កម្ពុជា

តុលាការ​សាលា​ឧទ្ធរណ៍​បើក​សវនាការ​ករណី​លោក ឈូក បណ្ឌិត នៅ​រសៀល​ថ្ងៃ​ទី​៣១​តុលា​

លោក ឈូក បណ្ឌិត អតីត​អភិបាល​ក្រុង​បាវិត
លោក ឈូក បណ្ឌិត អតីត​អភិបាល​ក្រុង​បាវិត RFI-ចាន់ណា

សំណុំ​រឿង​ក្តី អតីត​អភិបាល​ក្រុង​បាវិត លោក ឈូក បណ្ឌិត បាញ់​ស្ត្រី​កម្មករ​កាត់ដេរ ៣​នាក់ ឲ្យ​រង​របួស​ធ្ងន់​ស្ទើរ​តែ​ស្លាប់ នឹង​ត្រូវ​តុលាការ​សាលា​ឧទ្ធរណ៍​បើក​សវនាការ​ជំនុំ​ជម្រះ​ឡើង​វិញ នា​រសៀល​ម៉ោង ២ ថ្ងៃ​ព្រហស្បតិ៍ ទី​៣១ ខែ​តុលា។ ក្រុម​មេធាវី​របស់​លោក ឈូក បណ្ឌិត បាន​ប្តឹង​ប្រឆាំង​នឹង​ការ​សម្រេច​របស់​តុលាការ​ខេត្ត​ស្វាយរៀង ដែល​បាន​ផ្តន្ទាទោស​កំបាំង​មុខ ដាក់​ពន្ធនាគារ ១​ឆ្នាំ​កន្លះ លើ​លោក ឈូក បណ្ឌិត ពី​បទ​បង្ក​របួស​ស្នាម​ដោយ​អចេតនា។ ​ចំណែក​ក្រុម​ជន​រងគ្រោះ បាន​ប្តឹង​តវ៉ា ប្រឆាំង​នឹង​ការ​ផ្តល់​សំណង។

ផ្សាយពាណិជ្ជកម្ម

សវនាការ នៅ​តុលាការ​សាលា​ឧទ្ធរណ៍ នា​រសៀល​ម៉ោង ២ រសៀល​ថ្ងៃ​ទី​៣១​តុលា លើ​សំណុំ​រឿង​ក្តី​លោក ឈូក បណ្ឌិត នឹង​ត្រូវ​ធ្វើ​ឡើង​ជា​សាធារណៈ បើក​ឲ្យ​មហាជន​ចូលរួម​តាមដាន។ ក្រុម​ស្ត្រី​កម្មករ ៣​នាក់ រង​គ្រោះ ក្នុង​អំពើ​បាញ់​ប្រហារ បង្ក​ឡើង​ដោយ​អតីត​អភិបាល​ក្រុង បាវិត លោក ឈូក បណ្ឌិត នឹង​ចូលរួម​ក្នុង​សវនាការ។ ចំណែក​លោក ឈូក បណ្ឌិត បាត់​ដំណឹង​សូន្យ​ឈឹង មិន​ដឹង​ស្លាប់​ឬ​រស់ ខណៈ​ដែល​ប៉ូលិស​តាម​រក​មិន​ឃើញ។

លោក ជិន លី​ដា មេធាវី​ការពារ​ក្រុម​ស្ត្រី​រង​គ្រោះ បាន​ឲ្យ​ដឹង​ថា មេធាវី​និង​ជន​រង​គ្រោះ​បាន​ទទួល​​ដីកា កាល​ពី​សប្តាហ៍​មុន ពី​តុលាការ​សាលា​ឧទ្ធរណ៍ ឲ្យ​ចូលរួម​សវនាការ នា​រសៀល​ថ្ងៃ​ទី​៣១​តុលា។

តាម​លោក​មេធាវី សំណុំ​រឿង​ក្តី​លោក ឈូក បណ្ឌិត បាញ់​ស្ត្រី​កម្មករ ត្រូវ​បាន​ប្តឹង​ជំទាស់ ដោយ​ខាង​លោក​ឈូក ​បណ្ឌិត ដែល​មិន​សុខ​ចិត្ត​នឹង​ការ​សម្រេច​ផ្តន្ទាទោស​កំបាំង​មុខ ដាក់​ពន្ធនាគារ​លើ​លោក​ឈូក បណ្ឌិត ១ ឆ្នាំ​កន្លះ។ រីឯ​ប៉ូលិស​ម្នាក់​ទៀត លោក ស ចាន់​ថា ក៏​មិន​សុខ​ចិត្ត​នឹង​ការ​សម្រេច​ក្តី​របស់​តុលាការ ដែល​ផ្តន្ទាទោស​រូប​លោក ដាក់​ពន្ធនាគារ ៦ខែ ក្នុង​រឿង​កាន់​កាប់​អាវុធ​ខុស​ច្បាប់។ ចំណែក​ក្រុម​ស្ត្រី​កម្មករ​រងគ្រោះ ៣ នាក់ ក៏​បាន​ប្តឹង​ជំទាស់​នឹង​ការ​សម្រេច​របស់​តុលាការ​ខេត្ត​ស្វាយរៀង ដែល​តម្រូវ​ឲ្យ​លោក ឈូក បណ្ឌិត បង់​ប្រាក់​សង​ជំងឺ​ចិត្ត​តិច​តួច ដល់​កម្មករ​ទាំង​បី ត្រឹម​តែ​ពី ៨លាន​រៀល ទៅ​២០លាន​រៀល ខណៈ​ដែល​ក្រុម​ស្ត្រី​កម្មករ​រងគ្រោះ ទាមទារ​​ប្រាក់​សំណង រហូត​ដល់​ពី ៤​០​០០០​ដុល្លារ ទៅ ៤៥០០០ ដុល្លារ។

ក្នុង​ដីកា​សម្រេច កាលពី​ថ្ងៃទី២៥ ខែមិថុនា ឆ្នាំ២០១៣ ចៅ​ក្រម​តុលាការ​ខេត្ត​ស្វាយរៀង បាន​ចេញ​ដីកា បញ្ជា​ឲ្យ​ប៉ូលិស​តាម​ចាប់​ខ្លួន​លោក ឈូក បណ្ឌិត យក​មក​ដាក់​ពន្ធនាគា​រ ពី​បទ​បាញ់​ឲ្យ​របួស​ស្ត្រី​កម្មករ​កាត់ដេរ ៣នាក់ ឲ្យ​រងរបួស​ធ្ងន់ ក្នុង​ព្រឹត្តិការណ៍​តវ៉ា កាលពី​ថ្ងៃទី២០ ខែកុម្ភៈ ឆ្នាំ២០១២។

សកម្មជន​សិទ្ធិមនុស្ស លោក មឿ​ន តុលា បាន​បញ្ជាក់ថា ការសម្រេច​ផ្តន្ទាទោស លើ​លោក ឈូក បណ្ឌិត ត្រឹមតែ ១ឆ្នាំកន្លះ គឺ​ស្រាល​ពេក ព្រោះ​លោក​ឈូក បណ្ឌិត បាន​ដក​កាំភ្លើង​បាញ់​កម្មករ មិនមែនជា​រឿង​អ​ចេតនា​ទេ។ មួយទៀត​ ទោះជា​លោក ឈូក បណ្ឌិត ប្តឹង​ឧទ្ធរណ៍ ក៏​មិនអាច​លុបចោល​ដីកា​តាម​ចាប់ខ្លួន លោក ឈូក បណ្ឌិត យកមក​ដាក់ពន្ធនាគា​រ​ទេ។

យ៉ាងណាក៏ដោយ សកម្មជន​សិទ្ធិមនុស្ស និង​ជនរងគ្រោះ រង់​ចាំមើល​តុលាការ​ឧទ្ធរណ៍​កាត់ក្តី​លើ​ករណី​លោក ឈូក បណ្ឌិត នៅ​ថ្ងៃទី៣១តុលា ដើម្បី​ឆ្លើយតប​ទៅនឹង​ការប្រកាស​របស់​រដ្ឋាភិបាល​អាណត្តិ​ថ្មី ចំពោះ​ការកែទម្រង់​ស៊ីជម្រៅ លើ​ប្រព័ន្ធ​ច្បាប់ និង​តុលាការ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI