រុស្ស៊ី-អ៊ុយក្រែន

លោកពូទីន​ទាមទារ​កងទ័ព​អ៊ុយក្រែន​អោយ​បញ្ឈប់​ប្រតិបត្តិការ​នៅ​ភាគ​ខាងកើត​​អ៊ុយក្រែន​​ជា​បន្ទាន់​

ឧទ្ធម្ភាគចក្រ​យោធា​អ៊ុយក្រែន​នៅ​អាកាសយានដ្ឋាន​​ក្រុងដូណេត កាលពី​ថ្ងៃ​ចន្ទ​២៦ឧសភា។
ឧទ្ធម្ភាគចក្រ​យោធា​អ៊ុយក្រែន​នៅ​អាកាសយានដ្ឋាន​​ក្រុងដូណេត កាលពី​ថ្ងៃ​ចន្ទ​២៦ឧសភា។ Reuters/路透社

នៅថ្ងៃ​អង្គារ​នេះ ប្រធានាធិបតី​រុស្ស៊ី វ្ល៉ាឌីមៀ ពូទីន បាន​អំពាវនាវ​អោយ​ក្រុងគៀវ​​បញ្ឈប់​ប្រតិបត្តិការ​យោធា​ នៅ​ភាគខាងកើត​អ៊ុយក្រែន និង​សុំអោយ​រដ្ឋាភិបាលក្រុងគៀវ ជួប​ចរចា​​​ដោយសន្តិវិធី​ជាមួយ​តំណាងគ្រប់​តំបន់​ក្នុង​ប្រទេស ដើម្បី​រក​ដំណោះស្រាយ​បញ្ចប់​វិបត្តិ។ កាលពី​ថ្ងៃ​ចន្ទ យោធា​អ៊ុយក្រែន​បាន​បើក​ប្រតិបត្តិការ​​ដណ្តើម​យក​អាកាសយានដ្ឋាន​​ក្រុង​ដូណេត នៅ​ភាគខាងកើត ពី​ក្រុម​បះបោរ​គាំទ្ររុស្ស៊ី។ សកម្មភាព​យោធា​​នេះ បាន​ធ្វើអោយ​មនុស្ស​ជាង​៤០នាក់ បាត់បង់​ជីវិត។

ផ្សាយពាណិជ្ជកម្ម

នៅថ្ងៃ​អង្គារ​នេះ ប្រធានាធិបតី​​​រុស្ស៊ី​ ពូទីន បាន​អំពាវនាវ​អោយ​រដ្ឋាភិបាល​អ៊ុយក្រែន បញ្ឈប់​​ជាបន្ទាន់​ ​នូវ​ប្រតិបត្តិការ​យោធា នៅ​ភាគខាងកើត​អ៊ុយក្រែន។ លោក​ពូទីន​បាន​ទាមទារ​អោយ​ក្រុងគៀវ និង​តំណាង​គ្រប់តំបន់​នៅ​អ៊ុយក្រែន ជួបចរចា​គ្នា ដើម្បី​រក​ដំណោះស្រាយ​វិបត្តិ។ កាលពីរសៀល​ថ្ងៃ​ចន្ទ កងទ័ព​អ៊ុយក្រែន បាន​ពង្រាយ​ឧទ្ធម្ភាគចក្រ​​​ យន្តហោះ​ចំបាំង​ជាច្រើន​គ្រឿង​ រួមទាំង​​អ្នក​លោត​ឆ័ត្រ​យោង​ផងដែរ ដើម្បី​ដណ្តើម​យក​​អាកាសយានដ្ឆាន​ក្រុងដូណេត​ នៅភាគ​ខាងកើត ពី​ក្រុម​ផ្តាច់ទឹកដី​និយម​មកវិញ។ ប្រតិបត្តិការ​​យោធា​នេះ​បាន​សម្លាប់​មនុស្ស​ជាង​​៤០នាក់។

កងទ័ព​អ៊ុយក្រែន​បាន​ប្រាប់ថា នៅថ្ងៃ​អង្គារ​នេះ ខ្លួន​បាន​កាន់កាប់​អាកាសយានដ្ឋាន​នេះ​ហើយ។ ​អាកាសយានដ្ឋាន​ក្រុងដូណេត គឺ​ជា​ទីតាំង​យុទ្ធសាស្ត្រ​​ជាច្រក​​ឆ្ពោះទៅ​ភាគខាងកើត​អ៊ុយក្រែន។ ក្រុម​បះបោរគាំទ្រ​រុស្ស៊ី​បាន​កាន់កាប់​ទីនោះ កាលពី​យប់​ថ្ងៃ​អាទិត្យ​ឈាន​ចូលព្រឹក​ថ្ងៃ​ចន្ទ។

ដោយឡែក នៅ​ក្រុងដូណេតនេះដែរ អង្គការ​​សន្តិសុខ​និង​សហប្រតិបត្តិការ​អឺរ៉ុបបាន​ប្រាប់​ថា បាត់ដំណឹង​ពី​អ្នកសង្កេតការណ៍​អន្តរជាតិ​របស់​ខ្លួន​ចំនួន​៤រូប កាលពី​ល្ងាច​ថ្ងៃ​ចន្ទ។ សម្រាប់​ការបោះឆ្នោត​ប្រធានាធិបតី​អ៊ុយក្រែន ​កាលពី​ថ្ងៃ​អាទិត្យ​កន្លងទៅ អ្នកសង្កេត​ការណ៍​​របស់​អង្គការ​សន្តិសុខ​និង​សហប្រតិបត្តិការ​អឺរ៉ុប និង​អង្គការ​អន្តរជាតិ​ផ្សេងៗ​ប្រមាណ​ជាង​១ពាន់នាក់ បាន​ចុះទៅ​បំពេញ​ការងារ​នៅ​អ៊ុយក្រែន។

ការបោះឆ្នោតនេះ បាន​ផ្តល់​ជោគជ័យអោយ​ដល់​មហាសេដ្ឋី ប៉េត្រូ ប៉ូរ៉ូឆិនកូ ជាមួយ​សម្លេងឆ្នោត​៥៤ភាគរយ។ ប្រធានាធិបតី​ប៉ូរ៉ូឆិនកូ សង្ឃឹម​ថា អាច​នឹង​ជួប​ប្រធានាធិបតី​រុស្ស៊ី​ពូទីន នៅ​ខែ​មិថុនា​ខាងមុខ​នេះ។ ប៉ុន្តែ​ រដ្ឋមន្ត្រីការបរទេស​រុស្ស៊ី ស៊ែរហ្កី ឡាវ្រ៉ូវ បាន​ប្រាប់ថា ទស្សនកិច្ច​របស់​លោក​ប៉ូរ៉ូឆិនកូ​នៅ​រុស្ស៊ី មិន​បានត្រូវ​ផ្នែកការទូត​ណាមួយ​លើក​យក​មក​ពិភាក្សា​​ទេ។

​ដោយឡែក ​នាយករដ្ឋមន្ត្រី​អ៊ុយក្រែន អាសេ អ៊ីយ៉ាតសេនីយុក បាន​បដិសេធ​​​​​មិន​ព្រមចរចា​​ជាមួយ​រុស្ស៊ី​ទល់មុខគ្នា​តែ​២ភាគី​ទេ ប្រសិន​បើ​គ្មាន​អ្នកអន្តរការី​​ប្រទេស​លោក​ខាងលិច​ចូល​រួម។ រដ្ឋាភិបាល​អ៊ុយក្រែន​បាន​សំដែង​ការខកចិត្ត​ចំពោះ​ផែនការ​​ដោះស្រាយ​ជម្លោះ​ឧស្ម័ន​ជាមួយ​រុស្ស៊ី ដែល​​សហភាព​អឺរ៉ុបបាន​ស្នើដល់​អ៊ុយក្រែន​និង​រុស្ស៊ី។ ផែនការ​នេះ ​តម្រូវ​អោយ​អ៊ុយក្រែន​សងថ្លៃ​ឧស្ម័ន​២ពាន់លាន​ដុល្លារទៅក្រុមហ៊ុន​ឧស្ម័ន​ហ្កាសព្រូម​រុស្ស៊ី​សម្រាប់ថ្លៃ​​ជំពាក់​តាំង​ពី​ខែ​វិច្ឆិកា​ឆ្នាំ២០១៣។ ប្រសិន​រុស្ស៊ី​និង​អ៊ុយក្រែន​យល់ព្រម នៅថ្ងៃ​​សុក្រ​នេះ នឹង​មាន​ការចរចា​ទាក់ទង​ការផ្គត់ផ្គង់​ឧស្ម័ន​នៅ​ពេល​អនាគត។ ប៉ុន្តែ​មុន​នឹង​សង​បំណុល​រុស្ស៊ី ​អ៊ុយក្រែន​ទាមទារ​អោយ​​មាន​ការធានា​បញ្ចុះ​ថ្លៃ​ឧស្ម័ន​​ដែល​​​​លក់អោយ​អ៊ុយក្រែន​ជាមុន​សិន៕     

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI