អានតួអត្ថបទ
ទស្សនៈព្រឹត្តិការណ៍ខ្មែរ

ការ​លើក​ស្ទួយ​អ្នក​ចេះ​ដឹង​និង​អ្នក​ពូកែ​ជា​គន្លឹះ​កសាង​ធន​ធាន​មនុស្ស

សំឡេង ០៥:០២
កម្មវិធី​ស្វាគមន៍​កីឡា​ការិនីស៊ន​ សៀវម៉ី​ ម្ចាស់​មេដៃមាស​តៃ​ក្វាន់​ដូ​ កាល​ពី​យប់​ថ្ងៃ​ទី​០៥​ តុលា។​
កម្មវិធី​ស្វាគមន៍​កីឡា​ការិនីស៊ន​ សៀវម៉ី​ ម្ចាស់​មេដៃមាស​តៃ​ក្វាន់​ដូ​ កាល​ពី​យប់​ថ្ងៃ​ទី​០៥​ តុលា។​ RFI/ Siv Channa
ដោយ៖ ប៉ែន បូណា
២៧ នាទី

បន្ទាប់​ពី​សិស្ស​ប្រឡង​ជាប់​និទ្ទេស​ ​A ​ដែល​បាន​ទទួល​ការ​លើក​ស្ទួយ​ជា​ពិសេស​ពី​គ្រប់​មជ្ឈដ្ឋាន​ឥឡូវ​នេះ ​កីឡាការិនី​ដ៏​ឆ្នើម​ម្នាក់​ទៀត​គឺ​កញ្ញា ​ស៊ន សៀវម៉ី​ ដែល​ទទួល​បាន​មេដាយមាស​នៅ​កីឡា​អាស៊ី​ក៏​ត្រូវ​បាន​លើក​ស្ទួយ​ជា​ពិសេស​ដែរ​ចាប់​តាំង​ពី​សាធារណជន​ទូទៅ ​គណបក្ស​នយោបាយ​រហូត​ដល់​នាយក​រដ្ឋមន្ត្រី។ ​ព្រឹត្តិការណ៍​នេះ​គឺ​ជា​ការ​ទឹក​ចិត្ត​ដល់​អ្នក​ពូកែ​ផង​ និង​ក៏​ជា​កត្តា​ជំរុញ​ឲ្យ​មនុស្ស​ខ្មែរ​ខិត​ខំ​ដើម្បី​ក្លាយ​ខ្លួន​ជា​អ្នក​ពូកែ​កាន់​តែ​ច្រើន​ផង​ដែរ។​ នេះ​គឺ​ជា​ជំហាន​ដ៏​ល្អ​ក្នុង​ការ​ពង្រឹង​គុណភាព​ធនធាន​មនុស្ស​នៅ​កម្ពុជា។

ផ្សាយពាណិជ្ជកម្ម

អ្នកចេះដឹង​ឬ​មនុស្ស​ដែល​ពូកែ​លេចធ្លោ​ជាងគេ​ត្រូវបាន​គេ​ចាត់ទុកថា​ជា​ធនធានមនុស្ស​ដ៏​មានតម្លៃ​សម្រាប់​ប្រទេសជាតិ។ ហេតុដូច្នេះ​ហើយ​បានជា​ក្រុមមនុស្ស​ដែលពូកែៗតែង​ត្រូវ​បាន​គេ​លើកស្ទួយ​យ៉ាង​ពិសេស។ ការលើកស្ទួយ​អ្នកចេះដឹង​នេះហើយ​ដែលជា​គន្លឹះ​ក្នុងការ​អភិវឌ្ឍ​ធនធានមនុស្ស​ពីព្រោះ​មធ្យោបាយ​នេះ​បានធ្វើ​ឲ្យ​មនុស្ស​ខិតខំ​ដើម្បី​ក្លាយជា​អ្នក​ពូកែ​ទើប​ទទួលបាន​កិត្តិយស​និង​ការ​ស្ញប់ស្ញែង​ពី​សង្គម។

ប៉ុន្តែ ជា​អ​កុស នៅ​កម្ពុជា ភ្លើងសង្គ្រាម​ជាច្រើន​ទសវត្សរ៍​មិន​ត្រឹមតែ​ធ្វើ​ឲ្យ​រាំងស្ទះ​ដល់​ការ​បណ្តុះបណ្តាល​ធនធាន​មនុស្ស​ប៉ុណ្ណោះ​ទេ តែ​ពេលខ្លះ​អ្នកចេះដឹង​បែរជា​ត្រូវបាន​គេ​ចាត់​ទុក​ជា​សត្រូវ​ទៀតផង។ ជាក់ស្តែង ការកាប់សម្លាប់​បញ្ញវន្ត​ដែលជា​ធនធាន​មានតម្លៃ​សម្រាប់​ប្រទេសជាតិ​ក្នុង​របប​ខ្មែរក្រហម​គឺជា​ឧទាហរណ៍​ស្រាប់។ ក្រោយពី​របប​ខ្មែរក្រហម ការ​បណ្តុះ​បណ្តាល​ធនធាន​មនុស្ស​បានចាប់ផ្តើម​ឡើង​វិញ​ពី​ចំណុចសូន្យ...។

រហូតមកទល់​បច្ចុប្បន្ន បើទោះបីជា​ប្រទេសជាតិ​មាន​សន្តិភាព​និង​បាន​ស្គាល់​ការអភិវឌ្ឍ​ខុសប្លែក​ពីមុន​ក៏ដោយ ក៏​ស្ថានភាព​នៅតែ​មិនទាន់​អំណោយផល​ដល់​ការអភិវឌ្ឍ​ធន​ធាន​មនុស្ស​នៅឡើយ​ទេ។ ការប្រើប្រាស់​ធនធានមនុស្ស​នៅតែ​ផ្អែក​សំខាន់​ទៅលើ​សកម្មភាព​ន​យោ​បាយ​និង​បក្សពួកនិយម​ជាធំ។ មនុស្សពូកែៗជាច្រើន​ដែល​មិន​ចំណុះ​អ្នកនយោបាយ​មិនត្រូវ​បាន​គេ​លើកស្ទួយ​ទេ។ ទម្លាប់​នេះ​បាន​ជំរុញ​ឲ្យ​មនុស្ស​មនុស្ស​ពូកែ​ជាច្រើន​បាក់​ទឹក​ចិត្ត​និង​បានធ្វើ​ឲ្យ​មនុស្ស​ជាច្រើន​ងាក​ទៅ​ពឹង​លើ​ការតស៊ូ​នយោបាយ​ដើម្បី​ទទួលបាន​មុខ​តំណែង​បុណ្យស័ក្តិ​ជាជាង​ពឹង​លើ​ចំណេះវិជ្ជា។

ប៉ុន្តែ ដល់ពេល​ហើយ​ដែល​ខ្មែរ​ត្រូវ​ចាប់ផ្តើម​រៀបចំ​ប្រទេសជាតិ​របស់ខ្លួន​ឡើងវិញ​ដោយ​ពឹង​ផ្អែក​ជាសំខាន់​ទៅលើ​ធនធានមនុស្ស​ដែល​ពូកែ​ពិតប្រាកដ។ កំណែទម្រង់​ប្រព័ន្ធ​អប់រំ​ដូច​ដែល​បាននិងកំពុង​ធ្វើ​នេះ​គឺជា​ការចាប់ផ្តើម​ដ៏​ល្អ​មួយ។ និយាយ​ពី​គុណភាព​ធនធានមនុស្ស គេ​ត្រូវ​លើកស្ទួយ​អ្នកចេះដឹង​ជា​ចាំបាច់។ ការលើកស្ទួយ​យ៉ាង​ពិសេស​ដល់​សិស្ស​ពូកែ​ដែល​ប្រឡង​បាន​និទ្ទេស A និង​ការផ្តល់​កិត្តិយស​ដល់​កីឡាការិនី​ឆ្នើម​នៅពេលនេះ​គឺជា​សញ្ញា​វិជ្ជមាន​មួយ។ វិជ្ជមាន​នៅត្រង់ថា វា​មិន​គ្រាន់តែ​លើកទឹកចិត្ត​ដល់​អ្នក​ពូកែ​ប៉ុណ្ណោះ​ទេ តែ​វា​ក៏​ជា​កត្តា​ជំរុញ​ឲ្យ​អ្នក​ដទៃទៀត​ស្រមៃ​ចង់​ក្លាយជា​សិស្ស​ពូកែ​ផងដែរ។

គេ​នៅ​ចាំបាន​ថា កាលពី​ក្នុងសម័យ​សង្គមរាស្ត្រនិយម គ្រូបង្រៀន​មានតម្លៃ​ខ្លាំងណាស់​នៅ​ក្នុង​សង្គម។ ប្រាក់ខែ​គ្រូបង្រៀន​អាច​ចិញ្ចឹម​មនុស្ស​មួយ​គ្រួសារ​ដោយ​មិន​លំបាក។ កាល​ណោះ អ្នកណាៗក៏​ប្រាថ្នា​និង​ស្រមៃ​ចង់​ធ្វើជា​គ្រូបង្រៀន​ដែរ។ ខណៈដែល​គ្រូ​មានតម្លៃ​បែប​នេះ ប្រាកដ​ណាស់​ថា​មនុស្ស​ដែលពូកែៗនាំគ្នា​បាញ់​ឆ្ពោះទៅរក​អាជីព​ជា​គ្រូបង្រៀន។ នៅពេលដែល​មជ្ឈដ្ឋាន​គ្រូបង្រៀន​ប្រមូលផ្តុំ​ដោយ​ធនធានមនុស្ស​ពូកែ ពួកគេ​អាច​បណ្តុះ​ធនធានមនុស្ស​ជំនាន់​ក្រោយ​រឹតតែ​ពូកែ​ថែមទៀត។

នៅក្នុង​វិ​ស​ដ័យ​កីឡា​និង​វិស័យ​ផ្សេងទៀត​ក៏​ដូចគ្នា​ដែរ ការលើកស្ទួយ​អ្នក​ពូកែ​ពិតប្រាកដ​គឺជា​មធ្យោបាយ​ដ៏​មាន​ប្រសិទ្ធភាព​ក្នុងការ​ជំរុញ​ឲ្យ​មនុស្ស​ខិតខំ​បញ្ចេញ​សមត្ថភាព​ដើម្បី​ក្លាយខ្លួនជា​អ្នក​ពូកែ។ ប៉ុន្តែ ការលើកស្ទួយ​មនុស្ស​ពូកែ​ម្នាក់​ពីរ​នាក់​នៅ​មិនទាន់​គ្រប់គ្រាន់​ទេ។ ដើម្បី​ឲ្យ​កម្ពុជា​សម្បូរ​មនុស្ស​ពូកែ មាន​កិច្ចការ​ជាច្រើន​ទៀត​ដែល​ត្រូវធ្វើ​ទន្ទឹមគ្នា។  នៅក្នុង​វិស័យ​អប់រំ ការលើកទឹកចិត្ត​អ្នក​ពូកែ​ត្រូវ​ចាប់​ផ្ត​ម​តាំងពី​ថ្នាក់​បឋម​រហូតដល់​ថ្នាក់​បញ្ចប់​ការសិក្សា​ជាន់ខ្ពស់។ អ្នក​ដែល​ទទួល​ការលើកស្ទួយ​មុនគេ​គឺ​អ្នក​បណ្តុះបណ្តាល​ធនធាន​មនុស្ស​នេះឯង។​

នៅក្នុង​វិស័យ​កីឡា ការ​បង្វឹក​ក៏ត្រូវ​តែ​ចាប់ផ្តើម​ពី​កុមារតូចៗដែរ ហើយ​ត្រូវ​បង្វឹក​ទៅតាម​បច្ចេកទេស​ពិតប្រាកដ​ដោយ​មិន​ឲ្យ​កីឡាករ​គិតគូរ​ច្រើនពេក​អំពី​បញ្ហា​ជីវភាព​ទេ។ ក្រៅពីនោះ ការលើកទឹកចិត្ត​អ្នកចេះដឹង​និង​អ្នក​ពូកែ​ក្នុង​ពិភព​ការងារ​និង​ក្នុង​នយោបាយ​ក៏​សំខាន់​ដែរ​ពីព្រោះ​អ្នក​ទាំងនោះ​ហើយ​ដែល​អាច​ធ្វើជា​គំរូ​យ៉ាង​ល្អ​សម្រាប់​មនុស្ស​ក្នុងសង្គម​ជាពិសេស​គំរូ​ដល់​អ្នក​រៀនសូត្រ។

សូម​កុំភ្លេចថា នៅ​កម្ពុជា ក្រៅពី​កង្វះ​ធនធានមនុស្ស​ក៏​នៅមាន​បញ្ហា​ប្រើប្រាស់​ធនធាន​មនុស្ស​​មិនត្រូវ​ថែមទៀត។ ការប្រកាន់​បក្សពួក ការបែកបាក់​ចូលគ្នា​មិន​ចុះ​ដោយសារ​ពណ៌​សម្បុរ​នយោបាយ និង​កង្វះ​ការលើកទឹកចិត្ត​ដល់​អ្នកចេះដឹង​ឲ្យ​បាន​ពិតប្រាកដ។ល។
សុទ្ធសឹង​ជា​ឧបសគ្គធំៗក្នុងការ​អភិវឌ្ឍ​ប្រទេស។ ដូច្នេះ ការលើកស្ទួយ​អ្នកចេះដឹង​នឹងធ្វើ​ឲ្យ​កម្ពុ​ជាមាន​ធនធានមនុស្ស​ពូកែ​ពិតប្រាកដ​កាន់តែច្រើន​ដែល​អាច​ជំរុញ​សន្ទុះ​ការអភិវឌ្ឍ​ប្រទេស​បាន​លឿន​ជាង​នេះ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ