រុស្ស៊ី

ការ​លាចេញ​ពី​តំណែង​រដ្ឋាភិបាល​នឹង​ប្រព្រឹត្ត​ទៅ ខាន​មិន​បាន

លោក​នាយក​រដ្ឋមន្ត្រីរុស្ស៊ី មេដវេដេវ
លោក​នាយក​រដ្ឋមន្ត្រីរុស្ស៊ី មេដវេដេវ REUTERS/Dmitry Astakhov/RIA Novosti

សេចក្តីនេះ ថ្លែង​យប់​មិញ ដោយ​លោក​នាយក​រដ្ឋមន្ត្រី​រុស្ស៊ី មេដវេដេវ ក្នុង​បទសម្ភាសន៍​ផ្សាយ​តាម​កាណាល់ទូរទស្សន៍​សហព័ន្ធ NTV តប​នឹង​ពាក្យ​ចចាមអារ៉ាម​ដែល​ចេះ​តែ​លេចឮ នា​ពេល​ចុង​ក្រោយ។ បទសម្ភាសន៍​នេះ​ត្រូវ​បាន​លោក​មេដវេដេវ​ធ្វើ​ឧទ្ទិស​ដល់​ខួបគម្រប់មួយឆ្នាំ តាំង​ពី​គាត់​ទទួល​តួនាទី​ជា​ប្រមុខ​រដ្ឋាភិបាល បន្ទាប់​ពី​កាន់តំណែងកំពូល ជា​ប្រធានាធិបតី​បាន​មួយអាណត្តិ។

ផ្សាយពាណិជ្ជកម្ម

សេចក្តីថ្លែងការណ៍​លោក​នាយក​រដ្ឋមន្ត្រី​មេដវេដេវ​ដែល​ថា “រដ្ឋាភិបាល​គាត់​គង់​នឹង​ចុះចេញ​ពី​តំណែង” ក្លាយ​ជា​ចំណងជើង​គ្មាន​រំលង​ទេ​នៃ​កាសែតរុស្ស៊ី​លេខ​ថ្ងៃ​នេះ។ លោក​មេដវេដេវ​ពន្យល់​បំភ្លឺ​ថា លេស​សម្រាប់​លេច​ចេញ​មក ជា​ពាក្យ​ចចាមអារ៉ាម​តែង​មាន​ជានិច្ច។ ការ​លា​ចេញ​ពី​តំណែង​នៃ​រដ្ឋាភិបាល​ខ្ញុំ​នឹង​ប្រព្រឹត្ត​ទៅ​ខាន​មិន​បាន ដោយ​គ្មាន​អ្វី​គួរ​ឲ្យ​សង្ស័យ ប៉ុន្តែ​សំនួរ​ដែល​ចោទ តើ​អង្កាល់​ណា ដែល​ការលាចេញ​នេះ​នឹង​ប្រព្រឹត្ត​ទៅ ?

តាម​យោបល់​លោក​មេដវេដេវ សំនួរនេះ​តែង​ស្ថិត​នៅ​ក្នុង​ការ​យក​ចិត្តទុកដាក់​របស់​ពួក​អ្នក​នយោបាយ និង​ពួក​នយោបាយវិទូ ដរាប​ណា​ដែល​រដ្ឋាភិបាល និង​ប្រមុខរដ្ឋ​នៅ​ជា​សមាសភាគ​ប្លែក​ខុស​ពី​គ្នា ដែល​ផ្សំ​ឡើង ជា​រដ្ឋអំណាច។ ត្រង់ចំណុចនេះ លោក​មេដវេដេវ​គូសបញ្ជាក់​ថា ប្រធានាធិបតី គឺ​ជា​អ្នកធានា​ឲ្យ​មាន​ការគោរព​តាម​រដ្ឋធម្មនុញ្ញ ចំណែក​រដ្ឋាភិបាល​គឺ​ជា អំណាចនីតិប្រតិបត្តិ​កំពូល។

ព្រម​ជាមួយ​នេះ លោក​ប្រមុខរដ្ឋាភិបាល​កត់សម្គាល់​ថា ពាក្យ​ចចាមអារ៉ាម​នោះ​មិន​រំខាន​ឡើយ ដល់​ការងារ​របស់​គាត់។ ក៏ប៉ុន្តែ សម្រាប់​ពួក​រដ្ឋមន្ត្រី​របស់​គាត់​វិញ ស្ថានភាព​គឺ​ស្មុគស្មាញ​ជាង ដ្បិត​គេ​ទាំងនោះ​ភាគច្រើន នៅ​មិនទាន់​ជា​យុទ្ធជន​លត់ដំ ដូច​រូបគាត់​ឡើយ។ ម៉្លោះហើយ​បាន​ជា​លោក​មេដវេដេវ​ព្រមាន​ថា រាល់​តែ​រដ្ឋមន្ត្រី​ក្នុង​រដ្ឋាភិបាល​គាត់ យូរ ឬ​ឆាប់ គង់​នឹង​ធ្លាក់​ពី​តំណែង​ខ្លួន​ពុំ​ខាន។

តាម​ការវិភាគ​នៃ​ពួក​នយោបាយវិទូ មូលហេតុ​ដែល​បាន​ញ៉ាំង​ឲ្យ​មាន​លេច​ចេញ​មក ជា​ពាក្យ​ចចាមអារ៉ាម​អំពី​វាសនា​រដ្ឋាភិបាល​លោកមេដវេដេវ គឺ​មក​ពី​រដ្ឋាភិបាល​នេះ​ចុះ​ទន់ខ្សោយ​ទៅ ក្រោយ​ពី​មនុស្ស​ដៃស្តាំ និង​ជា​អ្នកជំនិត​របស់​គាត់ គឺ​លោក Vladislav Sourkov កាល​ពី​ថ្ងៃ៨ ឧសភា​កន្លង​ទៅ បាន​លា​ចេញ​ពី​តំណែង​ជា​នាយខុទ្ទកាល័យ​គណៈរដ្ឋមន្ត្រី និង​ជា​ឧបនាយក​រដ្ឋមន្ត្រី​ទទួល​រ៉ាប់រង​ខាង​បំពេញ​តាម​ក្រឹត្យ​ចំនួន ១១ ស្តីអំពី​វិស័យ​សង្គមកិច្ច ចេញ​ភ្លាមភ្លែត​ដោយ​លោក​ពូទីន កាល​ពី​មួយឆ្នាំមុន បន្ទាប់​ពី​គាត់​ចូល​កាន់​តំណែង​ប្រធានាធិបតី​ឡើង​វិញ។

នៅ​ទីបញ្ចប់ តប​នឹង​សំនួរ​ទាក់ទង​នឹង​ផែនការ​ទៅ​អនាគត​របស់​គាត់ ក្នុង​ករណី​បើ​គាត់​ស្រាប់​តែ​ត្រូវ​បង្ខំចិត្ត​ចុះ​ចេញ​ពី​តំណែង​ប្រមុខ​រដ្ឋាភិបាល​មែន លោក​មេដវេដេវ​ថ្លែង​ថា ការ​លា​ចេញ​ពី​តំណែង មិនមែន​មាន​ន័យ​ថា ជា​ទីអវសាន​នៃ​អាជីព​របស់​គាត់​ឡើយ ដ្បិត​ឥឡូវ ខុស​ពី​ជំនាន់​សូវៀត ប្រទេស​រុស្ស៊ី​សម័យថ្មី​មាន​ប្រព័ន្ធ​នយោបាយ​ទំនើបទាន់សម័យ កាល​ដែល​ពួក​មន្ត្រី​អាច​ត្រូវ​ទទួល​ឲ្យ​ចូលធ្វើការ ហើយ​បន្ទាប់​មក ក៏​អាច​ចាក​ចេញ​ពី​តំណែងខ្លួន​ទៅ​ដែរ នេះ​ជា​រឿង​ធម្មតា៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI