ឧបទ្វីបកូរ៉េ

ប៉េកាំងនិងម៉ូស្គូ ស្នើ​ក្រុម​ប្រឹក្សា​សន្តិសុខបន្ថយ​ទណ្ឌកម្ម​ទៅលើ​កូរ៉េខាង​ជើង

ប្រមុខរដ្ឋចិន​និងរុស្ស៊ី​
ប្រមុខរដ្ឋចិន​និងរុស្ស៊ី​ REUTERS/Alexander Nemenov

រដ្ឋបាល​ក្រុង​ប៉េកាំងនិងក្រុង​ម៉ូស្គូ បាន​ធ្វើ​សំណើរួម​គ្នា ដាក់​ទៅ​កាន់​សមាជិក​ក្រុម​ប្រឹក្សា​សន្តិសុខ​អង្គការ​សហប្រជាជាតិ ដើម្បី​ជួយ​សម្រួល​បន្ធូរ​បន្ថយ​ទណ្ឌកម្ម​ទៅលើ​កូរ៉េខាង​ជើង។ បើ​តាម​ការ​​បញ្ជាក់របស់​អ្នក​នាំ​ពាក្យ​ក្រសួង​ការ​បរទេស​ចិន ពីថ្ងៃអង្គារ ទី​១៧ធ្នូ។ ​យោង​តាម​​ខ្លឹមសារ​របស់​សំណើ​រួម​គ្នា​នៃ​ប្រទេស​សង្គម​និយម​ទាំង​ពីរ, ការ​លើកលែង​ទណ្ឌកម្ម​មួយ​ចំពោះ​កូរ៉េខាង​ជើង​នេះ ​គឺ​ដើម្បី​កិច្ចការមនុស្សធម៌​សម្រាប់​ជួយ​ដល់​ពលរដ្ឋ​កូរ៉េខាង​ជើង ដែល​កំពុងតែរស់​នៅ​យ៉ាង​​លំបាក​វេទនា។​

ផ្សាយពាណិជ្ជកម្ម

សេចក្តី​អំពាវវនាវរួម​គ្នា​របស់​ចិន​និងរុស្ស៊ី គឺ​ចង់​ប្រកាស​ឱ្យក្រុមប្រឹក្សាសន្តិសុខអង្គការសហប្រជាជាតិ​ លុប​ចោល​គន្លឹះ​​ទណ្ឌកម្ម​​សំខាន់ៗ​មួយ​ចំនួន ដែល​បាន​ដាក់​ចេញ​កាល​ពីឆ្នាំ​២០១៦ និង​២០១៧​។

ទណ្ឌកម្ម​ដែល​អង្គការ​សហប្រជាជាតិ បាន​​ដាក់​កម្រិត​លើប្រទេស​កុម្មុយនីស្ត​​កូរ៉េខាងជើងនោះ​​ គឺ​ធ្ងន់ធ្ងរ​ខ្លាំង​ ខាង​វិស័យ​សេដ្ឋកិច្ច​និង​ការ​នាំ​ចេញ។ ពោលគឺ​ហាម​ឃាត់​ការទិញ​​ធ្យូងថ្ម, ដែក, រ៉ែលោហធាតុ​​ និង​ផលិតសម្លៀកបំពាក់​ ជាដើម​ ដែល​ផលិត​នៅ​​កូរ៉េខាង​ជើង។ ចំពោះ​ទណ្ឌកម្ម​ទាំង​​នេះ រុស្ស៊ី​និង​ចិន ស្នើ​សុំថាគួរ​លុប​ចោលទៅ។ មួយវិញទៀត រដ្ឋធានី​​ប៉េកាំង​និងម៉ូស្គូ ក៏​ស្នើដែរ ថា​គួរ​លុប​ចោល«​វិធានការ​បញ្ចូន​ពលករ​កូរ៉េខាងជើង ឱ្យ​ត្រឡប់​ទៅ​ស្រុក​ដើម​វិញ»។ វិធានការ​ចាប់បញ្ចូន​ពលករបរទេស​នេះ ​គឺ​ផ្តើម​ដាក់​ចេញ​ដោយសហរដ្ឋ​​អាមេរិក កាល​ពី​ឆ្នាំ​២០១៧ ចំពោះកម្មករ​កូរ៉េខាង​ជើង​។

​​អ្នក​នាំ​ពាក្យ​ក្រសួង​ការ​បរទេស​ចិន លោក​ គឺង ស័ង (Geng Shung) បញ្ជាក់ប្រាប់​អ្នក​កាសែត​ថា​ការ​លើកលែង​ទណ្ឌកម្ម​ចេញខ្លះចំពោះ​​កូរ៉េខាង​ជើង​ គឺ​ដើម្បី​ជួយ​សម្រួល​ដល់​ការ​លើកកម្ពស់​ជីវភាព​រស់​នៅ​របស់​ពលរដ្ឋ​កូរ៉េខាង​ជើង ​ហើយ​ការ​ធ្វើដូច្នេះ ក៏​ជាកាយវិការមនុស្ស​ធម៌​សប្បុរធម៌​ផងដែរ​។ នេះ​បើ​តាម​អត្ថបទ​សំណើរួម​គ្នា​របស់​ក្រុង​ម៉ូស្គូ​និង​ប៉េកាំង ដែល​ផ្ញើ​ចេញ​ទៅ​សមាជិក១៥ប្រទេស​ នៃ​ក្រុមប្រឹក្សាសន្តិសុខអង្គការសហប្រជាជាតិ​ ​ ទាំងអចិន្ត្រៃយ៍ក្តី​ និង​មិន​អចិន្ត្រៃយ៍ក្តី​។​ មិនតែប៉ុណ្ណោះ សំណើនេះ ក៏ចង់​ឱ្យ​មាន​ការ​ជួប​ជុំ​ជជែកទល់​មុខគ្នា​ ចំនួន​៦ភាគី នៅ​ពេល​ឆាប់​ៗ​ខាងមុខនេះ។ ៦ភាគី​នោះ ​មាន​ចិន រុស្ស៊ី​ អាមេរិក ជប៉ុន​ ​ប្រទេស​កូរ៉េទាំងពីរ គឺ​ខាងជើង​និង​ខាង​ត្បួង។ ហើយ​បើ​គ្មា​នអ្វី​ប្រែប្រួល​ទេ ​ក្រុមប្រឹក្សាសន្តិសុខ នឹង​បើក​អង្គ​ប្រជុំ​​សម្រេច​រឿង​នេះ នៅថ្ងៃអាទិត្យ ទី​២២ធ្នូចុង​សប្តាហ៍នេះ។​

ជាការ​កត់​សម្គាល់ សំណើ​របស់​បងធំ​រុស្ស៊ីនិង​ចិននៅពេល​នេះ គឺ​នៅស្រប​ពេល​ដែ​ល​ បេសជនពិសេស​របស់​​អាមេរិក​ កំពុង​តែ​បំពេញ​ទស្សនកិច្ច​ ចំនួន​បីថ្ងៃ​ នៅកូរ៉េខាង​ត្បួង គឺ​ដើម្បី​រក​ដំណោះស្រាយ​ចំពោះ​សំណុំ​រឿង​វិបត្តិ​នៅ​ឧបទ្វីបកូរ៉េ៕​

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI