​ប​ត្ត​នយោបាយ​នៅ​កម្ពុជា​នោះ លោក បណ្ឌិត​សុខ ទូច​ ពន្យល់ថា​ អ្នកនយោបាយ​ទាំងពីរ​គណបក្ស​មិនបាន​គិតគូរ​ពី​ផលប្រយោជន៍​របស់​ជាតិ​ធំ​​ជាង​គណបក្ស​របស់ខ្លួន​នោះទេ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI