អានតួអត្ថបទ
ព្រឹត្តិការណ៍អន្តរជាតិប្រចាំថ្ងៃ

សមាជិកភាព​របស់​ប៉ាឡេស្ទីន​នៅ​អ.ស.ប.៖ ដំណើរការ​នីតិវិធី​អាច​នឹង​ចំណាយពេល​រាប់​ខែ

សំឡេង ០៥:៥១
លោក​ម៉ះមូដ អាបាស់ (ឆ្វេង) ប្រធានអាជ្ញាធរ​ប៉ាឡេស្ទីន និង​លោក​បាន​ គីមូន អគ្គលេខាធិការ​អ.ស.ប.
លោក​ម៉ះមូដ អាបាស់ (ឆ្វេង) ប្រធានអាជ្ញាធរ​ប៉ាឡេស្ទីន និង​លោក​បាន​ គីមូន អគ្គលេខាធិការ​អ.ស.ប. REUTERS
ដោយ៖ សេង ឌីណា
២៤ នាទី

នៅ​ថ្ងៃ​សុក្រ​​ ២៣ កញ្ញា ២០១១​នេះ លោក​ម៉ះមូដ អាបាស់ (Mahmoud Abbas) ប្រធាន​អាជ្ញាធរ​ប៉ាឡេស្ទីន នឹង​ជួប​ជាមួយ​លោក​បាន គីមូន អគ្គលេខា​ធិការ​អ.ស.ប. ដើម្បី​​ដាក់ពាក្យ​ជាផ្លូវការ​សុំចូល​ជា​សមាជិក​ពេញសិទ្ធិ​របស់​អ.ស.ប. ទោះបី​ជា​សហរដ្ឋ​អាមេរិក​គំរាម​ថា​នឹង​ប្រើ​សិទ្ធិវ៉េតូ​ជំទាស់​សមាជិកភាព​របស់​ប៉ាឡេស្ទីន​ក៏ដោយ។ តើការ​ទទួលសមាជិកថ្មី​របស់​អ.ស.ប.​មាន​ដំណើរការ​នីតិវិធី​ដូចម្តេច​ខ្លះ?

ផ្សាយពាណិជ្ជកម្ម

យោងតាម​មាត្រា ៤ នៃ​ធម្មនុញ្ញ​អ.ស.ប. ការទទួល​សមាជិកថ្មី​ត្រូវ​ធ្វើ​ឡើង​តាមរយៈការ​បោះឆ្នោត ដោយ​មហាសន្និបាត​ (ដែល​រួមមាន​​ប្រទេស​ទាំង ១៩៣ ជា​សមាជិក​អ.ស.ប.) ទៅតាម​សំណើ​របស់​ក្រុមប្រឹក្សា​សន្តិសុខ (១៥​ប្រទេស​ជា​សមាជិក)។

នីតិវិធី​លម្អិត​នៃ​ដំណើរការ​ទទួល​សមាជិក​ថ្មី មាន​ចែង​ក្នុង​វិធាន​នីតិវិធី​របស់​អ.ស.ប. ចាប់ពី​វិធាន​១៣៤ ដល់​ ១៣៨។

ជាដំបូង ប៉ាឡេស្ទីន​ត្រូវ​​ដាក់ពាក្យ​សុំជាផ្លូវការ ទៅ​លោក​បាន គីមូន អគ្គលេខាធិការ​អ.ស.ប.។ បន្ទាប់​មក លោក​បាន គីមូន ត្រូវ​បញ្ជូន​ពាក្យសុំ​របស់​ប៉ាឡេស្ទីន ទៅ​ឲ្យ​ក្រុមប្រឹក្សា​សន្តិសុខ។ ក្រុមប្រឹក្សា​សន្តិសុខ​ត្រូវ​បង្កើត​គណៈកម្មាធិការ​ពិសេស​មួយ ដើម្បី​សិក្សា​លម្អិត​លើ​ពាក្យសុំ​នេះ មុននឹង​ដាក់ជូន​សមាជិក​ក្រុមប្រឹក្សា​សន្តិសុខ​បោះឆ្នោត​អនុម័ត​។

នៅក្នុង​ក្រុមប្រឹក្សា​សន្តិសុខ​ ប៉ាឡេស្ទីន​ត្រូវ​មាន​សំឡេងគាំទ្រ​យ៉ាងតិច ៩​សំឡេង ក្នុង​ចំណោម​សមាជិក​ទាំង ១៥ ហើយ​មិនត្រូវ​មាន​ប្រទេសណាមួយ​ក្នុង​ចំណោម​សមាជិក​អចិន្រ្តៃយ៍ (អាមេរិក អង់គ្លេស បារាំង ចិន និង​រុស្ស៊ី) បោះឆ្នោត​ប្រឆាំង​ (វ៉េតូ)។

ក្នុងករណី​ក្រុមប្រឹក្សា​សន្តិសុខ​អនុម័តគាំទ្រ​សមាជិកភាព​ប៉ាឡេស្ទីន សំណុំរឿង​នេះ​​ត្រូវ​បញ្ជូន​បន្ត​ ទៅ​ឲ្យ​មហាសន្និបាត​​អ.ស.ប.​បោះឆ្នោត​អនុម័ត។ ការបោះឆ្នោត​អនុម័ត​នៅ​មហាសន្និបាត​ត្រូវ​ធ្វើ​ឡើង ដោយ​សំឡេង​ភាគច្រើន ២ភាគ៣ ពោលគឺ យ៉ាងតិច ១២៩​សំឡេង​គាំទ្រ ក្នុង​ចំណោម​សមាជិក​ទាំង ១៩៣​ប្រទេស។

អាជ្ញាធរ​ប៉ាឡេស្ទីន​បាន​អះអាង​ថា រហូតមកទល់ពេលនេះ មានប្រទេស​យ៉ាងតិច ១២៦ ដែល​គាំទ្រ​សមាជិកភាព​ប៉ាឡេស្ទីន ក្នុង​អ.ស.ប.។ ដូច្នេះ ការបោះឆ្នោត​នៅ​ក្នុង​មហាសន្និបាត​ទំនង​ជា​មិនចោទ​ជា​បញ្ហា​នោះទេ។ ក៏ប៉ុន្តែ ឧបសគ្គ គឺ​នៅ​ឯ​ក្រុមប្រឹក្សា​សន្តិសុខ ដែល​សហរដ្ឋ​អាមេរិក​គ្រោង​នឹង​ប្រើសិទ្ធិវ៉េតូ។

​ដោយដឹងថា ការប្រើសិទ្ធិវ៉េតូ​លើ​សមាជិកភាព​ប៉ាឡេស្ទីន​អាច​នឹង​ធ្វើ​ឲ្យ​អាមេរិក​ត្រូវ​ទទួលរងនូវការ​រិះគន់​ពី​សហគមន៍​អន្តរជាតិ និង​អាច​ធ្វើ​ឲ្យ​ខូចទំនាក់ទំនង​ជា​មួយ​ប្រទេស​អារ៉ាប់ អាមេរិក​កំពុង​តែ​ព្យាយាម​ធ្វើ​យ៉ាងណា​បញ្ចៀស​កុំ​ឲ្យ​មាន​ការ​បោះឆ្នោត​លើ​សមាជិកភាព​ប៉ាឡេស្ទីន នៅ​ក្រុមប្រឹក្សា​សន្តិសុខ។ ដូច្នេះ គេរំពឹង​ថា ពាក្យសុំ​របស់​ប៉ាឡេស្ទីន​ទំនងជា​នឹង​ត្រូវ​ជាប់គាំង​ក្នុង​ដៃ​គណៈកម្មាធិការ​ពិសេស​របស់​ក្រុមប្រឹក្សា​សន្តិសុខ​ រយៈពេល​រាប់សប្តាហ៍ ឬ​រហូតដល់​រាប់ខែ​។ អាមេរិក​ប្រាកដ​ជា​ប្រើ​គ្រប់មធ្យោបាយ ដើម្បីពន្យារពេល មិន​ឲ្យ​ក្រុមប្រឹក្សា​សន្តិសុខ​ធ្វើការ​បោះឆ្នោត​លើ​សមាជិកភាព​របស់​ប៉ាឡេស្ទីន​ភ្លាមៗ​នោះទេ ដើម្បី​ទុកពេល​បញ្ចុះបញ្ចូល ឬ​ដាក់សម្ពាធ​លើ​អាជ្ញាធរ​ប៉ាឡេស្ទីន​ឲ្យ​ដក​ពាក្យ​សុំ​នេះ​ចេញ​វិញ។

ប្រសិនបើ​​គ្មានការគាំទ្រ​ពី​សំណាក់​ក្រុមប្រឹក្សា​សន្តិសុខ​ ប៉ាឡេស្ទីន​មិនមាន​ផ្លូវណា​ផ្សេងទៀត​ ដើម្បី​ចូល​ជា​សមាជិក​ពេញសិទ្ធិ​របស់​អ.ស.ប.​នោះទេ។ ក៏ប៉ុន្តែ ប៉ាឡេស្ទីន​អាច​សុំចូល​ត្រឹមជា​រដ្ឋ​សង្កេតការណ៍​របស់​អ.ស.ប. ដូច​ជា​បុរីវ៉ាទីកង់​នាពេលបច្ចុប្បន្ន។

ការសុំចូល​ត្រឹមជា​រដ្ឋសង្កេតការណ៍​​​ត្រូវ​ឆ្លងកាត់​ការបោះឆ្នោត​តែ​ក្នុង​មហាសន្និបាត​មួយ​ប៉ុណ្ណោះ ដោយ​មិន​ចាំបាច់​ឆ្លងកាត់​ការបោះឆ្នោត​ក្នុង​ក្រុមប្រឹក្សា​សន្តិសុខ​នោះទេ។ ដូច្នេះ មិនមាន​ប្រទេសណាមួយ​អាច​ប្រើសិទ្ធិវ៉េតូ រារាំង​ប៉ាឡេស្ទីន​មិន​ឲ្យ​ចូល​ជា​សមាជិក​សង្កេតការណ៍​របស់​អ.ស.ប.​បាន​នោះទេ។

ម្យ៉ាងវិញ​ទៀត នៅ​ក្នុង​មហាសន្និបាត​អ.ស.ប. ការបោះឆ្នោត​​អនុម័ត​​ទទួល​យក​សមាជិក​សង្កេតការណ៍​​​អាច​ធ្វើ​ទៅបាន ដោយសំឡេង​ភាគច្រើន ៥០% + ១ ពោលគឺ ត្រឹមតែ ៩៧​សំឡេង​ប៉ុណ្ណោះ ក្នុង​ចំណោម​សមាជិក​ទាំង ១៩៣​ប្រទេស​ ខុស​ពី​ការ​សុំចូល​ជា​សមាជិក​ពេញសិទ្ធិ ដែល​ទាមទារ​ឲ្យ​មាន​ការគាំទ្រ​ដោយ​សំឡេង​ភាគច្រើន ២ភាគ៣៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ