ចុះផ្សាយនៅថ្ងៃ៖ កែប្រែថ្ងៃទី៖
នៅថ្ងៃច័ន្ទនេះ រដ្ឋសភា បានអនុម័តលើសេចក្តីព្រាងច្បាប់ពន្ធនាគារ ដែលមាន មាន ១១ ជំពូក និង ៨៥ មាត្រា។ ច្បាប់ពន្ធនាគារ ដែលមានគោលដៅ កំណត់អំពីការគ្រប់គ្រងពន្ធនាគារ នៅកម្ពុជា និងដើម្បីផ្តល់ការអប់រំ កែប្រែស្តារនីតិសម្បទាជនជាប់ឃុំ មុននឹងបញ្ជូនទៅរស់នៅក្នុងសង្គមជាតិវិញ ក៏បានកំណត់ពីការប្រើប្រាស់កម្លាំងអ្នកទោស ដើម្បីរកប្រាក់ចំណូលផងដែរ។ គណបក្សប្រឆាំងបានជំទាស់ទៅនឹងការកំណត់ដូច្នេះ។
សមាជិករដ្ឋសភាចំនួន ៩៤ រូប ក្នុងចំណោមសមាជិករដ្ឋសភាចំនួន ៩៦ រូប ដែលមានវត្តមានក្នុងកិច្ចប្រជុំរដ្ឋសភា នៅព្រឹកថ្ងៃទី៧វិច្ឆិកា ឆ្នាំ២០១១ បានលើកដៃអនុម័តលើសេចក្តីព្រាងច្បាប់ពន្ធនាគារ។ សេចក្តីព្រាងច្បាប់ពន្ធនាគារ មានគោលបំណង កំណត់អំពីការគ្រប់គ្រងពន្ធនាគារ នៅកម្ពុជា និងដើម្បីផ្តល់ការអប់រំ កែប្រែស្តារនីតិសម្បទា ដើម្បីធ្វើសមាហរ័ណកម្មជនជាប់ឃុំ ទៅក្នុងសង្គមជាតិវិញ ព្រមទាំងទប់ស្កាត់ការប្រព្រឹត្តបទល្មើសសាជាថ្មី។
សេចក្តីព្រាងច្បាប់ពន្ធនាគារ ដែលមាន ១១ ជំពូក និង ៨៥ មាត្រា ក៏ដើម្បីគ្រប់គ្រងជនជាប់ឃុំឲ្យធានាបានសន្តិសុខ សុវត្ថិភាព សុខភាព និងមនុស្សធម៌ ស្របតាមគោលការណ៍អន្តរជាតិ និងវិធានសហប្រជាជាតិ សម្រាប់ការពារអនីតិជន ដែលត្រូវបានដកហូតសិទ្ធិសេរីភាព។ ច្បាប់នេះ អនុវត្តលើពន្ធនាគារទាំងអស់នៅកម្ពុជា លើកលែងតែពន្ធនាគារយោធា ឬកន្លែងឃាត់ខ្លួនរបស់នគរបាលយុត្តិធម៌ ឬមណ្ឌលឃុំខ្លួនដទៃទៀត ដែលកំណត់ដោយច្បាប់ផ្សេង។
ក្នុងមាត្រា ៧១ បានកំណត់ថា បន្ទាប់ពីមានការយល់ព្រមពីរដ្ឋមន្រ្តីក្រសួងមហាផ្ទៃ អគ្គនាយកនៃអគ្គនាយកដ្ឋានពន្ធនាគារ មានសិទ្ធិចុះកិច្ចសន្យាជាមួយរូបវន្តបុគ្គល ឬនីតិបុគ្គល ឬអង្គការជាតិ អន្តរជាតិ ដើម្បីបង្កើតការងារ សម្រាប់កម្មវិធីឧស្សាហកម្ម សិប្បកម្ម កសិកម្មពន្ធនាគារ និងមានសិទ្ធិចុះកិច្ចសន្យាលក់ផលិតផល ឧស្សាហកម្ម សិប្បកម្ម និងកសិកម្មពន្ធនាគារ។
ការកំណត់ពីការលក់កម្លាំងពលកម្មនៅក្នុងពន្ធនាគារដូច្នេះ ត្រូវបានលោក យឹម សុវណ្ណ អ្នកតំណាងរាស្ត្រគណបក្សសមរង្ស៊ី ចាត់ទុកថា ជាការរំលោភលើច្បាប់អន្តរជាតិ ដែលបានហាម មិនឲ្យប្រើប្រាស់កម្លាំងពលកម្មក្នុងពន្ធនាគារ សម្រាប់បម្រើផលប្រយោជន៍ឯកជន នៅគ្រប់រូបភាពទាំងអស់។
តាមលោកយឹមសុវណ្ណ បើសិនជាកម្ពុជាអនុវត្តដោយប្រើកម្លាំងពលកម្មក្នុងពន្ធនាគារ អាចធ្វើឲ្យអន្តរជាតិបញ្ឈប់កិច្ចសន្យាទិញផលិតផលឧស្សាហកម្មកាត់ដេរពីកម្ពុជា និងមានផលប៉ះពាល់ដល់វិស័យឧស្សាហកម្ម និងសេដ្ឋកិច្ចកម្ពុជា។
យ៉ាងណាក៏ដោយ លោក ស ខេង រដ្ឋមន្ត្រីក្រសួងមហាផ្ទៃ ដែលបានចូលការពារសេចក្តីព្រាងច្បាប់ពន្ធនាគារ ជាមួយនឹងតំណាងក្រសួងយុតិ្តធម៌ នៅក្នុងកិច្ចប្រជុំរដ្ឋសភានៅព្រឹកថ្ងៃចន្ទ ទី ៧ វិច្ឆិកា បានច្រានចោលការលើកឡើងរបស់តំណាងរាស្ត្រគណបក្សសមរង្ស៊ី ហើយថា រដ្ឋមន្ត្រីក្រសួងពាណិជ្ជកម្ម លោកចមប្រសិទ្ធ មិនបានជំទាស់នឹងការកំណត់ពីការប្រើប្រាស់ពលកម្មក្នុងពន្ធនាគារឡើយ។
តាមលោករដ្ឋមន្ត្រី ការកំណត់ពីការប្រើប្រាស់ពលកម្មនៅពន្ធនាគារ គឺរដ្ឋាភិបាលចង់ឲ្យអ្នកជាប់ឃុំមានជំនាញ និងមុខរបរចិញ្ចឹមជីវិត នៅពេលចេញទៅវិញ។ ការធ្វើនោះ ក៏ដោយស្ម័គ្រចិត្ត និងមិនផ្ទុយពីច្បាប់ជាតិ និងអន្តរជាតិទេ៕
